ଏସଆଇଆର୍ ଯୋଗୁଁ ମତାଧିକାର ହରାଇବେ ୧୦ କୋଟି ନାଗରିକ : ଚିଦାମ୍ବରମ

ନୂଆଦିଲ୍ଲୀ(ସଂକେତ ଟିଭି): ଭାରତୀୟ ନିର୍ବାଚନ ଆୟୋଗ (ଇସିଆଇ) ଦ୍ୱାରା ଚଳାଯାଇଥିବା ଭୋଟର ତାଲିକାର ଗହନ ପୁନରୀକ୍ଷଣ (ଏସଆଇଆର) ଅଭିଯାନକୁ ନେଇ ବର୍ତ୍ତମାନ ରାଜନୈତିକ ବିତର୍କ ତୀବ୍ର ହୋଇଛି। ଏହି ପ୍ରକ୍ରିୟା ମଧ୍ୟରେ ବରିଷ୍ଠ କଂଗ୍ରେସ ନେତା ପି.ଚିଦାମ୍ବରମ ଏକ ବିବାଦୀୟ ବୟାନ ଦେଇଛନ୍ତି, ଯେଉଁଥିରେ ସେ ଦାବି କରିଛନ୍ତି ଯେ ଏହି ଅଭିଯାନ ଦ୍ୱାରା ଦେଶର ପ୍ରାୟ ୧୦% ବୟସ୍କ ଜନସଂଖ୍ୟା, ଅର୍ଥାତ୍ ୧୦ କୋଟି ଲୋକ, ନାଗରିକ ଥାଇ ମଧ୍ୟ ସେମାନଙ୍କ ମତଦାନ ଅଧିକାରରୁ ବଞ୍ଚିତ ହୋଇପାରନ୍ତି।

ଚିଦାମ୍ବରମ ଏହି ପ୍ରକ୍ରିୟାକୁ ନେଇ ନିର୍ବାଚନ ଆୟୋଗ ଉପରେ ପ୍ରଶ୍ନ ଉଠାଇ କହିଛନ୍ତି ଯେ, “ଏପର୍ଯ୍ୟନ୍ତର ପରିଣାମ ଆଧାରରେ ଏସଆଇଆର ପ୍ରକ୍ରିୟା ଅନ୍ତରେ ଭାରତର ୧0% ବୟସ୍କ ଜନସଂଖ୍ୟା ‘ନାଗରିକ’ ତ ରହିବେ, ହେଲେ ନିର୍ବାଚନ ଆୟୋଗଙ୍କ ବ୍ୟବସ୍ଥା କାରଣରୁ ସେମାନଙ୍କ ପାଖରେ ମତଦାନର ଅଧିକାର ରହିବ ନାହିଁ।” ସେ ଆହୁରି ମଧ୍ୟ କହିଛନ୍ତି ଯେ ଏହା ଦ୍ୱାରା ଆୟୋଗ ଏକ ପ୍ରକାର ‘ଅଣ-ମତଦାତା ନାଗରିକ’ଙ୍କ ନୂତନ ଶ୍ରେଣୀ ସୃଷ୍ଟି କରିଛନ୍ତି, ଯାହା ଲୋକତନ୍ତ୍ର ପାଇଁ ଚିନ୍ତାଜନକ।

ଅନ୍ୟପଟେ, ଏହି ବିଷୟରେ ପୂର୍ବତନ କୂଟନୀତିଜ୍ଞ ତଥା ଇଜିପ୍ଟ ଓ ୟୁଏଇରେ ଭାରତର ରାଜଦୂତ ରହିଥିବା ନଭଦୀପ ସୁରୀ ତାଙ୍କ ଅଭିଜ୍ଞତା ବାଣ୍ଟି ଚିନ୍ତା ପ୍ରକଟ କରିଛନ୍ତି। ପଞ୍ଜାବରେ ଏହି ପୁନରୀକ୍ଷଣ ଅଭିଯାନ ବେଳେ ସୁରୀଙ୍କୁ ନାଗରିକତା ପ୍ରମାଣ କରିବାକୁ ଅସୁବିଧାର ସମ୍ମୁଖୀନ ହେବାକୁ ପଡ଼ିଛି।

