ଏହି ଶିଳ୍ପ ଗୁଡିକ ରାଜ୍ୟର ୧୪ଟି ଜିଲ୍ଲାରେ- ଅନୁଗୋଳ, ବରଗଡ, ବାଲେଶ୍ୱର, ବୌଦ୍ଧ, କଟକ, ଢେଙ୍କାନାଳ, ଯାଜପୁର, ଜଗତସିଂହପୁର, କେନ୍ଦୁଝର, ଖୋର୍ଦ୍ଧା, ମୟୂରଭଞ୍ଜ, ପୁରୀ, ସମ୍ବଲପୁର ଓ ସୁନ୍ଦରଗଡ଼ରେ ସ୍ଥାପିତ ହେବ। ଏହାଦ୍ୱାରା ୪୨,୫୧୨ଟି ନିଯୁକ୍ତି ସୃଷ୍ଟି ହେବ ବୋଲି ଆଶା ରଖାଯାଇଛି।

ଏହି ଅବସରରେ ଉଦ୍‌ବୋଧନ ଦେଇ ମୁଖ୍ୟମନ୍ତ୍ରୀ କହିଛନ୍ତି, ଆଜି ଠାରୁ ରାଜ୍ୟର ଦ୍ୱିତୀୟ ଶିଳ୍ପ ବିପ୍ଲବର ଏକ ସ୍ୱର୍ଣ୍ଣିମ ଅଧ୍ୟାୟ ଆରମ୍ଭ ହୋଇଛି। ରାଜ୍ୟରେ ବିଜେପି ସରକାର ଆସିବା ପୂର୍ବରୁ ଶିଳ୍ପ ନିବେଶ କେବଳ ଏକ ସ୍ଲୋଗାନ ଏବଂ ପ୍ରଚାର ପ୍ରସାରର ମାଧ୍ୟମ ହୋଇ ରହିଥିଲା। କିନ୍ତୁ ଆମେ ପ୍ରତିଟି ବୁଝାମଣାପତ୍ରକୁ ବାସ୍ତବ ରୂପ ଦେଇ କାରଖାନା ନିର୍ମାଣ କରି ଉତ୍ପାଦନ ଆରମ୍ଭ କରିଛୁ ଏବଂ ଆମର ଓଡ଼ିଆ ପୁଅ-ଝିଅମାନଙ୍କୁ ନିଯୁକ୍ତି ଦେବାରେ ସମର୍ଥ ହୋଇଛୁ।

ସେ ଆହୁରି ମଧ୍ୟ କହିଛନ୍ତି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଜୀଙ୍କ ‘ପୂର୍ବୋଦୟ’ ପରିକଳ୍ପନାର କେନ୍ଦ୍ରରେ ରହିଛି ଓଡ଼ିଶା। ଆଗାମୀ ଦଶ ବର୍ଷ ଭିତରେ ରାଜ୍ୟର ଅର୍ଥନୀତିକୁ ୫୦୦ ବିଲିୟନ ଆମେରିକୀୟ ଡଲାରରେ ପହଞ୍ଚାଇବା ପାଇଁ ଆମେ ‘ସମୃଦ୍ଧ ଓଡ଼ିଶା’ ଗଠନର ଲକ୍ଷ୍ୟ ରଖିଛୁ।

ମୁଖ୍ୟମନ୍ତ୍ରୀ ସ୍ପଷ୍ଟ କରିଛନ୍ତି ଯେ ଶିଳ୍ପ କେବଳ କିଛି ନିର୍ଦ୍ଦିଷ୍ଟ ଜିଲ୍ଲାରେ ସୀମିତ ନ ରହି ରାଜ୍ୟର ପ୍ରାୟ ସବୁ ଅଞ୍ଚଳରେ ସ୍ଥାପିତ ହେବା ଉଚିତ। ଏହି ନୀତିକୁ ଆଧାର କରି କେନ୍ଦୁଝର ଓ ସୁନ୍ଦରଗଡ଼ରେ ଇସ୍ପାତ ଶିଳ୍ପ, ଅନୁଗୋଳ ଓ ଢେଙ୍କାନାଳରେ ଅକ୍ଷୟ ଶକ୍ତି ପ୍ରକଳ୍ପ, ଖୋର୍ଦ୍ଧାରେ ଖାଦ୍ୟ ପ୍ରକ୍ରିୟାକରଣ ଏବଂ ପୁରୀ, କଟକ, ବରଗଡ଼, ବାଲେଶ୍ୱର ଓ ମୟୂରଭଞ୍ଜ ଆଦି ଜିଲ୍ଲାରେ ବିଭିନ୍ନ ପର୍ଯ୍ୟଟନ, ହସ୍ପିଟାଲିଟି ଓ ଅନ୍ୟାନ୍ୟ ଶିଳ୍ପ ପ୍ରକଳ୍ପଗୁଡ଼ିକୁ ସ୍ଥାନ ଦିଆଯାଇଛି।

ଦୁଇ ବର୍ଷରୁ କମ୍ ସମୟ ମଧ୍ୟରେ ୧୫୧ଟି ପ୍ରକଳ୍ପର ଭୂମିପୂଜନ କିମ୍ବା ଉଦ୍‌ଘାଟନ କରାଯାଇ ୩ ଲକ୍ଷ ୧୧ ହଜାର କୋଟିରୁ ଅଧିକ ପୁଞ୍ଜି ନିବେଶ ହୋଇଥିବାବେଳେ ଏହାଦ୍ୱାରା ୨ ଲକ୍ଷ ୪୦ ହଜାରରୁ ଅଧିକ ଯୁବକଯୁବତୀଙ୍କ ପାଇଁ ନିଯୁକ୍ତିର ପଥ ଉନ୍ମୁକ୍ତ ହୋଇଛି। ଆଜିର ପ୍ରକଳ୍ପକୁ ମିଶାଇଲେ ରାଜ୍ୟରେ ସମୁଦାୟ ୩ ଲକ୍ଷ ୫୦ ହଜାର କୋଟିରୁ ଅଧିକ ଟଙ୍କାର ପ୍ରକଳ୍ପର ଗ୍ରାଉଣ୍ଡିଂ ବା ଶୁଭାରମ୍ଭ ହେଲା।

