ସୂଚନା ଅନୁଯାୟୀ, ଗତକାଲି ରାତିରେ ହଷ୍ଟେଲରେ ରାତ୍ରିଭୋଜନ ସାରି ଶୋଇବା ପରେ ବିଳମ୍ବିତ ରାତିରୁ କିଛି ଛାତ୍ରୀଙ୍କଠାରେ ବାନ୍ତି, ଝାଡ଼ା ଓ ପେଟକଟା ଲକ୍ଷଣ ଦେଖାଦେଇଥିଲା। ଧୀରେ ଧୀରେ ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଇ ୪୬ରୁ ଉର୍ଦ୍ଧ୍ୱରେ ପହଞ୍ଚିଥିଲା। ବିଦ୍ୟାଳୟ କର୍ତ୍ତୃପକ୍ଷ ତୁରନ୍ତ ଆମ୍ବୁଲାନ୍ସ ଏବଂ ଅନ୍ୟ ଗାଡ଼ି ଯୋଗେ ଅସୁସ୍ଥ ଛାତ୍ରୀମାନଙ୍କୁ ପ୍ରାଥମିକ ଚିକିତ୍ସା ପାଇଁ ମାଣତ୍ରୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ସେଠାରେ ସ୍ଥାନାଭାବ ଏବଂ ଗୁରୁତର ଥିବା କିଛି ଛାତ୍ରୀଙ୍କୁ ତୁରନ୍ତ ବଡ଼ସାହି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ସ୍ଥାନାନ୍ତର କରାଯାଇଛି।

ଡାକ୍ତରଖାନାରେ ଏକ ସ୍ୱତନ୍ତ୍ର ଡାକ୍ତରୀ ଦଳ ଆକ୍ରାନ୍ତ ଛାତ୍ରୀମାନଙ୍କୁ ଚିକିତ୍ସା ଯୋଗାଇ ଦେଉଛନ୍ତି। ବର୍ତ୍ତମାନ ସମସ୍ତ ଛାତ୍ରୀଙ୍କ ସ୍ୱାସ୍ଥ୍ୟାବସ୍ଥା ସ୍ଥିର ଥିବା ଏବଂ ବିପଦମୁକ୍ତ ଥିବା ଡାକ୍ତର ସୂଚନା ଦେଇଛନ୍ତି। ଖାଦ୍ୟ ବିଷକ୍ରିୟା (ଫୁଡ୍ ପଏଜନିଂ) କିମ୍ବା ଦୂଷିତ ପାନୀୟ ଜଳ ବ୍ୟବହାର ଯୋଗୁଁ ଏଭଳି ସ୍ଥିତି ଉପୁଜିଥିବା ସନ୍ଦେହ କରାଯାଉଛି।

ଘଟଣା ସମ୍ପର୍କରେ ଖବର ପାଇ ମୟୂରଭଞ୍ଜ ଜିଲ୍ଲାପାଳ ତୁରନ୍ତ ଡାକ୍ତରଖାନାରେ ପହଞ୍ଚି ଅସୁସ୍ଥ ଛାତ୍ରୀମାନଙ୍କ ସ୍ୱାସ୍ଥ୍ୟାବସ୍ଥା ବୁଝିବା ସହ ଉତ୍ତମ ଚିକିତ୍ସା ଯୋଗାଇଦେବାକୁ ଡାକ୍ତରମାନଙ୍କୁ ନିର୍ଦ୍ଦେଶ ଦେଇଛନ୍ତି। ଏହାପରେ ଜିଲ୍ଲାପାଳ ସିଧାସଳଖ ମାଣତ୍ରୀ ଏସଏସଡି ବାଳିକା ହଷ୍ଟେଲ ପରିଦର୍ଶନ କରି ରୋଷେଇ ଘର, ଡାଇନିଂ ହଲ୍ ଏବଂ ପାନୀୟ ଜଳ ବ୍ୟବସ୍ଥାର ତନଖି କରିଛନ୍ତି।

ଘଟଣାର ଉଚ୍ଚସ୍ତରୀୟ ତଦନ୍ତ କରିବା ସହ ହଷ୍ଟେଲରେ ଦିଆଯାଉଥିବା ଖାଦ୍ୟ ଓ ପାଣିର ନମୁନା ସଂଗ୍ରହ କରି ପରୀକ୍ଷାଗାରକୁ ପଠାଇବା ପାଇଁ ସ୍ୱାସ୍ଥ୍ୟ ବିଭାଗକୁ ନିର୍ଦ୍ଦେଶ ଦିଆଯାଇଛି। କର୍ତ୍ତବ୍ୟରେ ଅବହେଳା କରୁଥିବା ବ୍ୟକ୍ତିଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜିଲ୍ଲା ପ୍ରଶାସନ ପକ୍ଷରୁ ସ୍ପଷ୍ଟ କରାଯାଇଛି।

The post ମାଣତ୍ରୀ ଏସଏସଡି ବାଳିକା ହଷ୍ଟେଲରେ ଝାଡ଼ାବାନ୍ତି ଆତଙ୍କ: ୪୬ରୁ ଉର୍ଦ୍ଧ୍ୱ ଛାତ୍ରୀ ଅସୁସ୍ଥ appeared first on Sanket Tv.

ନୂତନ ତଥ୍ୟ ଅନୁଯାୟୀ, ୨୦୨୬-୨୭ ଶିକ୍ଷାବର୍ଷ ପାଇଁ ଏମଡି, ଏମଏସ ଏବଂ ଅନ୍ୟାନ୍ୟ ପିଜି ମେଡିକାଲ୍ ପ୍ରୋଗ୍ରାମରେ ସିଟ୍ ସଂଖ୍ୟା ବୃଦ୍ଧି ପାଇ ପ୍ରାୟ ୫୮,୦୦୦କୁ ପହଞ୍ଚିଛି। ଗତ ବର୍ଷ ଏହି ସଂଖ୍ୟା ୫୨,୧୭୩ ଥିଲା, ଯାହାକି ଚଳିତ ବର୍ଷ ପ୍ରାୟ ୧୧ ପ୍ରତିଶତ ବୃଦ୍ଧି ପାଇଛି।