ସୁରୀ କହିଛନ୍ତି, “ଅଧିକାରୀମାନେ ମୋତେ ମୋର ପାସପୋର୍ଟ ଉପସ୍ଥାପନ କରିବାକୁ କହିଥିଲେ। ମୁଁ ବିଏଲଓ (ବୁଥ୍ ଲେଭଲ ଅଫିସର)ଙ୍କ ସହ କଥା ହେଲା ପରେ ମୋତେ କୁହାଗଲା, ‘ଆସନ୍ତୁ, ନୋଟିସ୍ ନିଅନ୍ତୁ ଏବଂ ଏପରି କାଗଜପତ୍ର ଦାଖଲ କରନ୍ତୁ ଯାହା ଆପଣଙ୍କ ନାଗରିକତା ପ୍ରମାଣ କରୁ।’ ସେ ଆହୁରି କହିଛନ୍ତି ଯେ ତାଙ୍କ ପାଖରେ ଭୋଟର କାର୍ଡ, ଆଧାର କାର୍ଡ ସମେତ ଅନ୍ୟାନ୍ୟ ଦଲିଲ୍ ରହିଥିଲା ମଧ୍ୟ ଏହି ପ୍ରକ୍ରିୟା ସହଜ ହୋଇନଥିଲା।

ଏହି ପ୍ରସଙ୍ଗରେ ଚିଦାମ୍ବରମ ସୁରୀଙ୍କ ପୋଷ୍ଟକୁ ଉଦ୍ଧୃତ କରି କହିଛନ୍ତି, “ଯେତେବେଳେ ୩ଟି ଦେଶରେ ଭାରତର ପ୍ରତିନିଧିତ୍ୱ କରିଥିବା ଏକ ବରିଷ୍ଠ କୂଟନୀତିଜ୍ଞଙ୍କୁ ନିଜର ନାଗରିକତା ସାବ୍ୟସ୍ତ କରିବାରେ ଅସୁବିଧା ହେଉଛି, ତେବେ ସାଧାରଣ ନାଗରିକମାନେ କି ଅବସ୍ଥା ଭୋଗୁଛନ୍ତି?” ଚିଦାମ୍ବରମ ପ୍ରଶ୍ନ କରି କହିଛନ୍ତି ଯେ ଏହି ପ୍ରକ୍ରିୟା ଜୀବନର ସୁଗମତାକୁ ବିପନ୍ନ କରିପାରେ।

ସୂଚନାଯୋଗ୍ୟ, ନିର୍ବାଚନ ଆୟୋଗ ଭୋଟର ତାଲିକାକୁ ଶୁଦ୍ଧ ଓ ତ୍ରୁଟିହୀନ କରିବା ପାଇଁ ଏହି ବ୍ୟାପକ ପୁନରୀକ୍ଷଣ ଅଭିଯାନ ଆରମ୍ଭ କରିଥିଲେ। କିନ୍ତୁ ଏହି ପ୍ରକ୍ରିୟା ଅନେକ ବୈଧ ନାଗରିକଙ୍କୁ ସେମାନଙ୍କ ମତଦାନ ଅଧିକାରରୁ ବଞ୍ଚିତ କରୁଛି ବୋଲି ବିରୋଧୀ ଦଳମାନେ ଅଭିଯୋଗ କରୁଛନ୍ତି। ଏହି ଘଟଣା ଏବେ ରାଜନୈତିକ ଏବଂ ପ୍ରଶାସନିକ ମହଲରେ ଚର୍ଚ୍ଚାର ବିଷୟ ପାଲଟିଛି।