ସମାରୋହରେ ଅନ୍ୟମାନଙ୍କ ମଧ୍ୟରେ ସମବାୟ, ହସ୍ତତନ୍ତ, ବୟନଶିଳ୍ପ ଓ ହସ୍ତଶିଳ୍ପ ମନ୍ତ୍ରୀ ପ୍ରଦୀପ ବଳ ସାମନ୍ତ, ଶିଳ୍ପ, ଦକ୍ଷତା ବିକାଶ ଓ ବୈଷୟିକ ଶିକ୍ଷା ମନ୍ତ୍ରୀ ସମ୍ପଦ ଚନ୍ଦ୍ର ସ୍ୱାଇଁ, ଯାଜପୁର ସାଂସଦ ଡକ୍ଟର ରବୀନ୍ଦ୍ର ନାରାୟଣ ବେହେରା, କୋରେଇ ବିଧାୟକ ଆକାଶ ଦାସ ନାୟକ, ଧର୍ମଶାଳା ବିଧାୟକ ହିମାଂଶୁ ଶେଖର ସାହୁ, ବଡ଼ଚଣା ବିଧାୟକ ଅମର ନାୟକ, ମୁଖ୍ୟ ଶାସନ ସଚିବ ଅନୁ ଗର୍ଗ, ଜେଏସ୍‌ଏଲ୍ ଲିମିଟେଡର ପରିଚାଳନା ନିର୍ଦ୍ଦେଶକ ଅଭ୍ୟୁଦୟ ଜିନ୍ଦଲ, ଇମ୍ଫାର ପରିଚାଳନା ନିର୍ଦ୍ଦେଶକ ଶୁଭ୍ରକାନ୍ତ ପଣ୍ଡା ପ୍ରମୁଖ ଉପସ୍ଥିତ ଥିଲେ।

ସମାରୋହ ଆରମ୍ଭରେ ଶିଳ୍ପ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ହେମନ୍ତ କୁମାର ଶର୍ମା ସ୍ୱାଗତ ଭାଷଣ ପ୍ରଦାନ କରିଥିବା ବେଳେ ଯାଜପୁର ଜିଲ୍ଲାପାଳ ଅମ୍ବର କୁମାର କର ଧନ୍ୟବାଦ ଦେଇଥିଲେ।

The post ୪୬ଟି ଶିଳ୍ପ ପ୍ରକଳ୍ପର ଭୂମିପୂଜନ ଓ ଉଦ୍‌ଘାଟନ କଲେ ମୁଖ୍ୟମନ୍ତ୍ରୀ appeared first on Sanket Tv.

ଏହି ନିୟମ ଅକ୍ଟୋବର ୧୫ ତାରିଖରୁ ଲାଗୁ ହେବାର ଥିଲା। କିନ୍ତୁ ଆଗକୁ ଦୀପାବଳି ଥିବାରୁ ୟୁପିଆଇ ପେମେଣ୍ଟ ଉପରେ ଚାର୍ଜ ଲାଗୁ କରିବା ନିଷ୍ପତ୍ତିକୁ ସ୍ଥଗିତ ରଖିବା ପାଇଁ ବ୍ୟବସାୟୀମାନେ ଲଗାତାର ସରକାରଙ୍କୁ ଦାବି କରୁଥିଲେ।

ସୂଚନାନୁଯାୟୀ, NPCI ନିଜର ଅଫିସିଆଲ ସୋସିଆଲ ମିଡିଆ ପ୍ଲାଟଫର୍ମ ‘X’ରେ ଏହି ସୂଚନା ସେୟାର କରିଛି। ଏଥିରେ କୁହାଯାଇଛି ଯେ, ଚୟନିତ ମର୍ଚ୍ଚାଣ୍ଟ ଟ୍ରାଞ୍ଜାକ୍ସନ ଉପରେ MDR ଲାଗୁ କରିବା ନିଷ୍ପତ୍ତିକୁ ଦୀପାବଳି ପର୍ଯ୍ୟନ୍ତ ସ୍ଥଗିତ ରଖାଯାଇଛି।

ଅର୍ଥାତ, ୨,୦୦୦ ଟଙ୍କାରୁ ଅଧିକ ମୂଲ୍ୟର ୟୁପିଆଇ ପେମେଣ୍ଟ ଉପରେ ୧୫ ଅକ୍ଟୋବର ୨୦୨୬ରୁ ଯେଉଁ MDR ଲାଗୁ ହେବାର ଥିଲା, ତାହାକୁ ବର୍ତ୍ତମାନ ପାଇଁ ଦୀପାବଳି ପର୍ଯ୍ୟନ୍ତ ସ୍ଥଗିତ କରିଦିଆଯାଇଛି। ଏହି ନିଷ୍ପତ୍ତି ଯୋଗୁଁ ବ୍ୟବସାୟୀମାନଙ୍କୁ ବଡ଼ ଆଶ୍ୱାସ୍ତି ମିଳିପାରେ।

ପ୍ରସ୍ତାବିତ ବ୍ୟବସ୍ଥା ଅନୁଯାୟୀ, ୟୁପିଆଇ ମାଧ୍ୟମରେ ୨,୦୦୦ ଟଙ୍କାରୁ ଅଧିକ ପେମେଣ୍ଟ କଲେ କିଛି ମର୍ଚ୍ଚାଣ୍ଟ ଟ୍ରାଞ୍ଜାକ୍ସନ ଉପରେ ୦.୪ ପ୍ରତିଶତ ଚାର୍ଜ ଲାଗୁ କରିବାର ପ୍ରସ୍ତାବ ଥିଲା। ଅର୍ଥାତ, ଯଦି କୌଣସି ଗ୍ରାହକ ଗୋଟିଏ ଦୋକାନରୁ ୨,୦୦୦ ଟଙ୍କାରୁ ଅଧିକ ମୂଲ୍ୟର ସାମଗ୍ରୀ କିଣନ୍ତି ଏବଂ ୟୁପିଆଇ ମାଧ୍ୟମରେ ଟଙ୍କା ପେମେଣ୍ଟ କରନ୍ତି, ତେବେ ସେହି କାରବାର ଉପରେ ଚାର୍ଜ ଲାଗୁ ହୋଇଥାନ୍ତା।

କିନ୍ତୁ ଏହି ଚାର୍ଜ ଗ୍ରାହକଙ୍କୁ ନୁହେଁ, ବରଂ ଦୋକାନୀ ଅର୍ଥାତ ମର୍ଚ୍ଚାଣ୍ଟଙ୍କୁ ଦେବାକୁ ପଡ଼ିଥାନ୍ତା। ହେଲେ ଏହାକୁ ଏବେ ଦୀପାବଳି ପର୍ଯ୍ୟନ୍ତ ସ୍ଥଗିତ କରାଯାଇଛି। ଏହାର ନୂଆ ତାରିଖ ପରବର୍ତ୍ତୀ ସମୟରେ ଘୋଷଣା କରାଯିବ ବୋଲି ଜଣାପଡ଼ିଛି।

ସୂଚନାଯୋଗ୍ୟ ଯେ, ଟେଲିକମ, ବୀମା, ରେଳବାଇ ଏବଂ ଇନ୍ଧନ ଭଳି କେତେକ କ୍ଷେତ୍ରରେ ୨,୦୦୦ ଟଙ୍କାରୁ ଅଧିକ ୟୁପିଆଇ ପେମେଣ୍ଟ ଉପରେ ୫ ଟଙ୍କାର ଏକ ନିର୍ଦ୍ଧାରିତ MDR ଚାର୍ଜ ଲାଗୁ କରିବାର ପ୍ରସ୍ତାବ ମଧ୍ୟ ରହିଥିଲା। ଏହି ଚାର୍ଜ ଗ୍ରାହକଙ୍କଠାରୁ ଆଦାୟ କରାଯାଇପାରିନଥାନ୍ତା। ଏହା ମର୍ଚ୍ଚାଣ୍ଟଙ୍କୁ ହିଁ ଦେବାକୁ ପଡ଼ିଥାନ୍ତା।

The post ୟୁପିଆଇ ଏମଡିଆର ଚାର୍ଜ ଦୀପାବଳି ପର୍ଯ୍ୟନ୍ତ ସ୍ଥଗିତ appeared first on Sanket Tv.

