ସମ୍ରାଟ ଚୌଧୁରୀ ହେବେ ବିହାରର ମୁଖ୍ୟମନ୍ତ୍ରୀ

ପାଟନା (ସଂକେତ୍ ଟିଭି) ବିହାର ରାଜନୀତିରେ ଏକ ଐତିହାସିକ ପରିବର୍ତ୍ତନ ଘଟିଛି। ଦୀର୍ଘ ଦୁଇ ଦଶନ୍ଧି ଧରି ବିହାରର ଶାସନ ଭାର ସମ୍ଭାଳିଥିବା ନୀତୀଶ କୁମାର ମଙ୍ଗଳବାର ଦିନ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଛନ୍ତି। ସେ ପାଟଣା ସ୍ଥିତ ଲୋକ ଭବନରେ ରାଜ୍ୟପାଳ ସୟଦ ଅତା ହସନୈନଙ୍କୁ ଭେଟି ନିଜର ଇସ୍ତଫା ପତ୍ର ପ୍ରଦାନ କରିଛନ୍ତି। ଏହା ସହିତ ରାଜ୍ୟରେ ପ୍ରଥମ ଥର ପାଇଁ ଭାରତୀୟ ଜନତା ପାର୍ଟି (ବିଜେପି) ନେତୃତ୍ୱାଧୀନ ସରକାର ଗଠନ ପାଇଁ ବାଟ ଫିଟିଛି।

ବିଜେପି ନେତା ତଥା ବିହାରର ପୂର୍ବତନ ଉପମୁଖ୍ୟମନ୍ତ୍ରୀ ସମ୍ରାଟ ଚୌଧୁରୀ ରାଜ୍ୟର ପରବର୍ତ୍ତୀ ମୁଖ୍ୟମନ୍ତ୍ରୀ ହେବାକୁ ଯାଉଛନ୍ତି। ଏକ ଏନଡିଏ ବୈଠକରେ ତାଙ୍କୁ ବିଜେପି ବିଧାୟକ ଦଳର ନେତା ଭାବରେ ନିର୍ବାଚିତ କରାଯାଇଛି। କେନ୍ଦ୍ରୀୟ ପର୍ଯ୍ୟବେକ୍ଷକ ଭାବରେ କେନ୍ଦ୍ର ମନ୍ତ୍ରୀ ଶିବରାଜ ସିଂହ ଚୌହାନ ଏହି ବୈଠକରେ ଉପସ୍ଥିତ ଥିଲେ। ନୂତନ ସରକାରଙ୍କ ଶପଥ ଗ୍ରହଣ ଉତ୍ସବ ଏପ୍ରିଲ ୧୫ ତାରିଖରେ ଅନୁଷ୍ଠିତ ହେବାର ସମ୍ଭାବନା ରହିଛି। ବିହାର ଇତିହାସରେ ସେ ପ୍ରଥମ ବିଜେପି ମୁଖ୍ୟମନ୍ତ୍ରୀ ଭାବେ ଶପଥ ନେବେ।

ଇସ୍ତଫା ଦେବା ପୂର୍ବରୁ ନୀତୀଶ କୁମାର ନିଜ ମନ୍ତ୍ରିମଣ୍ଡଳର ଶେଷ ବୈଠକ ଡାକିଥିଲେ। ପ୍ରାୟ ୨୫ ମିନିଟ୍ ଧରି ଚାଲିଥିବା ଏହି ବୈଠକ ବେଶ ଭାବପ୍ରବଣ ଥିଲା ବୋଲି ମନ୍ତ୍ରୀ ରାମ କୃପାଳ ଯାଦବ ସୂଚନା ଦେଇଛନ୍ତି। ଏହି ବୈଠକରେ ସେ ମନ୍ତ୍ରିମଣ୍ଡଳ ଭଙ୍ଗ କରିବା ନେଇ ସାମ୍ବିଧାନିକ ନିଷ୍ପତ୍ତି ନେଇଥିଲେ। ନିଜର ୬ ମିନିଟର ଅଭିଭାଷଣରେ ସେ ୨୦୦୫ ମସିହାରୁ ଆରମ୍ଭ କରିଥିବା ବିଭିନ୍ନ ଯୋଜନା ଓ ବିକାଶମୂଳକ କାର୍ଯ୍ୟ ବିଷୟରେ ଆଲୋଚନା କରିଥିଲେ ଏବଂ ଆଗାମୀ ସରକାରଙ୍କୁ ନିଜର ମାର୍ଗଦର୍ଶନ ମିଳିବ ବୋଲି ପ୍ରତିଶ୍ରୁତି ଦେଇଥିଲେ।

ସୂଚନାଯୋଗ୍ୟ ଯେ, ଗତ ମାର୍ଚ୍ଚ ୧୬ ତାରିଖରେ ନୀତୀଶ କୁମାର ରାଜ୍ୟସଭାକୁ ନିର୍ବାଚିତ ହୋଇଥିଲେ ଏବଂ ନିୟମ ଅନୁଯାୟୀ ମାର୍ଚ୍ଚ ୩୦ ତାରିଖରେ ତାଙ୍କୁ ବିଧାନ ପରିଷଦ ସଦସ୍ୟ (ଏମଏଲସି) ପଦରୁ ଇସ୍ତଫା ଦେବାକୁ ପଡ଼ିଥିଲା। ରାଜ୍ୟସଭା ସାଂସଦ ଭାବରେ ଏପ୍ରିଲ ୧୧ ତାରିଖରେ ଶପଥ ନେବା ପରେ, ସେ ମୁଖ୍ୟମନ୍ତ୍ରୀ ପଦ ଛାଡିବା ନିଶ୍ଚିତ ହୋଇଯାଇଥିଲା। ଏହି ଘଟଣାକ୍ରମ ବିହାର ରାଜନୀତିରେ ଏକ ନୂତନ ଯୁଗର ଆରମ୍ଭ ବୋଲି ବିବେଚନା କରାଯାଉଛି।