ଏହି ପବିତ୍ର କାର୍ତ୍ତିକ ମାସରେ ରାଜ୍ୟ ସରକାରଙ୍କ ପକ୍ଷରୁ ପୁରୀରେ ଆୟୋଜିତ ହେଉଥିବା ହବିଷ୍ୟାଳି ଯୋଜନା ପାଇଁ ଇଚ୍ଛୁକ ମହିଳାମାନେ ଅନଲାଇନରେ ଆବେଦନ କରିପାରିବେ।

ପ୍ରଶାସନର ସୂଚନା ଅନୁଯାୟୀ, ଚଳିତ ବର୍ଷ ସମୁଦାୟ ୨୫୦୦ ହବିଷ୍ୟାଳିଙ୍କୁ ଏହି ଯୋଜନାରେ ସାମିଲ କରାଯିବ। ସେମାନଙ୍କ ରହଣି ପାଇଁ ପୁରୀର ତିନୋଟି ପ୍ରମୁଖ ସ୍ଥାନ ଯଥା- ବୃନ୍ଦାବତୀ ନିବାସ, ପୌରସଂସ୍ଥା କଲ୍ୟାଣ ମଣ୍ଡପ ଏବଂ ରେଳବାଇ ଟୁରିଷ୍ଟ କମ୍ପ୍ଲେକ୍ସରେ ମାଗଣା ବ୍ୟବସ୍ଥା କରାଯିବ।

ଏଥିସହିତ ପଞ୍ଜିକୃତ ହବିଷ୍ୟାଳିଙ୍କ ପାଇଁ ଶ୍ରୀମନ୍ଦିରରେ ଶୃଙ୍ଖଳିତ ଦର୍ଶନ ଏବଂ ମାଗଣା ମହାପ୍ରସାଦ ସେବନର ସୁବିଧା ମଧ୍ୟ ରହିବ। ରାଜ୍ୟର ସମସ୍ତ ୩୦ଟି ଜିଲ୍ଲାରୁ ଇଚ୍ଛୁକ ମହିଳାମାନେ https://edistrict.odisha.gov.in ପୋର୍ଟାଲ ମାଧ୍ୟମରେ ଆବେଦନ କରିପାରିବେ।

The post ପୁରୀ ହବିଷ୍ୟାଳି ବ୍ରତ: ଅକ୍ଟୋବର ୬ରୁ ଅନଲାଇନ ଆବେଦନ ଆରମ୍ଭ appeared first on Sanket Tv.

ମହାପ୍ରଭୁଙ୍କ ରତ୍ନଭଣ୍ଡାର ଗଣତିମଣତି ଉପରେ ବୈଠକରେ ଆଲୋଚନା ହୋଇଛି। ସେବାୟତ ପିଲାମାନଙ୍କ ପାଇଁ ଆଦର୍ଶ ଗୁରୁକୂଳ ନିର୍ମାଣ ଉପରେ ମଧ୍ୟ ଆଲୋଚନା ହୋଇଛି। ଗୁରୁକୂଳର ୧୩୦୦ ମିଟର ବାଉଣ୍ଡ୍ରି ମଧ୍ୟରୁ ୮୦୦ ମିଟର ନିର୍ମାଣ ହୋଇସାରିଛି। ଗୁରୁକୂଳର ଡିଜାଇନ, ସ୍କୁଲ, ଖେଳପଡ଼ିଆ ଓ ହଷ୍ଟେଲ ପାଇଁ ଓବିସିସି ସହ ଆଲୋଚନା ହୋଇଛି। ନଭେମ୍ବର ମାସରେ ଭୂମିପୂଜନ କରାଯିବ ଏବଂ ଏହି କାର୍ଯ୍ୟକ୍ରମରେ ଆଇନମନ୍ତ୍ରୀ, ଗଜପତି ଓ ମୁଖ୍ୟମନ୍ତ୍ରୀ ଉପସ୍ଥିତ ରହିବେ।

ସେହିପରି ପ୍ରମୋଦ ଉଦ୍ୟାନ, ଶ୍ରୀଜଗନ୍ନାଥ ସଂସ୍କୃତି କେନ୍ଦ୍ର ଏବଂ ରଘୁନନ୍ଦନ ଲାଇବ୍ରେରୀ ଉପରେ ଆଲୋଚନା ହୋଇଛି। ସେବାୟତ ବାସଗୃହ ପାଇଁ ହରଚଣ୍ଡୀ ସାହିରେ ୩ ଏକର ୨୫ ଡିସିମିଲ୍ ଜମି ରହିଥିବା ନେଇ ବୈଠକରେ ଆଲୋଚନା ହୋଇଛି। ଶ୍ରୀଜଗନ୍ନାଥ ଭୂମି ପରିଚାଳନା ଅଧିନିୟମ ୨୦୨୬ ପାଇଁ ଅନଲାଇନ ପୋର୍ଟାଲର କାମ ଚାଲିଛି ଏବଂ ଖୁବଶୀଘ୍ର ଏହା ଆରମ୍ଭ ହେବ।

ସେବକ, ସେବକ ନିଯୋଗ ଓ ମଠର ପ୍ରଚାରପ୍ରସାର ପାଇଁ ଫାସିଲିଟେସନ ସେଲ୍ ଗଠନ ପାଇଁ ପ୍ରସ୍ତାବ ଦିଆଯାଇଛି। ଶ୍ରୀମନ୍ଦିରର ଆର୍ଥିକ ୨୦୨୫-୨୬ ଅଡିଟ୍ ରିପୋର୍ଟ ଉପସ୍ଥାପନ ହେବା ସହ ଶ୍ରୀମନ୍ଦିର ପ୍ରଶାସନର ସମସ୍ତ ଆୟବ୍ୟୟର ଅଟକଳ କରାଯାଇଛି। ଶ୍ରୀ ଜଗନ୍ନାଥ ତତ୍ତ୍ୱ ଗବେଷଣା ଉପରେ ମଧ୍ୟ ଆଲୋଚନା ହୋଇଛି। ଜଗନ୍ନାଥ ସଂସ୍କୃତିକୁ କୌଣସି ସଂସ୍ଥା କିମ୍ବା ଅନୁଷ୍ଠାନ ବ୍ୟତିକ୍ରମ କଲେ କାର୍ଯ୍ୟାନୁଷ୍ଠାନ ହେବ। ଗଜପତିଙ୍କ ଅଧ୍ୟକ୍ଷତାରେ ସବ୍‌କମିଟି ଗଠନ କରାଯାଇଛି ଏବଂ ଦିଲ୍ଲୀ ଯିବା କମିଟି ଗଠନ ସହ ମହାପ୍ରଭୁଙ୍କ ପରମ୍ପରା ଅକ୍ଷୁର୍ଣ୍ଣ ରଖିବା ପାଇଁ ପ୍ରସ୍ତାବ ଦିଆଯାଇଛି।