ବୁଧବାର ଦିନ ରିଜର୍ଭ ବ୍ୟାଙ୍କର ଗଭର୍ଣ୍ଣର ସଞ୍ଜୟ ମଲହୋତ୍ରାଙ୍କ ଅଧ୍ୟକ୍ଷତାରେ ଅନୁଷ୍ଠିତ ମୁଦ୍ରା ନୀତି କମିଟି (ଏମପିସି) ବୈଠକରେ ରେପୋ ରେଟ୍କୁ ୨୫ ବେସିସ୍ ପଏଣ୍ଟ (ବିପିଏସ) ବୃଦ୍ଧି କରିବାକୁ ନିଷ୍ପତ୍ତି ନିଆଯାଇଛି।

ଆରବିଆଇର ସୂଚନା ଅନୁଯାୟୀ, ଷ୍ଟାଣ୍ଡିଂ ଡିପୋଜିଟ୍ ଫ୍ୟାସିଲିଟି (ଏସଡିଏଫ) ହାରକୁ ୫.୨୫ ପ୍ରତିଶତକୁ ସମନ୍ୱୟ କରାଯାଇଥିବା ବେଳେ ମାର୍ଜିନାଲ୍ ଷ୍ଟାଣ୍ଡିଂ ଫ୍ୟାସିଲିଟି (ଏମଏସଏଫ) ଏବଂ ବ୍ୟାଙ୍କ ହାରକୁ ୫.୭୫ ପ୍ରତିଶତକୁ ବୃଦ୍ଧି କରାଯାଇଛି।

ତିନି ଦିନ ଧରି ଚାଲିଥିବା ଏହି ଗୁରୁତ୍ୱପୂର୍ଣ୍ଣ ବୈଠକ ପରେ ଗଭର୍ଣ୍ଣର ମଲହୋତ୍ରା କହିଛନ୍ତି ଯେ ବିଶ୍ୱବ୍ୟାପୀ ମୁଦ୍ରାସ୍ଫୀତି ତୀବ୍ର ହେବାର ଆଶଙ୍କା ରହିଛି, ଯାହା ଫଳରେ ବିଶ୍ୱର ପ୍ରମୁଖ କେନ୍ଦ୍ରୀୟ ବ୍ୟାଙ୍କଗୁଡ଼ିକ କଠୋର ମୁଦ୍ରା ନୀତି ଆପଣାଇବାକୁ ବାଧ୍ୟ ହେଉଛନ୍ତି।

ଗତ କିଛି ସମୟ ଧରି କେନ୍ଦ୍ରୀୟ ବ୍ୟାଙ୍କ ରେପୋ ରେଟ୍କୁ ୫.୨୫ ପ୍ରତିଶତରେ ଅପରିବର୍ତ୍ତିତ ରଖିଥିଲା। କିନ୍ତୁ ପଶ୍ଚିମ ଏସିଆ ସଙ୍କଟ କାରଣରୁ ଅଶୋଧିତ ତୈଳ ଦର ବ୍ୟାରେଲ ପିଛା ୧୦୦ ଡଲାରରୁ ଅଧିକ ହେବା ଏବଂ ଘରୋଇ ମୁଦ୍ରାସ୍ଫୀତି ବୃଦ୍ଧି ଭଳି ଆହ୍ୱାନମୂଳକ ପରିସ୍ଥିତି ଯୋଗୁଁ ଏହି ନିଷ୍ପତ୍ତି ନିଆଯାଇଛି।

ଅଗଷ୍ଟ ମାସରେ ଖୁଚୁରା ମୁଦ୍ରାସ୍ଫୀତି (ସିପିଆଇ) ବୃଦ୍ଧି ପାଇ ୪.୮୨ ପ୍ରତିଶତରେ ପହଞ୍ଚିଥିଲା, ଯାହା ଜୁଲାଇରେ ୪.୪୫ ପ୍ରତିଶତ ଥିଲା। ଏହାବ୍ୟତୀତ ପ୍ରତିକୂଳ ଏଲ୍-ନିନୋ ପରିସ୍ଥିତି ଏବଂ ଅକ୍ଟୋବରରେ ସ୍ୱାଭାବିକଠାରୁ କମ୍ ବୃଷ୍ଟିପାତ ରବି ଫସଲ ଉତ୍ପାଦନ ଉପରେ ପ୍ରଭାବ ପକାଇବାର ଆଶଙ୍କା ରହିଛି।

ଅର୍ଥନୀତିଜ୍ଞମାନେ ଆଶା କରିଥିଲେ ଯେ ଫେବୃଆରୀ ୨୦୨୩ ପରେ ପ୍ରଥମ ଥର ପାଇଁ ରେପୋ ରେଟ୍ ବୃଦ୍ଧି ପାଇବ। ଏସବିଆଇ ରିସର୍ଚ୍ଚ (ଏସବିଆଇ ରିସର୍ଚ୍ଚ) ଅନୁଯାୟୀ, ବ୍ୟାପକ ମୁଦ୍ରାସ୍ଫୀତି, ଖରାପ ବିଶ୍ୱ ଅର୍ଥନୈତିକ ସ୍ଥିତି ଏବଂ ପରିବର୍ତ୍ତିତ ତରଳତା ପରିସ୍ଥିତିକୁ ଦୃଷ୍ଟିରେ ରଖି ୨୫ ବେସିସ୍ ପଏଣ୍ଟ ବୃଦ୍ଧି ଏକ ଆବଶ୍ୟକୀୟ ପଦକ୍ଷେପ ଥିଲା।

ବିଶେଷଜ୍ଞମାନଙ୍କ ମତରେ, ପରିସ୍ଥିତି ବିଗିଡ଼ିବା ପୂର୍ବରୁ ଆଗୁଆ ପଦକ୍ଷେପ ନେବା ଅଧିକ ବୁଦ୍ଧିମାନର କାର୍ଯ୍ୟ ଅଟେ।

The post ରେପୋ ରେଟ୍ ୨୫ ବେସିସ୍ ପଏଣ୍ଟ ବୃଦ୍ଧି କଲା ଆରବିଆଇ appeared first on Sanket Tv.

