ରାଜ୍ୟ ଶିଳ୍ପ ମନ୍ତ୍ରୀ ସମ୍ପଦ ସ୍ଵାଇଁ ଏହି ସୂଚନା ଦେଇ କହିଛନ୍ତି ଯେ, କେନ୍ଦ୍ର ଜାହାଜ ଚଳାଚଳ ଏବଂ ଜଳପଥ ମନ୍ତ୍ରଣାଳୟର ‘ଜାହାଜ ନିର୍ମାଣ ବିକାଶ ଯୋଜନା’ ଅଧୀନରେ ‘ନ୍ୟାସନାଲ ସିପ୍ବିଲ୍ଡିଂ ଆଣ୍ଡ ହେଭି ଇଣ୍ଡଷ୍ଟ୍ରିଜ୍ ପାର୍କ ଓଡ଼ିଶା ଲିମିଟେଡ୍’କୁ ଏହି ୨୪,୭୦୦ କୋଟି ଟଙ୍କାର ମେଗା ପ୍ରକଳ୍ପ ପାଇଁ ଅନୁମୋଦନ ମିଳିଛି।

ପାରାଦୀପସ୍ଥିତ ଇଫ୍କୋ (IFFCO) ପ୍ଲାଣ୍ଟ ନିକଟରେ ମହାନଦୀର ଉତ୍ତର କୂଳରେ ଏହି ପ୍ରସ୍ତାବିତ ଶିଳ୍ପ କ୍ଲଷ୍ଟର ନିର୍ମାଣ କରାଯିବ। ଓଡ଼ିଶା ନୌବାଣିଜ୍ୟ ବୋର୍ଡ ଏବଂ ପାରାଦୀପ ବନ୍ଦର କର୍ତ୍ତୃପକ୍ଷଙ୍କ ମିଳିତ ସହଯୋଗରେ ଏହି ବୃହତ୍ ପ୍ରକଳ୍ପଟି ଏକ ‘ସ୍ୱତନ୍ତ୍ର ଉଦ୍ଦେଶ୍ୟ ଯାନ’ ମାଧ୍ୟମରେ ବିକଶିତ ହେବ।

ଏହି କ୍ଲଷ୍ଟରରେ ଜାହାଜ ନିର୍ମାଣ, ଜାହାଜ ମରାମତି ଏବଂ ଆନୁସଙ୍ଗିକ ଭାରୀ ଶିଳ୍ପ ପାଇଁ ଏକ ସମନ୍ୱିତ ଇକୋସିଷ୍ଟମ୍ ଗଢ଼ିଉଠିବ। ମୂଳ ଯୋଜନା ଅନୁଯାୟୀ, ଏହି ପ୍ରକଳ୍ପ ପାଇଁ ପ୍ରାୟ ୨,୦୦୦ରୁ ୨,୫୦୦ ଏକର ଜମି ଏବଂ ୨ରୁ ୨.୫ କିଲୋମିଟର ଦୀର୍ଘ ସ୍ୱତନ୍ତ୍ର ଜଳପ୍ରାନ୍ତ (Waterfront) ବ୍ୟବହାର କରାଯିବ।

ଏହି କ୍ଲଷ୍ଟରରେ ଗୋଟିଏ କିମ୍ବା ଏକାଧିକ ବଡ଼ ଜାହାଜ ନିର୍ମାଣ ୟୁନିଟ୍ ରହିବ, ଯାହାର ମିଳିତ ନିର୍ମାଣ କ୍ଷମତା ବାର୍ଷିକ ପ୍ରାୟ ୧.୨ ନିୟୁତ ଗ୍ରସ୍ ଟନ୍ ହେବ। ଏହି ସମନ୍ୱିତ ଶିଳ୍ପାଞ୍ଚଳରେ କେବଳ ଜାହାଜ ତିଆରି ନୁହେଁ, ବରଂ ଇଞ୍ଜିନ୍ ନିର୍ମାଣ, ଇସ୍ପାତ ପ୍ରସେସିଂ ଏବଂ ସାମୁଦ୍ରିକ ଉପକରଣ ଯୋଗାଣ ଭଳି ଅନେକ ଆନୁଷଙ୍ଗିକ ଶିଳ୍ପ ମଧ୍ୟ ଗଢ଼ିଉଠିବ।

ଏହାସହିତ ଗବେଷଣା ଓ ବିକାଶ (R&D) କେନ୍ଦ୍ର, ବିଶେଷଜ୍ଞ ତାଲିମ କେନ୍ଦ୍ର ଏବଂ ସାଧାରଣ ଭିତ୍ତିଭୂମି ସୁବିଧା ଯୋଗାଇ ଦିଆଯିବ। ଏହି ବୃହତ୍ ପ୍ରକଳ୍ପ ଦ୍ୱାରା ରାଜ୍ୟରେ ବ୍ୟାପକ ନିଯୁକ୍ତି ସୁଯୋଗ ସୃଷ୍ଟି ହେବା ସହ ଓଡ଼ିଶା ବିଶ୍ୱ ନୌବାଣିଜ୍ୟ ମାନଚିତ୍ରରେ ଏକ ପ୍ରମୁଖ କେନ୍ଦ୍ର ଭାବେ ଉଭା ହେବ।

The post ଓଡ଼ିଶାରେ ହେବ ପ୍ରଥମ ବିଶାଳ ପଣ୍ୟବାହୀ ଜାହାଜ ନିର୍ମାଣ କ୍ଲଷ୍ଟର appeared first on Sanket Tv.