ଅନ୍ୟପଟେ ରାଷ୍ଟ୍ରପତି ଭବନରେ ତିନିରଥର ଚକ ରହିବା ଉପରେ ଆଲୋଚନା ହୋଇଛି। ବଡ଼ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ହେଉଛି ସୁନାବେଶ ପାଇଁ ଶ୍ରୀଜୀଉଙ୍କ ଆଉ ଏକ ସେଟ୍ ଶ୍ରୀମନ୍ଦିର ପ୍ରଶାସନର ନିଜସ୍ୱ ଅର୍ଥରେ କରାଯିବ। ଗଣତିମଣତି ସମୟରେ ହୋଇଥିବା ଡିଜିଟାଲ ଡକୁମେଣ୍ଟ ଶ୍ରୀମନ୍ଦିର ପ୍ରଶାସନ ପାଖରେ ଅଛି ଏବଂ ସେଟ୍ ଚୟନରେ ସ୍ୱଚ୍ଛତା ଅବଲମ୍ବନ କରାଯିବ।

ଗୁଣ୍ଡିଚା ମନ୍ଦିର ସେପ୍ଟେମ୍ବର ୩୦ ତାରିଖରୁ ଖୋଲିବ। ଭକ୍ତଙ୍କ ପାଇଁ ମନ୍ଦିର ସକାଳ ୬ଟାରୁ ସନ୍ଧ୍ୟା ୫ଟା ପର୍ଯ୍ୟନ୍ତ ଖୋଲା ରହିବ। ପ୍ରଥମ ତିନିଦିନ ମାଗଣାରେ ପ୍ରବେଶ ଅନୁମତି ମିଳିବ। ଶ୍ରୀମନ୍ଦିରକୁ ଦିବ୍ୟାଙ୍ଗ ଓ ବରିଷ୍ଠ ନାଗରିକମାନଙ୍କ ପାଇଁ ସ୍ଲଟ୍ ବୁକିଂ କିଛି ସମୟ ପାଇଁ ବନ୍ଦ ରହିବ। ପୁରୀବାସୀଙ୍କ ପାଇଁ ଶ୍ରୀମନ୍ଦିର ସ୍ୱତନ୍ତ୍ର ଦର୍ଶନ ଲାଗି ମଧ୍ୟ ସ୍ଲଟ୍ ବୁକିଂ ଓ ସମୟ ଦିଆଯିବ। ଏହାକୁ ଜିଲ୍ଲାପାଳ ଓ ଏସପି ନିର୍ଦ୍ଧାରଣ କରିବେ ବୋଲି ଶ୍ରୀମନ୍ଦିର ମୁଖ୍ୟପ୍ରଶାସକ ଡଃ ଅରବିନ୍ଦ ପାଢ଼ୀ ପ୍ରତିକ୍ରିୟା ରଖିଛନ୍ତି।

The post ସେପ୍ଟେମ୍ବର ୩୦ରୁ ଖୋଲିବ ଗୁଣ୍ଡିଚା ମନ୍ଦିର appeared first on Sanket Tv.

ନୂଆଁଖାଇର ପ୍ରମୁଖ ଆକର୍ଷଣ ସମ୍ବଲପୁରର ମା’ ସମଲେଶ୍ୱରୀ ପୀଠ। ଚଳିତବର୍ଷ ନବାନ୍ନ ଲାଗି ପାଇଁ ସକାଳ ୯ଟା ୪୦ରୁ ୯ଟା ୫୪ ମଧ୍ୟରେ ଶୁଭଲଗ୍ନ ଧାର୍ଯ୍ୟ କରାଯାଇଥିଲା। ନିର୍ଦ୍ଧାରିତ ଲଗ୍ନରେ ମା’ ସମଲେଶ୍ୱରୀଙ୍କୁ ନୂଆ ଧାନରୁ ପ୍ରସ୍ତୁତ ନବାନ୍ନ ଅର୍ପଣ କରାଯାଇଥିଲା।

ଏହାପରେ ଘରେ ଘରେ ନିଜ ଇଷ୍ଟଦେବତା ଓ ଗ୍ରାମଦେବୀଙ୍କୁ ନବାନ୍ନ ଅର୍ପଣ କରି ପରିବାର ସଦସ୍ୟ ଏକାଠି ନୂଆ ଅନ୍ନ ଭକ୍ଷଣ କରିଥିଲେ। ନୂଆଁଖାଇ’ର ଅର୍ଥ ହେଉଛି ନୂଆ ଅନ୍ନ ଖାଇବା। କିନ୍ତୁ ଏହାର ମହତ୍ତ୍ୱ କେବଳ ନୂଆ ଫସଲ ମଧ୍ୟରେ ସୀମିତ ନୁହେଁ। ନୂଆଁଖାଇ ପରିବାରକୁ ଏକାଠି କରେ, ଭାଇଚାରା ବଢ଼ାଏ ଏବଂ ପୁରୁଣା ମନୋମାଳିନ୍ୟ ଭୁଲି ନୂଆ ସମ୍ପର୍କର ଆରମ୍ଭ ପାଇଁ ସନ୍ଦେଶ ଦିଏ।