ଫଳରେ ଆସନ୍ତା ୧୫ ଅକ୍ଟୋବରରୁ ୨,୦୦୦ ଟଙ୍କାରୁ ଅଧିକ ଟଙ୍କାର ମର୍ଚ୍ଚାଣ୍ଟ (ବ୍ୟବସାୟୀ) ପେମେଣ୍ଟ ଉପରେ ୦.୪% ଚାର୍ଜ ଲାଗୁ ହେବ ।ତେବେ ଏହି ନୂଆ ନିୟମ ଲାଗୁ କରିବା ପଛର ମୁଖ୍ୟ ଆଧାର କ’ଣ ? ସେନେଇ ସୁପ୍ରିମକୋର୍ଟ କେନ୍ଦ୍ର ସରକାରଙ୍କୁ ନୋଟିସ୍ ଜାରି କରି ଜବାବ ମାଗିଛନ୍ତି ।

ପ୍ରଧାନ ବିଚାରପତି ସୂର୍ଯ୍ୟକାନ୍ତ, ଜଷ୍ଟିସ୍ ଜୟମାଲ୍ୟ ବାଗଚୀ ଏବଂ ଜଷ୍ଟିସ୍ ଭି. ମୋହନାଙ୍କୁ ନେଇ ଗଠିତ ତିନି ଜଣିଆ ଖଣ୍ଡପୀଠ ଆଡଭୋକେଟ୍ ଅଞ୍ଜନ ଦତ୍ତଙ୍କ ଦ୍ଵାରା ଦାୟର ହୋଇଥିବା ଏକ ଜନସ୍ବାର୍ଥ ମାମଲାର ଶୁଣାଣି କରି ଏହି ନିର୍ଦ୍ଦେଶ ଦେଇଛନ୍ତି ।

ଆବେଦନକାରୀ ଅଞ୍ଜନ ଦତ୍ତ ପ୍ରଶ୍ନ ଉଠାଇଥିଲେ ଯେ, ସରକାର ଜନସାଧାରଣଙ୍କ ସହ କୌଣସି ଆଲୋଚନା ନକରି କେଉଁ ଆଧାରରେ ୨,୦୦୦ ଟଙ୍କାର ସୀମା ସ୍ଥିର କଲେ ? ଏହାସହ UPI ଏବଂ ରୂପେ (RuPay) କାର୍ଡ ପାଇଁ ଅଲଗା ନିୟମ କାହିଁକି ରହିଛି ? ସେନେଇ ମଧ୍ୟ ସେ ଆପତ୍ତି ଜଣାଇଥିଲେ । ଏହି ନିୟମକୁ ରଦ୍ଦ କରିବାକୁ ଆବେଦନ କରାଯାଇଥିଲା ।

ତେବେ ସରକାରଙ୍କ ପକ୍ଷରୁ ଏଏସଜି ଏନ. ଭେଙ୍କଟରମଣ ସ୍ପଷ୍ଟ କରିଛନ୍ତି ଯେ, ସାଧାରଣ ଜନତାଙ୍କ ପରସ୍ପର ମଧ୍ୟରେ ହେଉଥିବା ଟ୍ରାଞ୍ଜାକସନ ଉପରେ କୌଣସି ଚାର୍ଜ ଲାଗିବ ନାହିଁ । ଏପରିକି ଦେଶର ପ୍ରାୟ ୯୬% ଛୋଟ ବ୍ୟବସାୟୀଙ୍କ ଉପରେ ମଧ୍ୟ ଏହାର କୌଣସି ପ୍ରଭାବ ପଡ଼ିବ ନାହିଁ ।

The post ୟୁପିଆଇ କାରବାର ଉପରେ ଚାର୍ଜ: ସୁପ୍ରିମକୋର୍ଟଙ୍କ ରୋକ୍ ମନା appeared first on Sanket Tv.

ୟୁନାଇଟେଡ୍ ଫୋରମ୍ ଅଫ୍ ବ୍ୟାଙ୍କ ୟୁନିଅନ୍ (UFBU) ସମେତ ବ୍ୟାଙ୍କ କର୍ମଚାରୀ ସଂଗଠନଗୁଡ଼ିକ ୨୮ରୁ ୩୦ ସେପ୍ଟେମ୍ବର ତିନିଦିନିଆ ଦେଶବ୍ୟାପୀ ଧର୍ମଘଟ ଡାକରା ଦେଇଛନ୍ତି। ସପ୍ତାହକୁ ୫ ଦିନ ବ୍ୟାଙ୍କିଂ ବ୍ୟବସ୍ଥା ଲାଗୁ କରିବା ଏବଂ ପ୍ରଦର୍ଶନ ଆଧାରରେ ପ୍ରୋତ୍ସାହନ ବା ପିଏଲଆଇ ବ୍ୟବସ୍ଥା ପ୍ରତ୍ୟାହାର କରିବା ଆଦି ବ୍ୟାଙ୍କ ସଂଘ ଦାବି ରହିଛି। ଏହି ଧର୍ମଘଟରେ ବ୍ୟାଙ୍କିଂ କର୍ମଚାରୀଙ୍କ ବଡ଼ ଅଂଶ ସାମିଲ ହେବାର ସମ୍ଭାବନା ରହିଛି।

ବର୍ତ୍ତମାନ ଆର୍‌ବିଆଇ ନିୟମ ଅନୁସାରେ, ନିଜ ବ୍ୟାଙ୍କର ଏଟିଏମ୍‌ରୁ ମାସକୁ ୫ଟି ମାଗଣା ଟ୍ରାଞ୍ଜାକ୍ସନ୍ କରାଯାଇପାରେ। ଅନ୍ୟ ବ୍ୟାଙ୍କର ଏଟିଏମ୍‌ ବ୍ୟବହାର କଲେ ମେଟ୍ରୋ ସହରରେ ୩ଟି ଏବଂ ଅନ୍ୟ ସ୍ଥାନରେ ୫ଟି ମାଗଣା ଟ୍ରାଞ୍ଜାକ୍ସନ୍‌ର ସୁବିଧା ରହିଛି। ଏହି ସୀମା ଅତିକ୍ରମ କଲେ ପ୍ରତି ଟ୍ରାଞ୍ଜାକ୍ସନ୍ ପିଛା ସର୍ବାଧିକ ₹୨୩ ଏବଂ ଜିଏସ୍‌ଟି ଚାର୍ଜ ଲାଗିପାରେ। ତେବେ ଧର୍ମଘଟ ସମୟରେ ଏସ୍‌ବିଆଇ ଏବଂ ଅନ୍ୟ କିଛି ସରକାରୀ ବ୍ୟାଙ୍କ ଏହି ଏଟିଏମ୍‌ ଚାର୍ଜ ଛାଡ଼ କରୁଥିବା ଘୋଷଣା କରିଛନ୍ତି।

