ଫରାସୀ ମଦ ଉପରେ ୨୦୦% ଶୁଳ୍କ ଲଗାଇବା ଧମକ ଦେଲେ ଟ୍ରମ୍ପ

ୱାଶିଂଟନ(ସଂକେତ ଟିଭି): ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଫ୍ରାନ୍ସର ରାଷ୍ଟ୍ରପତି ଇମାନୁଏଲ ମାକ୍ରୋନଙ୍କୁ ନେଇ ଆଉ ଏକ ବିବାଦିତ ମନ୍ତବ୍ୟ ଦେଇଛନ୍ତି । ଗାଜା ବିଷୟକ ତାଙ୍କ ଗଠିତ ‘ବୋର୍ଡ ଅଫ ପିସ୍’ରେ ଯୋଗ ଦେବାକୁ ମାକ୍ରୋନ ପ୍ରତ୍ୟାଖ୍ୟାନ କରିବା ପରେ ଟ୍ରମ୍ପ ଫରାସୀ ମଦ ଓ ସାମ୍ପେନ ଉପରେ ୨୦୦ ପ୍ରତିଶତ ଶୁଳ୍କ ଲଗାଉବାର ଧମକ ଦେଇଛନ୍ତି ।

ଗଣମାଧ୍ୟମକୁ ଦିଆଯାଇଥିବା ଏକ ସାକ୍ଷାତକାରରେ ଟ୍ରମ୍ପ କହିଛନ୍ତି, “ମାକ୍ରୋନ କହିଛନ୍ତି ସେ ଯୋଗ ଦେବେ ନାହିଁ? ହଁ, କେହି ଚାହାଁନ୍ତି ନାହିଁ ସେ ଯୋଗ ଦେଉ, କାରଣ ସେ ତ କାର୍ଯ୍ୟାଳୟରୁ ଶୀଘ୍ର ଚାଲିଯିବେ । ଯଦି ମୁଁ ତାଙ୍କ ମଦ ଓ ସାମ୍ପେନ ଉପରେ ୨୦୦% ଶୁଳ୍କ ଲଗାଇଦେଉ, ତେବେ ସେ ଯୋଗ ଦେବେ, କିନ୍ତୁ ତାଙ୍କୁ ଯୋଗ ଦେବାର ଆବଶ୍ୟକତା ନାହିଁ ।”

ଟ୍ରମ୍ପଙ୍କ ଅଧ୍ୟକ୍ଷତାରେ ଗଠିତ ଏହି ଶାନ୍ତି ବୋର୍ଡର ଲକ୍ଷ୍ୟ ଗାଜାରେ ଶାନ୍ତି, ପୁନଃନିର୍ମାଣ ଓ ଅସ୍ଥାୟୀ ପାଲେଷ୍ଟାଇନୀ ପ୍ରଶାସନକୁ ସମର୍ଥନ କରିବା । ଟ୍ରମ୍ପ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ପାକିସ୍ତାନର ପ୍ରଧାନମନ୍ତ୍ରୀ ଶହବାଜ୍ ଶରୀଫ ଏବଂ ରୁଷିଆର ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ମଧ୍ୟ ନିମନ୍ତ୍ରଣ କରିଛନ୍ତି, ଯଦିଓ କେଉଁ ନେତା ଯୋଗ ଦେବେ ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ ।

ଟ୍ରମ୍ପଙ୍କ ଏହି ଧମକ ଆସିଛି ଏକ ସମୟରେ ଯେତେବେଳେ ଆମେରିକା ଓ ଅନେକ ୟୁରୋପୀୟ ଦେଶ ଗ୍ରୀନଲାଣ୍ଡ ଉପରେ ନିୟନ୍ତ୍ରଣ ନେବା ପ୍ରସଙ୍ଗରେ ମତଭେଦରେ ରହିଛନ୍ତି । ଟ୍ରମ୍ପଙ୍କ ଗ୍ରୀନଲାଣ୍ଡ ଦାବିକୁ ଆଠଟି ୟୁରୋପୀୟ ଦେଶ ବିରୋଧ କରିବା ପରେ ଆମେରିକା ସେମାନଙ୍କ ଉପରେ ୧୦% ଶୁଳ୍କ ଆରମ୍ଭ କରିବା ଘୋଷଣା କରିଛି, ଯାହା ଆସନ୍ତା ମାସରୁ ଲାଗୁ ହେବ ।

ଟ୍ରମ୍ପ ଆହୁରି ମଧ୍ୟ ଏକ ବ୍ୟକ୍ତିଗତ ବାର୍ତ୍ତା ଶେୟାର କରି ଦାବି କରିଛନ୍ତି ଯେ ରାଷ୍ଟ୍ରପତି ମାକ୍ରୋନ ତାଙ୍କୁ କହିଛନ୍ତି ସେ ଇରାନ ଓ ସିରିଆ ବିଷୟରେ ସହମତ, କିନ୍ତୁ ଟ୍ରମ୍ପ ଗ୍ରୀନଲାଣ୍ଡରେ କ’ଣ କରୁଛନ୍ତି ତାହା ବୁଝିପାରୁନାହାଁନ୍ତି ।