ନବାନ୍ନ ଭକ୍ଷଣ ପରେ ଆରମ୍ଭ ହୁଏ ‘ନୂଆଁଖାଇ ଜୁହାର’। ପରିବାରର ସାନମାନେ ବଡ଼ମାନଙ୍କୁ ଜୁହାର କରି ଆଶୀର୍ବାଦ ନିଅନ୍ତି। ସାଙ୍ଗସାଥୀ, ଆତ୍ମୀୟସ୍ୱଜନ ଓ ପଡ଼ୋଶୀ ପରସ୍ପରକୁ ନୂଆଁଖାଇ ଜୁହାର ଜଣାନ୍ତି। ଦୂରଦୂରାନ୍ତରେ ରହୁଥିବା ପରିବାର ସଦସ୍ୟମାନେ ମଧ୍ୟ ଏହି ଅବସରରେ ଘରକୁ ଫେରନ୍ତି। ସମ୍ବଲପୁର ସହ ବରଗଡ଼, ବଲାଙ୍ଗୀର, ସୁବର୍ଣ୍ଣପୁର, ଝାରସୁଗୁଡ଼ା, କଳାହାଣ୍ଡି, ନୂଆପଡ଼ା, ସୁନ୍ଦରଗଡ଼, ବୌଦ୍ଧ ଓ ଦେବଗଡ଼ ସମେତ ପଶ୍ଚିମ ଓଡ଼ିଶାର ବିଭିନ୍ନ ଅଞ୍ଚଳ ନୂଆଁଖାଇ ପାଇଁ ଉତ୍ସବମୁଖର ହୋଇଉଠିଛି।

ନୂଆ ପୋଷାକ, ଘର ସଫାସୁତରା, ପିଠାପଣା ଓ ପାରମ୍ପରିକ ଖାଦ୍ୟରେ ମହକୁଛି ପରିବେଶ। ବିଭିନ୍ନ ଅଞ୍ଚଳରେ ସ୍ଥାନୀୟ ଇଷ୍ଟଦେବୀଙ୍କୁ ନୂଆ ଅନ୍ନ ସମର୍ପଣର ସ୍ୱତନ୍ତ୍ର ପରମ୍ପରା ରହିଛି। ସମ୍ବଲପୁରରେ ମା’ ସମଲେଶ୍ୱରୀଙ୍କ ସହ ବଲାଙ୍ଗୀର-ପାଟଣାଗଡ଼ ଅଞ୍ଚଳରେ ମା’ ପାଟଣେଶ୍ୱରୀ, ସୁବର୍ଣ୍ଣପୁରରେ ମା’ ସୁରେଶ୍ୱରୀ ଏବଂ କଳାହାଣ୍ଡିରେ ମା’ ମାଣିକେଶ୍ୱରୀଙ୍କ ପୀଠରେ ନୂଆଁଖାଇର ବିଶେଷ ପରମ୍ପରା ଦେଖିବାକୁ ମିଳେ।

ନବାନ୍ନ ଓ ଜୁହାର ପରେ ଜମିବ ନୂଆଁଖାଇ ଭେଟଘାଟ। ଢୋଲ, ନିଶାନ, ତାସାର ତାଳ ସହ ସମ୍ବଲପୁରୀ ଗୀତ ଓ ନୃତ୍ୟରେ ଦୁଲିବ ପଶ୍ଚିମ ଓଡ଼ିଶା। ଡାଲଖାଇ, ରସରକେଲି ଭଳି ଲୋକନୃତ୍ୟ ସହ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ନୂଆଁଖାଇର ଉତ୍ସବକୁ ଆହୁରି ରଙ୍ଗିନ କରିବ। ମାଟିକୁ ସମ୍ମାନ, ଚାଷୀର ପରିଶ୍ରମକୁ ସ୍ୱୀକୃତି, ଇଷ୍ଟଦେବୀଙ୍କ ପ୍ରତି କୃତଜ୍ଞତା ଏବଂ ପରିବାର-ସମାଜକୁ ଏକାଠି ବାନ୍ଧି ରଖିବାର ପରମ୍ପରା—ଏସବୁର ସମାହାର ହେଉଛି ନୂଆଁଖାଇ। ସେଥିପାଇଁ ପଶ୍ଚିମ ଓଡ଼ିଶାରେ ନୂଆଁଖାଇ କେବଳ ଏକ ପର୍ବ ନୁହେଁ, ଏହା ଏକ ଭାବନା ଓ ଜୀବନଧାରା।

ଓଡ଼ିଶାର କୃଷିଭିତ୍ତିକ ପର୍ବ ନୂଆଁଖାଇ ଅବସରରେ ରାଜ୍ୟବାସୀଙ୍କୁ ଶୁଭେଚ୍ଛା ଜଣାଇଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ। ସେ କହିଛନ୍ତି, ନୂଆଁଖାଇ କେବଳ ଏକ ପର୍ବ ନୁହେଁ। ଏହା ଆମର ମାଟି, ସଂସ୍କୃତି, ଚାଲିଚଳଣୀ ଓ ସାମାଜିକ ଏକତାର ପ୍ରାଣସ୍ପନ୍ଦନ। ଏହି ଆନନ୍ଦମୟ ପର୍ବରେ ଆମେ ସମସ୍ତେ ଭେଦଭାବ ଓ ତିକ୍ତତା ଭୁଲି ଗୁରୁଜନଙ୍କୁ ମୁଣ୍ଡିଆଁ ମାରି ଆଶୀର୍ବାଦ ନେଇଥାଉ। ଏ ସୁନ୍ଦର ପରମ୍ପରା ଆମ ପରିବାର ଏବଂ ଭାଇଚାରା ବନ୍ଧନକୁ ଆହୁରି ମଜଭୁତ କରିଥାଏ।

ମୁଖ୍ୟମନ୍ତ୍ରୀ ୨୦୩୬ ସୁଦ୍ଧା ସମୃଦ୍ଧ ଓଡ଼ିଶା ଏବଂ ୨୦୪୭ ଯାଏଁ ବିକଶିତ ଭାରତ ଗଠନ ପାଇଁ ସମସ୍ତେ ନିଜ ନିଜ କର୍ତ୍ତବ୍ୟ ପାଳନ କରନ୍ତୁ ବୋଲି ଛାତ୍ରଛାତ୍ରୀ, ଶ୍ରମିକ, ଯବାନ ଓ ଚାଷୀ ଭାଇଙ୍କୁ ଅନୁରୋଧ କରିଛନ୍ତି। ନୂଆଁଖାଇ ସମସ୍ତଙ୍କ ଜୀବନରେ ନୂଆ ଆଶା ଆଣିଦେଉ ଏବଂ ମାଆ ସମଲେଇ ସମସ୍ତଙ୍କୁ ସୁଖ ସମୃଦ୍ଧି ଦିଅନ୍ତୁ ବୋଲି ସେ ପ୍ରାର୍ଥନା କରିଛନ୍ତି

The post ନୂଆଁଖାଇ ପାଇଁ ଉତ୍ସବମୁଖର ପଶ୍ଚିମ ଓଡ଼ିଶା, ମା’ ସମଲେଶ୍ୱରୀଙ୍କୁ ନବାନ୍ନ ଅର୍ପଣ appeared first on Sanket Tv.

