କେନ୍ଦ୍ର ସରକାର ରକ୍ତଚାପ, ମଧୁମେହ, ହୃଦରୋଗ ଭଳି ଗୁରୁତର ରୋଗ ପାଇଁ ୩୫ଟି ପ୍ରମୁଖ ଔଷଧର ଦର ନିର୍ଦ୍ଧାରଣ କରିଛନ୍ତି। ଏହି ନିଷ୍ପତ୍ତି ପାଇଁ ମୁକେଶ ମହାଲିଙ୍ଗ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ ଏବଂ ପ୍ରଧାନମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି। ଏହାଦ୍ୱାରା ସାଧାରଣ ଲୋକମାନେ ସୁଲଭ ମୂଲ୍ୟରେ ଆବଶ୍ୟକୀୟ ଔଷଧ ପାଇପାରିବେ ବୋଲି ସେ କହିଛନ୍ତି।

ଅନ୍ୟପଟେ, ଖୋର୍ଦ୍ଧା କେମିଷ୍ଟ ଆଣ୍ଡ ଡ୍ରଗିଷ୍ଟ ଆସୋସିଏସନ୍ ସରକାରଙ୍କ ଏହି ନିଷ୍ପତ୍ତିକୁ ସ୍ୱାଗତ ଜଣାଇଛି। ଔଷଧ ବ୍ୟବସାୟୀ ସଂଘର କହିବା ଅନୁସାରେ, ମେଡିସିନ ମୂଲ୍ୟ ନିର୍ଦ୍ଧାରଣ ପାଇଁ ନ୍ୟାସନାଲ ଫାର୍ମାସୀ ପ୍ରାଇସିଂ ଅଥରିଟି (NPPA) ରହିଛି। ଏହି ନିର୍ଦ୍ଧାରିତ ଦରଠାରୁ ଅଧିକ ଟଙ୍କା ନେବାର ଅଧିକାର ବ୍ୟବସାୟୀଙ୍କୁ ନାହିଁ। ତେବେ ବିଭିନ୍ନ ବ୍ରାଣ୍ଡ୍ର ତାରତମ୍ୟ (ଭିନ୍ନତା) ଥିବା ଔଷଧ ଗୁଡ଼ିକ ପାଇଁ ଏହା ଅଧିକ ସୁବିଧା ଆଣିବ ବୋଲି ସଂଘ ପକ୍ଷରୁ କୁହାଯାଇଛି।

ଏହି ନୂଆ ନିୟମ କାର୍ଯ୍ୟକାରୀ ହେଲେ ଗ୍ରାହକମାନେ ଠକାମୀର ଶିକାର ହେବେ ନାହିଁ। ଗୋଟିଏ ସମାନ କମ୍ପୋଜିସନ୍ (ଉପାଦାନ) ଥିବା ଔଷଧ ସବୁ ସ୍ଥାନରେ ସମାନ ଦରରେ ଉପଲବ୍ଧ ହେବ। ଏହାଦ୍ୱାରା ସାଧାରଣ ଲୋକଙ୍କ ଅର୍ଥର ବଞ୍ଚତ ହେବା ସହ ଔଷଧ କ୍ଷେତ୍ରରେ ସ୍ୱଚ୍ଛତା ଆସିବ। ଗ୍ରାହକମାନେ ମଧ୍ୟ ଏହି ପଦକ୍ଷେପକୁ ସ୍ୱାଗତ କରି କହିଛନ୍ତି ଯେ, ଏହା ଦ୍ୱାରା ସେମାନେ ଶୋଷଣରୁ ରକ୍ଷା ପାଇବେ।

The post ରାଜ୍ୟର ସମସ୍ତ ଔଷଧ ଦୋକାନରେ ଲାଗିବ ଏକୀକୃତ ରେଟ୍ ଚାର୍ଟ appeared first on Sanket Tv.

ନୂଆ ମୂଲ୍ୟ ତାଲିକାରେ ଉଚ୍ଚ ରକ୍ତଚାପ, ମଧୁମେହ (ଡାୟାବେଟିସ୍), ହୃଦ୍ ରୋଗ, HIV ଏବଂ ଆଖି ସଂକ୍ରମଣ ଭଳି ଗୁରୁତର ରୋଗର ଚିକିତ୍ସା ପାଇଁ ବ୍ୟବହୃତ ଔଷଧ ସାମିଲ ରହିଛି। ଯଥା – ଆମ୍ଲୋଡିପାଇନ, ବାଇସୋପ୍ରୋଲୋ ଓ ଟେଲମିସାର୍ଟାନ ପ୍ରତି ଟାବଲେଟର ମୂଲ୍ୟ ୧୪ ଟଙ୍କା ୭୪ ପଇସା ଧାର୍ଯ୍ୟ କରାଯାଇଛି। ସରକାରଙ୍କ ଏହି ନିଷ୍ପତ୍ତି ଫଳରେ ଏବେ ଔଷଧ କମ୍ପାନୀଗୁଡ଼ିକ ନିର୍ଦ୍ଧାରିତ ଦରଠାରୁ ଅଧିକ ଦାମ୍ ନେଇପାରିବେ ନାହିଁ।

NPPA ପକ୍ଷରୁ କୁହାଯାଇଛି ଯେ, ବଜାରକୁ ଆସୁଥିବା ପ୍ରତ୍ୟେକ ନୂଆ ବ୍ୟାଚ୍ ଔଷଧର ଷ୍ଟ୍ରିପ୍ ଉପରେ ଏହି ସଂଶୋଧିତ MRP (ସର୍ବୋଚ୍ଚ ଖୁଚୁରା ମୂଲ୍ୟ) ଛାପିବା ବାଧ୍ୟତାମୂଳକ। ସମସ୍ତ ଔଷଧ ପ୍ରସ୍ତୁତକାରୀ ଏବଂ ବିକ୍ରେତାଙ୍କୁ ତୁରନ୍ତ ଏହି ନୂଆ ଦର ଲାଗୁ କରିବାକୁ ନିର୍ଦ୍ଦେଶ ଦିଆଯାଇଛି। ଏହାଦ୍ୱାରା ଗ୍ରାହକମାନେ ସଠିକ୍ ମୂଲ୍ୟରେ ଔଷଧ ପାଇପାରିବେ ଏବଂ ଅତ୍ୟଧିକ ଦାମ୍ ଦେବାକୁ ବାଧ୍ୟ ହେବେ ନାହିଁ।

