୧୩ ବର୍ଷରୁ କମ୍ ପିଲାଙ୍କୁ ସୋସିଆଲ ମିଡିଆ ଉପରେ ପ୍ରତିବନ୍ଧକ ଲଗାଇଲା ଆନ୍ଧ୍ରପ୍ରଦେଶ

ଅମରାବତୀ(ସଂକେତ ଟିଭି): ଆନ୍ଧ୍ରପ୍ରଦେଶ ସରକାର ୧୩ ବର୍ଷରୁ କମ୍ ବୟସ୍କ ପିଲାଙ୍କ ପାଇଁ ସୋସିଆଲ ମିଡିଆ ପ୍ଲାଟଫର୍ମ ଉପରେ ପ୍ରତିବନ୍ଧକ ଲଗାଇବାକୁ ନିଷ୍ପତ୍ତି ନେଇଛନ୍ତି। ମୁଖ୍ୟମନ୍ତ୍ରୀ ଏନ୍.ଚନ୍ଦ୍ରବାବୁ ନାୟଡୁ ଶୁକ୍ରବାର ଏହି ଘୋଷଣା କରିଛନ୍ତି। ତାଙ୍କ ଘୋଷଣା ଅନୁଯାୟୀ, ଆଗାମୀ ୯୦ ଦିନ ମଧ୍ୟରେ ରାଜ୍ୟରେ ପର୍ଯ୍ୟାୟକ୍ରମେ ଏହି ନିୟମ କାର୍ଯ୍ୟକାରୀ ହେବ।

ମୁଖ୍ୟମନ୍ତ୍ରୀ ଶ୍ରୀ ନାୟଡୁ ଏହା ମଧ୍ୟ ସୂଚନା ଦେଇଛନ୍ତି ଯେ, ଏହି ପ୍ରତିବନ୍ଧକକୁ ଭବିଷ୍ୟତରେ ୧୩ରୁ ୧୬ ବର୍ଷ ବୟସ୍କ କିଶୋରଙ୍କ ପାଇଁ ଲାଗୁ କରିବାକୁ ରାଜ୍ୟ ସରକାର ବିଚାର କରୁଛନ୍ତି। ବିଶେଷଜ୍ଞଙ୍କ ପରାମର୍ଶ ଓ ନୀତି ଗଠନ ପରେ ଏହି ଦିଗରେ ପରବର୍ତ୍ତୀ ପଦକ୍ଷେପ ନିଆଯିବ ବୋଲି ସେ ସଙ୍କେତ ଦେଇଛନ୍ତି।

ଆନ୍ଧ୍ରପ୍ରଦେଶର ଏହି ନିଷ୍ପତ୍ତି କର୍ଣ୍ଣାଟକ ସରକାରଙ୍କ ସମାନ ପଦକ୍ଷେପ ଅନୁସରଣରେ ଆସିଛି। କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଦାରମୈୟା ଶୁକ୍ରବାର ବିଧାନସଭାରେ ୨୦୨୬-୨୭ ବର୍ଷର ରାଜ୍ୟ ବଜେଟ୍ ଉପସ୍ଥାପନ କରିବା ସମୟରେ ୧୬ ବର୍ଷରୁ କମ୍ ବୟସ୍କ ପିଲାଙ୍କ ପାଇଁ ସୋସିଆଲ ମିଡିଆ ନିଷେଧ ଘୋଷଣା କରିଥିଲେ। ପିଲାମାନଙ୍କ ମଧ୍ୟରେ ମୋବାଇଲ ଫୋନ୍ର ବ୍ୟବହାର ବୃଦ୍ଧି ଜନିତ ନକାରାତ୍ମକ ପ୍ରଭାବକୁ ରୋକିବା ଏହି ନିଷ୍ପତ୍ତିର ଉଦ୍ଦେଶ୍ୟ ବୋଲି ସିଦ୍ଦାରମୈୟା କହିଛନ୍ତି।

କର୍ଣ୍ଣାଟକ ବଜେଟ୍ରେ କେବଳ ସୋସିଆଲ ମିଡିଆ ପ୍ରତିବନ୍ଧକ ନୁହେଁ, ଶିକ୍ଷା ଓ ଛାତ୍ର କଲ୍ୟାଣ ସମ୍ପର୍କିତ ଅନେକ ଗୁରୁତ୍ୱପୂର୍ଣ୍ଣ ଘୋଷଣା ମଧ୍ୟ କରାଯାଇଛି। ଆଗାମୀ ଶିକ୍ଷାବର୍ଷରେ ବିଦ୍ୟାଳୟ ଓ ମହାବିଦ୍ୟାଳୟମାନଙ୍କରେ ଥିବା ୧୫ ହଜାର ଶିକ୍ଷକ ପଦବୀ ପୂରଣ କରିବାକୁ ସରକାର ଯୋଜନା କରିଛନ୍ତି।

ଶିକ୍ଷା ଭିତ୍ତିଭୂମି ବିକାଶ ପାଇଁ ମଧ୍ୟ ବଜେଟ୍ରେ ବ୍ୟାପକ ବ୍ୟବସ୍ଥା ରଖାଯାଇଛି। ପ୍ରାଥମିକ ବିଦ୍ୟାଳୟ, ଉଚ୍ଚ ବିଦ୍ୟାଳୟ ଏବଂ ପ୍ରି-ୟୁନିଭର୍ସିଟି କଲେଜଗୁଡ଼ିକରେ ନୂତନ ଶ୍ରେଣୀଗୃହ ନିର୍ମାଣ ଏବଂ ଜୀର୍ଣ୍ଣୋଦ୍ଧାର ପାଇଁ ୫୬୫ କୋଟି ଟଙ୍କା ଆବଣ୍ଟନ କରାଯାଇଛି। ଏହା ବ୍ୟତୀତ ବିଦ୍ୟାଳୟଗୁଡ଼ିକରେ ଶୌଚାଳୟ ନିର୍ମାଣ ପାଇଁ ୭୫ କୋଟି ଟଙ୍କା ଏବଂ ଶିକ୍ଷାନୁଷ୍ଠାନ ପାଇଁ ଆସବାବପତ୍ର କ୍ରୟ ନିମନ୍ତେ ୨୫ କୋଟି ଟଙ୍କା ବ୍ୟୟ କରାଯିବ ବୋଲି ମୁଖ୍ୟମନ୍ତ୍ରୀ ଘୋଷଣା କରିଛନ୍ତି।