ଦୈନିକ ସମାଜରେ ପ୍ରକାଶିତ ରିପୋର୍ଟ ଅନୁସାରେ, ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ କହିଛନ୍ତି, ମହାପ୍ରଭୁଙ୍କ ନାମରେ ପ୍ରାୟ ୬୦ ହଜାର ଏକର ଜମି ଥିବା ନେଇ ଆମ ପାଖରେ ରେକର୍ଡ ଅଛି। ଏଥିରୁ ଅଧିକାଂଶ ଓଡ଼ିଶା ମଧ୍ୟରେ ରହିଛି। ଆଉ କିଛି ଜମି ଭାରତର ବିଭିନ୍ନ ରାଜ୍ୟ ଏବଂ ପାକିସ୍ତାନର ସିନ୍ଧପ୍ରଦେଶରେ ରହିଛି। ଦେଶ ଭିତରେ ଥିବା ଜମିର ସ୍ଥିତି ସମ୍ପର୍କରେ ପର୍ଯ୍ୟାୟକ୍ରମେ ଅନୁଧ୍ୟାନ କରାଯିବ। ଓଡ଼ିଶା ମଧ୍ୟରେ ଥିବା ସବୁ ଜମିକୁ ସୁରକ୍ଷିତ କରାଯିବା ସହ ଅନ୍ୟ ଜମିକୁ ଜବରଦଖଲମୁକ୍ତ କରାଯିବ।

ରିପୋର୍ଟ ଅନୁସାରେ, ମହାପ୍ରଭୁଙ୍କ ଜମିଜମାର ସୁରକ୍ଷା ଏବଂ ପୁନରୁଦ୍ଧାର ସମ୍ପର୍କରେ ସୁପ୍ରିମକୋର୍ଟ ଏବଂ ଓଡ଼ିଶା ହାଇକୋର୍ଟଙ୍କ ସମସ୍ତ ନିଷ୍ପତ୍ତିକୁ କାର୍ଯ୍ୟକାରୀ କରିବା ନିମନ୍ତେ ପଦକ୍ଷେପ ନେବାକୁ ରାଜସ୍ୱ ବିଭାଗ ପକ୍ଷରୁ ଫେବ୍ରୁଆରୀରେ ନିର୍ଦେଶନାମା ଜାରି କରାଯାଇଥିଲା। ଶ୍ରୀଜଗନ୍ନାଥ ମହାପ୍ରଭୁ ବିଜେ, ପୁରୀ ମାର୍ଫତ୍ ଶ୍ରୀମନ୍ଦିର ପରିଚାଳନା କମିଟି ନାମରେ ଥିବା ସମସ୍ତ ଭୂ-ସମ୍ପତ୍ତିର ଖତିୟାନ ସଂଶୋଧନ ସହ ବିଭିନ୍ନ ଅପେକ୍ଷିତ ମାମଲାର ତୁରନ୍ତ ସମାଧାନ କରିବାକୁ ନିର୍ଦେଶ ଦିଆଯାଇଥିଲା।

ଏହା ପୂର୍ବରୁ ଗତବର୍ଷ ସେପ୍ଟେମ୍ବର ମାସରେ ଆଇନ ମନ୍ତ୍ରୀ କହିଥିଲେ, ମହାପ୍ରଭୁଙ୍କ ଭୂ-ସମ୍ପତ୍ତି ଫେରାଇ ଆଣିବା ପାଇଁ ପ୍ରକ୍ରିୟା ଆରମ୍ଭ ହୋଇଛି। ରାଜ୍ୟ ଭିତରେ ଓ ବାହାରେ ଥିବା ମହାପ୍ରଭୁଙ୍କ ସମ୍ପତ୍ତି ଚିହ୍ନଟ କରାଯାଉଥିବା ବେଳେ ବିଧିମତେ ଏହା ଉପରେ ସରକାରଙ୍କ ଦଖଲ ଆରମ୍ଭ ହେବ। ରାଜ୍ୟ ଏବଂ ରାଜ୍ୟ ବାହାରେ ମହାପ୍ରଭୁଙ୍କର ୬୦ ହଜାର ଏକର ଜମି ରହିଛି। ସେଥିମଧ୍ୟରୁ ଆମ ପାଖରେ ୩୨ ହଜାର ଏକର ଜମିର କାଗଜପତ୍ର ପ୍ରସ୍ତୁତ ହୋଇସାରିଛି। ପ୍ରାୟ ୬ଟି ରାଜ୍ୟରେ ଶ୍ରୀମନ୍ଦିରର ପ୍ରାୟ ୪୦୦ ଏକର ଭୂ-ସମ୍ପତ୍ତି ରହିଛି। ଅନ୍ୟ ଜମିଗୁଡ଼ିକୁ ଚିହ୍ନଟ କରିବା ଲାଗି ପଦକ୍ଷେପ ନିଆଯାଉଛି।

The post ଶ୍ରୀଜଗନ୍ନାଥଙ୍କ ନାମରେ ରହିଛି ୬୦ ହଜାର ଏକର ଜମି: ପାକିସ୍ତାନରେ ବି ଅଛି ସମ୍ପତ୍ତି appeared first on Sanket Tv.

ପୂର୍ବରୁ ନାଟମଣ୍ଡପରେ ପ୍ରବଳ ଗରମ ଓ ଗୁଳୁଗୁଳି ଯୋଗୁଁ ଅନେକ ଭକ୍ତ ଅଣନିଃଶ୍ଵାସୀ ହୋଇ ଅସୁସ୍ଥ ହୋଇ ପଡୁଥିଲେ। ଅନେକ ଭକ୍ତଙ୍କୁ ବାନ୍ତି ହେଉଥିଲା, ଯାହାଫଳରେ ମହାପ୍ରଭୁଙ୍କ ନୀତିକାନ୍ତିରେ ବାଧା ସୃଷ୍ଟି ହେଉଥିଲା। ଏହି ସମସ୍ୟାର ସମାଧାନ ପାଇଁ ASI (ପୁରାତତ୍ତ୍ଵ ସର୍ବେକ୍ଷଣ ବିଭାଗ)ର ସହଯୋଗରେ ଶ୍ରୀମନ୍ଦିର ପ୍ରଶାସନ ଏହି ପଦକ୍ଷେପ ନେଇଛି। ଭକ୍ତ ଓ ସେବାୟତମାନେ ପ୍ରଶାସନର ଏଭଳି ଉଦ୍ୟମକୁ ସ୍ଵାଗତ ଜଣାଇଛନ୍ତି।

