ପୁଣି ୪୦ ଦିନର ପାରୋଲରେ ଗଲେ ରାମ ରହିମ

ନୂଆଦିଲ୍ଲୀ (ସଂକେତ ଟିଭି):ରୋହତକ ସ୍ଥିତ ସୁନାରିଆ ଜେଲରେ ଥିବା ଡେରା ସଚ୍ଚା ସୌଦା ମୁଖ୍ୟ ଗୁରମିତ ରାମ ରହିମଙ୍କୁ ପୁଣି ୪୦ ଦିନର ପାରୋଲ ଦିଆଯାଇଛି। ପାରୋଲ ଅବଧି ମଧ୍ୟରେ ସେ ହରିୟାଣାର ସିରସାରେ ଥିବା ନିଜ ଡେରା ପରିସରରେ ରହିବେ ବୋଲି ପ୍ରଶାସନ ସ୍ପଷ୍ଟ କରିଛି। ରିପୋର୍ଟ ଅନୁଯାୟୀ, ଏହି ପାରୋଲ ପରେ ସେ ଖୁବ୍ ଶୀଘ୍ର ସୁନାରିଆ ଜେଲରୁ ସ୍ଥାୟୀ ଭାବେ ମୁକ୍ତ ହେବାର ଆଶା ରହିଛି।

ଏହା ହେଉଛି ରାମ ରହିମଙ୍କ ଜେଲ ଜୀବନର ୧୫ତମ ପାରୋଲ ମୁକ୍ତି। ଗତ ସେପ୍ଟେମ୍ବର ୧୫ ତାରିଖରେ ମଧ୍ୟ ସେ ୪୦ ଦିନର ପାରୋଲ ପାଇଥିଲେ। ପୂର୍ବରୁ ମଧ୍ୟ ତାଙ୍କୁ ଅନେକ ଥର ପାରୋଲ ଏବଂ ଫର୍ଲୋ ପ୍ରଦାନ କରାଯାଇସାରିଛି।

ରାମ ରହିମ ଦୁଇଜଣ ସାଧ୍ୱୀଙ୍କ ବଳାତ୍କାର ମାମଲାରେ ସିବିଆଇ କୋର୍ଟ ଦ୍ୱାରା ଦଶ ବର୍ଷ ଜେଲ ଦଣ୍ଡାଦେଶ ପାଇଥିଲେ, ଯାହା ମୋଟ ୨୦ ବର୍ଷର ଶାସ୍ତି ହିସାବରେ ଧରାଯାଏ। ଏହା ବ୍ୟତୀତ ସାମ୍ବାଦିକ ରାମଚନ୍ଦ୍ର ଛତ୍ରପତି ଏବଂ ଡେରା ପରିଚାଳକ ରଣଜିତ ସିଂହଙ୍କ ହତ୍ୟା ମାମଲାରେ ମଧ୍ୟ ତାଙ୍କୁ ଦୋଷୀ ସାବ୍ୟସ୍ତ କରାଯାଇଛି।

ତାଙ୍କୁ ବାରମ୍ବାର ପାରୋଲ ଦିଆଯିବା ବିଷୟରେ ବିବାଦ ରହିଛି। ସାମ୍ବାଦିକ ଛତ୍ରପତିଙ୍କ ପୁଅ ଅଂଶୁଲ ଆଦି ଏହାକୁ ଦୃଢ଼ ଭାବେ ଆପତ୍ତି ଜଣାଇ କହିଛନ୍ତି ଯେ ଜଣେ ଦୁର୍ଦ୍ଦାନ୍ତ ଅପରାଧୀ ଭାବେ ତାଙ୍କୁ ଏଭଳି ସୁବିଧା ଦିଆଯିବା କଥା ନୁହେଁ। ମାତ୍ର, ହରିୟାଣା ସରକାର ହାଇକୋର୍ଟରେ ଦାଖଲ କରାଯାଇଥିବା ଏକ ସତ୍ୟପାଠରେ ରାମ ରହିମଙ୍କୁ ‘ଦୁର୍ଦ୍ଦାନ୍ତ ଅପରାଧୀ’ ବୋଲି ସ୍ୱୀକାର କରିବାକୁ ଇଙ୍ଗିତ ଦେଇ ନାହାନ୍ତି। ସରକାରଙ୍କ ଯୁକ୍ତି ଅନୁଯାୟୀ, ରାମ ରହିମ ଜେଲରେ ଭଲ ଆଚରଣ କରୁଥିବା କଏଦୀ ଏବଂ ଜେଲ ନିୟମାନୁସାରେ ଜଣେ କଏଦୀ ବର୍ଷରେ ୯୦ ଦିନ ପର୍ଯ୍ୟନ୍ତ ପାରୋଲ ପାଇପାରନ୍ତି।