ମେଡିକାଲ୍ କଲେଜଗୁଡ଼ିକରେ ଏହି ସିଟ୍ ବୃଦ୍ଧି କେବଳ ସରକାରୀ ସ୍ତରରେ ନୁହେଁ, ବରଂ ବେସରକାରୀ ଏବଂ ଡିମ୍ଡ ମେଡିକାଲ୍ ପ୍ରତିଷ୍ଠାନଗୁଡ଼ିକରେ ମଧ୍ୟ ଦେଖିବାକୁ ମିଳିଛି। ସବୁଠାରୁ ବଡ଼ କଥା ହେଲା, ବେସରକାରୀ ଏବଂ ଡିମ୍ଡ ବିଶ୍ୱବିଦ୍ୟାଳୟଗୁଡ଼ିକରେ ସିଟ୍ ସଂଖ୍ୟା ପ୍ରାୟ ୩୨ ପ୍ରତିଶତ ବୃଦ୍ଧି ପାଇଥିବାବେଳେ ସରକାରୀ ମେଡିକାଲ୍ କଲେଜଗୁଡ଼ିକରେ ପ୍ରାୟ ୧୦ ପ୍ରତିଶତ ବୃଦ୍ଧି ହୋଇଛି।

ନୂତନ ସିଟ୍ ମ୍ୟାଟ୍ରିକ୍ସ ଅନୁଯାୟୀ ଏନାସ୍ଥେସିଆ, ଅପଥଲ୍ମୋଲୋଜି, ଇଏନଟି, ପାଥୋଲୋଜି, ସାଇକ୍ରିଆଟ୍ରି ଏବଂ ରେସ୍ପିରେଟୋରୀ ମେଡିସିନ୍ ଭଳି ପ୍ରମୁଖ ବିଶେଷଜ୍ଞ କୋର୍ସଗୁଡ଼ିକରେ ସିଟ୍ ସଂଖ୍ୟା ବ୍ୟାପକ ଭାବେ ସମ୍ପ୍ରସାରିତ ହୋଇଛି।
ସରକାରୀ ମେଡିକାଲ୍ କଲେଜରେ ଏନାସ୍ଥେସିଓଲୋଜିରେ ୩,୨୦୫ଟି, ଜେନେରାଲ୍ ମେଡିସିନରେ ୩,୨୦୧ଟି, ଜେନେରାଲ୍ ସର୍ଜରୀରେ ୨,୮୦୫ଟି, ଓବିଜି (OBG)ରେ ୨,୬୩୫ଟି, ପିଡାଟ୍ରିକ୍ସରେ ୨,୧୭୬ଟି ଏବଂ ପାଥୋଲୋଜିରେ ୧,୮୩୩ଟି ସିଟ୍ ରହିଛି।

ଏହାବ୍ୟତୀତ ଅର୍ଥୋପେଡିକ୍ସରେ ୧,୬୦୩, ଅପଥଲ୍ମୋଲୋଜିରେ ୧,୨୨୩ ଏବଂ ରାଡିଓ ଡାଏଗ୍ନୋସିସରେ ୧,୧୮୨ଟି ସରକାରୀ ସିଟ୍ ରହିଥିବା ଜଣାପଡ଼ିଛି।

ଏନଏମସି ସ୍ପଷ୍ଟ କରିଛି ଯେ ଆବଶ୍ୟକତା ଅନୁଯାୟୀ ଏହି ଜାରି କରାଯାଇଥିବା ସିଟ୍ ମ୍ୟାଟ୍ରିକ୍ସରେ ପରିବର୍ତ୍ତନ କରାଯାଇପାରିବ। ଯେଉଁ କଲେଜଗୁଡ଼ିକରୁ ନୂତନ ପିଜି କୋର୍ସ କିମ୍ବା ଅଧିକ ସିଟ୍ ପାଇଁ ଆବେଦନ କରାଯାଇଛି ଏବଂ ଆଗକୁ ଯେଉଁଗୁଡ଼ିକର ଅନୁମୋଦନ ମିଳିବ, ସେଗୁଡ଼ିକୁ ପରବର୍ତ୍ତୀ ଅପଡେଟ୍ ସିଟ୍ ମ୍ୟାଟ୍ରିକ୍ସରେ ସାମାହିକ କରାଯିବ। କାଉନସେଲିଂ ସମୟରେ ସିଟ୍ ସମ୍ବନ୍ଧୀୟ କୌଣସି ଅସୁବିଧା ଦେଖାଗଲେ ମେଡିକାଲ୍ ଆସେସମେଣ୍ଟ ଆଣ୍ଡ ରେଟିଂ ବୋର୍ଡ (MARB) ନିକଟକୁ ମାମଲା ପଠାଯିବ।

ନିଟ୍ ପିଜି କାଉନସେଲିଂରେ ଦିବ୍ୟାଙ୍ଗ (PwBD) ପ୍ରାର୍ଥୀମାନଙ୍କ ପାଇଁ ରାଉଣ୍ଡ-୧ର ରେଜିଷ୍ଟ୍ରେସନ୍ ପୋର୍ଟାଲ୍ ଅକ୍ଟୋବର ୧, ୨୦୨୬ ତାରିଖରୁ ଖୋଲିବ। ପ୍ରାର୍ଥୀମାନେ ଏମସିସି (MCC)ର ଅଫିସିଆଲ୍ ୱେବସାଇଟ୍ mcc.nic.in ମାଧ୍ୟମରେ ରେଜିଷ୍ଟ୍ରେସନ୍ ଏବଂ ଚଏସ୍ ଫିଲିଂ କରିପାରିବେ। ଏହାଛଡ଼ା ମେଡିକାଲ୍ ଆସେସମେଣ୍ଟ ବୋର୍ଡର ଯାଞ୍ଚ ପ୍ରକ୍ରିୟା ଅକ୍ଟୋବର ୧ରୁ ୯ ତାରିଖ ପର୍ଯ୍ୟନ୍ତ ଚାଲିବ।

The post ନିଟ୍ ପିଜି ୨୦୨୬: ପିଜି ମେଡିକାଲ୍ ସିଟ୍ ସଂଖ୍ୟା ବୃଦ୍ଧି ପାଇ ପ୍ରାୟ ୫୮,୦୦୦କୁ ପହଞ୍ଚିଲା appeared first on Sanket Tv.