ନୂଆ ଶୀତତାପ ନିୟନ୍ତ୍ରିତ ବ୍ୟବସ୍ଥାକୁ ଭକ୍ତମାନେ ସ୍ଵାଗତ କରିବା ସହିତ ଶ୍ରୀମନ୍ଦିର ନାଟମଣ୍ଡପ ଭିତରେ ଧାଡ଼ି ଦର୍ଶନ ବ୍ୟବସ୍ଥା କରାଗଲେ ଅଧିକ ସୁବିଧା ହେବ ବୋଲି ମତବ୍ୟକ୍ତ କରିଛନ୍ତି। ବରିଷ୍ଠ ନାଗରିକ, ମହିଳା ଏବଂ ଛୋଟପିଲାମାନେ ଶୃଙ୍ଖଳିତ ଦର୍ଶନ ବ୍ୟବସ୍ଥା ଅଭାବରୁ ମହାପ୍ରଭୁଙ୍କୁ ଠିକ୍ ଭାବେ ଦର୍ଶନ କରିପାରୁ ନାହାନ୍ତି, ଯାହାକୁ ନେଇ ଭକ୍ତଙ୍କ ମଧ୍ୟରେ ଅସନ୍ତୋଷ ରହିଛି। ଭକ୍ତମାନେ ସରକାରଙ୍କୁ ଯଥାଶୀଘ୍ର ନାଟମଣ୍ଡପରେ ଧାଡ଼ି ଦର୍ଶନ ବ୍ୟବସ୍ଥା ଲାଗୁ କରିବାକୁ ଅନୁରୋଧ କରିଛନ୍ତି।

ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢୀ କହିଛନ୍ତି, “ନାଟମଣ୍ଡପକୁ ସମ୍ପୂର୍ଣ୍ଣ ଶୀତତାପ ନିୟନ୍ତ୍ରିତ କରାଯାଇଥିବାରୁ ଭକ୍ତମାନେ ଅତି ସୁନ୍ଦର ଭାବେ ମହାପ୍ରଭୁଙ୍କ ଦର୍ଶନ ପାଇପାରିବେ। ଆଗାମୀ ଦିନରେ ରାଜ୍ୟ ସରକାର ଶୃଙ୍ଖଳିତ ଦର୍ଶନ ପାଇଁ ନାଟମଣ୍ଡପରେ ଧାଡ଼ି ଦର୍ଶନ ବ୍ୟବସ୍ଥା କାର୍ଯ୍ୟକାରୀ କରିବେ।” ତେବେ ଏହି ଧାଡ଼ି ଦର୍ଶନ ବ୍ୟବସ୍ଥା କେବେ ଆରମ୍ଭ ହେବ, ତାହା ଏବେ ସମସ୍ତଙ୍କ ଅପେକ୍ଷା।

The post ଶୀତତାପ ନିୟନ୍ତ୍ରିତ ହେଲା ଶ୍ରୀମନ୍ଦିର ନାଟମଣ୍ଡପ appeared first on Sanket Tv.

ଏଥର ଉପର ଓ ତଳ ପଡ଼ିଆ ଉଭୟ ସ୍ଥାନରେ ବାଲିଯାତ୍ରା ଆୟୋଜନ କରିବାକୁ ପ୍ରଶାସନ ପକ୍ଷରୁ ପ୍ରସ୍ତାବ ଦିଆଯାଇଛି। ତେବେ ଏହା ଉପରେ ରାଜ୍ୟ ସରକାରଙ୍କ ଉଚ୍ଚସ୍ତରୀୟ ବୈଠକରେ ଅନ୍ତିମ ନିଷ୍ପତ୍ତି ନିଆଯିବ। ବ୍ୟବସାୟୀଙ୍କ ଲାଭ ଓ ଅଧିକ ଦର୍ଶକଙ୍କୁ ଆକୃଷ୍ଟ କରିବା ପାଇଁ ଜନସାଧାରଣଙ୍କଠାରୁ ମଧ୍ୟ ପ୍ରସ୍ତାବ ମଗାଯାଇଛି।

ଗତବର୍ଷ ବାଲିଯାତ୍ରା ପଡ଼ିଆରେ ଘଟିଥିବା ଭୟଙ୍କର ଦୋଳି ଅଘଟଣକୁ ସାମ୍ନାକୁ ରଖି ଏଥର କଟକ ଜିଲ୍ଲା ପ୍ରଶାସନ ଅତ୍ୟନ୍ତ କଠୋର ଆଭିମୁଖ୍ୟ ଗ୍ରହଣ କରିଛି। ଗତବର୍ଷ ଏକ ଦୋଳି ହଠାତ୍ ଅଚଳ ହୋଇଯିବା ଯୋଗୁଁ ଦୁଇ ଘଣ୍ଟାରୁ ଉର୍ଦ୍ଧ୍ୱ ସମୟ ଧରି ୮ ଜଣ ଦର୍ଶକ ଆକାଶରେ ଝୁଲି ରହି ନାହିଁ ନଥିବା ଦୁର୍ଦ୍ଦଶା ଭୋଗିଥିଲେ। ଏହି ସମ୍ବେଦନଶୀଳ ଘଟଣାକୁ ଦୃଷ୍ଟିରେ ରଖି କଟକ ଜିଲ୍ଲାପାଳ ସ୍ପଷ୍ଟ କରିଛନ୍ତି ଯେ, ଏଥର ବାଲିଯାତ୍ରାରେ କୌଣସି ପୁରୁଣା ଦୋଳି ଲଗାଇବାକୁ ଆଦୌ ଅନୁମତି ଦିଆଯିବ ନାହିଁ।