୨୦୦୧-୦୨ ମସିହାରେ ନିତ୍ୟାନନ୍ଦ ମହାନ୍ତି ଢେଙ୍କାନାଳ ଜିଲ୍ଲାପାଳ ଥିବାବେଳେ ତତ୍କାଳୀନ ପ୍ରକଳ୍ପ ନିର୍ଦ୍ଦେଶକ (ପିଡି), ଡିଆରଡିଏ ସୂର୍ଯ୍ୟନାରାୟଣ ଦାସ ଓ ପରିବହନ ଠିକାଦାର ସତ୍ୟାନନ୍ଦ ବଳସାମନ୍ତଙ୍କ ସହ ମିଶି ସରକାରୀ ଅର୍ଥ ହେରଫେର କରିଥିବା ଅଭିଯୋଗ ହୋଇଥିଲା। ଏଫସିଆଇ ଗୋଦାମରୁ ବିଭିନ୍ନ ବ୍ଲକ୍ ଓ ଗ୍ରାମପଞ୍ଚାୟତକୁ ଚାଉଳ ଓ ଗହମ ପରିବହନ ପାଇଁ ଓଡ଼ିଶା ସିଭିଲ୍ ସପ୍ଲାଏ କର୍ପୋରେସନ୍ ନିର୍ଦ୍ଧାରିତ ହାର ଅପେକ୍ଷା ଅଧିକ ଦର ଧାର୍ଯ୍ୟ କରାଯାଇଥିଲା। ଏହି ଅଧିକ ଦରକୁ ପୂର୍ବତନ ଜିଲ୍ଲାପାଳ ଅନୁମୋଦନ କରିଥିଲେ, ଯାହାଦ୍ୱାରା ସରକାରୀ ରାଜକୋଷକୁ ପ୍ରାୟ ୯ ଲକ୍ଷ ଟଙ୍କାର ଆର୍ଥିକ କ୍ଷତି ଘଟିଥିଲା।

ଏହି ଅଧିକ ଦର ପ୍ରଦାନ ଗଭୀର ତଦନ୍ତରେ ସାମ୍ନାକୁ ଆସିଥିଲା। ଭିଜିଲାନ୍ସ ବିଭାଗ ମାମଲା ରୁଜୁ କରି ୩ ଅଭିଯୁକ୍ତଙ୍କ ବିରୋଧରେ ଚାର୍ଜସିଟ୍ ଦାଖଲ କରିଥିଲା। କୋର୍ଟ ସମସ୍ତ ପ୍ରମାଣ ଓ ସାକ୍ଷ୍ୟ ଯାଞ୍ଚ କରି ୩ ଜଣଙ୍କୁ ଦୋଷୀ ସାବ୍ୟସ୍ତ କରିଛନ୍ତି। ପ୍ରତ୍ୟେକଙ୍କୁ ୧ ବର୍ଷ ସଶ୍ରମ କାରାଦଣ୍ଡ ଓ ଜରିମାନା ଦଣ୍ଡାଦେଶ ଶୁଣାଇଛନ୍ତି।

କୋର୍ଟଙ୍କ ରାୟ ପରେ ଓଡ଼ିଶା ଭିଜିଲାନ୍ସ ପୂର୍ବତନ ଜିଲ୍ଲାପାଳ ନିତ୍ୟାନନ୍ଦ ମହାନ୍ତି ଏବଂ ପୂର୍ବତନ ପିଡି, ଡିଆରଡିଏ ସୂର୍ଯ୍ୟନାରାୟଣ ଦାସଙ୍କ ପେନସନ୍ ବନ୍ଦ କରିବା ପାଇଁ ସକ୍ଷମ କର୍ତ୍ତୃପକ୍ଷଙ୍କ ପାଖରେ ପ୍ରସ୍ତାବ ଦାଖଲ କରିବ। ଏହି ପଦକ୍ଷେପ ଦୁର୍ନୀତିରେ ସଂପୃକ୍ତ ଅବସରପ୍ରାପ୍ତ ଅଧିକାରୀମାନଙ୍କ ବିରୋଧରେ ଭିଜିଲାନ୍ସର କଠୋର ମନୋଭାବକୁ ଦର୍ଶାଉଛି।

The post ଦୁର୍ନୀତି ମାମଲାରେ ପୂର୍ବତନ କଲେକ୍ଟରଙ୍କ ସମେତ ୩ ଦୋଷୀ, ୧ ବର୍ଷ ଜେଲ୍ ଓ ପେନସନ୍ ବନ୍ଦ appeared first on Sanket Tv.

ଉଲ୍ଲେଖଯୋଗ୍ୟ ଯେ, ସଞ୍ଜୟ ହାଂସଦା ବର୍ତ୍ତମାନ ଯାଜପୁର ଜିଲ୍ଲାର ସହକାରୀ ଡ୍ରଗ୍ ନିୟନ୍ତ୍ରକ ଭାବରେ କାର୍ଯ୍ୟରତ ଥିବା ବେଳେ ଜଗତସିଂହପୁର ଜିଲ୍ଲାର ଅତିରିକ୍ତ ଦାୟିତ୍ୱରେ ରହିଛନ୍ତି। କଟକ ଓ ଜଗତସିଂହପୁର ଭିଜିଲାନ୍ସ ଟିମ୍ ମିଳିତ ଭାବରେ ଏହି ଚଢ଼ାଉ କରିଥିଲା ଏବଂ ସଞ୍ଜୟଙ୍କୁ ରେଡ୍ ହ୍ୟାଣ୍ଡରେ ଧରିବାରେ ସଫଳ ହୋଇଥିଲା।

