ଢେଙ୍କାନାଳ ମେଡିକାଲର ଚାରି ମହଲାରୁ ଡେଇଁ ରୋଗୀର ମୃତ୍ୟୁ

ଢେଙ୍କାନାଳ(ସଂକେତ ଟିଭି): ଢେଙ୍କାନାଳ ଜିଲ୍ଲା ମୁଖ୍ୟ ଚିକିତ୍ସାଳୟରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି। ଚିକିତ୍ସାଳୟର ଚାରି ମହଲାରୁ ଡେଇଁ ଜଣେ ରୋଗୀ ପ୍ରାଣ ହରାଇଛନ୍ତି।

ମୃତକ ହେଲେ ଢେଙ୍କାନାଳ ଟାଉନ ଥାନା ଅନ୍ତର୍ଗତ ଗାନ୍ଧିମନ୍ଦିର ରୋଡ୍ ସ୍ଥିତ ୩୫ ବର୍ଷୀୟ ମନୋଜ ଦେହୁରୀ। ଏହି ଘଟଣା ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି।

ମନୋଜ ଦୁଇ ଦିନ ତଳେ ବାତ ରୋଗ ଓ ଉଚ୍ଚ ରକ୍ତଚାପ ଜନିତ ରୋଗରେ ପୀଡ଼ିତ ହୋଇ ଢେଙ୍କାନାଳ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଥିଲେ।

ଗତକାଲି ବିଳମ୍ବିତ ରାତିରେ ସେ ଚାରି ମହଲା ଉପରୁ ଡେଇଁ ପଡ଼ିଥିଲେ। ସୁରକ୍ଷା କର୍ମୀମାନେ ତାଙ୍କୁ ଉଦ୍ଧାର କରି ଓପିଡିରେ ଭର୍ତ୍ତି କରିଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
ସେ କେଉଁ କାରଣରୁ ୪ ମହଲାରୁ ଡେଇଁଲେ, ତା’ର ପ୍ରକୃତ କାରଣ ଅସ୍ପଷ୍ଟ ରହିଛି। ମେଡିକାଲରେ ସୁରକ୍ଷା କର୍ମୀ ଥାଇ ଏତେ ବଡ଼ ଅଘଟଣ କିଭଳି ଘଟିଲା, ତାକୁ ନେଇ ଅନେକ ପ୍ରଶ୍ନବାଚୀ ସୃଷ୍ଟି ହୋଇଛି।
ଢେଙ୍କାନାଳ ଟାଉନ ଥାନା ପୁଲିସ୍ ଏନେଇ ଅଧିକ ତଦନ୍ତ ଜାରି ରଖିଛି।