ହସ୍ପିଟାଲରେ ସାପ କାମୁଡା ଇଞ୍ଜେକସନ ପର୍ଯ୍ୟାପ୍ତ ମହଜୁଦ ରଖିବାକୁ ନିର୍ଦ୍ଦେଶ

ଭୁବନେଶ୍ୱର (ସଂକେତ ଟିଭି): ରାଜ୍ୟରେ ବନ୍ୟା ପରିସ୍ଥିତି ଉଗ୍ର ରୂପ ନେବାରେ ଲାଗିଛି। ଏହି ସଙ୍କଟମୟ ଘଡ଼ିସନ୍ଧିରେ ସ୍ୱାସ୍ଥ୍ୟ ବିଭାଗ ପୂର୍ଣ୍ଣ ସତର୍କ ଅବସ୍ଥାରେ ରହିଛି। ବିଭାଗୀୟ ପ୍ରମୁଖ ସଚିବଙ୍କ ଅଧ୍ୟକ୍ଷତାରେ ଏକ ଜରୁରୀ ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି, ଯେଉଁଥିରେ ସମସ୍ତ ଜିଲ୍ଲା ମୁଖ୍ୟ ଚିକିତ୍ସାଧିକାରୀ (ସିଡ଼ିଏମଓ) ଏବଂ ଅନ୍ୟ ବରିଷ୍ଠ ଅଧିକାରୀମାନେ ଭିଡ଼ିଓ କନଫରେନ୍ସିଂ ମାଧ୍ୟମରେ ଯୋଡ଼ି ହୋଇଥିଲେ।

ଏହି ବୈଠକରେ ସ୍ୱାସ୍ଥ୍ୟ ବିଭାଗ ପକ୍ଷରୁ ସମସ୍ତ ଜିଲ୍ଲାପାଳ ଓ ସିଡ଼ିଏମଓମାନଙ୍କୁ କଡ଼ା ନିର୍ଦ୍ଦେଶ ଦିଆଯାଇଛି। ସମସ୍ତ ଅଧିକାରୀଙ୍କୁ ୨୪ ଘଣ୍ଟା ଆଲର୍ଟରେ ରହିବାକୁ କୁହାଯାଇଛି। ବିଶେଷକରି ବନ୍ୟାପ୍ରଭାବିତ ଅଞ୍ଚଳରେ ଗର୍ଭବତୀ ମହିଳାମାନଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତରିତ କରିବାକୁ ନିର୍ଦ୍ଦେଶ ଦିଆଯାଇଛି, ଯାହା ଏହି କଠିନ ସମୟରେ ଅତ୍ୟନ୍ତ ଗୁରୁତ୍ୱପୂର୍ଣ୍ଣ।

ସେହିପରି ବନ୍ୟା ପରେ ସାପ କାମୁଡ଼ା ଘଟଣା ବଢ଼ିବାର ଆଶଙ୍କା ରହିଥିବାରୁ ସମସ୍ତ ମେଡିକାଲ କେନ୍ଦ୍ର ଓ ହସ୍ପିଟାଲରେ ‘ଆଣ୍ଟି-ସ୍ନେକ ଭେନମ୍’ ଇଞ୍ଜେକସନର ପର୍ଯ୍ୟାପ୍ତ ମହଜୁଦ ରଖିବାକୁ ନିର୍ଦ୍ଦେଶ ଦିଆଯାଇଛି। ଏହାବ୍ୟତୀତ ଉତ୍ତର ଓଡ଼ିଶାରେ ବନ୍ୟା ସ୍ଥିତି ଅଧିକ ଜଟିଳ ଥିବାରୁ ସେଠାକାର ସମସ୍ତ ମେଡିକାଲ କଲେଜ ଓ ବଡ଼ ହସ୍ପିଟାଲଗୁଡ଼ିକୁ ସତର୍କ କରାଯାଇଛି। ଆବଶ୍ୟକ ସ୍ଥଳେ ଏହି ମେଡିକାଲ ଟିମ୍କୁ ବିଭିନ୍ନ ବନ୍ୟାପୀଡ଼ିତ ଅଞ୍ଚଳରେ ନିୟୋଜିତ କରାଯିବ।

ଅବଶ୍ୟ, ସ୍ୱାସ୍ଥ୍ୟ ବିଭାଗ ସ୍ପଷ୍ଟ କରିଛି ଯେ କୋଭିଡ-୧୯ ସମ୍ପର୍କୀୟ ସତର୍କତା ଉପରେ ମଧ୍ୟ ପୂର୍ଣ୍ଣ ନଜର ରଖାଯାଇଛି। ରାଜ୍ୟ ସରକାରଙ୍କ ଗାଇଡଲାଇନ୍ ଅନୁଯାୟୀ କୋଭିଡ୍ ପରିଚାଳନା ଜାରି ରହିବ ଏବଂ ଏଥିପାଇଁ ପୃଥକ୍ ବ୍ୟବସ୍ଥା କରାଯାଇଛି। ଏହି ଦୁଇ ସଙ୍କଟକୁ ଏକାସାଙ୍ଗରେ ମୁକାବିଲା କରିବା ପାଇଁ ସ୍ୱାସ୍ଥ୍ୟ ବିଭାଗ ସମ୍ପୂର୍ଣ୍ଣ ପ୍ରସ୍ତୁତ ଥିବା ଅଧିକାରୀମାନେ ଅବଗତ କରାଇଛନ୍ତି।