ଭିଜିଲାନ୍ସ ବିଭାଗ ତାଙ୍କୁ ଗିରଫ କରିବା ସହିତ ତାଙ୍କ କାର୍ଯ୍ୟାଳୟରେ ରଖାଯାଇଥିବା କାଗଜପତ୍ରଗୁଡ଼ିକର ଯାଞ୍ଚ କରିଛି। ଏହାବ୍ୟତୀତ, ଲାଞ୍ଚ ନେବା ଘଟଣାରେ ସହଯୋଗ କରିଥିବା ଅନ୍ୟ ଜଣେ କିରାଣୀଙ୍କୁ ମଧ୍ୟ ଭିଜିଲାନ୍ସ ଟିମ୍ ଗିରଫ କରି ତଦନ୍ତ ପରିସରକୁ ଆଣିଛି।

ସୂଚନା ଅନୁଯାୟୀ, ଏହି ବ୍ୟବସାୟୀ ପୂର୍ବରୁ ୨୦ ହଜାର ଟଙ୍କା ଲାଞ୍ଚ ଦେଇଥିଲେ। କିନ୍ତୁ ସଞ୍ଜୟ ପୁଣି ୬ ହଜାର ଟଙ୍କା ଦାବି କରିବାରୁ ବ୍ୟବସାୟୀ ଶେଷରେ ଭିଜିଲାନ୍ସ ନିକଟରେ ଅଭିଯୋଗ କରିଥିଲେ। ଭିଜିଲାନ୍ସ ପକ୍ଷରୁ କୁହାଯାଇଛି ଯେ, ଅଧିକ ତଦନ୍ତ ପରେ ତାଙ୍କର ଆୟ ବହିର୍ଭୂତ ସମ୍ପତ୍ତି ସମ୍ପର୍କରେ ଜଣାପଡ଼ିପାରେ।

The post ଲାଞ୍ଚ ନେଉଥିବାବେଳେ ସହକାରୀ ଡ୍ରଗ୍ ନିୟନ୍ତ୍ରକ ଭିଜିଲାନ୍ସ ହାତରେ ଗିରଫ appeared first on Sanket Tv.

ସୂଚନା ଅନୁଯାୟୀ, ଛାତ୍ରୀ ଜଣକ ନିଜ ପୁରୁଷ ବନ୍ଧୁଙ୍କ ସହିତ ସ୍ଥାନୀୟ ବିଶ୍ଵେଶ୍ଵର ପାହାଡ଼ ଅଞ୍ଚଳକୁ ବୁଲିବାକୁ ଯାଇଥିଲେ। ସେଠାରେ ପୁରୁଷ ବନ୍ଧୁ ଏବଂ ତାଙ୍କର ଅନ୍ୟ ଜଣେ ସହଯୋଗୀ ମିଶି ଛାତ୍ରୀଙ୍କ ସହ ଦୁଷ୍କର୍ମ କରିଥିବା ଅଭିଯୋଗ ହୋଇଛି। ଘଟଣା ପରେ ବିଳମ୍ବିତ ରାତିରେ ଅଭିଯୁକ୍ତମାନେ ତାଙ୍କୁ ତଳନଗର ନିକଟରେ ଛାଡ଼ି ଘଟଣାସ୍ଥଳରୁ ଫେରାର ହୋଇଯାଇଥିଲେ।

ଅସହାୟ ଓ ହତାଶ ଅବସ୍ଥାରେ ରାସ୍ତା କଡ଼ରେ ଛିଡ଼ା ହୋଇଥିବା ଛାତ୍ରୀଙ୍କୁ ରାଜପଥ ପାଟ୍ରୋଲିଂ ପୋଲିସ ଦେଖିବାକୁ ପାଇଥିଲା। ସେମାନେ ତାଙ୍କୁ ଉଦ୍ଧାର କରି ଜଣେ ସମ୍ପର୍କୀୟଙ୍କ ଘରେ ପହଞ୍ଚାଇ ଥିଲେ। ଏହାପରେ ପୀଡ଼ିତା ସୋର ଥାନାରେ ପହଞ୍ଚି ଘଟଣା ସମ୍ପର୍କରେ ଲିଖିତ ଏତଲା ଦେଇଥିଲେ।

ଅଭିଯୋଗକୁ ଭିତ୍ତି କରି ପୋଲିସ ବିଭିନ୍ନ ସ୍ଥାନରେ ଚଢ଼ଉ ଆରମ୍ଭ କରିଛି। ଏ ସମ୍ପର୍କରେ ସୋର ଥାନା ଆଇଆଇସି ଅନୁରାଗ ମହାନ୍ତି କହିଛନ୍ତି ଯେ, “ଘଟଣାକୁ ଗମ୍ଭୀରତାର ସହ ନିଆଯାଇ ତଦନ୍ତ ପ୍ରକ୍ରିୟା ଚାଲିଛି। ପୋଲିସର ଏକ ସ୍ୱତନ୍ତ୍ର ଟିମ୍ ମାମଲାରେ ସକ୍ରିୟ ଭାବେ କାର୍ଯ୍ୟ କରୁଛି ଏବଂ ଖୁବ୍ ଶୀଘ୍ର ଫେରାର ଥିବା ଅନ୍ୟ ଅଭିଯୁକ୍ତଙ୍କୁ ଗିରଫ କରାଯିବ।”

The post ବାଲେଶ୍ୱରରେ ଯୁକ୍ତ ଦୁଇ ଛାତ୍ରୀଙ୍କୁ ଦୁଷ୍କର୍ମ ଅଭିଯୋଗ appeared first on Sanket Tv.