ଯଦି କୌଣସି ଔଷଧ କମ୍ପାନୀ କିମ୍ବା ଖୁଚୁରା ଦୋକାନଦାର ଧାର୍ଯ୍ୟ ମୂଲ୍ୟଠାରୁ ଅଧିକ ଟଙ୍କା ଗ୍ରାହକଙ୍କଠାରୁ ଆଦାୟ କରନ୍ତି, ତେବେ ସେମାନଙ୍କ ବିରୋଧରେ କଠୋର ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଗ୍ରାହକମାନେ ଔଷଧ କିଣିବା ସମୟରେ ପ୍ୟାକେଟ୍ରେ ଥିବା MRP ନିଶ୍ଚୟ ଯାଞ୍ଚ କରନ୍ତୁ। ଯଦି କୌଣସି ବିକ୍ରେତା ଅଧିକ ଦାମ୍ ନେଉଛନ୍ତି, ତେବେ ଗ୍ରାହକ ନିଜ ନିକଟସ୍ଥ NPPA କାର୍ଯ୍ୟାଳୟ କିମ୍ବା ଔଷଧ ନିୟନ୍ତ୍ରଣ ବିଭାଗରେ ଅଭିଯୋଗ ଦାଖଲ କରିପାରିବେ।

The post ୩୯ଟି ନୂଆ ଔଷଧର ମୂଲ୍ୟ ସ୍ଥିର କଲେ କେନ୍ଦ୍ର ସରକାର appeared first on Sanket Tv.

ଫାର୍ମାସ୍ୟୁଟିକାଲ୍ କମ୍ପାନି ନୋଭୋ ନୋର୍ଡିସ୍କ (Novo Nordisk) ଦ୍ୱାରା ପ୍ରସ୍ତୁତ ଏହି ଇନସୁଲିନକୁ ଚିକିତ୍ସା କ୍ଷେତ୍ରରେ ବ୍ୟବହାର ପାଇଁ ଅନୁମତି ମିଳିସାରିଛି। ଏହି ସେବା ପାଇବାରେ ଭାରତ ବିଶ୍ୱର ପ୍ରଥମ ଦେଶଗୁଡ଼ିକ ମଧ୍ୟରେ ସାମିଲ ହୋଇଛି।

ରଏଟର୍ସ ରିପୋର୍ଟ ଅନୁଯାୟୀ, ଭାରତରେ ଏହି ଇନସୁଲିନର ପ୍ରଚଳନ ଏଭଳି ସମୟରେ ଆରମ୍ଭ ହୋଇଛି, ଯେତେବେଳେ ବିଶ୍ୱର ସର୍ବାଧିକ ମଧୁମେହରେ ପୀଡିତ ଏହି ଦେଶରେ ରହୁଛନ୍ତି। ଭାରତରେ ୧୦୧ ନିୟୁତରୁ ଅଧିକ ଲୋକ ମଧୁମେହରେ ପୀଡିତ ଥିବା ବେଳେ ଆଉ ୧୩୬ ନିୟୁତ ଲୋକ ପ୍ରି-ଡାଇବେଟିସ୍ ରୋଗରେ ପୀଡିତ ବୋଲି ଆକଳନ କରାଯାଉଛି।

ସାଧାରଣତଃ ଡାଇବେଟିସ୍ ରୋଗୀଙ୍କୁ ପ୍ରତିଦିନ ଇନସୁଲିନ୍ ଇଞ୍ଜେକ୍ସନ୍ ନେବାକୁ ପଡ଼ିଥାଏ। ବର୍ଷକୁ ପ୍ରାୟ ୩୬୫ଟି ହୋଇଥାଏ। ମାତ୍ର ‘ଆୱିକ୍ଲି’ ଆସିବା ପରେ ରୋଗୀଙ୍କୁ ବର୍ଷକୁ ମାତ୍ର ୫୨ଟି ଇଞ୍ଜେକ୍ସନ୍ ନେବାକୁ ପଡ଼ିବ। ଏହା ପ୍ରତିଦିନ ନେଉଥିବା ଇନସୁଲିନ୍ ଭଳି କିମ୍ବା ତା’ଠାରୁ ଅଧିକ ଭଲ ଭାବରେ ବ୍ଲଡ୍ ସୁଗାର ସ୍ତରକୁ ନିୟନ୍ତ୍ରଣ କରିଥାଏ।

ଆୱିକ୍ଲି ହେଉଛି ଏକ ଦୀର୍ଘ-କାର୍ଯ୍ୟକାରୀ ବେସାଲ୍ ଇନସୁଲିନ୍। ଏହାକୁ ସପ୍ତାହ ଧରି ଇନସୁଲିନ୍ ସମର୍ଥନ ପ୍ରଦାନ କରିବା ପାଇଁ ଡିଜାଇନ୍ କରାଯାଇଛି। ଏକ ପ୍ରି-ଫିଲ୍ଡ ପେନ୍ ସାହାଯ୍ୟରେ ଏହାକୁ ସପ୍ତାହର ଗୋଟିଏ ନିର୍ଦ୍ଦିଷ୍ଟ ବାରରେ ପେଟ, ଜଙ୍ଘ କିମ୍ବା ହାତର ଚମଡ଼ା ତଳେ ନିଆଯାଇଥାଏ। ରୋଗୀଙ୍କ ରକ୍ତ ଶର୍କରା ସ୍ତର ଅନୁସାରେ ଡୋଜ୍ ଆଡଜଷ୍ଟ କରାଯାଏ।

ଟାଇପ୍-୨ ଡାଇବେଟିସ୍ ରୋଗୀ ଏହାକୁ ଏକାକୀ କିମ୍ବା ଅନ୍ୟ ଔଷଧ ସହ ନେଇପାରିବେ। କିନ୍ତୁ, ଟାଇପ୍-୧ ଡାଇବେଟିସ୍ ରୋଗୀଙ୍କ କ୍ଷେତ୍ରରେ ଏହା ସହିତ ଖାଇବା ସମୟରେ ନିଆଯାଉଥିବା ସ୍ୱଳ୍ପକାଳୀନ ଇନସୁଲିନ୍ ମଧ୍ୟ ଆବଶ୍ୟକ ହେବ।

