ପିଏମ୍ ମୋଦିଙ୍କ କାର୍ଯ୍ୟକ୍ରମ ପୂର୍ବରୁ ଦୁଇ ସନ୍ଦିଗ୍ଧ ଗିରଫ

ମୁମ୍ବାଇ (ସଂକେତ ଟିଭି): ମୁମ୍ବାଇର ବାନ୍ଦ୍ରା-କୁର୍ଲା କମ୍ପ୍ଲେକ୍ସ (BKC) ସ୍ଥିତ ନୀତା ଅମ୍ବାନୀ କଲ୍ଚରାଲ୍ ସେଣ୍ଟରରୁ ଦୁଇ ସନ୍ଦିଗ୍ଧଙ୍କୁ ଗିରଫ କରାଯାଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ କାର୍ଯ୍ୟକ୍ରମ ଆରମ୍ଭ ହେବା ପୂର୍ବରୁ ସୁରକ୍ଷା ବଳ ଏହି ଦୁଇ ଜଣଙ୍କୁ ଅଟକ ରଖିଥିଲା। ଗିରଫ ହୋଇଥିବା ବ୍ୟକ୍ତିଙ୍କ ମଧ୍ୟରୁ ଜଣଙ୍କ ସହ ଥିବା ବଡିଗାର୍ଡଙ୍କ ନିକଟରୁ ଏକ ବନ୍ଧୁକ ମିଳିଥିବା ସୂଚନା ମିଳିଛି।

ଖବର ଅନୁଯାୟୀ, ଅଟକ ହୋଇଥିବା ୨୪ ବର୍ଷୀୟ ଯୁବକଙ୍କ ନାମ ରୋହନ ପାରେଖ ବୋଲି ଜଣାପଡ଼ିଛି। ସେ ନିଜକୁ ପ୍ରଧାନମନ୍ତ୍ରୀ କାର୍ଯ୍ୟାଳୟ (PMO)ର ଜଣେ ଅଧିକାରୀ ବୋଲି ପରିଚୟ ଦେଇଥିଲେ। ପିଏମ୍ କାର୍ଯ୍ୟାଳୟର ନକଲି ପରିଚୟ ପତ୍ର ତିଆରି କରି ସେ ସୁରକ୍ଷାକର୍ମୀଙ୍କ ଯାଞ୍ଚ ସମୟରେ ବର୍ତ୍ତି ଯାଇଥିଲେ। କିନ୍ତୁ ପରବର୍ତ୍ତୀ ସମୟରେ ତାଙ୍କର ଗତିବିଧି ସନ୍ଦେହଜନକ ମନେ ହେବାରୁ ତାଙ୍କୁ ଏବଂ ତାଙ୍କ ସହ ଥିବା ଅନ୍ୟ ଜଣଙ୍କୁ ଅଟକ ରଖାଯାଇଥିଲା।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଙ୍ଗଳବାର ସେପ୍ଟେମ୍ବର ୮ ତାରିଖ ସନ୍ଧ୍ୟା ପ୍ରାୟ ୫ଟା ୪୫ ମିନିଟ୍ ସମୟରେ ଏହି ସ୍ଥାନରେ ଗ୍ଲୋବାଲ୍ ଫିନଟେକ୍ ଫେଷ୍ଟ (GFF) ୨୦୨୬ର ସପ୍ତମ ସଂସ୍କରଣର ଉଦଘାଟନ କରିବାର କାର୍ଯ୍ୟକ୍ରମ ରହିଛି। GFFକୁ ଫାଇନାନ୍ସିଆଲ୍ ଟେକ୍ନୋଲୋଜି କ୍ଷେତ୍ରର ଏକ ପ୍ରମୁଖ ଅନ୍ତର୍ଜାତୀୟ ସମ୍ମିଳନୀ ଭାବେ ବିବେଚନା କରାଯାଏ। ଏଠାରେ ନୀତି ନିର୍ମାତା, ନିୟାମକ, କେନ୍ଦ୍ରୀୟ ବ୍ୟାଙ୍କ, ଆର୍ଥିକ ସଂସ୍ଥା, ଫିନଟେକ୍ ଓ ଟେକ୍ନୋଲୋଜି କମ୍ପାନୀ, ନିବେଶକ ଏବଂ ଶିକ୍ଷାବିତ୍ମାନେ ଯୋଗଦେଇ ଆର୍ଥିକ କ୍ଷେତ୍ରର ଭବିଷ୍ୟତ ନେଇ ଆଲୋଚନା କରିବେ।

GFF ୨୦୨୬ର ମୁଖ୍ୟ ଲକ୍ଷ୍ୟ ହେଉଛି ଡିଜିଟାଲ୍ ପେମେଣ୍ଟ ଏବଂ ଆର୍ଥିକ ସମାବେଶ କ୍ଷେତ୍ରରେ ଭାରତର ଅଗ୍ରଣୀ ଭୂମିକାକୁ ଆହୁରି ମଜବୁତ କରିବା। ସମ୍ମିଳନୀରେ ଏଜେଣ୍ଟିକ୍ AI, ପ୍ରୋଗ୍ରାମେବଲ୍ ଫାଇନାନ୍ସିଆଲ୍ ଇନଷ୍ଟ୍ରୁମେଣ୍ଟ, କ୍ୱାଣ୍ଟମ୍ ଟେକ୍ନୋଲୋଜି ସମେତ ବିଭିନ୍ନ ଉଦୀୟମାନ ପ୍ରଯୁକ୍ତି ଉପରେ ଆଲୋଚନା ହେବ। ଏହି କାର୍ଯ୍ୟକ୍ରମକୁ ନେଇ ମୁମ୍ବାଇ ପୋଲିସ ତୀବ୍ର ସୁରକ୍ଷା ବ୍ୟବସ୍ଥା କରିଥିବା ବେଳେ ସନ୍ଦିଗ୍ଧଙ୍କ ଗିରଫ ଘଟଣା ପରେ ସୁରକ୍ଷା ଆହୁରି କଡ଼ାକଡ଼ି କରାଯାଇଛି।

ମୁମ୍ବାଇ ଗସ୍ତ ପୂର୍ବରୁ ପିଏମ୍ ମୋଦି ବଦୋଦରାରେ ୱେଷ୍ଟର୍ଣ୍ଣ ଡେଡିକେଟେଡ୍ ଫ୍ରେଟ୍ କରିଡର୍ (WDFC)ର ୩ଟି ଗୁରୁତ୍ୱପୂର୍ଣ୍ଣ ଖଣ୍ଡକୁ ଦେଶ ଉଦ୍ଦେଶ୍ୟରେ ସମର୍ପଣ କରିବେ। ଏହି ତିନୋଟି ଖଣ୍ଡର ମୋଟ ଲମ୍ବ ପ୍ରାୟ ୩୨୬ କିଲୋମିଟର ଏବଂ ଏଗୁଡ଼ିକର ବିକାଶ ପାଇଁ ୨୦,୭୦୦ କୋଟି ଟଙ୍କାରୁ ଅଧିକ ଖର୍ଚ୍ଚ ହୋଇଛି। ଏହି ପ୍ରକଳ୍ପ ଦ୍ୱାରା ମାଲ ପରିବହନ ଦ୍ରୁତ ଓ ସୁରୁଖୁରୁରେ ହୋଇପାରିବ ବୋଲି ଆଶା କରାଯାଉଛି।