ସତ୍ୟେନ୍ଦ୍ର ଜୈନଙ୍କ ପକ୍ଷରୁ ଆଇନଜୀବୀ ଏନ୍. ହରିହରନ୍ କୋର୍ଟରେ ଯୁକ୍ତି ରଖି କହିଥିଲେ ଯେ, ମାମଲା ରୁଜୁ ହେବାର ପ୍ରାୟ ୨୭ ମାସ ପରେ ତାଙ୍କୁ ଗିରଫ କରାଯାଇଛି। ଏହି ଦୀର୍ଘ ସମୟ ମଧ୍ୟରେ ତାଙ୍କୁ କେବଳ ଥରେ ପଚରାଉଚରା ପାଇଁ ଡକାଯାଇଥିଲା। ପରବର୍ତ୍ତୀ ସମୟରେ ପୁଣି ଥରେ ଡକାଯିବା ପରେ ତାଙ୍କୁ ଗିରଫ କରାଯାଇଥିବା ଓକିଲ ଉଲ୍ଲେଖ କରିଥିଲେ।

ଓକିଲ ଆହୁରି ଯୁକ୍ତି ଦେଇଥିଲେ ଯେ, ମାମଲା ସହ ଜଡ଼ିତ ସମସ୍ତ ସାମଗ୍ରୀ, ଦସ୍ତାବିଜ ଓ ପ୍ରମାଣ ତଦନ୍ତକାରୀ ସଂସ୍ଥା ଆଗରୁ ଜବତ କରିସାରିଛି। ତେଣୁ ତାଙ୍କୁ ହେପାଜତରେ ରଖିବାର କୌଣସି ଆବଶ୍ୟକତା ନାହିଁ ବୋଲି ପକ୍ଷର ଓକିଲ କୋର୍ଟଙ୍କୁ ଅବଗତ କରାଇଥିଲେ।

ଅପରପକ୍ଷରେ, ଆଣ୍ଟି କରପ୍ସନ୍ ବ୍ରାଞ୍ଚ (ଏସିବି) ଜାମିନକୁ ଜୋରଦାର ବିରୋଧ କରିଥିଲା। ତଦନ୍ତକାରୀ ସଂସ୍ଥା ପକ୍ଷରୁ ସତ୍ୟେନ୍ଦ୍ର ଜୈନଙ୍କୁ ଅଭ୍ୟାସଗତ ଅପରାଧୀ ବୋଲି ଦାବି କରାଯିବା ସହ ଜାମିନ ଆବେଦନ ଉପରେ ନିଷ୍ପତ୍ତି ନେବା ବେଳେ ଏହି ଦିଗକୁ ବିଚାର କରିବାକୁ କୋର୍ଟଙ୍କୁ ଅନୁରୋଧ କରାଯାଇଥିଲା।

ଉଲ୍ଲେଖଯୋଗ୍ୟ ଯେ, ଦିଲ୍ଲୀ ଜଳ ବୋର୍ଡର ଏସଟିପି ପ୍ରକଳ୍ପର ଟେଣ୍ଡର ପ୍ରକ୍ରିୟାରେ କଥିତ ଅନିୟମିତତା ମାମଲାରେ ଏସିବି ଅଗଷ୍ଟ ୧୮ ତାରିଖରେ ସତ୍ୟେନ୍ଦ୍ର ଜୈନଙ୍କୁ ଗିରଫ କରିଥିଲା। ତାଙ୍କ ବିରୋଧରେ ଦୁର୍ନୀତି ନିବାରଣ ଆଇନ ଏବଂ ଭାରତୀୟ ଦଣ୍ଡ ସଂହିତାର ସମ୍ପୃକ୍ତ ଧାରାରେ ମାମଲା ରୁଜୁ ହୋଇଥିଲା। ଏହି ମାମଲା ୨୦୨୪ ମେ ମାସରେ ଦିଲ୍ଲୀ ସରକାରଙ୍କ ଭିଜିଲାନ୍ସ ଡାଇରେକ୍ଟୋରେଟ୍ର ଅଭିଯୋଗ ଆଧାରରେ ରୁଜୁ ହୋଇଥିଲା।

The post ଆମ୍ ଆଦମୀ ପାର୍ଟିର ବରିଷ୍ଠ ନେତା ସତ୍ୟେନ୍ଦ୍ର ଜୈନଙ୍କୁ ମିଳିଲା ଜାମିନ appeared first on Sanket Tv.

ଏହି ମାମଲାରେ ପୂର୍ବରୁ ଭୁବନେଶ୍ୱର SDJM ମଧ୍ୟ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ଭି.କେ. ପାଣ୍ଡିଆନଙ୍କ ସ୍ୱଚ୍ଛତା ଉପରେ ମୋହର ମାରିଥିଲେ। ଆଜି ଜିଲ୍ଲା ଜଜ୍ ସେହି ନିମ୍ନ ଅଦାଲତର ଆଦେଶକୁ କାଏମ ରଖି କହିଛନ୍ତି ଯେ, ଦୁଇ ବର୍ଷ ଧରି ଅଭିଯୋଗକାରୀ କୌଣସି ଠୋସ୍ ପ୍ରମାଣ ଦାଖଲ କରି ପାରି ନାହାନ୍ତି। ତେଣୁ ଏହି ଅଭିଯୋଗକୁ ମିଥ୍ୟା, କପୋଳକଳ୍ପିତ ଓ ମନ୍ଦ ଉଦ୍ଦେଶ୍ୟପୂର୍ଣ୍ଣ ବୋଲି ବିଚାର କରାଯାଇଛି।