ଧର୍ମଘଟ ପୂର୍ବରୁ ଗ୍ରାହକଙ୍କ ସୁବିଧା ପାଇଁ ୨୭ ସେପ୍ଟେମ୍ବର ରବିବାର ପବ୍ଲିକ ସେକ୍ଟର ବ୍ୟାଙ୍କ ଏବଂ ରିଜନାଲ ରୁରାଲ ବ୍ୟାଙ୍କଗୁଡ଼ିକ ଖୋଲା ରହିବ। ଅର୍ଥ ମନ୍ତ୍ରାଳୟର ସୂଚନା ଅନୁସାରେ, ଆରବିଆଇ ସମସ୍ତ ବ୍ୟାଙ୍କ ଶାଖା, ଏଟିଏମ ଲିଙ୍କଡ୍ ବ୍ରାଞ୍ଚ ଏବଂ କରେନ୍ସି ଚେଷ୍ଟକୁ ମଧ୍ୟ ୨୭ ତାରିଖରେ କାର୍ଯ୍ୟକ୍ଷମ ରଖିବାକୁ ଅନୁମତି ଦେଇଛି।

୨୮ରୁ ୩୦ ସେପ୍ଟେମ୍ବର ମଧ୍ୟରେ ବ୍ୟାଙ୍କ ଶାଖାର ସାଧାରଣ କାର୍ଯ୍ୟ ବାଧାପ୍ରାପ୍ତ ହୋଇପାରେ। ଚେକ୍ କ୍ଲିୟରିଂ ଏବଂ ଅନ୍ୟ ଶାଖାଭିତ୍ତିକ କାର୍ଯ୍ୟ ମଧ୍ୟ ପ୍ରଭାବିତ ହେବାର ଆଶଙ୍କା ରହିଛି। ତେବେ ଏଟିଏମ୍‌, ୟୁପିଆଇ, ମୋବାଇଲ୍ ଏବଂ ଇଣ୍ଟରନେଟ୍ ବ୍ୟାଙ୍କିଂ ଭଳି ଡିଜିଟାଲ୍ ସେବା ଚାଲୁ ରହିବା ଆଶା କରାଯାଉଛି। ଏସବିଆଇ ସମେତ ଅନେକ ବ୍ୟାଙ୍କ ଗ୍ରାହକଙ୍କୁ ଜରୁରୀ ଶାଖାଭିତ୍ତିକ କାମ ଆଗୁଆ କରିନେବାକୁ ପରାମର୍ଶ ଦେଇଛନ୍ତି।

୫ ଦିନିଆ ବ୍ୟାଙ୍କିଂ ଦାବି ଉପରେ ଏପର୍ଯ୍ୟନ୍ତ ସରକାରୀ ମଞ୍ଜୁରି ମିଳିନାହିଁ। ସରକାର ଏବଂ ବ୍ୟାଙ୍କ ପରିଚାଳନା ପକ୍ଷରୁ ଧର୍ମଘଟ ଟାଳିବାକୁ ଅପିଲ୍ କରାଯାଇଥିଲେ ମଧ୍ୟ ୟୁନିୟନ୍‌ଗୁଡ଼ିକ ଧର୍ମଘଟ ନିଷ୍ପତ୍ତିରେ ଅଟଳ ରହିଛନ୍ତି। ଏହି କାରଣରୁ ଗ୍ରାହକମାନେ ୨୭ ସେପ୍ଟେମ୍ବରରେ ଆବଶ୍ୟକ ବ୍ୟାଙ୍କ କାମ ସାରିନେବା ସହ ଧର୍ମଘଟ ସମୟରେ ଏଟିଏମ୍‌ ଓ ଡିଜିଟାଲ୍ ବ୍ୟାଙ୍କିଂ ସେବାର ବ୍ୟବହାର କରିପାରିବେ।

The post ତିନିଦିନିଆ ବ୍ୟାଙ୍କ ଧର୍ମଘଟ: ଏଟିଏମ୍‌ରୁ ଟଙ୍କା ଉଠାଣରେ ଚାର୍ଜ ନାହିଁ appeared first on Sanket Tv.

ବିଧାନସଭାରେ ଏକ ଲିଖିତ ପ୍ରଶ୍ନର ଉତ୍ତର ଦେଇ ରାଜ୍ୟ ସମବାୟ ମନ୍ତ୍ରୀ ପ୍ରଦୀପ ବଳ ସାମନ୍ତ ଏହି ଗୁରୁତ୍ୱପୂର୍ଣ୍ଣ ସୂଚନା ଦେଇଛନ୍ତି। ମନ୍ତ୍ରୀଙ୍କ ସୂଚନା ଅନୁଯାୟୀ, କେନ୍ଦ୍ର ସମବାୟ ମନ୍ତ୍ରଣାଳୟ ଦ୍ୱାରା ୨୦୨୬ ଫେବ୍ରୁଆରୀ ୫ ତାରିଖରେ ଏହି ‘ଭାରତ ଟ୍ୟାକ୍ସି’ ଯୋଜନାର ଶୁଭାରମ୍ଭ କରାଯାଇଥିଲା।

ଏବେ ଏହାକୁ ଓଡ଼ିଶାରେ ପୂର୍ଣ୍ଣାଙ୍ଗ ଭାବେ କାର୍ଯ୍ୟକାରୀ କରିବା ପାଇଁ ରାଜ୍ୟ ସରକାରଙ୍କ ପକ୍ଷରୁ ତତ୍ପରତା ପ୍ରକାଶ ପାଇଛି ଏବଂ ଆବଶ୍ୟକୀୟ ଆଇନଗତ ଓ ପ୍ରଶାସନିକ ପଦକ୍ଷେପ ଗ୍ରହଣ କରାଯାଉଛି।

ଏହି ଯୋଜନାର ସଫଳ ପରିଚାଳନା ପାଇଁ ସମବାୟ ମନ୍ତ୍ରଣାଳୟ ପକ୍ଷରୁ ଗତ ମାର୍ଚ୍ଚ ୨୦୨୬ରେ ଏକ ଉଚ୍ଚସ୍ତରୀୟ ବୈଠକ ଅନୁଷ୍ଠିତ ହୋଇସାରିଛି। ଏହି ଆଲୋଚନାରେ ବିଭିନ୍ନ ସମବାୟ ସମିତି ମାଧ୍ୟମରେ କିପରି ଏହି ଟ୍ୟାକ୍ସି ସେବାକୁ ଲୋକଙ୍କ ପାଖରେ ପହଞ୍ଚାଯାଇପାରିବ ଏବଂ ଏହାର ବ୍ୟାବହାରିକ ଉପଯୋଗୀତା କ’ଣ ରହିବ, ସେ ନେଇ ବିସ୍ତୃତ ସମୀକ୍ଷା କରାଯାଇଛି।