ସେହିପରି ଝାରସୁଗୁଡ଼ାରେ ୨ ମିଲିୟନ ଟନର ସ୍ମେଲଟର ପ୍ଲାଣ୍ଟ କରିବ ବେଦାନ୍ତ । ଏଥିରେ ୧ ଲକ୍ଷ କୋଟି ଟଙ୍କାର ନିବେଶ ହେବ । ଏଥିପାଇଁ ରାଜ୍ୟ ସରକାର ୫୦୦ ଏକର ଜାଗା ଯୋଗାଇ ଦେଇଛନ୍ତି । ଏହାଦ୍ୱାରା ୫୦ ହଜାର ନିଯୁକ୍ତି ସୃଷ୍ଟି ହେବ ବୋଲି ଆଶା କରାଯାଉଛି । ଆଗାମୀ ଅଢ଼େଇରୁ ୩ ବର୍ଷ ମଧ୍ୟରେ ଏହି ପ୍ରକଳ୍ପର କାମ ସରିବ ବୋଲି ସୂଚନା ମିଳିଛି ।

ଏତଦ୍ ବ୍ୟତୀତ ସିଜିମାଳୀ ଏବଂ କର୍ଲାପାଟ ଖଣିକୁ ଖୁବ୍ ଶୀଘ୍ର କାର୍ଯ୍ୟକ୍ଷମ କରିବାକୁ ମୁଖ୍ୟମନ୍ତ୍ରୀଙ୍କ ସହ ଆଲୋଚନା ହୋଇଛି । ଝାରସୁଗୁଡ଼ା ପ୍ଲାଣ୍ଟର ସମ୍ପ୍ରସାରଣ ହେଉଥିବାରୁ ବକ୍ସାଇଟର ଆବଶ୍ୟକତା ରହିଛି । ଲୋକସେବା ଭବନରେ ମୁଖ୍ୟମନ୍ତ୍ରୀଙ୍କୁ ଭେଟି ବେଦାନ୍ତ ମୁଖ୍ୟ ଅନୀଲ ଅଗ୍ରୱାଲ ଏ ସମ୍ପର୍କରେ ଆଲୋଚନା କରିଛନ୍ତି ।

The post ପଶ୍ଚିମ ଓଡ଼ିଶାରେ ୧,୦୦୦ ଶଯ୍ୟା ବିଶିଷ୍ଟ ହସ୍ପିଟାଲ କରିବ ବେଦାନ୍ତ appeared first on Sanket Tv.

ଗେଜେଟ୍ ବିଜ୍ଞପ୍ତି ଜରିଆରେ ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ଏହି ଔଷଧଗୁଡ଼ିକୁ ଡ୍ରଗ୍ସ ଆଣ୍ଡ୍ କସ୍ମେଟିକ୍ସ ଆଇନର ପରିଚ୍ଛେଦ ଏଚ୍୧ ଅଧୀନରେ ରଖିଛି। ଏହି ଔଷଧଗୁଡ଼ିକ ହେଲେ: ଫ୍ଲୁପେଣ୍ଟଇକ୍ସୋଲ (ସିଜୋଫ୍ରେନିଆ ପାଇଁ), ଜୋପିକ୍ଲୋନ୍ (ନିଦ୍ରାହୀନତା ସମସ୍ୟା ପାଇଁ), ଗାବାପେଣ୍ଟାଇନ୍ (ସ୍ନାୟୁ ଯନ୍ତ୍ରଣା ଲାଘବ ପାଇଁ) ଏବଂ କାରିସୋପ୍ରୋଡୋଲ୍ (ମାଂସପେଶୀକୁ ଆରାମ ଦେବା ପାଇଁ)।

ଏହି ନୂଆ ନିୟମ ଅନୁଯାୟୀ, ଖୁଚୁରା ଔଷଧ ଦୋକାନୀ ଏବଂ ଔଷଧ କମ୍ପାନୀଗୁଡ଼ିକୁ ଏହି ୪ଟି ଔଷଧର ବିକ୍ରି ସମ୍ପର୍କିତ ସବିଶେଷ ରେକର୍ଡ ରଖିବାକୁ ହେବ। ଏଥିରେ ଉକ୍ତ ଔଷଧ ଲେଖିଥିବା ଡାକ୍ତରଙ୍କ ନାମ, ଠିକଣା ଏବଂ କେତେ ପରିମାଣର ଔଷଧ ଯୋଗାଣ ହୋଇଛି, ତାହା ଉଲ୍ଲେଖ କରିବାକୁ ପଡ଼ିବ।

ଏତଦ୍ବ୍ୟତୀତ, ଉକ୍ତ ରେକର୍ଡକୁ ୩ ବର୍ଷ ପର୍ଯ୍ୟନ୍ତ ସଂରକ୍ଷଣ କରି ରଖିବାକୁ ହେବ ଏବଂ ଯାଞ୍ଚ ସମୟରେ କର୍ତ୍ତୃପକ୍ଷଙ୍କୁ ତାହା ଦେଖାଇବାକୁ ପଡ଼ିବ। ଏହି ପଦକ୍ଷେପ ଫଳରେ ଏହି ଔଷଧଗୁଡ଼ିକର ଦୁରୁପଯୋଗ ଏବଂ ନିଶାଦ୍ରବ୍ୟ ଭାବେ ବ୍ୟବହାରକୁ ରୋକାଯାଇପାରିବ ବୋଲି ଆଶା କରାଯାଉଛି।

The post ୪ଟି ସିଏନଏସ୍ ଔଷଧର ବିକ୍ରି ଉପରେ ନିୟନ୍ତ୍ରଣକୁ କଡ଼ାକଡ଼ି କଲେ କେନ୍ଦ୍ର ସରକାର appeared first on Sanket Tv.