ପୂର୍ବତନ ମୁଖ୍ୟମନ୍ତ୍ରୀ ଏବଂ ପାଣ୍ଡିଆନଙ୍କ ପକ୍ଷରୁ ମାମଲା ଲଢ଼ୁଥିବା ବରିଷ୍ଠ ଆଇନଜୀବୀ ତଥା ପୂର୍ବତନ ଆଡଭୋକେଟ୍ ଜେନେରାଲ୍ ଅଶୋକ କୁମାର ପରିଜା ଏବଂ ଆଇନଜୀବୀ ସୀତାଂଶୁ ମୋହନ ଦ୍ୱିବେଦୀ କୋର୍ଟଙ୍କୁ ଅବଗତ କରାଇଥିଲେ ଯେ, ଅଭିଯୋଗକାରୀ କୌଣସି ଉପଯୁକ୍ତ ପ୍ରମାଣ ଦାଖଲ କରି ନାହାନ୍ତି ଏବଂ ଅଭିଯୋଗ ଉପସ୍ଥାପନ କରିବା ପୂର୍ବରୁ ବିଏନଏସଏସ୍ (BNSS) ର ଧାରା ୧୭୩(୪) କୁ ପାଳନ କରି ନାହାନ୍ତି। ଏଥିସହ ଧାରା ୩୩ ଅନୁଯାୟୀ ଏହି ଅଭିଯୋଗର କୌଣସି ଆଇନଗତ ସ୍ଥିତି ନଥିବା କୋର୍ଟ ଉଲ୍ଲେଖ କରିଥିଲେ।

ଆଇନଗତ ଏବଂ ପ୍ରାମାଣିକ ତ୍ରୁଟି ଯୋଗୁଁ ଜିଲ୍ଲା ଜଜ୍ ତଳ କୋର୍ଟଙ୍କ ଖାରଜ ଆଦେଶକୁ ବଳବତ୍ତର ରଖିଛନ୍ତି। ପୂର୍ବରୁ କ୍ୟାପିଟାଲ ଥାନା ପୋଲିସ ଏବଂ ଡିସିପି ମଧ୍ୟ ଏହି ମାମଲାରେ କୌଣସି ସତ୍ୟତା ନଥିବାରୁ ଏଫ୍ଆଇଆର୍ ଦାୟର କରି ନଥିଲେ। ଭୁବନେଶ୍ୱର SDJM ମଧ୍ୟ ଅଭିଯୋଗକାରୀଙ୍କ ପ୍ରମାଣହୀନତାକୁ ଦୃଷ୍ଟିରେ ରଖି ପୂର୍ବରୁ ମାମଲା ଖାରଜ କରିଥିଲେ। ଶେଷରେ ଜିଲ୍ଲା ଜଜ୍ ସ୍ପଷ୍ଟ କରିଛନ୍ତି ଯେ, ଏହି ମାମଲାରେ କୌଣସି ଭିତ୍ତି ନାହିଁ ଏବଂ ଏହା ନିର୍ବାସିତ ତଥ୍ୟ ଉପରେ ଆଧାରିତ।

The post ନବୀନ ଓ ପାଣ୍ଡିଆନଙ୍କ ବିରୋଧରେ ହେଲିକପଟର ଅପବ୍ୟବହାର ମାମଲା ଖାରଜ appeared first on Sanket Tv.

ନୂଆ ସଂଶୋଧନ ଅନୁଯାୟୀ, ମୋଟର ସାଇକେଲ୍ ଏବଂ ତିନି ଚକିଆ ଗାଡ଼ି (ଯାତ୍ରୀବାହୀ/ମାଲ୍ ପରିବହନ) ପ୍ରଥମ ଥର ନିୟମ ଉଲ୍ଲଂଘନ କଲେ ୧ ହଜାର ଟଙ୍କା ଏବଂ ଦ୍ବିତୀୟ ଥର ଉଲ୍ଲଂଘନ କଲେ ୨ ହଜାର ଟଙ୍କା ଜରିମାନା ଦେବାକୁ ପଡିବ। ସେହିପରି ମୋଟର କାର୍, ଜିପ୍ ଏବଂ ମୋଟର କ୍ୟାବ୍ ପାଇଁ ପ୍ରଥମ ଥର ୨ ହଜାର ଏବଂ ଦ୍ବିତୀୟ ଥର ନିୟମ ଉଲ୍ଲଂଘନ କଲେ ୫ ହଜାର ଟଙ୍କା ଫାଇନ୍ ଧାର୍ଯ୍ୟ କରାଯାଇଛି।

ଟ୍ରାକ୍ଟର, ଟ୍ରେଲର ପାଇଁ ପ୍ରଥମ ଥର ୨ ହଜାର ଏବଂ ଦ୍ୱିତୀୟ ଥର ପାଇଁ ୫ ହଜାର ଟଙ୍କା ଜରିମାନା ଲାଗିବ। ଅନନ୍ୟା ଯାନ (ଅନ୍ୟ ବାହନ) ପ୍ରଥମ ଥର ପାଇଁ ୩ ହଜାର ଏବଂ ଦ୍ବିତୀୟ ଥର ପାଇଁ ୬ ହଜାର ଟଙ୍କା ଫାଇନ୍ ଧାର୍ଯ୍ୟ କରାଯାଇଛି। ଏହାସହ ୯୦ ଦିନରୁ ଅଧିକ ଦିନ ଇ-ଚାଲାଣ ବକେୟା ଥିଲେ PUCC ହୋଇପାରିବ ନାହିଁ ବୋଲି ମନ୍ତ୍ରୀ ଶ୍ରୀ ଜେନା ସ୍ପଷ୍ଟ କରିଛନ୍ତି।

ନୂଆ ନିୟମ ଅନୁଯାୟୀ ସଂକ୍ଷିପ୍ତ ସୂଚୀ:

• ମୋଟର ସାଇକେଲ୍: ପ୍ରଥମ ଥର ୧ ହଜାର, ଦ୍ବିତୀୟ ଥର ୨ ହଜାର
• ତିନି ଚକିଆ ଗାଡ଼ି: ପ୍ରଥମ ଥର ୧ ହଜାର, ଦ୍ବିତୀୟ ଥର ୨ ହଜାର
• ମୋଟର କ୍ୟାବ୍/କାର୍/ଜିପ୍: ପ୍ରଥମ ଥର ୨ ହଜାର, ଦ୍ବିତୀୟ ଥର ୫ ହଜାର
• ଟ୍ରାକ୍ଟର/ଟ୍ରେଲର: ପ୍ରଥମ ଥର ୨ ହଜାର, ଦ୍ବିତୀୟ ଥର ୫ ହଜାର
• ଅନ୍ୟାନ୍ୟ ଯାନ: ପ୍ରଥମ ଥର ୩ ହଜାର, ଦ୍ବିତୀୟ ଥର ୬ ହଜାର

The post ରାଜ୍ୟରେ କମିଲା ପ୍ରଦୂଷଣ ନିୟନ୍ତ୍ରଣ ସାର୍ଟିଫିକେଟ୍ ଫାଇନ୍ appeared first on Sanket Tv.

ଶୁଣାଣି ସମୟରେ ବରିଷ୍ଠ ଆଇନଜୀବୀ ପି. ଚିଦାମ୍ବରମ କୋର୍ଟଙ୍କୁ ଜଣାଇଥିଲେ ଯେ, ଗତକାଲି ସନ୍ଧ୍ୟାରେ ମାମଲାର ‘ରିଜଏଣ୍ଡର’ ଦାଖଲ କରାଯାଇଛି। ଏହାସହ ଏହି ମାମଲାରେ ଆମିକସ୍ କ୍ୟୁରି ରାଜୁ ରାମଚନ୍ଦ୍ରନ୍ ନିଜର ରିପୋର୍ଟ ଦାଖଲ କରିବାର ଥିବାରୁ ଏହାକୁ ଯାଞ୍ଚ କରିବା ପାଇଁ ଅଧିକ ସମୟର ଆବଶ୍ୟକତା ରହିଛି। ତେଣୁ ସୋମବାର ପର୍ଯ୍ୟନ୍ତ ଶୁଣାଣି ଘୁଞ୍ଚାଇବାକୁ ସେ ଅନୁରୋଧ କରିଥିଲେ।

ଅନ୍ୟପଟେ, ସଲିସିଟର ଜେନେରାଲ୍ ତୁଷାର ମେହେଟ୍ଟା ମଧ୍ୟ ବିଚାରପତିଙ୍କୁ ଅଧିକ ସମୟ ଦେବା ପାଇଁ ନିବେଦନ କରିଥିଲେ। ଦୁଇ ପକ୍ଷର ଅନୁରୋଧକୁ ବିଚାରକୁ ନେଇ ସୁପ୍ରିମକୋର୍ଟଙ୍କ ଖଣ୍ଡପୀଠ ଶୁଣାଣିକୁ ଆସନ୍ତା ୭ ସେପ୍ଟେମ୍ବର ପର୍ଯ୍ୟନ୍ତ ସ୍ଥଗିତ ରଖିଛନ୍ତି। ଆସନ୍ତା ସୋମବାର ଶୁଣାଣି ବେଳେ ଆମିକସ୍ କ୍ୟୁରିଙ୍କ ରିପୋର୍ଟ ଆଧାରରେ ସମସ୍ତ ପକ୍ଷ ନିଜ ନିଜର ଯୁକ୍ତି ଉପସ୍ଥାପନ କରିବାର ସମ୍ଭାବନା ରହିଛି।

ସୂଚନାଯୋଗ୍ୟ, ଓ୍ଵାଇବି ଖୁରାନିଆଙ୍କ ଅବସର ରାଜ୍ୟରେ ପୂର୍ଣ୍ଣକାଳୀନ ଡିଜି ପଦ ଖାଲି ପଡ଼ିଛି। ଡିଜି ପଦକୁ ନେଇ ଜାରି ବିବାଦକୁ ନେଇ ଉପୁଜିଥିବା ମାମଲାର ଶୁଣାଣି ସୁପ୍ରିମକୋର୍ଟରେ ଚାଲିଛି। ଅନ୍ୟପଟେ କ୍ରାଇମବ୍ରାଞ୍ଚ ଡିଜି ବିନୟତୋଷ ମିଶ୍ର ଅନ୍ତରୀଣ ପୋଲିସ ମହାନିର୍ଦ୍ଦେଶକ ଭାବେ କାର୍ଯ୍ୟ କରୁଛନ୍ତି। ଡିଜି ନିଯୁକ୍ତିରେ ରାଜ୍ୟ ସରକାର ନିୟମର ଉଲ୍ଲଂଘନ କରିଥିବା ନେଇ ସୁପ୍ରିମକୋର୍ଟରେ ଅଭିଯୋଗ ହୋଇଛି।

ସୁପ୍ରିମକୋର୍ଟଙ୍କ ୨୦୦୬ ‘ପ୍ରକାଶ ସିଂହ ମାମଲା’ର ନିର୍ଦ୍ଦେଶାନୁସାରେ, ରାଜ୍ୟଗୁଡ଼ିକ ଡିଜିପି ଚୟନ ପାଇଁ ସଂଘ ଲୋକସେବା ଆୟୋଗ (UPSC) ନିକଟକୁ ବରିଷ୍ଠ ଆଇପିଏସ (IPS) ଅଫିସରଙ୍କ ନାମ ପଠାଇବା କଥା। UPSC ତିନିଜଣିଆ ସର୍ଟଲିଷ୍ଟ୍ ପ୍ରସ୍ତୁତ କଲା ପରେ ରାଜ୍ୟ ସରକାର ସେଥିରୁ ଜଣଙ୍କୁ ନିଯୁକ୍ତ କରିବେ। ଏହାସହ ନିଯୁକ୍ତ ଡିଜିପିଙ୍କ କାର୍ଯ୍ୟକାଳ ଅତିକମରେ ୨ ବର୍ଷ ରହିବା ବାଧ୍ୟତାମୂଳକ। ଓଡ଼ିଶାରେ ଏହି ନିୟମର ସଠିକ୍ ପାଳନ ହୋଇନଥିବା ନେଇ ଆବେଦନ ହୋଇଛି। ଏପରିକି ବରିଷ୍ଠତା ଆଧାରରେ ଯୋଗ୍ୟ ଆଇପିଏସ ଅଫିସରଙ୍କୁ ଏଡ଼ାଇ ଦିଆଯାଉଥିବା ଏବଂ UPSC କୁ ନାମ ପଠାଇବାରେ ବିଳମ୍ବ କରାଯାଉଥିବା ନେଇ ପୂର୍ବତନ ଅଫିସର ଓ ଆବେଦନକାରୀମାନେ ଅଭିଯୋଗ ଆଣିଛନ୍ତି।