ବର୍ତ୍ତମାନ ଏହି ଯୋଜନାର ଚୂଡ଼ାନ୍ତ ରୂପରେଖ ଓ ନୀତି ନିର୍ଦ୍ଧାରଣ ବିଭାଗୀୟ ବିଚାରାଧୀନ ରହିଛି। ସବୁ ପ୍ରକ୍ରିୟା ଶେଷ ହେବା ପରେ ଖୁବଶୀଘ୍ର ଓଡ଼ିଶାର ପ୍ରମୁଖ ସହରଗୁଡ଼ିକରେ ‘ଭାରତ ଟ୍ୟାକ୍ସି’ ଗଡ଼ିବ, ଯାହା ଗାଡ଼ି ଚାଳକଙ୍କ ସହ ଯାତ୍ରୀଙ୍କୁ ମଧ୍ୟ ସୁଲଭ ଦରରେ ସୁରକ୍ଷିତ ଯାତାୟାତର ସୁବିଧା ଯୋଗାଇଦେବ।

The post ଓଡ଼ିଶାରେ ଖୁବଶୀଘ୍ର ଆରମ୍ଭ ହେବ ଭାରତ ଟ୍ୟାକ୍ସି ସେବା appeared first on Sanket Tv.

ୟୁନାଇଟେଡ୍ ଫୋରମ୍ ଅଫ ବ୍ୟାଙ୍କ ୟୁନିଅନ୍ସ (UFBU) ପକ୍ଷରୁ ୨୮ରୁ ୩୦ ସେପ୍ଟେମ୍ବର ପର୍ଯ୍ୟନ୍ତ ୩ ଦିନ ବ୍ୟାପୀ ବ୍ୟାଙ୍କ ହଡତାଳ ଆହ୍ୱାନ ଦିଆଯାଇଛି । ଏହି ଧର୍ମଘଟ ୨୬ ସେପ୍ଟେମ୍ବର (ଚତୁର୍ଥ ଶନିବାର), ୨୭ ସେପ୍ଟେମ୍ବର (ରବିବାର) ପରେ ୨୮ରୁ ୩୦ ସେପ୍ଟେମ୍ବର ଯାଏଁ ୩ ଦିନ ଧରି ହେବ । ତେଣୁ ନାଗରିକଙ୍କ ବ୍ୟାଙ୍କିଂ ସେବାକୁ ଗୁରୁତ୍ୱ ଦେଇ ସରକାର ଏଭଳି ପଦକ୍ଷେପ ନେଇଛନ୍ତି ।

ଗ୍ରାହକଙ୍କ ବ୍ୟାଙ୍କିଂ ଜରୁରୀ ବହୁ ଦିନ ଧରି ପ୍ରଭାବିତ ନ ହେଉ, ତେଣୁ ସମସ୍ତ ପବ୍ଲିକ ସେକ୍ଟର ବ୍ୟାଙ୍କ ଏବଂ ରିଜନାଲ ରୁରାଲ ବ୍ୟାଙ୍କ ରବିବାର ସାମାନ୍ୟ ଭାବେ କାମ କରିବ । ରିଜର୍ଭ ବ୍ୟାଙ୍କ ଅଫ ଇଣ୍ଡିଆ ସମସ୍ତ ବ୍ୟାଙ୍କ ଶାଖା, ଅଫିସ, ଏଟିଏମ ଲିଙ୍କ ଶାଖା ଏବଂ କରେନ୍ସୀ ଚେଷ୍ଟକୁ ୨୭ ସେପ୍ଟେମ୍ବର ରବିବାର ଚାଲୁ ରଖିବାକୁ ମଞ୍ଜୁରୀ ଦେଇଛି ।

ଧର୍ମଘଟ ଯୋଗୁଁ ଗ୍ରାହକମାନଙ୍କୁ ଅସୁବିଧା ଯେପରି ନ ହେବ, ସେନେଇ ସୋମବାର ଅର୍ଥ ମନ୍ତ୍ରଣାଳୟର ସଚିବଙ୍କ ଅଧ୍ୟକ୍ଷତାରେ ସରକାରୀ କ୍ଷେତ୍ରର ବ୍ୟାଙ୍କ, RRB ଏବଂ NABARD ର ଶୀର୍ଷ ପରିଚାଳନାର ଏକ ଗୁରୁତ୍ୱପୂର୍ଣ୍ଣ ବୈଠକ ଡକାଯାଇଥିଲା । ଏଥିରେ ବିକଳ୍ପ ପ୍ରଶାସନିକ ବ୍ୟବସ୍ଥା ଉପରେ ଆଲୋଚନା କରାଯାଇଥିଲା । ୫ ଦିନ ଲଗାତାର ବ୍ୟାଙ୍କ ବନ୍ଦ ରହୁଥିବା ଯୋଗୁଁ ଗ୍ରାହକଙ୍କ ଉପରେ ଏହାର ପ୍ରଭାବ ନ ପଡ଼ୁ, ତେଣୁ ଏଭଳି ନିଷ୍ପତ୍ତି ନିଆଯାଇଛି ।

The post ବ୍ୟାଙ୍କ ହଡତାଳ ପୂର୍ବରୁ ରବିବାର ଖୋଲା ରହିବ ସମସ୍ତ ବ୍ୟାଙ୍କ appeared first on Sanket Tv.

ଧର୍ମଘଟ ଯୋଗୁଁ ଗ୍ରାହକମାନଙ୍କୁ ଅସୁବିଧା ନହେବା ପାଇଁ ସୋମବାର ଅର୍ଥ ମନ୍ତ୍ରଣାଳୟର ସଚିବଙ୍କ ଅଧ୍ୟକ୍ଷତାରେ ସରକାରୀ କ୍ଷେତ୍ରର ବ୍ୟାଙ୍କ, RRB ଏବଂ NABARD ର ଶୀର୍ଷ ପରିଚାଳନାର ଏକ ଗୁରୁତ୍ୱପୂର୍ଣ୍ଣ ବୈଠକ ଡକାଯାଇଛି। ଏଥିରେ ବିକଳ୍ପ ପ୍ରଶାସନିକ ବ୍ୟବସ୍ଥା ଉପରେ ଆଲୋଚନା କରାଯିବ।

ଏହା ବ୍ୟତୀତ ମୁଖ୍ୟ ଶ୍ରମ କମିଶନର ସେପ୍ଟେମ୍ବର ୨୨ ଏବଂ ୨୩ ତାରିଖରେ ଆଲୋଚନା ପାଇଁ IBA, ବ୍ୟାଙ୍କ ପରିଚାଳନା ଏବଂ ଅର୍ଥ ମନ୍ତ୍ରଣାଳୟର ପ୍ରତିନିଧିମାନଙ୍କୁ ନିମନ୍ତ୍ରଣ କରିଛନ୍ତି।