ସାଧାରଣ ଚିକିତ୍ସା ପଦ୍ଧତିରେ ସମସ୍ତଙ୍କୁ ଗୋଟିଏ ପ୍ରକାର ଔଷଧ ଦିଆଯାଉଥିବା ବେଳେ, ଏହି ନୂଆ ଟିକା ରୋଗୀର ଶରୀର ହିସାବରେ ସ୍ୱତନ୍ତ୍ର ଭାବରେ ପ୍ରସ୍ତୁତ କରାଯାଏ। ଏହା ରୋଗୀର ରୋଗ ପ୍ରତିରୋଧକ ଶକ୍ତିକୁ ଚିହ୍ନଟ କରି ତା’ର ଆଧାରରେ ଔଷଧ ତିଆରି କରାଯାଏ, ଯାହା ଚିକିତ୍ସା କ୍ଷେତ୍ରରେ ଏକ ଯୁଗାନ୍ତକାରୀ ପରିବର୍ତ୍ତନ।

ଏହି ବଡ଼ ବିଶ୍ୱସ୍ତରୀୟ ପରୀକ୍ଷାରେ ୧,୧୩୭ ଜଣ ଉଚ୍ଚ-ଆଶଙ୍କା ଥିବା ରୋଗୀ ସାମିଲ ହୋଇଥିଲେ, ଯେଉଁମାନଙ୍କର ସାଙ୍ଘାତିକ ଚର୍ମ କ୍ୟାନସର (ମେଲାନୋମା) ଅପରେସନ ଦ୍ୱାରା ବାହାର କରାଯାଇଥିଲା। ରୋଗୀଙ୍କୁ ଦୁଇଟି ଗ୍ରୁପରେ ବିଭକ୍ତ କରାଯାଇଥିଲା। ପ୍ରଥମ ଗ୍ରୁପ୍କୁ କେବଳ ସାଧାରଣ ଇମ୍ୟୁନୋଥେରାପି ଔଷଧ ‘କିଟ୍ରୁଡା’ ଦିଆଯାଇଥିବା ବେଳେ, ଦ୍ଵିତୀୟ ଗ୍ରୁପ୍କୁ କିଟ୍ରୁଡା ସହିତ ମଡର୍ଣ୍ଣାର ଏହି ସ୍ୱତନ୍ତ୍ର କ୍ୟାନସର ଟିକାର ୯ଟି ଡୋଜ୍ ପର୍ଯ୍ୟନ୍ତ ଦିଆଯାଇଥିଲା।

ଏହି ଦୁଇଟି ଔଷଧର ମିଶ୍ରଣ ଯୋଗୁଁ ରୋଗୀଙ୍କ ଶରୀରରେ କ୍ୟାନସର ଫେରିବାର ସମୟ ସୀମା ଯଥେଷ୍ଟ ବୃଦ୍ଧି ପାଇଥିଲା। ଅର୍ଥାତ୍, କ୍ୟାନସର ପୁନର୍ବାର ଫେରିବାର ପ୍ରକ୍ରିୟା ବହୁତ କମିଯାଇଥିଲା କିମ୍ବା ପ୍ରାୟ ବନ୍ଦ ହୋଇଯାଇଥିଲା। ଏହି ଟିକା ଶରୀରର ଅନ୍ୟ ଅଙ୍ଗକୁ କ୍ୟାନସର ବ୍ୟାପିବାକୁ ମଧ୍ୟ ରୋକିବାରେ ସଫଳ ହୋଇଥିଲା।

ଏହା ଏକ ଚିକିତ୍ସା ଟିକା, ଯାହା ରୋଗ ଭଲ କରିବା ପାଇଁ ବ୍ୟବହୃତ ହୁଏ, କିନ୍ତୁ ଏହା କ୍ୟାନସର ନ ହେବା ପାଇଁ ଦିଆଯାଉଥିବା ପ୍ରତିଷେଧକ ଟିକା ନୁହେଁ। ଏହା ଶରୀରର ରୋଗ ପ୍ରତିରୋଧକ ଶକ୍ତି ପାଇଁ ଏକ ସ୍ୱତନ୍ତ୍ର “ୱାଣ୍ଟେଡ୍ ପୋଷ୍ଟର” ଭଳି କାମ କରେ। ଟିକା ଦେବା ପରେ, ଏହା ରୋଗୀର ରୋଗ ପ୍ରତିରୋଧକ କୋଷଗୁଡ଼ିକୁ ଶରୀରରେ ଲୁଚି ରହିଥିବା ଅତି ସୂକ୍ଷ୍ମ କ୍ୟାନସର କୋଷଗୁଡ଼ିକୁ ଖୋଜି ବାହାର କରି ସେଗୁଡ଼ିକୁ ନଷ୍ଟ କରିଥାଏ।

ଚିକିତ୍ସା ବିଜ୍ଞାନୀମାନେ ଏହାକୁ କ୍ୟାନସର ଚିକିତ୍ସାରେ ନୂଆ ଯୁଗ ବୋଲି କହୁଛନ୍ତି। ଏହି ବଡ଼ ବୈଜ୍ଞାନିକ ସଫଳତା ପରେ ମଡେର୍ଣ୍ଣା କମ୍ପାନୀର ସେୟାର ମୂଲ୍ୟ ଗୋଟିଏ ଦିନରେ ୯୦% ରୁ ଅଧିକ ବୃଦ୍ଧି ପାଇଛି। ଚର୍ମ କ୍ୟାନସରରେ ଏହା ଭଲ କାମ କରିଥିବାରୁ, ମଡେର୍ଣ୍ଣା ଏବଂ ମର୍କ କମ୍ପାନୀ ଏବେ ଫୁସଫୁସ କ୍ୟାନସର, ବ୍ଲାଡର କ୍ୟାନସର ଏବଂ କିଡନୀ କ୍ୟାନସର ପାଇଁ ମଧ୍ୟ ଏହାର ପରୀକ୍ଷା ଆରମ୍ଭ କରିଦେଇଛନ୍ତି।

The post ୧୧୩୭ ରୋଗୀଙ୍କ ପରୀକ୍ଷାରେ ସଫଳ ହେଲା ମଡେର୍ଣ୍ଣା କ୍ୟାନସର ଟିକା appeared first on Sanket Tv.