The post ଓଡ଼ିଶା ଡିଜିପି ନିଯୁକ୍ତି ମାମଲାର ଶୁଣାଣି ସେପ୍ଟେମ୍ବର ୭ ପର୍ଯ୍ୟନ୍ତ ଘୁଞ୍ଚିଲା appeared first on Sanket Tv.

ମନ୍ତ୍ରୀ ଶ୍ରୀ ଜେନା କହିଛନ୍ତି ଯେ, ବିକ୍ରମ ପଣ୍ଡାଙ୍କ ରାଜନୈତିକ ପ୍ରାସଙ୍ଗିକତା ଏକ ଏକ୍ସପାୟରୀ ଡେଟ୍ ଔଷଧ ପରି ଅପ୍ରଭାବୀ ହୋଇଗଲାଣି। ତାଙ୍କୁ ସ୍ୱାଧୀନତା ସଂଗ୍ରାମୀଙ୍କ ଭଳି ସମ୍ମାନ ଦେବା ଆମ ସମସ୍ତଙ୍କ ପାଇଁ ଲଜ୍ଜାର ବିଷୟ ବୋଲି ସେ ମତ ଦେଇଛନ୍ତି। ଗଞ୍ଜାମ ଅଞ୍ଚଳର ଭାଷାରେ ଏହାକୁ ‘ଅଲାଜୁକ’ ବୋଲି କୁହାଯାଏ, ଯାହାର ଅର୍ଥ ହେଉଛି ଅସମ୍ଭବ ଓ ଅନୁଚିତ।

ମଙ୍ଗଳବାର ବ୍ରହ୍ମପୁରରେ ବିକ୍ରମ ପଣ୍ଡାଙ୍କୁ ଭବ୍ୟ ସ୍ୱାଗତ କରିଥିବା ବିଜେଡି ନେତାମାନଙ୍କୁ ଉଦ୍ଦେଶ୍ୟ କରି ମନ୍ତ୍ରୀ କହିଛନ୍ତି ଯେ, ସେମାନେ ଏହା ଭାବିବା ଉଚିତ୍ ଥିଲା ଯେ ବିକ୍ରମ ପଣ୍ଡା ଦେଶ ବା ରାଜ୍ୟ ପାଇଁ କୌଣସି ବଡ଼ କାର୍ଯ୍ୟ କରି ଜେଲ୍ ଯାଇନାହାନ୍ତି। ବରଂ ସେ ଏକ ହତ୍ୟା ଅଭିଯୋଗରେ ଗିରଫ ହୋଇଥିଲେ ଏବଂ ବର୍ତ୍ତମାନ ଜାମିନ ପାଇବା ପରେ ବାହାରକୁ ଆସିଛନ୍ତି। ତେଣୁ ଏଭଳି ଘଟଣାକୁ ନେଇ ଗର୍ବ କରିବା କିମ୍ବା ବଡ଼ ପ୍ରୋସେସନ୍ କରିବା ଠିକ୍ ନୁହେଁ ବୋଲି ସେ ଗୁରୁତ୍ୱାରୋପ କରିଛନ୍ତି।

ଆଇନଜୀବୀ ପୀତବାସ ପଣ୍ଡାଙ୍କ ପରିବାରକୁ ନ୍ୟାୟ ମିଳିବ ବୋଲି ଆଶା ପ୍ରକାଶ କରି ମନ୍ତ୍ରୀ କହିଛନ୍ତି ଯେ, ଏହି ମାମଲାରେ ଦୋଷୀ ବ୍ୟକ୍ତିଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ସେ ନ୍ୟାୟିକ ପ୍ରକ୍ରିୟା ପ୍ରତି ଆସ୍ଥା ପ୍ରକାଶ କରିଛନ୍ତି।

ଅନ୍ୟପକ୍ଷରେ, ମନ୍ତ୍ରୀଙ୍କ ଏହି ମନ୍ତବ୍ୟକୁ ପ୍ରତ୍ୟାଖ୍ୟାନ କରି ବିଜେଡି ପକ୍ଷରୁ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ବିଜେଡି କହିଛି ଯେ, ବିକ୍ରମ ପଣ୍ଡାଙ୍କୁ ଉଦ୍ଦେଶ୍ୟମୂଳକ ଭାବେ ଏହି ହତ୍ୟା ମାମଲାରେ ଫସାଯାଇଛି। ଗଞ୍ଜାମ ଜିଲ୍ଲା ବିଜେଡି ସଭାପତି ହେବା ପରେ ତାଙ୍କ ଲୋକପ୍ରିୟତା ଓ ସାଂଗଠନିକ ଦକ୍ଷତାକୁ ଦେଖି ବିଜେପି ନେତାମାନେ ତାଙ୍କୁ ସହ୍ୟ କରିପାରି ନଥିଲେ, ଯାହା ଫଳରେ ଏହି ଷଡ଼ଯନ୍ତ୍ର କରାଯାଇଥିଲା।