ପ୍ରତିବର୍ଷ ବାଲିଯାତ୍ରାରେ ଦେଖାଦେଉଥିବା ଟ୍ରାଫିକ୍ ସମସ୍ୟାର ସ୍ଥାୟୀ ସମାଧାନ ପାଇଁ ଏଥର ବିଶେଷ ପ୍ଲାନ୍ କରାଯାଇଛି। ଚହାଟା ରୋଡ୍‌ର ଗୋଟିଏ ପାର୍ଶ୍ୱକୁ ସମ୍ପୂର୍ଣ୍ଣ ପାର୍କିଂ ପାଇଁ ବ୍ୟବହାର କରାଯିବ ଓ ଅନ୍ୟ ପାର୍ଶ୍ୱରେ ଟ୍ରାଫିକ୍ ଚାଲିବ। ଗତବର୍ଷ ଅପେକ୍ଷା ପାର୍କିଂ ସ୍ଥଳ ଯଥେଷ୍ଟ ବୃଦ୍ଧି ପାଇବ। ମହାନଦୀ ବକ୍ଷରେ ପ୍ରତିଦିନ ଜଳକ୍ରୀଡ଼ା ଓ ବୋଟ୍ ରେସ୍ ଆୟୋଜିତ ହେବ। ଦର୍ଶକଙ୍କୁ ଅପରାହ୍ନ ପୂର୍ବରୁ ଆକୃଷ୍ଟ କରିବା ପାଇଁ ପ୍ରତିଦିନ ସ୍ୟାଣ୍ଡ ଆର୍ଟ, ମହାନଦୀ ପେଣ୍ଟିଂ ଓ ଫ୍ଲାୱାର ଶୋ’ ଭଳି ସ୍ୱତନ୍ତ୍ର ‘ଡେ-ଏଙ୍ଗେଜମେଣ୍ଟ’ ଥିମ୍ ରଖାଯିବ। ବାଲିଯାତ୍ରାରେ ଲେଜର ଶୋ’ ଓ ଫାୟାର ୱାର୍କସ୍ ସହ ଦୁଇଟି ପ୍ରମୁଖ ମଞ୍ଚରେ ସାଂସ୍କୃତିକ କାର୍ଯ୍ୟକ୍ରମ ହେବ।

୧୫ରୁ ଉର୍ଦ୍ଧ୍ୱ ରାଜ୍ୟର ଲୋକକଳାକାରଙ୍କ ସହ ବଲିଉଡ୍ ଓ ଓଲିଉଡ୍ ଆର୍ଟିଷ୍ଟମାନେ ସଙ୍ଗୀତ ପରିବେଷଣ କରିବେ। ଏଥର ପୁରୁଣା ଇନଷ୍ଟଲେସନକୁ ବ୍ୟାନ୍ କରାଯିବ। ପ୍ରତି ଷ୍ଟଲ୍ ପାଇଁ ଫାୟାର୍, ଇଲେକ୍ଟ୍ରିକାଲ୍, ଷ୍ଟ୍ରକ୍ଚରାଲ୍ ଓ ମେକାନିକାଲ୍ ସେଫ୍ଟି— ଏହି ୪ଟି ସେଫ୍ଟି ସାର୍ଟିଫିକେଟ୍ ବାଧ୍ୟତାମୂଳକ କରାଯାଇଛି। ଏହାସହ ବାଲିଯାତ୍ରା ଇତିହାସରେ ପ୍ରଥମ ଥର ପାଇଁ ଏକ ସ୍ୱତନ୍ତ୍ର ‘ଡିଜାଷ୍ଟର ମ୍ୟାନେଜମେଣ୍ଟ ପ୍ଲାନ୍’ (Disaster Management Plan) ଲାଗୁ ହେବ ବୋଲି ସୂଚନା ଦେଇଛନ୍ତି କଟକ ଜିଲ୍ଲାପାଳ ଦତ୍ତାତ୍ରୟ ଭାଉ ସାହେବ ସିନ୍ଦେ।

The post ନଭେମ୍ବର ୨୪ରୁ କଟକ ବାଲିଯାତ୍ରା; ଏଥର ଉପର ଓ ତଳ ପଡ଼ିଆରେ ବିଶ୍ୱପ୍ରସିଦ୍ଧ ମହୋତ୍ସବ appeared first on Sanket Tv.

ସମଗ୍ର ମୁକ୍ତି ମଣ୍ଡପକୁ ପାରମ୍ପରିକ ସୋଲ ଓ ଜରି ଜମ୍ବୁରା କାର୍ଯ୍ୟରେ କାଠ ନିର୍ମିତ ଝୁଲା ସଜାଯାଇ ଏକ କୁଞ୍ଜ ନିର୍ମାଣ କରାଯିବ । ଏହି କୁଞ୍ଜକୁ ସୁନ୍ଦର ଆଲୋକ ମାଳାରେ ସଜ୍ଜିତ କରାଯିବା ସହ କୁଞ୍ଜରେ ମଦନ ମୋହନ, ଭୂଦେବୀ ଓ ଶ୍ରୀଦେବୀଙ୍କ ବିଜେ କରାଇବାର ପରମ୍ପରା ରହିଛି । ମଣ୍ଡପ ତଳେ ଭୀମ, ଅର୍ଜୁନଙ୍କ ଶୋଭା ମଣ୍ଡନ କରାଯିବା ସହ ଦୁଇ ପାର୍ଶ୍ୱରେ କାଳୀୟଦଳନ ଓ କୃଷ୍ଣ ଜନ୍ମର ଲୀଳା ପ୍ରଦର୍ଶିତ ହୋଇଥାଏ । ଝୁଲଣ କୁଞ୍ଜରେ ବିଭିନ୍ନ ପକ୍ଷୀଙ୍କ ବିରାଜମାନ ଦୃଶ୍ୟ ସମସ୍ତଙ୍କୁ ଆକର୍ଷିତ କରିଥାଏ ।

ଶ୍ରୀ ଜଗନ୍ନାଥ ବଲ୍ଲଭ ମଠ ସମେତ ଶ୍ରୀକ୍ଷେତ୍ରରେ ଥିବା ଅନେକ ଛୋଟ ବଡ଼ ମଠରେ ଏହି ଝୁଲଣ ଯାତ୍ରାକୁ ମହା ଆଡ଼ମ୍ବର ସହକାରେ ପାଳନ କରାଯାଇଥାଏ । ଏହି ଅବସରରେ ବିଭିନ୍ନ ସ୍ଥାନରେ ପାରମ୍ପରିକ ଚମ୍ପୁ, ଛନ୍ଦ ଓ ପୂରାତନ ଝୁଲଣର ରାସ ଗୀତ ପରିବେଷଣ କରାଯାଇଥାଏ ।

ଜଗନ୍ନାଥ ବଲ୍ଲଭ ମଠରେ ଚଳିତ ବର୍ଷ ଅନେକ ନୂଆ ସାଜ ତିଆରି ହୋଇଛି । ଦ୍ୱାପର ଯୁଗ ଆଧାରିତ ଶ୍ରୀକୃଷ୍ଣଙ୍କ ଲୀଳା ଓ ପ୍ରକୃତିର ରଙ୍ଗ ରୂପକୁ ନେଇ ବିଶେଷ ପ୍ରସ୍ତୁତି କରାଯାଇଛି ।

The post ଶ୍ରୀକ୍ଷେତ୍ରରେ ଆରମ୍ଭ ହେଲା ୭ ଦିନିଆ ଝୁଲଣ ଯାତ୍ରା appeared first on Sanket Tv.