ଏସସିବି କ୍ୟାମ୍ପସରେ ନିର୍ମାଣାଧୀନ ନୂଆ ବିଲ୍ଡିଂର ଦୁଇଟି ବ୍ଲକର ନିର୍ମାଣ କାର୍ଯ୍ୟ ଶେଷ ହୋଇସାରିଛି। ଶୀଘ୍ର ଏହି ଦୁଇ ବ୍ଲକରେ ରୋଗୀମାନଙ୍କୁ ସ୍ଥାନାନ୍ତରିତ କରାଯିବାର ପ୍ରକ୍ରିୟା ଆରମ୍ଭ ହେବ। ସେହିପରି ଅବଶିଷ୍ଟ ଦୁଇଟି ବ୍ଲକର ନିର୍ମାଣ କାମ ମଧ୍ୟ ଅତିଶୀଘ୍ର ସମାପ୍ତ କରିବାକୁ ଲକ୍ଷ୍ୟ ଧାର୍ଯ୍ୟ କରାଯାଇଛି। ଏହି ସମୀକ୍ଷା ବୈଠକ ଲୋକସେବା ଭବନରେ ଅନୁଷ୍ଠିତ ହୋଇଥିଲା, ଯେଉଁଠି ପାର୍କିଂ ଏବଂ ଅନ୍ୟାନ୍ୟ ରୋଗୀ ସୁବିଧା ସମ୍ପର୍କରେ ମଧ୍ୟ ଗଭୀର ଆଲୋଚନା ହୋଇଥିଲା।

ଏହାବ୍ୟତୀତ, ପୁରୁଣା ବିଲ୍ଡିଂ ସହିତ ସଂଯୋଗ କରି ଏସସିବିର ଦ୍ଵିତୀୟ କ୍ୟାମ୍ପସରେ ଏକ ନୂଆ ସ୍ୱତନ୍ତ୍ର ମେଡିସିନ ବିଭାଗୀୟ ବିଲ୍ଡିଂ ନିର୍ମାଣ କରାଯିବ। ଏହି ପ୍ରସ୍ତାବିତ ନୂଆ ବିଲ୍ଡିଂ ପାଇଁ ଡିପିଆର (DPR) ପ୍ରସ୍ତୁତ ହେବା ପରେ ପୁଣି ଥରେ ଏକ ବୈଠକ ଅନୁଷ୍ଠିତ ହେବ। ଏହି ସମଗ୍ର ନିର୍ମାଣ ପ୍ରକ୍ରିୟାକୁ ଡିସେମ୍ବର ସୁଦ୍ଧା ସମାପ୍ତ କରିବାକୁ ଲକ୍ଷ୍ୟ ଧାର୍ଯ୍ୟ କରାଯାଇଛି।

ମୁଖ୍ୟମନ୍ତ୍ରୀଙ୍କ ଏହି ସମୀକ୍ଷା ବୈଠକରେ ପୂର୍ତ୍ତ ମନ୍ତ୍ରୀ ପୃଥ୍ଵୀରାଜ ହରିଚନ୍ଦନ, ପୂର୍ତ୍ତ ବିଭାଗର ସଚିବ, କଟକ ଜିଲ୍ଲାପାଳ ଏବଂ ଅନ୍ୟାନ୍ୟ ବରିଷ୍ଠ ପ୍ରଶାସନିକ ଅଧିକାରୀମାନେ ଉପସ୍ଥିତ ଥିଲେ। ସେମାନେ ନିର୍ମାଣର ଅଗ୍ରଗତି ଏବଂ ଆଗାମୀ ପଦକ୍ଷେପ ସମ୍ପର୍କରେ ମୁଖ୍ୟମନ୍ତ୍ରୀଙ୍କୁ ଅବଗତ କରାଇଥିଲେ।

The post ଡିସେମ୍ବରରେ ଏସସିବି ନୂଆ ବିଲ୍ଡିଂ ଉଦଘାଟନ, ଜାନୁଆରୀରୁ କାର୍ଯ୍ୟକ୍ଷମ appeared first on Sanket Tv.

ଏହି ସ୍ୱାସ୍ଥ୍ୟ ସଙ୍କଟ ସମ୍ପର୍କରେ ସୂଚନା ଦେଇ ଗୁଜରାଟର ସ୍ୱାସ୍ଥ୍ୟ ମନ୍ତ୍ରୀ ପ୍ରଫୁଲ୍ଲ ପାନଶେରିୟା କହିଛନ୍ତି ଯେ, ରାଜ୍ୟରେ ଏପର୍ଯ୍ୟନ୍ତ ୧୮୪ଟି ସନ୍ଦିଗ୍ଧ ମାମଲା ରିପୋର୍ଟ କରାଯାଇଛି। ସେଥିମଧ୍ୟରୁ ୩୫ ଜଣଙ୍କ ରିପୋର୍ଟ ପଜିଟିଭ୍ ଆସିଛି ଏବଂ ୧୧ଟି ନମୁନାର ଫଳାଫଳ ଏବେ ବି ଅପେକ୍ଷାରେ ରହିଛି। ସେ ସ୍ପଷ୍ଟ କରିଛନ୍ତି ଯେ, ସମସ୍ତ ସନ୍ଦିଗ୍ଧ ମୃତ୍ୟୁ ମଧ୍ୟରୁ ୨୨ ଜଣ ଶିଶୁ ପ୍ରାଣ ହରାଇଛନ୍ତି। ବର୍ତ୍ତମାନ ୭ ଜଣ ରୋଗୀ ବିଭିନ୍ନ ସରକାରୀ ଡାକ୍ତରଖାନାରେ ଚିକିତ୍ସିତ ହେଉଥିବା ବେଳେ ୬ ଜଣ ସୁସ୍ଥ ହୋଇ ଘରକୁ ଫେରିଛନ୍ତି।

ରାଜ୍ୟର ମୁଖ୍ୟମନ୍ତ୍ରୀ ଭୂପେନ୍ଦ୍ର ପଟେଲଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ସମଗ୍ର ଗୁଜରାଟରେ ସ୍ଥିତି ଉପରେ ତୀକ୍ଷ୍ଣ ନଜର ରଖାଯାଇଛି। ସ୍ୱାସ୍ଥ୍ୟ ମନ୍ତ୍ରୀଙ୍କ କହିବାନୁସାରେ, ଗାନ୍ଧୀନଗର, ସାବରକାଣ୍ଠା ଜିଲ୍ଲାର ହିମ୍ମତନଗର, ପାଟଣ, ରାଜକୋଟ ଏବଂ ଭାବନଗରର ସିଭିଲ ହସ୍ପିଟାଲରେ ଶିଶୁମାନଙ୍କୁ ସ୍ୱତନ୍ତ୍ର ଚିକିତ୍ସା ଯୋଗାଇ ଦିଆଯାଉଛି। ଏହି ସଂକ୍ରମଣ କେବଳ ଗୋଟିଏ ଗାଁ ବା ଅଞ୍ଚଳରେ ସୀମିତ ନାହିଁ, ବରଂ ଗୁଜରାଟର ବିଭିନ୍ନ ପ୍ରାନ୍ତରୁ ମାମଲା ଆସୁଥିବାରୁ ସ୍ୱାସ୍ଥ୍ୟ ବିଭାଗ ଟିମ୍ ଗ୍ରାଉଣ୍ଡରେ ସକ୍ରିୟ ରହିଛନ୍ତି।