ଏହି ଔଷଧରେ ଇନସୁଲିନ୍ ଆଇକୋଡେକ୍ ଅଛି, ଯାହା ବ୍ଲଡ୍ ପ୍ରୋଟିନ୍ ଆଲବୁମିନ୍ ସହିତ ମିଶି ରହିଥାଏ। ଏହା ଧୀରେ ଧୀରେ ଏବଂ ସ୍ଥିର ଭାବରେ ପୂରା ସପ୍ତାହ ଯାକ ଶରୀରକୁ ଇନସୁଲିନ୍ ଯୋଗାଇଥାଏ। ରକ୍ତ ପ୍ରବାହରୁ କୋଷଗୁଡ଼ିକୁ ଗ୍ଲୁକୋଜ୍ ସ୍ଥାନାନ୍ତର କରିବାରେ ସାହାଯ୍ୟ କରିଥାଏ ଏବଂ ରକ୍ତରେ ଶର୍କରା ସ୍ତରକୁ ହ୍ରାସ କରିଥାଏ।

ନୋଭୋ ନୋର୍ଡିସ୍କ ଇଣ୍ଡିଆର ଏମଡି ବିକ୍ରାନ୍ତ ଶ୍ରୋତ୍ରୀୟ କହିଛନ୍ତି, ଭାରତ ହେଉଛି ଆୱିକ୍ଲି ଲଞ୍ଚ କରିଥିବା ସପ୍ତମ ଦେଶ। ପ୍ରତିଦିନ ଇଞ୍ଜେକ୍ସନ ଭୟରେ ଅନେକ ରୋଗୀ ଇନସୁଲିନ୍ ନେବାକୁ ପଛଘୁଞ୍ଚା ଦେଇଥାନ୍ତି, ଏହି ନୂଆ ଇନସୁଲିନ୍ ସେମାନଙ୍କ ସେହି ଭୟ ଓ ମାନସିକ ଅସୁବିଧାକୁ ଦୂର କରିବ।

The post ଭାରତରେ ଉପଲବ୍ଧ ହେଲା ସପ୍ତାହକୁ ଥରେ ଲାଗୁଥିବା ଇନସୁଲିନ୍ ଆୱିକ୍ଲି appeared first on Sanket Tv.

ଲୋକସେବା ଭବନରେ ଅନୁଷ୍ଠିତ ବୈଠକରେ OMSAର ସାଧାରଣ ସମ୍ପାଦକ ଓ ସଭାପତି ଉପସ୍ଥିତ ରହି ଡାକ୍ତରମାନଙ୍କର ୧୦ ଦଫା ଦାବି ନେଇ ଆଲୋଚନା କରିଥିଲେ। ବୈଠକ ପରେ ସ୍ୱାସ୍ଥ୍ୟମନ୍ତ୍ରୀ ଶ୍ରୀ ମହାଲିଙ୍ଗ ସୂଚନା ଦେଇଛନ୍ତି ଯେ, ଡାକ୍ତର ସଂଘ ସହିତ ଅତ୍ୟନ୍ତ ରଚନାତ୍ମକ ଆଲୋଚନା ହୋଇଛି ଏବଂ OMSA ପକ୍ଷରୁ ଆନ୍ଦୋଳନ ସ୍ଥଗିତ ରଖିବାକୁ ସମ୍ମତି ଦିଆଯାଇଛି।

ଡାକ୍ତରଙ୍କ ସମସ୍ୟାର ସମାଧାନ ପାଇଁ ଏକ ଉଚ୍ଚସ୍ତରୀୟ କମିଟି ଗଠନ କରାଯାଇଛି। ଏହି କମିଟିରେ ମୁଖ୍ୟ ଶାସନ ସଚିବ (ଜିଏ), ଆଇନ ସଚିବ, ସ୍ୱାସ୍ଥ୍ୟ ସଚିବ ଓ ଅର୍ଥ ସଚିବଙ୍କୁ ସାମିଲ କରାଯାଇଛି। କମିଟିର ଅଧ୍ୟକ୍ଷତା ଅର୍ଥ ସଚିବ କରିବେ। ଆସନ୍ତା ୨୨ ତାରିଖରେ ଏହି କମିଟିର ପ୍ରଥମ ବୈଠକ ଅନୁଷ୍ଠିତ ହେବ ଏବଂ ସେଥିରେ କିପରି ଦାବିଗୁଡ଼ିକୁ କାର୍ଯ୍ୟକାରୀ କରାଯିବ, ସେନେଇ ବିସ୍ତୃତ ଆଲୋଚନା ହେବ।

ସ୍ୱାସ୍ଥ୍ୟମନ୍ତ୍ରୀ ଆହୁରି ମଧ୍ୟ କହିଛନ୍ତି ଯେ, ଏହି ବୁଝାମଣା ପରେ ଓଡ଼ିଶାରେ ସ୍ୱାସ୍ଥ୍ୟସେବା ଉପରେ କୌଣସି ପ୍ରତିକୂଳ ପ୍ରଭାବ ପଡ଼ିବ ନାହିଁ। ସେ ଆଶା ପ୍ରକାଶ କରିଛନ୍ତି ଯେ, ଆଗାମୀ ଦିନରେ ସମସ୍ତ ସମସ୍ୟାର ସମାଧାନ ହୋଇପାରିବ।

ଓମସା ସଭାପତି ଡାକ୍ତର କିଶୋର ମିଶ୍ର ଏହି ନିଷ୍ପତ୍ତିକୁ ସ୍ୱାଗତ କରି କହିଛନ୍ତି ଯେ, “ଆନ୍ଦୋଳନ ସ୍ଥଗିତ ରହିଲା। ଆମେ ଗୁରୁତ୍ୱପୂର୍ଣ୍ଣ ସ୍ୱାସ୍ଥ୍ୟସେବା ଯୋଗାଇବୁ। ଆଶା କରୁଛୁ, କମିଟିରେ ସମସ୍ତ ଦାବି ଉପରେ ଗମ୍ଭୀର ଆଲୋଚନା ହେବ।” ସେ ନିଶ୍ଚିତ କରାଇଛନ୍ତି ଯେ, ଆଜିଠାରୁ ସମସ୍ତ ଆନ୍ଦୋଳନକାରୀ ଡାକ୍ତର ସେମାନଙ୍କର ନିୟମିତ କାର୍ଯ୍ୟରେ ଯୋଗ ଦେବେ।

The post ସ୍ୱାସ୍ଥ୍ୟ ମନ୍ତ୍ରୀଙ୍କ ସହ ଆଲୋଚନା ପରେ, ଡାକ୍ତରଙ୍କ ଆନ୍ଦୋଳନ ସ୍ଥଗିତ appeared first on Sanket Tv.