ଏହି ଗଣତି ସମୟରେ ରତ୍ନଭଣ୍ଡାରରେ ରହିଥିବା ବିଭିନ୍ନ ମୂଲ୍ୟବାନ ସାମଗ୍ରୀ, ଅଳଙ୍କାର ଓ ଅନ୍ୟାନ୍ୟ ବସ୍ତୁର ହିସାବ ଏବଂ ତଥ୍ୟ ଯାଞ୍ଚ କରାଯିବ। ପୂର୍ବରୁ ଏହି ସାମଗ୍ରୀଗୁଡ଼ିକର ସୁରକ୍ଷା ଓ ରକ୍ଷଣାବେକ୍ଷଣ ପାଇଁ ବିଭିନ୍ନ ସମୟରେ ପଦକ୍ଷେପ ନିଆଯାଇଥିଲା।

ଶ୍ରୀମନ୍ଦିର ପ୍ରଶାସନ ଏହି କାର୍ଯ୍ୟରେ ସମସ୍ତ ସେବକ ଓ ଶ୍ରଦ୍ଧାଳୁଙ୍କ ସହଯୋଗ ଓ ସହାୟତା କାମନା କରିଛି। ଗଣତି ସମୟରେ ଶୃଙ୍ଖଳା ବଜାୟ ରଖିବା ସହ ନିର୍ଦ୍ଧାରିତ ପ୍ରକ୍ରିୟାକୁ ସହଯୋଗ କରିବାକୁ ସମସ୍ତଙ୍କୁ ଅନୁରୋଧ କରାଯାଇଛି।

ନିର୍ଦ୍ଧାରିତ ତାରିଖରେ ଗଣତି କାର୍ଯ୍ୟ ହେବାକୁ ଥିବାରୁ ଶ୍ରୀମନ୍ଦିର ସେବକ ଓ ଭକ୍ତମହଲରେ ଏହାକୁ ନେଇ ବେଶ୍ ଉତ୍ସୁକତା ଦେଖାଦେଇଛି। ଏହି ପ୍ରକ୍ରିୟାରେ ସମ୍ପୃକ୍ତ ସମସ୍ତ ପକ୍ଷଙ୍କ ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ରହିବ ବୋଲି ପ୍ରଶାସନ ପକ୍ଷରୁ କୁହାଯାଇଛି।

The post ୩୧ ଓ ୧ ତାରିଖରେ ହେବ ପୁରୀ ଶ୍ରୀମନ୍ଦିର ରତ୍ନଭଣ୍ଡାର ଗଣତି appeared first on Sanket Tv.

ଆଜିଠାରୁ ଆଉ କୌଣସି ନୂଆ ତୀର୍ଥଯାତ୍ରୀ ବ୍ୟାଚ୍କୁ ଅମରନାଥ ଯାତ୍ରା ପାଇଁ ପଠାଯିବ ନାହିଁ। ତେବେ ପୂର୍ବରୁ ଯାତ୍ରାରେ ଥିବା ବ୍ୟାଚ୍ ଗୁଡ଼ିକୁ ତୀର୍ଥଯାତ୍ରା ସୁରକ୍ଷିତ ଭାବେ ସମାପ୍ତ କରିବାକୁ ଅନୁମତି ଦିଆଯାଇଛି।

ଏପର୍ଯ୍ୟନ୍ତ ୪ ଲକ୍ଷ ୮୦ ହଜାରରୁ ଅଧିକ ଶ୍ରଦ୍ଧାଳୁ ବାବା ଅମରନାଥଙ୍କ ପବିତ୍ର ଗୁମ୍ଫା ଦର୍ଶନ କରିସାରିଛନ୍ତି। ୨୦୨୬ ମସିହାର ଏହି ଯାତ୍ରା ୫୭ ଦିନ ଧରି ଚାଲିବାକୁ ଥିଲା।

କ୍ଷତିଗ୍ରସ୍ତ ଯାତ୍ରାପଥର ପୁନରୁଦ୍ଧାର ଓ ସ୍ଥିରୀକରଣ କାମ ଆରମ୍ଭ ହୋଇଛି। ବର୍ଡର ରୋଡ୍ ଅର୍ଗାନାଇଜେସନ୍ (BRO) କ୍ଷତିଗ୍ରସ୍ତ ଅଂଶଗୁଡ଼ିକର ମରାମତି ଓ ଟ୍ରାକ୍କୁ ପୁନଃ ସୁରକ୍ଷିତ କରିବା କାମରେ ନିୟୋଜିତ ରହିଛି।

ଅଧିକାରୀମାନଙ୍କ ଅନୁଯାୟୀ, ଏବେ ମୁଖ୍ୟ ଲକ୍ଷ୍ୟ ହେଉଛି ଯାତ୍ରାପଥକୁ ସୁରକ୍ଷିତ କରିବା ଏବଂ ପୂର୍ବରୁ ଯାତ୍ରାରେ ଥିବା ଶ୍ରଦ୍ଧାଳୁମାନଙ୍କୁ ସୁରକ୍ଷିତ ଭାବେ ଫେରାଇ ଆଣିବା।

The post ଅମରନାଥ ଯାତ୍ରା ୨୦ ଦିନ ପୂର୍ବରୁ ସ୍ଥଗିତ, ବର୍ଷା ଓ ଭୂସ୍ଖଳନ ଯୋଗୁଁ ରାସ୍ତାଘାଟ କ୍ଷତିଗ୍ରସ୍ତ appeared first on Sanket Tv.