ପ୍ରତିଷେଧକ ମୂଳକ ପଦକ୍ଷେପ ସ୍ୱରୂପ, ସ୍ୱାସ୍ଥ୍ୟ ବିଭାଗ ଲୋକଙ୍କୁ ମାଟି ଘର ଏବଂ କାନ୍ଥର ଫାଟଗୁଡ଼ିକୁ ବନ୍ଦ କରିବାକୁ ପରାମର୍ଶ ଦେଇଛି। ଏହା ସହିତ ଗୃହପାଳିତ ପଶୁ ରହୁଥିବା ଅଞ୍ଚଳରେ କୀଟନାଶକ ସିଞ୍ଚନ କରାଯାଉଛି। ମନ୍ତ୍ରୀ କହିଛନ୍ତି ଯେ, ବର୍ତ୍ତମାନ ସୁଦ୍ଧା ଚାନ୍ଦିପୁରା ଭାଇରସ୍ ବିରୋଧରେ କୌଣସି ନିର୍ଦ୍ଦିଷ୍ଟ ଟିକା କିମ୍ବା ଔଷଧ ଉପଲବ୍ଧ ନାହିଁ। ତେଣୁ, ୧୫ ବର୍ଷରୁ କମ୍ ବୟସର ଶିଶୁଙ୍କ ଠାରେ ଜ୍ୱର, ବାନ୍ତି, ବାତ ମାରିବା ଭଳି ଲକ୍ଷଣ ଦେଖାଗଲେ ତୁରନ୍ତ ନିକଟସ୍ଥ ସରକାରୀ ଡାକ୍ତରଖାନାରେ ଭର୍ତ୍ତି କରିବାକୁ ନିର୍ଦ୍ଦେଶ ଦିଆଯାଇଛି।

ଚାନ୍ଦିପୁରା ଭାଇରସ୍ (ସି.ଏଚ୍.ପି.ଭି.) ଏକ ବିରଳ ଏବଂ ବିପଦପୂର୍ଣ୍ଣ ଭେକ୍ଟର-ବାହିତ ରୋଗ, ଯାହା ତୀବ୍ର ଏନସେଫାଲାଇଟିସ୍ ସିଣ୍ଡ୍ରୋମ୍ ସୃଷ୍ଟି କରେ। ଏହା ମୁଖ୍ୟତଃ ବାଲି ମାଛି କାମୁଡ଼ା ଦ୍ୱାରା ବ୍ୟାପିଥାଏ ଏବଂ ମୁଖ୍ୟତଃ ୧୫ ବର୍ଷରୁ କମ୍ ବୟସ୍କ ପିଲାମାନେ ପ୍ରଭାବିତ ହୁଅନ୍ତି। ଏହି ଭାଇରସ୍ ସଂକ୍ରମଣ ପରେ ଗୁଜରାଟର ସ୍ୱାସ୍ଥ୍ୟ ବ୍ୟବସ୍ଥାକୁ ହାଇ ଆଲର୍ଟରେ ରଖାଯାଇଛି।

The post ଗୁଜରାଟରେ ଚାନ୍ଦିପୁରା ଭାଇରସ୍ ଆତଙ୍କ: ୨୨ ଶିଶୁଙ୍କ ମୃତ୍ୟୁ appeared first on Sanket Tv.

କେନ୍ଦ୍ର ସରକାର ରକ୍ତଚାପ, ମଧୁମେହ, ହୃଦରୋଗ ଭଳି ଗୁରୁତର ରୋଗ ପାଇଁ ୩୫ଟି ପ୍ରମୁଖ ଔଷଧର ଦର ନିର୍ଦ୍ଧାରଣ କରିଛନ୍ତି। ଏହି ନିଷ୍ପତ୍ତି ପାଇଁ ମୁକେଶ ମହାଲିଙ୍ଗ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ ଏବଂ ପ୍ରଧାନମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି। ଏହାଦ୍ୱାରା ସାଧାରଣ ଲୋକମାନେ ସୁଲଭ ମୂଲ୍ୟରେ ଆବଶ୍ୟକୀୟ ଔଷଧ ପାଇପାରିବେ ବୋଲି ସେ କହିଛନ୍ତି।

ଅନ୍ୟପଟେ, ଖୋର୍ଦ୍ଧା କେମିଷ୍ଟ ଆଣ୍ଡ ଡ୍ରଗିଷ୍ଟ ଆସୋସିଏସନ୍ ସରକାରଙ୍କ ଏହି ନିଷ୍ପତ୍ତିକୁ ସ୍ୱାଗତ ଜଣାଇଛି। ଔଷଧ ବ୍ୟବସାୟୀ ସଂଘର କହିବା ଅନୁସାରେ, ମେଡିସିନ ମୂଲ୍ୟ ନିର୍ଦ୍ଧାରଣ ପାଇଁ ନ୍ୟାସନାଲ ଫାର୍ମାସୀ ପ୍ରାଇସିଂ ଅଥରିଟି (NPPA) ରହିଛି। ଏହି ନିର୍ଦ୍ଧାରିତ ଦରଠାରୁ ଅଧିକ ଟଙ୍କା ନେବାର ଅଧିକାର ବ୍ୟବସାୟୀଙ୍କୁ ନାହିଁ। ତେବେ ବିଭିନ୍ନ ବ୍ରାଣ୍ଡ୍ର ତାରତମ୍ୟ (ଭିନ୍ନତା) ଥିବା ଔଷଧ ଗୁଡ଼ିକ ପାଇଁ ଏହା ଅଧିକ ସୁବିଧା ଆଣିବ ବୋଲି ସଂଘ ପକ୍ଷରୁ କୁହାଯାଇଛି।