ଭୁବନେଶ୍ୱରସ୍ଥିତ କଳିଙ୍ଗ ଷ୍ଟାଡିୟମଠାରେ ଆୟୋଜିତ ଅନ୍ତର୍ଜାତୀୟ ଯୋଗ ଦିବସ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବରେ ଯୋଗଦେଇ ମୁଖ୍ୟମନ୍ତ୍ରୀ ଯୋଗକୁ ଶାରୀରିକ, ବୌଦ୍ଧିକ ଓ ଆଧ୍ୟାତ୍ମିକତାର ଏକ ଅପୂର୍ବ ସଙ୍ଗମ ବୋଲି ଅଭିହିତ କରିଛନ୍ତି। ଯୋଗ କୌଣସି ନିର୍ଦ୍ଦିଷ୍ଟ ଧର୍ମ ମଧ୍ୟରେ ସୀମିତ ନୁହେଁ, ବରଂ ମାନବ ଚେତନାର ବିକାଶ ପାଇଁ ଏକ ବିଶ୍ୱବ୍ୟାପୀ ଅମୂଲ୍ୟ ଉପହାର ବୋଲି ସେ ମତବ୍ୟକ୍ତ କରିଛନ୍ତି।

ଚଳିତ ବର୍ଷ ଯୋଗ ଦିବସର ବିଷୟବସ୍ତୁ “Yoga for Healthy Ageing” ବା “ନିରୋଗ ଓ ସୁସ୍ଥ ଜୀବନ ପାଇଁ ଯୋଗ” ରହିଛି। ଏହି ଅବସରରେ ମୁଖ୍ୟମନ୍ତ୍ରୀ କହିଛନ୍ତି ଯେ, ବୟସ ବଢ଼ିବା ସହିତ ଶରୀରରେ ଦେଖା ଦେଉଥିବା ଉଚ୍ଚ ରକ୍ତଚାପ, ମଧୁମେହ, ଚିନ୍ତା ଓ ଏକାକୀପଣ ଭଳି ସମସ୍ୟାର ସହଜ ସମାଧାନ ଯୋଗ ଓ ପ୍ରାଣାୟାମ ମାଧ୍ୟମରେ ସମ୍ଭବ। ରାଜ୍ୟର ବୟୋଜ୍ୟେଷ୍ଠ ନାଗରିକମାନଙ୍କ ସୁସ୍ଥତା ସମାଜ ପାଇଁ ଏକ ଅମୂଲ୍ୟ ସମ୍ପଦ ବୋଲି ସେ ମତ ଦେଇଛନ୍ତି।

ଡିଜିଟାଲ ଯୁଗରେ ମୋବାଇଲ ଓ ସୋସିଆଲ ମିଡିଆରେ ବ୍ୟସ୍ତ ରହୁଥିବା ଯୁବପିଢ଼ିଙ୍କୁ ମାନସିକ ଚାପମୁକ୍ତ ରହିବା ପାଇଁ ପ୍ରତିଦିନ ଅତିକମରେ ୨୦-୩୦ ମିନିଟ୍ ଯୋଗ କରିବାକୁ ମୁଖ୍ୟମନ୍ତ୍ରୀ ପରାମର୍ଶ ଦେଇଛନ୍ତି। ଯୋଗ କେବଳ ଶାରୀରିକ ସ୍ୱାସ୍ଥ୍ୟ ପାଇଁ ନୁହେଁ, ମାନସିକ ସନ୍ତୁଳନ ପାଇଁ ମଧ୍ୟ ଅତ୍ୟନ୍ତ ଫଳପ୍ରଦ ବୋଲି ସେ ଗୁରୁତ୍ୱାରୋପ କରିଛନ୍ତି।

ସରକାରଙ୍କ ପକ୍ଷରୁ ଆୟୁଷ ସ୍ୱାସ୍ଥ୍ୟସେବା ବ୍ୟବସ୍ଥାକୁ ଅଧିକ ସୁଦୃଢ଼ କରିବା ପାଇଁ ଗଜପତି, ମାଲକାନଗିରି ଓ ରାୟଗଡ଼ା ଜିଲ୍ଲାରେ ୩ଟି ନୂଆ ଆୟୁର୍ବେଦିକ ମେଡିକାଲ କଲେଜ ପ୍ରତିଷ୍ଠା କରାଯିବ ବୋଲି ଘୋଷଣା କରାଯାଇଛି। ଏହା ଦ୍ୱାରା ଦୁର୍ଗମ ଓ ଆଦିବାସୀ ଅଞ୍ଚଳରେ ପ୍ରାଚୀନ ଚିକିତ୍ସା ପଦ୍ଧତି ମାଧ୍ୟମରେ ସ୍ୱାସ୍ଥ୍ୟ ସେବା ପହଞ୍ଚିବ ବୋଲି ଆଶା କରାଯାଉଛି।

ମୁଖ୍ୟମନ୍ତ୍ରୀ ଅଧିକ ସୂଚନା ଦେଇ କହିଛନ୍ତି ଯେ, ଜଟଣିର ବିଂଝଗିରିଠାରେ ୨୦ ଏକର ପରିମିତ ଅଞ୍ଚଳରେ ଏକ ଅତ୍ୟାଧୁନିକ ଯୋଗ ଓ ନେଚରୋପାଥି ଅନୁଷ୍ଠାନ ନିର୍ମାଣ ଚାଲିଛି। ସେହିପରି ରାଇରଙ୍ଗପୁରଠାରେ କେନ୍ଦ୍ରୀୟ ଆୟୁର୍ବେଦିକ ମେଡିକାଲ କଲେଜର ଶିଳାନ୍ୟାସ କରାଯାଇଛି। ଯୋଗକୁ ବିଦ୍ୟାଳୟ ପାଠ୍ୟକ୍ରମ ଓ ଜନସ୍ୱାସ୍ଥ୍ୟ କାର୍ଯ୍ୟକ୍ରମରେ ସାମିଲ କରିବା ପାଇଁ ସରକାର ପଦକ୍ଷେପ ନେଉଥିବା ସେ ସୂଚନା ଦେଇଛନ୍ତି।