ଶ୍ରୀମନ୍ଦିରର ମୁଖ୍ୟ ପ୍ରଶାସକ ଡକ୍ଟର ଅରବିନ୍ଦ କୁମାର ପାଢ଼ୀ ସାମାଜିକ ଗଣମାଧ୍ୟମ ‘ଏକ୍ସ’ ଜରିଆରେ ଏହି ସୂଚନା ପ୍ରଦାନ କରିଛନ୍ତି। ସେ ଜଣାଇଛନ୍ତି ଯେ ଏହି ଆବେଦନଗୁଡ଼ିକ ଦ୍ୱିତୀୟ ପର୍ଯ୍ୟାୟ ପରୀକ୍ଷାରେ ଉତ୍ତୀର୍ଣ୍ଣ ହୋଇଛି ଏବଂ ଆଗାମୀ ଟ୍ରେଡମାର୍କ ଜର୍ଣ୍ଣାଲରେ ପ୍ରକାଶନ ପାଇଁ ଅନୁମୋଦିତ ହୋଇଛି। ଏହି ସଫଳତା ପରେ ମନ୍ଦିର ପ୍ରଶାସନ ପକ୍ଷରୁ ଖୁସି ପ୍ରକାଶ ପାଇଛି।

ଯେଉଁ ୫ଟି ପବିତ୍ର ନାମକୁ ଅନୁମୋଦନ ମିଳିଛି, ସେଗୁଡ଼ିକ ହେଲା- ‘ଜଗନ୍ନାଥ ଧାମ’, ‘ଶ୍ରୀକ୍ଷେତ୍ର’, ‘ମହାପ୍ରସାଦ’, ‘ନୀଳଚକ୍ର’ ଏବଂ ‘କୋଇଲି ବୈକୁଣ୍ଠ’। ଏହି ସମସ୍ତ ନାମ ଶ୍ରୀମନ୍ଦିର ଏବଂ ମହାପ୍ରଭୁ ଶ୍ରୀ ଜଗନ୍ନାଥଙ୍କ ସହ ଗଭୀର ଭାବେ ଜଡ଼ିତ। ଏଗୁଡ଼ିକର ଟ୍ରେଡମାର୍କ ହେବା ଦ୍ୱାରା ଏହାର ବ୍ୟବହାର ଉପରେ ଆଇନଗତ ନିୟନ୍ତ୍ରଣ ସ୍ଥାପିତ ହୋଇପାରିବ।

ଏହି ପଦକ୍ଷେପର ମୁଖ୍ୟ ଉଦ୍ଦେଶ୍ୟ ହେଉଛି ମହାପ୍ରଭୁ ଶ୍ରୀ ଜଗନ୍ନାଥ ଏବଂ ପୁରୀର ଦ୍ୱାଦଶ ଶତାବ୍ଦୀର ଶ୍ରୀମନ୍ଦିର ସହିତ ଜଡ଼ିତ ନାମ ଓ ପ୍ରତୀକଗୁଡ଼ିକର ବେଆଇନ ବ୍ୟବହାର ତଥା ବ୍ୟାବସାୟିକ ଅପବ୍ୟବହାରକୁ ରୋକିବା। ବିଶେଷକରି ବ୍ୟବସାୟିକ ପ୍ରତିଷ୍ଠାନଗୁଡ଼ିକ ଏହି ପବିତ୍ର ନାମର ଦୁରୁପଯୋଗ କରୁଥିବାର ଅଭିଯୋଗ ପରେ ଏହି ନିଷ୍ପତ୍ତି ନିଆଯାଇଛି।

ଶ୍ରୀମନ୍ଦିରର ପବିତ୍ରତା ଏବଂ ଐତିହ୍ୟକୁ ବଜାୟ ରଖିବା ଦିଗରେ ଏହାକୁ ଏକ ବିଶେଷ ସଫଳତା ବୋଲି ମୁଖ୍ୟ ପ୍ରଶାସକ ବର୍ଣ୍ଣନା କରିଛନ୍ତି। ସେ କହିଛନ୍ତି ଯେ ଏହା ଦ୍ୱାରା ଶ୍ରୀଜଗନ୍ନାଥଙ୍କ ନାମ ଓ ଚିହ୍ନର ସୁରକ୍ଷା ସୁନିଶ୍ଚିତ ହୋଇପାରିବ ଏବଂ ଭକ୍ତମାନଙ୍କ ଭାବନାକୁ ସମ୍ମାନ ଦିଆଯାଇପାରିବ।

ଏହା ପୂର୍ବରୁ ମଧ୍ୟ ମନ୍ଦିର ଏବଂ ଏହାର ରୀତିନୀତି ସହିତ ଜଡ଼ିତ ଅନେକ ଶବ୍ଦକୁ ଟ୍ରେଡମାର୍କ କରାଯାଇଥିଲା, ଯାହାଦ୍ୱାରା ଧାର୍ମିକ ଏବଂ ସାଂସ୍କୃତିକ ଉଦ୍ଦେଶ୍ୟରେ ସେଗୁଡ଼ିକର କେବଳ ସ୍ୱତନ୍ତ୍ର ବ୍ୟବହାରକୁ ହିଁ ସୁନିଶ୍ଚିତ କରାଯାଇପାରିବ। ଏବେ ଏହି ନୂଆ ୫ଟି ନାମ ଏହି ତାଲିକାରେ ଯୋଡ଼ି ହୋଇଛି, ଯାହା ମନ୍ଦିରର ସୁରକ୍ଷା ବ୍ୟବସ୍ଥାକୁ ଆହୁରି ସୁଦୃଢ଼ କରିବ।

ଏହି ଟ୍ରେଡମାର୍କ ମଞ୍ଜୁରୀ ପରେ ଏବେ କୌଣସି ବ୍ୟକ୍ତି ବା ଅନୁଷ୍ଠାନ ବିନା ଅନୁମତିରେ ଏହି ନାମଗୁଡ଼ିକୁ ବ୍ୟବସାୟିକ ଉଦ୍ଦେଶ୍ୟରେ ବ୍ୟବହାର କରିପାରିବେ ନାହିଁ। ଏହା ଦ୍ୱାରା ପୁରୀ ଶ୍ରୀମନ୍ଦିରର ଗୌରବ ଏବଂ ଐତିହ୍ୟ ଅଧିକ ସୁରକ୍ଷିତ ହୋଇପାରିବ ବୋଲି ବିଶ୍ୱାସ କରାଯାଉଛି।

The post ଶ୍ରୀ ଜଗନ୍ନାଥ ମନ୍ଦିରର ୫ ପବିତ୍ର ନାମ ପାଇଁ ଟ୍ରେଡମାର୍କ ଅନୁମୋଦନ appeared first on Sanket Tv.