ଏହି ନୂଆ ନିୟମ କାର୍ଯ୍ୟକାରୀ ହେଲେ ଗ୍ରାହକମାନେ ଠକାମୀର ଶିକାର ହେବେ ନାହିଁ। ଗୋଟିଏ ସମାନ କମ୍ପୋଜିସନ୍ (ଉପାଦାନ) ଥିବା ଔଷଧ ସବୁ ସ୍ଥାନରେ ସମାନ ଦରରେ ଉପଲବ୍ଧ ହେବ। ଏହାଦ୍ୱାରା ସାଧାରଣ ଲୋକଙ୍କ ଅର୍ଥର ବଞ୍ଚତ ହେବା ସହ ଔଷଧ କ୍ଷେତ୍ରରେ ସ୍ୱଚ୍ଛତା ଆସିବ। ଗ୍ରାହକମାନେ ମଧ୍ୟ ଏହି ପଦକ୍ଷେପକୁ ସ୍ୱାଗତ କରି କହିଛନ୍ତି ଯେ, ଏହା ଦ୍ୱାରା ସେମାନେ ଶୋଷଣରୁ ରକ୍ଷା ପାଇବେ।

The post ରାଜ୍ୟର ସମସ୍ତ ଔଷଧ ଦୋକାନରେ ଲାଗିବ ଏକୀକୃତ ରେଟ୍ ଚାର୍ଟ appeared first on Sanket Tv.

ନୂଆ ମୂଲ୍ୟ ତାଲିକାରେ ଉଚ୍ଚ ରକ୍ତଚାପ, ମଧୁମେହ (ଡାୟାବେଟିସ୍), ହୃଦ୍ ରୋଗ, HIV ଏବଂ ଆଖି ସଂକ୍ରମଣ ଭଳି ଗୁରୁତର ରୋଗର ଚିକିତ୍ସା ପାଇଁ ବ୍ୟବହୃତ ଔଷଧ ସାମିଲ ରହିଛି। ଯଥା – ଆମ୍ଲୋଡିପାଇନ, ବାଇସୋପ୍ରୋଲୋ ଓ ଟେଲମିସାର୍ଟାନ ପ୍ରତି ଟାବଲେଟର ମୂଲ୍ୟ ୧୪ ଟଙ୍କା ୭୪ ପଇସା ଧାର୍ଯ୍ୟ କରାଯାଇଛି। ସରକାରଙ୍କ ଏହି ନିଷ୍ପତ୍ତି ଫଳରେ ଏବେ ଔଷଧ କମ୍ପାନୀଗୁଡ଼ିକ ନିର୍ଦ୍ଧାରିତ ଦରଠାରୁ ଅଧିକ ଦାମ୍ ନେଇପାରିବେ ନାହିଁ।

NPPA ପକ୍ଷରୁ କୁହାଯାଇଛି ଯେ, ବଜାରକୁ ଆସୁଥିବା ପ୍ରତ୍ୟେକ ନୂଆ ବ୍ୟାଚ୍ ଔଷଧର ଷ୍ଟ୍ରିପ୍ ଉପରେ ଏହି ସଂଶୋଧିତ MRP (ସର୍ବୋଚ୍ଚ ଖୁଚୁରା ମୂଲ୍ୟ) ଛାପିବା ବାଧ୍ୟତାମୂଳକ। ସମସ୍ତ ଔଷଧ ପ୍ରସ୍ତୁତକାରୀ ଏବଂ ବିକ୍ରେତାଙ୍କୁ ତୁରନ୍ତ ଏହି ନୂଆ ଦର ଲାଗୁ କରିବାକୁ ନିର୍ଦ୍ଦେଶ ଦିଆଯାଇଛି। ଏହାଦ୍ୱାରା ଗ୍ରାହକମାନେ ସଠିକ୍ ମୂଲ୍ୟରେ ଔଷଧ ପାଇପାରିବେ ଏବଂ ଅତ୍ୟଧିକ ଦାମ୍ ଦେବାକୁ ବାଧ୍ୟ ହେବେ ନାହିଁ।

ଯଦି କୌଣସି ଔଷଧ କମ୍ପାନୀ କିମ୍ବା ଖୁଚୁରା ଦୋକାନଦାର ଧାର୍ଯ୍ୟ ମୂଲ୍ୟଠାରୁ ଅଧିକ ଟଙ୍କା ଗ୍ରାହକଙ୍କଠାରୁ ଆଦାୟ କରନ୍ତି, ତେବେ ସେମାନଙ୍କ ବିରୋଧରେ କଠୋର ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଗ୍ରାହକମାନେ ଔଷଧ କିଣିବା ସମୟରେ ପ୍ୟାକେଟ୍ରେ ଥିବା MRP ନିଶ୍ଚୟ ଯାଞ୍ଚ କରନ୍ତୁ। ଯଦି କୌଣସି ବିକ୍ରେତା ଅଧିକ ଦାମ୍ ନେଉଛନ୍ତି, ତେବେ ଗ୍ରାହକ ନିଜ ନିକଟସ୍ଥ NPPA କାର୍ଯ୍ୟାଳୟ କିମ୍ବା ଔଷଧ ନିୟନ୍ତ୍ରଣ ବିଭାଗରେ ଅଭିଯୋଗ ଦାଖଲ କରିପାରିବେ।

The post ୩୯ଟି ନୂଆ ଔଷଧର ମୂଲ୍ୟ ସ୍ଥିର କଲେ କେନ୍ଦ୍ର ସରକାର appeared first on Sanket Tv.