ଏହି କାର୍ଯ୍ୟକ୍ରମରେ ଉଚ୍ଚଶିକ୍ଷା, କ୍ରୀଡ଼ା ଓ ଯୁବସେବା ତଥା ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗର ମନ୍ତ୍ରୀ ସୂର୍ଯ୍ୟବଂଶୀ ସୂରଜ, ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ, ମତ୍ସ୍ୟ ଓ ପ୍ରାଣୀସମ୍ପଦ ବିକାଶ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ ପ୍ରମୁଖ ଉପସ୍ଥିତ ଥିଲେ। କନ୍ଧମାଳ ସାଂସଦ ସୁକାନ୍ତ କୁମାର ପାଣିଗ୍ରାହୀ, ମୁଖ୍ୟ ଶାସନ ସଚିବ ଅନୁ ଗର୍ଗ, ଉନ୍ନୟନ କମିଶନର ଡିକେ ସିଂ, କ୍ରୀଡ଼ା ଓ ଯୁବସେବା ବିଭାଗ କମିଶନର ତଥା ଶାସନ ସଚିବ ଭୂପିନ୍ଦର ସିଂ ପୁନିଆଙ୍କ ସମେତ ବରିଷ୍ଠ ଅଧିକାରୀ, କ୍ରୀଡ଼ାବିତ୍ ଓ ଗଣମାଧ୍ୟମର ପ୍ରତିନିଧିମାନେ ଯୋଗ ଦେଇଥିଲେ।

The post ୩ ଜିଲ୍ଲାରେ ଖୋଲିବ ନୂଆ ଆୟୁର୍ବେଦିକ ମେଡିକାଲ କଲେଜ appeared first on Sanket Tv.

ବିଶେଷଜ୍ଞ କମିଟି, ଡ୍ରଗ୍ସ ଟେକ୍ନିକାଲ ଆଡଭାଇଜରୀ ବୋର୍ଡ (DTAB) ଏବଂ ଏହାର ଉପ-ସମିତି ଦ୍ୱାରା କରାଯାଇଥିବା ଗଭୀର ସମୀକ୍ଷାରୁ ଜଣାପଡ଼ିଛି ଯେ, ଏହି ଔଷଧଗୁଡ଼ିକର କୌଣସି ଦୃଢ଼ ଚିକିତ୍ସା ଆଧାର ନାହିଁ। ଏହି କମ୍ବିନେସନ୍ଗୁଡ଼ିକ ରୋଗୀଙ୍କୁ କୌଣସି ଅତିରିକ୍ତ ଲାଭ ଦେଇଥାଏ ବୋଲି ବୈଜ୍ଞାନିକ ପ୍ରମାଣ ମଧ୍ୟ ଉପଲବ୍ଧ ନାହିଁ। ବରଂ, ଏହାର ବ୍ୟବହାର ଦ୍ୱାରା ଶରୀର ପ୍ରତି ବିପଦ ବଢ଼ିପାରେ ବୋଲି ବିଶେଷଜ୍ଞମାନେ ଚିନ୍ତା ପ୍ରକଟ କରିଛନ୍ତି।

ଏହି ସମୀକ୍ଷା ପ୍ରକ୍ରିୟା ୨୦୨୧ ମସିହାରୁ ଜାରି ରହିଥିଲା। ଗତ ଡିସେମ୍ବର ୨୦୨୪ ମସିହାରେ ଉପ-ସମିତି ଏହି ସବୁ ଔଷଧକୁ ବ୍ୟାନ୍ କରିବା ପାଇଁ ସୁପାରିଶ କରିଥିଲା। ଶେଷରେ, ସରକାର ଏହି ସୁପାରିଶକୁ ଗ୍ରହଣ କରି କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି।

କେଉଁ ସବୁ ଔଷଧ ଉପରେ ଲାଗିଲା ନିଷେଧାଜ୍ଞା?

ବ୍ୟାନ୍ ହୋଇଥିବା ୧୬ଟି ଔଷଧ ମଧ୍ୟରେ ଅନେକ ଜରୁରୀ ଆଣ୍ଟିବାୟୋଟିକ୍, ପେଟ ଯନ୍ତ୍ରଣା ସହ ଜଡ଼ିତ ଔଷଧ ଏବଂ ମଧୁମେହ (ଡାଇବେଟିସ୍) ଔଷଧ ସାମିଲ୍ ଅଛି। ଏହି ତାଲିକାରେ ଥିବା କେତେକ ପ୍ରମୁଖ ଔଷଧ ହେଲା:

• ଆଣ୍ଟିବାୟୋଟିକ୍ କମ୍ବିନେସନ୍: Amoxicillin + Serratiopeptidase, Cefuroxime + Serratiopeptidase, ଏବଂ Cefadroxyl + Probenecid
• ପେଟ ଯନ୍ତ୍ରଣା ଔଷଧ: Dicyclomine + Paracetamol + Clidinium Bromide
• ଡାଇବେଟିସ୍ ଔଷଧ: Gliclazide + Chromium Picolinate (ଏହି କମ୍ବିନେସନ୍ ପାଇଁ କୌଣସି ଚିକିତ୍ସା ଗାଇଡଲାଇନରେ ସୁପାରିଶ ନାହିଁ)

ସରକାର କହିଛନ୍ତି ଯେ, ରୋଗୀଙ୍କ ସୁରକ୍ଷା ସବୁଠାରୁ ଗୁରୁତ୍ୱପୂର୍ଣ୍ଣ। କେବଳ ବୈଜ୍ଞାନିକ ଆଧାର ଥିବା ଏବଂ ସୁରକ୍ଷିତ ବୋଲି ପ୍ରମାଣିତ ଔଷଧକୁ ହିଁ ବଜାରରେ ବିକ୍ରି ପାଇଁ ଅନୁମତି ଦିଆଯିବ ବୋଲି ସ୍ପଷ୍ଟ କରାଯାଇଛି।

The post ୧୬ଟି ଔଷଧ ଉପରେ କେନ୍ଦ୍ର ସରକାରଙ୍କ ପ୍ରତିବନ୍ଧକ appeared first on Sanket Tv.