ଅଲ୍ ଇଣ୍ଡିଆ ବ୍ୟାଙ୍କ ଅଫିସର୍ସ ଆସୋସିଏସନର ଜାତୀୟ ସମ୍ପାଦକ ଡି.ଏନ୍. ତ୍ରିବେଦୀ ଏକ ସକରାତ୍ମକ ସମାଧାନ ପାଇଁ ଆଶା ପ୍ରକାଶ କରିଛନ୍ତି। ଯଦି ଆଲୋଚନା ବିଫଳ ହୁଏ, ତେବେ ସେପ୍ଟେମ୍ବର ୨୬ ଏବଂ ସେପ୍ଟେମ୍ବର ୨୭ ତାରିଖ ଛୁଟି ପରେ ସେପ୍ଟେମ୍ବର ୨୮, ୨୯ ଏବଂ ୩୦ ତାରିଖ ପର୍ଯ୍ୟନ୍ତ ଧର୍ମଘଟ ଜାରି ରହିବ। ଫଳରେ ଲଗାତାର ପାଞ୍ଚ ଦିନ ପାଇଁ ବ୍ୟାଙ୍କ ଶାଖା କାର୍ଯ୍ୟ ବନ୍ଦ ରହିବ।

The post ପାଞ୍ଚ ଦିନ ବ୍ୟାଙ୍କ ଧର୍ମଘଟ ଡାକରା: ସେପ୍ଟେମ୍ବର ୨୮ ରୁ ପ୍ରଭାବିତ ହେବ ବ୍ୟାଙ୍କିଂ ସେବା appeared first on Sanket Tv.

ଓଡ଼ିଶା ସରକାରଙ୍କ ଦ୍ୱାରା ଅନୁମତି ପ୍ରାପ୍ତ ୩ଟି ବିଶ୍ୱବିଦ୍ୟାଳୟ ଏବଂ ସେମିକନ ଇଣ୍ଡଷ୍ଟ୍ରିରେ କାମ କରୁଥିବା ୪ଟି କମ୍ପାନୀ ନିଜ ପ୍ରଡକ୍ଟ ପ୍ରଦର୍ଶନ କରିଛନ୍ତି। ସରକାରଙ୍କର ସେମିକଣ୍ଡକ୍ଟର ଏବଂ ଇଲେକ୍ଟ୍ରୋନିକ୍ସ ପଲିସିକୁ ମଧ୍ୟ ଏଠାରେ ପ୍ରଦର୍ଶିତ କରାଯାଇଛି। ଓଡ଼ିଶାକୁ ସେମିକଣ୍ଡକ୍ଟର ହବ କରିବା ପାଇଁ ରହିଛି ଯୋଜନା।

ଏହି ଓଡ଼ିଶା ପାଭିଲିୟନର ଥିମ୍ ରହିଛି ‘ସ୍ୟାଣ୍ଡ୍ ରୁ ସିଲିକନ୍’ – ଅର୍ଥାତ ସିଲିକା ବାଲିରୁ ସେମିକଣ୍ଡକ୍ଟର ଚିପ୍ ପର୍ଯ୍ୟନ୍ତ ଅସାଧାରଣ ଶିଳ୍ପ ଯାତ୍ରାକୁ ଦର୍ଶାଯାଇଛି। ପୂର୍ବରୁ କେବଳ ଖଣିଜ ଆଧାରିତ ଶିଳ୍ପ ପାଇଁ ଜଣାଶୁଣା ଥିଲା ଓଡ଼ିଶା, ଏବେ ଆଇଟି, ଡିପ୍-ଟେକ୍ ଏବଂ ସେମିକଣ୍ଡକ୍ଟର ହବ୍ ଭାବେ ଉଭା ହେଉଛି।

ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ନିଜ ଏକ୍ସ ଏକାଉଣ୍ଟରେ ଲେଖିଛନ୍ତି ଯେ ସେମିକନ୍-ଇଣ୍ଡିଆ ୨୦୨୬ ଅବସରରେ କେନ୍ଦ୍ର ଇଲେକ୍ଟ୍ରୋନିକ୍ସ ଓ ସୂଚନା ପ୍ରଯୁକ୍ତି ମନ୍ତ୍ରୀ ଅଶ୍ବିନୀ ବୈଷ୍ଣବଙ୍କ ସହ ଆଲୋଚନା କରିଛନ୍ତି। ନିବେଶ, ପ୍ରଯୁକ୍ତି, ନବସୃଜନ ଏବଂ ଦକ୍ଷତା ବିକାଶ ଉପରେ ଧ୍ୟାନ ଦେଇ ଓଡ଼ିଶାର ସେମିକଣ୍ଡକ୍ଟର ଇକୋସିଷ୍ଟମକୁ ସୁଦୃଢ଼ କରିବାର ଆଗାମୀ ପଥ ଉପରେ ଆଲୋଚନା ହୋଇଛି। ଓଡ଼ିଶା ଏକ ସୁଦୃଢ଼ ସେମିକଣ୍ଡକ୍ଟର ଓ ଇଲେକ୍ଟ୍ରୋନିକ୍ସ ଇକୋସିଷ୍ଟମ ନିର୍ମାଣ ଏବଂ ଆତ୍ମନିର୍ଭର ଭାରତରେ ଅର୍ଥପୂର୍ଣ୍ଣ ଅବଦାନ ଦେବା ପାଇଁ ପ୍ରତିବଦ୍ଧ।

ରାଜ୍ୟ ସରକାରଙ୍କ ସେମିକଣ୍ଡକ୍ଟର ଏବଂ ଇଲେକ୍ଟ୍ରୋନିକ୍ସ ନୀତି ବିଶ୍ବସ୍ତରୀୟ ନିବେଶକଙ୍କୁ ଆକୃଷ୍ଟ କରୁଥିବା ବେଳେ ରାଜ୍ୟକୁ ବିପୁଳ ପୁଞ୍ଜି ନିବେଶ ପ୍ରସ୍ତାବ ମଧ୍ୟ ମିଳିଛି। ଏହି ସମ୍ମିଳନୀ ସହ ତାଳ ଦେଇ ଓଡ଼ିଶା ସେମିକଣ୍ଡକ୍ଟର କ୍ଷେତ୍ରରେ ଏକ ବଡ଼ ସଫଳତା ହାସଲ କରିଛି।