ଫାର୍ମାସ୍ୟୁଟିକାଲ୍ କମ୍ପାନି ନୋଭୋ ନୋର୍ଡିସ୍କ (Novo Nordisk) ଦ୍ୱାରା ପ୍ରସ୍ତୁତ ଏହି ଇନସୁଲିନକୁ ଚିକିତ୍ସା କ୍ଷେତ୍ରରେ ବ୍ୟବହାର ପାଇଁ ଅନୁମତି ମିଳିସାରିଛି। ଏହି ସେବା ପାଇବାରେ ଭାରତ ବିଶ୍ୱର ପ୍ରଥମ ଦେଶଗୁଡ଼ିକ ମଧ୍ୟରେ ସାମିଲ ହୋଇଛି।

ରଏଟର୍ସ ରିପୋର୍ଟ ଅନୁଯାୟୀ, ଭାରତରେ ଏହି ଇନସୁଲିନର ପ୍ରଚଳନ ଏଭଳି ସମୟରେ ଆରମ୍ଭ ହୋଇଛି, ଯେତେବେଳେ ବିଶ୍ୱର ସର୍ବାଧିକ ମଧୁମେହରେ ପୀଡିତ ଏହି ଦେଶରେ ରହୁଛନ୍ତି। ଭାରତରେ ୧୦୧ ନିୟୁତରୁ ଅଧିକ ଲୋକ ମଧୁମେହରେ ପୀଡିତ ଥିବା ବେଳେ ଆଉ ୧୩୬ ନିୟୁତ ଲୋକ ପ୍ରି-ଡାଇବେଟିସ୍ ରୋଗରେ ପୀଡିତ ବୋଲି ଆକଳନ କରାଯାଉଛି।

ସାଧାରଣତଃ ଡାଇବେଟିସ୍ ରୋଗୀଙ୍କୁ ପ୍ରତିଦିନ ଇନସୁଲିନ୍ ଇଞ୍ଜେକ୍ସନ୍ ନେବାକୁ ପଡ଼ିଥାଏ। ବର୍ଷକୁ ପ୍ରାୟ ୩୬୫ଟି ହୋଇଥାଏ। ମାତ୍ର ‘ଆୱିକ୍ଲି’ ଆସିବା ପରେ ରୋଗୀଙ୍କୁ ବର୍ଷକୁ ମାତ୍ର ୫୨ଟି ଇଞ୍ଜେକ୍ସନ୍ ନେବାକୁ ପଡ଼ିବ। ଏହା ପ୍ରତିଦିନ ନେଉଥିବା ଇନସୁଲିନ୍ ଭଳି କିମ୍ବା ତା’ଠାରୁ ଅଧିକ ଭଲ ଭାବରେ ବ୍ଲଡ୍ ସୁଗାର ସ୍ତରକୁ ନିୟନ୍ତ୍ରଣ କରିଥାଏ।

ଆୱିକ୍ଲି ହେଉଛି ଏକ ଦୀର୍ଘ-କାର୍ଯ୍ୟକାରୀ ବେସାଲ୍ ଇନସୁଲିନ୍। ଏହାକୁ ସପ୍ତାହ ଧରି ଇନସୁଲିନ୍ ସମର୍ଥନ ପ୍ରଦାନ କରିବା ପାଇଁ ଡିଜାଇନ୍ କରାଯାଇଛି। ଏକ ପ୍ରି-ଫିଲ୍ଡ ପେନ୍ ସାହାଯ୍ୟରେ ଏହାକୁ ସପ୍ତାହର ଗୋଟିଏ ନିର୍ଦ୍ଦିଷ୍ଟ ବାରରେ ପେଟ, ଜଙ୍ଘ କିମ୍ବା ହାତର ଚମଡ଼ା ତଳେ ନିଆଯାଇଥାଏ। ରୋଗୀଙ୍କ ରକ୍ତ ଶର୍କରା ସ୍ତର ଅନୁସାରେ ଡୋଜ୍ ଆଡଜଷ୍ଟ କରାଯାଏ।

ଟାଇପ୍-୨ ଡାଇବେଟିସ୍ ରୋଗୀ ଏହାକୁ ଏକାକୀ କିମ୍ବା ଅନ୍ୟ ଔଷଧ ସହ ନେଇପାରିବେ। କିନ୍ତୁ, ଟାଇପ୍-୧ ଡାଇବେଟିସ୍ ରୋଗୀଙ୍କ କ୍ଷେତ୍ରରେ ଏହା ସହିତ ଖାଇବା ସମୟରେ ନିଆଯାଉଥିବା ସ୍ୱଳ୍ପକାଳୀନ ଇନସୁଲିନ୍ ମଧ୍ୟ ଆବଶ୍ୟକ ହେବ।

ଏହି ଔଷଧରେ ଇନସୁଲିନ୍ ଆଇକୋଡେକ୍ ଅଛି, ଯାହା ବ୍ଲଡ୍ ପ୍ରୋଟିନ୍ ଆଲବୁମିନ୍ ସହିତ ମିଶି ରହିଥାଏ। ଏହା ଧୀରେ ଧୀରେ ଏବଂ ସ୍ଥିର ଭାବରେ ପୂରା ସପ୍ତାହ ଯାକ ଶରୀରକୁ ଇନସୁଲିନ୍ ଯୋଗାଇଥାଏ। ରକ୍ତ ପ୍ରବାହରୁ କୋଷଗୁଡ଼ିକୁ ଗ୍ଲୁକୋଜ୍ ସ୍ଥାନାନ୍ତର କରିବାରେ ସାହାଯ୍ୟ କରିଥାଏ ଏବଂ ରକ୍ତରେ ଶର୍କରା ସ୍ତରକୁ ହ୍ରାସ କରିଥାଏ।

ନୋଭୋ ନୋର୍ଡିସ୍କ ଇଣ୍ଡିଆର ଏମଡି ବିକ୍ରାନ୍ତ ଶ୍ରୋତ୍ରୀୟ କହିଛନ୍ତି, ଭାରତ ହେଉଛି ଆୱିକ୍ଲି ଲଞ୍ଚ କରିଥିବା ସପ୍ତମ ଦେଶ। ପ୍ରତିଦିନ ଇଞ୍ଜେକ୍ସନ ଭୟରେ ଅନେକ ରୋଗୀ ଇନସୁଲିନ୍ ନେବାକୁ ପଛଘୁଞ୍ଚା ଦେଇଥାନ୍ତି, ଏହି ନୂଆ ଇନସୁଲିନ୍ ସେମାନଙ୍କ ସେହି ଭୟ ଓ ମାନସିକ ଅସୁବିଧାକୁ ଦୂର କରିବ।

The post ଭାରତରେ ଉପଲବ୍ଧ ହେଲା ସପ୍ତାହକୁ ଥରେ ଲାଗୁଥିବା ଇନସୁଲିନ୍ ଆୱିକ୍ଲି appeared first on Sanket Tv.