ଏପର୍ଯ୍ୟନ୍ତ ଲୋକମାନେ ବିନା କୌଣସି ଡାକ୍ତରୀ ପରାମର୍ଶରେ କଫ୍ ସିରପ୍ କିଣି ପାରୁଥିଲେ। ମାତ୍ର ଜୁନ୍ ୯, ୨୦୨୬ରୁ କେନ୍ଦ୍ର ସରକାର ଏହି ନୂଆ ନିୟମ ଲାଗୁ କରିଛନ୍ତି। ଏବେ କୋଡିନ୍ ଭଳି ଅଫିମ-ଆଧାରିତ ଔଷଧ ସମେତ ସମସ୍ତ ପ୍ରକାର କଫ୍ ସିରପ୍ ପାଇଁ ଡାକ୍ତରୀ ପ୍ରେସକ୍ରିପସନ୍ ଅନିବାର୍ଯ୍ୟ। ତେବେ କାଶ ପାଇଁ ବ୍ୟବହୃତ ଲଜେଞ୍ଜ୍, ବଟିକା କିମ୍ବା ଟାବଲେଟ୍ ଏହି ନିୟମରୁ ବାଦ୍ ପଡ଼ିଛନ୍ତି।

ନୂଆ ନିୟମ ଅନୁଯାୟୀ, କଫ୍ ସିରପ୍ ବିକ୍ରି ଏବଂ ବିତରଣ କେବଳ ଲାଇସେନ୍ସ ପ୍ରାପ୍ତ ମେଡିକାଲ ଷ୍ଟୋର କିମ୍ବା ଫାର୍ମାସୀ ଜରିଆରେ ହୋଇପାରିବ। ଏହି ନିୟମ ଔଷଧ ଏବଂ ପ୍ରସାଧନ ସାମଗ୍ରୀ ଅଧିନିୟମ ୧୯୪୦ ଅଧୀନରେ ଲାଗୁ କରାଯାଇଛି। ଏହାର ମୂଳ ଉଦ୍ଦେଶ୍ୟ ହେଉଛି ବିନା ଡାକ୍ତରୀ ତଦାରଖରେ ଔଷଧ ସେବନ ଯୋଗୁଁ ହେଉଥିବା ବିପଦକୁ ହ୍ରାସ କରିବା।

ମଧ୍ୟପ୍ରଦେଶର ଛିନ୍ଦୱାଡ଼ା ଜିଲ୍ଲାରେ ବିଷାକ୍ତ କଫ୍ ସିରପ୍ ସେବନ ଯୋଗୁଁ ୨୨ ଜଣ ଶିଶୁଙ୍କ ମୃତ୍ୟୁ ଘଟଣା ପରେ ସରକାର ଏହି ପଦକ୍ଷେପ ନେଇଛନ୍ତି। ପୂର୍ବରୁ ମଧ୍ୟ ଦେଶର ବିଭିନ୍ନ ସ୍ଥାନ ଏବଂ ବିଦେଶରେ ବିଷାକ୍ତ ସିରପ୍ ଯୋଗୁଁ ଶିଶୁ ମୃତ୍ୟୁର ଅନେକ ଘଟଣା ସାମ୍ନାକୁ ଆସିଛି। ଅନେକ କଫ୍ ସିରପ୍ରେ ‘ଡେକ୍ସଟ୍ରୋମେଥୋର୍ଫାନ୍’ ଭଳି ଉପାଦାନ ଥାଏ, ଯାହା ଛୋଟ ଶିଶୁଙ୍କ ପାଇଁ ଅତ୍ୟନ୍ତ କ୍ଷତିକାରକ ଏବଂ ଶ୍ୱାସକ୍ରିୟାରେ ସମସ୍ୟା ସୃଷ୍ଟି କରିପାରେ।

ପ୍ରେସକ୍ରିପସନ୍ ବାଧ୍ୟତାମୂଳକ ହେବା ଦ୍ୱାରା ଡାକ୍ତରଙ୍କ ପରାମର୍ଶ ବିନା ଛୋଟ ପିଲାମାନଙ୍କୁ ଏଭଳି ଔଷଧ ଦିଆଯିବ ନାହିଁ। ଏହାଦ୍ୱାରା ଭୁଲ୍ ଔଷଧ ସେବନ ଜନିତ ଜଟିଳତା ଏବଂ ମୃତ୍ୟୁ ହ୍ରାସ ପାଇବ ବୋଲି ସ୍ୱାସ୍ଥ୍ୟ ବିଶେଷଜ୍ଞମାନେ ମତ ଦେଇଛନ୍ତି। ସାଧାରଣ ଲୋକଙ୍କୁ ଏବେ କାଶ ହେଲେ ସିଧାସଳଖ ଫାର୍ମାସିରେ ଯାଇ ସିରପ୍ ନକିଣି ପ୍ରଥମେ ଡାକ୍ତରଙ୍କ ପରାମର୍ଶ ନେବାକୁ ପଡ଼ିବ।

The post କଫ୍ ସିରପ୍ କିଣିବା ପାଇଁ ଏବେ ଡାକ୍ତରୀ ପ୍ରେସକ୍ରିପସନ୍ ବାଧ୍ୟତାମୂଳକ appeared first on Sanket Tv.

ସମସ୍ତ ଘରୋଇ ହସ୍ପିଟାଲ ପାଇଁ ଏହି ନିର୍ଦ୍ଦେଶ କଡ଼ାକଡ଼ି ଭାବେ ପାଳନ କରିବାକୁ କୁହାଯାଇଛି। ହସ୍ପିଟାଲ କର୍ତ୍ତୃପକ୍ଷଙ୍କୁ ମଧ୍ୟ ତାଗିଦ କରାଯାଇଛି। ଉଲ୍ଲଂଘନ ଯାଞ୍ଚ ପାଇଁ ଏକ ଉଚ୍ଚସ୍ତରୀୟ କମିଟି ଗଠନ କରାଯାଇଛି, ଯାହାକୁ ବିଭିନ୍ନ ହସ୍ପିଟାଲ ପରିଦର୍ଶନ କରିବାକୁ ନିର୍ଦ୍ଦେଶ ଦିଆଯାଇଛି।

