ଡିସେମ୍ବର ୨୪ରେ ବାରବାଟୀରେ ଭାରତ-ଶ୍ରୀଲଙ୍କା ଟି-ଟ୍ୱେଣ୍ଟି

ଭୁବନେଶ୍ୱର (ସଂକେତ ଟିଭି): ଓଡ଼ିଶା କ୍ରିକେଟ୍ ପ୍ରେମୀମାନଙ୍କ ପାଇଁ ଖୁସି ଖବର ଆସିଛି। ଆସନ୍ତା ଡିସେମ୍ବର ୨୪ରେ କଟକର ବାରବାଟୀ ଷ୍ଟାଡିୟମରେ ପୁଣି ଥରେ ଆନ୍ତର୍ଜାତୀୟ ଟି-ଟ୍ୱେଣ୍ଟି ମ୍ୟାଚ୍ ଦୁଲୁକିବ। ବିଶ୍ୱବିଜେତା ଭାରତୀୟ ଦଳ ଏହି ମ୍ୟାଚ୍ରେ ଶ୍ରୀଲଙ୍କାକୁ ଭେଟିବ। ଭାରତୀୟ କ୍ରିକେଟ୍ ନିୟନ୍ତ୍ରଣ ବୋର୍ଡ (BCCI) ଆସନ୍ତା ଘରୋଇ ସିଜିନ୍ ୨୦୨୬-୨୭ ପାଇଁ ସୂଚୀ ପ୍ରକାଶ କରିଛି।

ଆଗାମୀ ଘରୋଇ ସିଜିନ୍ ଅତ୍ୟନ୍ତ ରୋମାଞ୍ଚକର ହେବ। ଏଥିରେ ଚାରିଟି ଭ୍ରମଣକାରୀ ଦଳ – ୱେଷ୍ଟଇଣ୍ଡିଜ୍, ଶ୍ରୀଲଙ୍କା, ଜିମ୍ବାୱେ ଏବଂ ଅଷ୍ଟ୍ରେଲିଆ ଭାରତ ଗସ୍ତରେ ଆସିବେ। ଦେଶର ୧୭ଟି ସହରରେ ସମୁଦାୟ ୨୨ଟି ଅନ୍ତର୍ଜାତୀୟ ମ୍ୟାଚ୍ ଖେଳାଯିବ, ଯାହା ପ୍ରଶଂସକମାନଙ୍କୁ ହାଇ ଭୋଲ୍ଟେଜ୍ କ୍ରିକେଟ୍ ଉପହାର ଦେବ।

ଏହି ସିଜିନ୍ ୨୭ ସେପ୍ଟେମ୍ବର, ୨୦୨୬ରୁ ୱେଷ୍ଟଇଣ୍ଡିଜ୍ ଗସ୍ତ ମାଧ୍ୟମରେ ଆରମ୍ଭ ହେବ। ଏହି ଗସ୍ତରେ ତିନି ମ୍ୟାଚ୍ ବିଶିଷ୍ଟ ଏକଦିବସୀୟ ସିରିଜ୍ ଏବଂ ପାଞ୍ଚ ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ ଖେଳାଯିବ। ତ୍ରିଭେନ୍ଦ୍ରମ, ଗୌହାଟୀ ଏବଂ ନ୍ୟୁ ଚଣ୍ଡିଗଡ଼ରେ ଏକଦିବସୀୟ ମ୍ୟାଚ୍ ଆୟୋଜନ ହେବ। ଲକ୍ଷ୍ନୌ, ରାଞ୍ଚି, ଇନ୍ଦୋର, ହାଇଦ୍ରାବାଦ ଏବଂ ବେଙ୍ଗାଲୁରୁରେ ଟି-୨୦ ମ୍ୟାଚ୍ ଖେଳାଯିବ।

ଡିସେମ୍ବର ୨୦୨୬ରେ ଭାରତ ଶ୍ରୀଲଙ୍କା ବିପକ୍ଷରେ ତିନୋଟି ଏକଦିବସୀୟ ଓ ତିନୋଟି ଟି-୨୦ ମ୍ୟାଚ୍ ବିଶିଷ୍ଟ ସିରିଜ୍ ଆୟୋଜନ କରିବ। ଏକଦିବସୀୟ ସିରିଜ୍ ଦିଲ୍ଲୀ, ବେଙ୍ଗାଲୁରୁ ଏବଂ ଅହମ୍ମଦାବାଦରେ ଖେଳାଯିବ। ଟି-୨୦ ସିରିଜ୍ର ମ୍ୟାଚ୍ ଗୁଡ଼ିକ ରାଜକୋଟ, କଟକ (ବାରବାଟୀ) ଏବଂ ପୁଣେରେ ଅନୁଷ୍ଠିତ ହେବ।

ନୂତନ ବର୍ଷ ୨୦୨୭ ଆରମ୍ଭରେ ଜିମ୍ବାୱେ ଭାରତ ଗସ୍ତରେ ଆସି ତିନି ମ୍ୟାଚ୍ ବିଶିଷ୍ଟ ଏକଦିବସୀୟ ସିରିଜ୍ ଖେଳିବ। ଏହି ମ୍ୟାଚ୍ ଗୁଡ଼ିକ କୋଲକାତା, ହାଇଦ୍ରାବାଦ ଏବଂ ମୁମ୍ବାଇରେ ଅନୁଷ୍ଠିତ ହେବ। ଏହି ଘରୋଇ ସିଜିନ୍ ବହୁ ପ୍ରତୀକ୍ଷିତ ବର୍ଡର-ଗାଭାସ୍କର ଟ୍ରଫି ସହିତ ସମାପ୍ତ ହେବ। ଜାନୁଆରୀ ୨୧, ୨୦୨୭ରୁ ନାଗପୁରରେ ଆରମ୍ଭ ହେଉଥିବା ଏହି ଟେଷ୍ଟ ସିରିଜ୍ରେ ଅଷ୍ଟ୍ରେଲିଆ ବିପକ୍ଷରେ ଭାରତ ପାଞ୍ଚ ମ୍ୟାଚ୍ ଖେଳିବ।