ବିଜେଡି ଆହୁରି ମଧ୍ୟ କହିଛି ଯେ, ବିକ୍ରମଙ୍କ ଗିରଫଦାରୀ ଅସାମ୍ବିଧାନିକ ଥିଲା ଏବଂ ହାଇକୋର୍ଟ ଜାମିନ ବେଳେ ଯେଉଁ ରିପୋର୍ଟ ଦେଇଛନ୍ତି, ମନ୍ତ୍ରୀ ଯଦି ସେହି ରିପୋର୍ଟ ପଢିବେ ତେବେ ସତ୍ୟ ଜାଣିପାରିବେ। ମନ୍ତ୍ରୀ ନିଜ ନିର୍ବାଚନ ମଣ୍ଡଳୀରେ ଲୋକଙ୍କ ମନୋଭାବ ଜାଣିବା ପାଇଁ ଯିବା ଉଚିତ୍ ବୋଲି ବିଜେଡି କହିଛି। ସେମାନେ ପ୍ରଶ୍ନ ଉଠାଇଛନ୍ତି ଯେ, ମନ୍ତ୍ରୀ କ’ଣ ଜ୍ୟୋତିଷ ଯେ ସେ ବିଜେଡିର ‘ଏକ୍ସପାୟରୀ ଡେଟ୍’ ନିର୍ଦ୍ଧାରଣ କରିବେ?

The post ବିକ୍ରମ ପଣ୍ଡାଙ୍କୁ ଭବ୍ୟ ସ୍ୱାଗତ ଓ ପ୍ରୋସେସନ୍ କଟାକ୍ଷ କଲେ ମନ୍ତ୍ରୀ ବିଭୂତି ଜେନା appeared first on Sanket Tv.

ଉପମୁଖ୍ୟମନ୍ତ୍ରୀ ଶ୍ରୀମତୀ ପ୍ରଭାତୀ ପରିଡ଼ା ପତାକା ଦେଖାଇ ଏହି ତୀର୍ଥ ଯାତ୍ରାର ଶୁଭାରମ୍ଭ କରିଥିବା ବେଳେ ପର୍ଯ୍ୟଟନ ମନ୍ତ୍ରୀ ଶ୍ରୀ ସମ୍ପଦ ସ୍ବାଇଁ ମଧ୍ୟ ଉପସ୍ଥିତ ରହି ଯାତ୍ରୀମାନଙ୍କୁ ଶୁଭେଚ୍ଛା ଜଣାଇଥିଲେ। ଏହି ଅବସରରେ ବରିଷ୍ଠ ନାଗରିକମାନଙ୍କ ସୁରକ୍ଷା ଓ ସୁବିଧା ପାଇଁ ୨୫ ଜଣ ଅଧିକାରୀ ମଧ୍ୟ ସେମାନଙ୍କ ସହ ଯାତ୍ରା କରିଛନ୍ତି।

ପ୍ରଥମ ପର୍ଯ୍ୟାୟରେ ଖୋର୍ଦ୍ଧା ଜିଲ୍ଲାରୁ ୧୬୯, ଜଗତସିଂହପୁରରୁ ୮୫, କଟକରୁ ୧୯୭, ପୁରୀରୁ ୧୨୭, କେନ୍ଦ୍ରାପଡ଼ାରୁ ୧୦୮ ଏବଂ ଢେଙ୍କାନାଳ ଜିଲ୍ଲାରୁ ୮୯ ଜଣଙ୍କୁ ନେଇ ମୋଟ ୭୭୫ ଜଣ ଯାତ୍ରୀ ଏହି ତୀର୍ଥଯାତ୍ରାରେ ସାମିଲ ହୋଇଛନ୍ତି। ସେମାନେ ଆସନ୍ତା ୭ ତାରିଖରେ ଫେରିବେ ବୋଲି ଜଣାପଡ଼ିଛି।

ରାଜ୍ୟ ସରକାରଙ୍କ ଏହି ମହତ୍ ପ୍ରୟାସରେ ଆର୍ଥିକ ଦୁର୍ବଳ ଶ୍ରେଣୀର ବରିଷ୍ଠ ନାଗରିକମାନେ ଦେଶର ବିଭିନ୍ନ ତୀର୍ଥକ୍ଷେତ୍ରକୁ ବିନା ଖର୍ଚ୍ଚରେ ବୁଲିବାର ସୁଯୋଗ ପାଇପାରୁଛନ୍ତି। ଉପମୁଖ୍ୟମନ୍ତ୍ରୀ କହିଛନ୍ତି ଯେ, ଏହା ଦ୍ୱାରା ବରିଷ୍ଠ ନାଗରିକମାନଙ୍କର ତୀର୍ଥ ଦର୍ଶନର ସ୍ୱପ୍ନ ସାକାର ହେଉଛି। ପର୍ଯ୍ୟାୟ କ୍ରମେ ରାଜ୍ୟର ଅନ୍ୟ ଜିଲ୍ଲାର ବରିଷ୍ଠ ନାଗରିକମାନଙ୍କୁ ମଧ୍ୟ ଏଭଳି ଯାତ୍ରାରେ ଅଂଶଗ୍ରହଣ କରାଯିବ।

The post ୭୭୫ ବରିଷ୍ଠ ନାଗରିକଙ୍କ ବାରାଣସୀ-ଅଯୋଧ୍ୟା ତୀର୍ଥ ଯାତ୍ରା ଶୁଭାରମ୍ଭ appeared first on Sanket Tv.