ପୂର୍ବରୁ ଅନେକ ହସ୍ପିଟାଲ ପ୍ରି-ଆଡମିସନ ଟେଷ୍ଟକୁ ଆୟୁଷ୍ମାନ ଅଧୀନରେ ଅନ୍ତର୍ଭୁକ୍ତ କରୁନଥିଲେ। ଗଣମାଧ୍ୟମ ଓ ସୋସିଆଲ ମିଡିଆରୁ ଏଭଳି ଅଭିଯୋଗ ପାଇବା ପରେ ସ୍ୱାସ୍ଥ୍ୟ ମନ୍ତ୍ରୀ ଏକ ବୈଠକ ଡାକି ବିଭାଗୀୟ ଅଧିକାରୀ ଏବଂ ଘରୋଇ ହସ୍ପିଟାଲ ପ୍ରତିନିଧିଙ୍କ ସହ ଆଲୋଚନା କରିଥିଲେ।

ଏହାସହ, ହସ୍ପିଟାଲ କର୍ମଚାରୀମାନେ ରୋଗୀ ଓ ସମ୍ପର୍କୀୟମାନଙ୍କୁ ଉତ୍ତମ ବ୍ୟବହାର, ଉତ୍ତମ ଚିକିତ୍ସା ଦେବେ ଏବଂ କୌଣସି ଅଭିଯୋଗ ଆସିବ ନାହିଁ ତାହା ଉପରେ ସ୍ୱାସ୍ଥ୍ୟ ବିଭାଗ ଗୁରୁତ୍ୱ ଦେଇଛି।

The post ଆଡମିଟ୍ ହେବାର ୩ ଦିନ ପୂର୍ବରୁ ହେଉଥିବା ସବୁ ଟେଷ୍ଟ ଆୟୁଷ୍ମାନରେ ଅନ୍ତର୍ଭୁକ୍ତ: ସ୍ୱାସ୍ଥ୍ୟ ମନ୍ତ୍ରୀ appeared first on Sanket Tv.

ଯଦି ଇବୋଲା ମାମଲା ରିପୋର୍ଟ ହୁଏ, ତେବେ ରୋଗୀଙ୍କୁ AIIMSରେ ୨୧ ଦିନ ପର୍ଯ୍ୟନ୍ତ କ୍ୱାରେଣ୍ଟାଇନ୍‌ରେ ରଖାଯିବ। କେବଳ ବିମାନବନ୍ଦର ନୁହେଁ, ପାରାଦ୍ୱୀପ ବନ୍ଦରରେ ମଧ୍ୟ ସ୍ୱାସ୍ଥ୍ୟ ଟିମ୍‌କୁ ସତର୍କ ରଖାଯାଇଛି। କୌଣସି ଇବୋଲା ଲକ୍ଷଣ ଥିବା ଯାତ୍ରୀ ଚିହ୍ନଟ ହେଲେ ତୁରନ୍ତ ଚିକିତ୍ସା ପାଇଁ ପଠାଇବାର ବ୍ୟବସ୍ଥା କରାଯାଇଛି। ବର୍ତ୍ତମାନ ପାଇଁ AIIMSରେ ୧୦ଟି ବେଡ୍ ସଂରକ୍ଷିତ ରହିଛି। ତେବେ ଏପର୍ଯ୍ୟନ୍ତ ରାଜ୍ୟରେ କୌଣସି ଇବୋଲା ରୋଗୀ ଚିହ୍ନଟ ହୋଇନାହାନ୍ତି।

ଜନସ୍ୱାସ୍ଥ୍ୟ ନିର୍ଦ୍ଦେଶକ ରବି ନାରାୟଣ ମିଶ୍ର କହିଛନ୍ତି, “ଇବୋଲା ପାଇଁ ସମ୍ପୂର୍ଣ୍ଣ ଭାବରେ ପ୍ରସ୍ତୁତି କରାଯାଇଛି। ବାହାର ଦେଶରୁ ଆସୁଥିବା ଯାତ୍ରୀଙ୍କ ଠାରେ ଲକ୍ଷଣ ଦେଖାଗଲେ ତୁରନ୍ତା ସେମାନଙ୍କୁ AIIMSକୁ ପଠାଯିବ। ୨୧ ଦିନ ପର୍ଯ୍ୟନ୍ତ କ୍ୱାରେଣ୍ଟାଇନ୍‌ରେ ରଖାଯିବ।”

ବରିଷ୍ଠ ଭେଷଜ ବିଶେଷଜ୍ଞ ଡାକ୍ତର ନିରୋଜ ମିଶ୍ରଙ୍କ କହିବା ଅନୁସାରେ, ଏଥର ଚିହ୍ନଟ ହୋଇଥିବା ବୁଣ୍ଡିବୁଗିଓ ଷ୍ଟ୍ରେନ୍‌ ପାଇଁ ଏପର୍ଯ୍ୟନ୍ତ କୌଣସି ନିର୍ଦ୍ଦିଷ୍ଟ ଟିକା ଉପଲବ୍ଧ ନାହିଁ। ଏହି ଭାଇରସରେ ମୃତ୍ୟୁହାର ପ୍ରାୟ ୫୦ ପ୍ରତିଶତ ପର୍ଯ୍ୟନ୍ତ ଥିବାରୁ ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ସତର୍କତା ଅବଲମ୍ବନ କରିବାକୁ କହିଛି।

ଇବୋଲା ଭାଇରସ କିଛି ଆଫ୍ରିକୀୟ ଦେଶରେ ବ୍ୟାପିଛି ଏବଂ ଏହା କ୍ରମଶଃ ମାରାତ୍ମକ ହେବାକୁ ଲାଗିଛି। ଏହାକୁ ଦୃଷ୍ଟିରେ ରଖି, WHO ଏକ ବିଶ୍ୱ ସ୍ବାସ୍ଥ୍ୟ ଜରୁରୀକାଳୀନ ଘୋଷଣା କରିଛି। WHO ବିଜ୍ଞପ୍ତି ପରେ, ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ (DGCA) ସମସ୍ତ ବିମାନବନ୍ଦର ପାଇଁ SOP ଏବଂ ନିର୍ଦ୍ଦେଶାବଳୀ ମଧ୍ୟ ଜାରି କରିଛି, ସେମାନଙ୍କୁ COVID-19 ଭଳି ପ୍ରୋଟୋକଲ ଅନୁସରଣ କରିବାକୁ ନିର୍ଦ୍ଦେଶ ଦିଆଯାଇଛି।