ଖୋର୍ଦ୍ଧାର ଇଡକୋ ଇନଫୋଭ୍ୟାଲି-୨ ଠାରେ ୨୧.୮୮ ଏକର ପରିମିତ ଜମିରେ ସିଲିକନ୍ କାର୍ବାଇଡ୍ ସେମିକଣ୍ଡକ୍ଟର ମାନୁଫାକ୍ଚରିଂ ୟୁନିଟ୍ ସ୍ଥାପନ କରାଯିବ। ରାଜ୍ୟର ୩ଟି ବିଶ୍ୱବିଦ୍ୟାଳୟ ଏବଂ ନିବେଶକମାନଙ୍କ ସହଯୋଗରେ ସ୍ଥାନୀୟ ଯୁବବର୍ଗଙ୍କୁ ସିଲିକା ସଂଶୋଧନ, ୱେଫର୍ କଟିଂ, ଚିପ୍ ଡିଜାଇନ୍ ଏବଂ ପ୍ୟାକେଜିଂ ପରି ଜଟିଳ ବିଷୟରେ ତାଲିମ ଦିଆଯିବ।

ଏହା ଦ୍ବାରା ହଜାର ହଜାର ଯୁବକଯୁବତୀଙ୍କ ପାଇଁ ଉଚ୍ଚ-ମାନର ନିଯୁକ୍ତି ସୁଯୋଗ ସୃଷ୍ଟି ହେବ ଏବଂ ପ୍ରଧାନମନ୍ତ୍ରୀଙ୍କ ‘ବିକଶିତ ଭାରତ ୨୦୪୭’ ର ସ୍ବପ୍ନକୁ ସାକାର କରିବାରେ ଓଡ଼ିଶା ପ୍ରମୁଖ ଭୂମିକା ଗ୍ରହଣ କରିବ।

The post ସେମିକନ୍-ଇଣ୍ଡିଆ ୨୦୨୬ ସମ୍ମିଳନୀରେ ଓଡ଼ିଶା ପାଭିଲିୟନ ଉଦଘାଟିତ appeared first on Sanket Tv.

ଗତ ମାସରେ ଚନ୍ଦ୍ରଶେଖରନ ଆଉ ଏକ କାର୍ଯ୍ୟକାଳ ପାଇଁ ପୁନଃନିଯୁକ୍ତି ଚାହିଁବେ ନାହିଁ ବୋଲି ଜଣାଇଥିଲେ । ହେଲେ ଏବେ ସେହି ନିଷ୍ପତ୍ତି ବଦଳିଥିବା ବେଳେ ଟାଟା ସନ୍ସ ବୋର୍ଡ ତାଙ୍କ ନୂଆ ୫ ବର୍ଷର କାର୍ଯ୍ୟକାଳକୁ ସବୁଜ ସଙ୍କେତ ଦେଇଛି । ଚନ୍ଦ୍ରଶେଖରନଙ୍କ ବର୍ତ୍ତମାନର କାର୍ଯ୍ୟକାଳ ୨୦୨୭ ଫେବ୍ରୁଆରୀରେ ଶେଷ ହେବାର ଥିଲା ।

୨୦୧୭ରେ ଚନ୍ଦ୍ରଶେଖରନ ଟାଟା ସନ୍ସର ଅଧ୍ୟକ୍ଷ ଦାୟିତ୍ୱ ନେଇଥିଲେ । ଏହାପୂର୍ବରୁ ସେ ଟାଟା କନସଲଟାନ୍ସି ସର୍ଭିସେସ (TCS)ର CEO ଏବଂ ମ୍ୟାନେଜିଂ ଡାଇରେକ୍ଟର ଥିଲେ । ୨୦୨୨ରେ ତାଙ୍କୁ ଦ୍ୱିତୀୟ ଥର ପାଇଁ ୫ ବର୍ଷର କାର୍ଯ୍ୟକାଳ ଦିଆଯାଇଥିଲା ।

ତାଙ୍କ ନେତୃତ୍ୱ ସମୟରେ ଟାଟା ଗ୍ରୁପ ବିମାନ ଚଳାଚଳ, ଇଲେକ୍ଟ୍ରୋନିକ୍ସ, ସେମିକଣ୍ଡକ୍ଟର, ବ୍ୟାଟେରୀ ଓ ଡିଜିଟାଲ୍ ବ୍ୟବସାୟ ଭଳି ନୂଆ କ୍ଷେତ୍ରରେ ବଡ଼ ପୁଞ୍ଜିନିବେଶ କରିଛି । ଏୟାର ଇଣ୍ଡିଆକୁ ପୁଣି ଟାଟା ଗ୍ରୁପ ଅଧୀନକୁ ଆଣିବା ଏବଂ ଏହାର ପୁନର୍ଗଠନ ମଧ୍ୟ ତାଙ୍କ କାର୍ଯ୍ୟକାଳର ଏକ ପ୍ରମୁଖ ଘଟଣା ।

ଟାଟା ଟ୍ରଷ୍ଟସ ପାଖରେ ଟାଟା ସନ୍ସର ପ୍ରାୟ ୬୬ ପ୍ରତିଶତ ଅଂଶଧନ ରହିଛି । ତେଣୁ ଟାଟା ସନ୍ସର ଶୀର୍ଷ ନେତୃତ୍ୱ ଚୟନରେ ଟାଟା ଟ୍ରଷ୍ଟସର ଭୂମିକା ଗୁରୁତ୍ୱପୂର୍ଣ୍ଣ । ଟାଟା ସନ୍ସର ଚେୟାରମ୍ୟାନ୍ ଓ ମ୍ୟାନେଜିଂ ଡାଇରେକ୍ଟରଙ୍କ ସମେତ ଶୀର୍ଷ ପରିଚାଳନାର ଚୟନ ଶେଷରେ ଅଧିକାଂଶ ଅଂଶଧନଧାରୀଙ୍କ ପସନ୍ଦ ଉପରେ ନିର୍ଭର କରିବ । ଟାଟା ଟ୍ରଷ୍ଟସ ଟାଟା ସନ୍ସର ସବୁଠାରୁ ବଡ଼ ଶେୟାରହୋଲ୍ଡର ହୋଇଥିବାରୁ ଏହି ନିଷ୍ପତ୍ତିରେ ତାହାର ଭୂମିକା ରହିବ ।

ଏବେ ଚନ୍ଦ୍ରଶେଖରନଙ୍କ ନୂଆ ୫ ବର୍ଷର କାର୍ଯ୍ୟକାଳକୁ ବୋର୍ଡ ଅନୁମୋଦନ କରିବା ପରେ ଟାଟା ଗ୍ରୁପରେ ନେତୃତ୍ୱ ପରିବର୍ତ୍ତନକୁ ନେଇ ଚାଲିଥିବା ଚର୍ଚ୍ଚାରେ ଏକ ନୂଆ ମୋଡ଼ ଆସିଛି ।

The post ଆଉ ୫ ବର୍ଷ ଟାଟା ଗ୍ରୁପର ଅଧ୍ୟକ୍ଷ ରହିବେ ଚନ୍ଦ୍ରଶେଖରନ appeared first on Sanket Tv.