ଇବୋଲାର ଲକ୍ଷଣ ମଧ୍ୟରେ ଜ୍ୱର, କାଶ, ଥଣ୍ଡା, ବାନ୍ତି, ଝାଡ଼ା ଓ ରକ୍ତସ୍ରାବ ଭଳି ସମସ୍ୟା ଦେଖାଯାଏ। ସଂକ୍ରମିତ ବ୍ୟକ୍ତିଙ୍କ ସଂସ୍ପର୍ଶରେ ଆସିଲେ ଏହା ଅନ୍ୟମାନଙ୍କୁ ମଧ୍ୟ ସଂକ୍ରମିତ କରିପାରେ। ସେଥିପାଇଁ ସନ୍ଦେହଜନକ ଲକ୍ଷଣ ଦେଖାଦେଲେ ତୁରନ୍ତ ପରୀକ୍ଷା ଓ ଆଇସୋଲେସନ୍ ଜରୁରୀ ବୋଲି ବିଶେଷଜ୍ଞମାନେ କହିଛନ୍ତି।

ଇବୋଲାକୁ ନେଇ ସ୍ୱାସ୍ଥ୍ୟ ମନ୍ତ୍ରୀ ରାଜ୍ୟର ସମସ୍ତ ବିମାନବନ୍ଦରରେ ଥର୍ମାଲ୍ ସ୍କ୍ରିନିଂକୁ ଅଧିକ କଡ଼ା କରିବା ସହ ଯାତ୍ରୀଙ୍କ ୨୧ ଦିନର ଟ୍ରାଭେଲ୍ ହିଷ୍ଟ୍ରି ଯାଞ୍ଚ କରିବାକୁ ନିର୍ଦ୍ଦେଶ ଦେଇଛନ୍ତି। ସନ୍ଦିଗ୍ଧ ରୋଗୀଙ୍କ ଚିହ୍ନଟ, ଆଇସୋଲେସନ୍ ୱାର୍ଡ, ଔଷଧ ଓ ସୁରକ୍ଷା ସାମଗ୍ରୀ ପ୍ରସ୍ତୁତ ରଖିବାକୁ ମଧ୍ୟ ସମସ୍ତ ହସ୍ପିଟାଲକୁ ସତର୍କ କରାଯାଇଛି।

The post ଇବୋଲା ଆତଙ୍କ: ଏମସ୍ ରେ ୨୧ ଦିନିଆ କ୍ୱାରେଣ୍ଟାଇନ୍‌ ବ୍ୟବସ୍ଥା appeared first on Sanket Tv.

ଡେମୋକ୍ରେଟିକ ରିପବ୍ଲିକ ଅଫ କଙ୍ଗୋ ଏବଂ ୟୁଗାଣ୍ଡାରେ ଇବୋଲା ମାମଲା ଦ୍ରୁତଗତିରେ ବ୍ୟାପୁଛି। ଏହାର ଗମ୍ଭୀରତାକୁ ଦୃଷ୍ଟିରେ ରଖି WHO ଅର୍ନ୍ତରାଷ୍ଟ୍ରୀୟ ସ୍ବାସ୍ଥ୍ୟ ନିୟମ ଅଧୀନରେ ଇବୋଲାକୁ ଗ୍ଲୋବାଲ ହେଲଥ ଏମରଜେନ୍ସୀ ଘୋଷଣା କରିଛି। ଏହାକୁ ନେଇ କେନ୍ଦ୍ରୀୟ ସ୍ବାସ୍ଥ୍ୟ ଏବଂ ପରିବାର କଲ୍ୟାଣ ମନ୍ତ୍ରଣାଳୟ ଭାରତୀୟ ନାଗରିକଙ୍କ ପାଇଁ ଜରୁରୀ ଟ୍ରାଭେଲ ଆଡଭାଇଜରୀ ଜାରି କରିଛି। ଏହାସହିତ ଆଫ୍ରିକାର ସେଣ୍ଟର୍ସ ଫର ଡିଜିଜ କଣ୍ଡ୍ରୋଲ ଆଣ୍ଡ ପ୍ରିଭେନ୍ସନ (CDC) ମଧ୍ୟ ଇବୋଲା ପାଇଁ ଚେତାବନୀ ଜାରି କରିଛି।

ଆଫ୍ରିକାରେ ଇବୋଲାର ସଂକ୍ରମଣ ଦେଖି ଭାରତର ସ୍ବାସ୍ଥ୍ୟ ମନ୍ତ୍ରଣାଳୟ ଦେଶବାସୀଙ୍କୁ ସତର୍କ ରହିବାକୁ ପରାମର୍ଶ ଦେଇଛି। ସରକାର ଆଡଭାଇଜରୀ ଜାରି କରି ସମସ୍ତ ନାଗରିକଙ୍କୁ କଙ୍ଗୋ, ୟୁଗାଣ୍ଡା, ଦକ୍ଷିଣ ସୁଡାନ ଭଳି ଦେଶକୁ ଯାତ୍ରା କରିବାକୁ ମନା କରିଛନ୍ତି। ଯେପର୍ଯ୍ୟନ୍ତ ପରିସ୍ଥିତି ସାମାନ୍ୟ ନହୁଏ, ସେପର୍ଯ୍ୟନ୍ତ ଏହି ସବୁ ଦେଶକୁ ଯାତ୍ରା ନ କରିବାକୁ ସରକାରଙ୍କ ତରଫରୁ ବାରଣ କରାଯାଇଛି। ଯଦି କୌଣସି ବ୍ୟକ୍ତିଙ୍କର ଅତି ଜରୁରୀ କାର୍ଯ୍ୟ ଥାଏ, ତେବେ ସେ ସମସ୍ତ ଜରୁରୀ ସ୍ବାସ୍ଥ୍ୟ ଗାଇଡଲାଇନ୍ ନିଶ୍ଚିତ ଭାବେ ପାଳନ କରନ୍ତୁ।

The post ଇବୋଲା ଭାଇରସକୁ ଦେଖି ଭାରତ ସରକାରଙ୍କ ଆଲର୍ଟ ଜାରି appeared first on Sanket Tv.