୨୯ ବର୍ଷୀୟା ଅଭିନେତ୍ରୀ ଦିବ୍ୟଙ୍କା ସିରୋହୀଙ୍କର ହୃଦଘାତରେ ଦେହାନ୍ତ

ନୂଆଦିଲ୍ଲୀ (ସଂକେତ ଟିଭି):ହରିୟାଣାର ଜଣାଶୁଣା ତଥା ପ୍ରତିଭାବାନ ଅଭିନେତ୍ରୀ ଦିବ୍ୟଙ୍କା ସିରୋହୀଙ୍କର ମାତ୍ର ୨୯ ବର୍ଷ ବୟସରେ ଦେହାନ୍ତ ହୋଇଛି। ଏପ୍ରିଲ ୨୧ ତାରିଖରେ ନିଜ ବାସଭବନରେ ହୃଦଘାତ ଯୋଗୁଁ ତାଙ୍କର ମୃତ୍ୟୁ ହୋଇଥିବା ବେଳେ ଏହି ଖବର ସାରା କଳା ଜଗତରେ ଶୋକର ଛାୟା ଖେଳାଇ ଦେଇଛି। ପ୍ରାଥମିକ ସୂଚନା ଅନୁଯାୟୀ, ଅତ୍ୟଧିକ ମାନସିକ ଚାପ ଯୋଗୁଁ ତାଙ୍କର ସ୍ୱାସ୍ଥ୍ୟ ବିଗିଡ଼ି ଯାଇଥିବା କୁହାଯାଉଛି।

ଏପ୍ରିଲ ୨୧ରେ ହୃଦଘାତ ଯୋଗୁଁ ଦେହାନ୍ତ ହୋଇଥିବା ବେଳେ ଡାକ୍ତରଖାନାରେ ତାଙ୍କୁ ମୃତ ଘୋଷଣା କରାଯାଇଥିଲା। କାମର ଅଭାବ ଏବଂ ଆର୍ଥିକ ସଙ୍କଟ ଯୋଗୁଁ ସେ ଦୀର୍ଘ ଦିନ ଧରି ଚିନ୍ତାରେ ଥିବା ସୂଚନା ମିଳିଛି। ପରିବାର ପକ୍ଷରୁ ଏପ୍ରିଲ ୨୨ ସକାଳେ ତାଙ୍କର ଶେଷକୃତ୍ୟ ସମ୍ପନ୍ନ କରାଯାଇଛି, ତେବେ କୌଣସି ଶବ ବ୍ୟବଚ୍ଛେଦ କରାଯାଇ ନାହିଁ।

ରିପୋର୍ଟ ଅନୁଯାୟୀ, ଦିବ୍ୟଙ୍କା ଗତ କିଛି ଦିନ ହେବ ବଡ଼ ଧରଣର ଆର୍ଥିକ ସଙ୍କଟ ଦେଇ ଗତି କରୁଥିଲେ। ଅଭିନୟ କ୍ଷେତ୍ରରେ ପର୍ଯ୍ୟାପ୍ତ ସୁଯୋଗ ମିଳୁନଥିବାରୁ ସେ ମାନସିକ ସ୍ତରରେ ଭାଙ୍ଗି ପଡ଼ିଥିଲେ। ମୃତ୍ୟୁର ପ୍ରାୟ ଦୁଇ ସପ୍ତାହ ପୂର୍ବରୁ ସେ ଜଣେ ବନ୍ଧୁଙ୍କୁ ଆର୍ଥିକ ସହାୟତା ମଧ୍ୟ ମାଗିଥିବା ଜଣାପଡ଼ିଛି। ତାଙ୍କ ସହ କାମ କରିଥିବା କଳାକାର ବିନ୍ଦର ଦାନୋଦା କହିଛନ୍ତି ଯେ, ନୂଆ ପ୍ରୋଜେକ୍ଟ ନ ମିଳିବାରୁ ସେ ସବୁବେଳେ ବ୍ୟତିବ୍ୟସ୍ତ ରହୁଥିଲେ।

ଏପ୍ରିଲ ୨୧ରେ ଯେତେବେଳେ ଏହି ଘଟଣା ଘଟିଲା, ସେତେବେଳେ ଦିବ୍ୟଙ୍କା ନିଜ ଗାଜିଆବାଦ ସ୍ଥିତ ବାସଭବନରେ ଏକା ଥିଲେ। ହୃଦଘାତ ଯୋଗୁଁ ସେ ହଠାତ୍ ତଳେ ପଡ଼ିଯାଇଥିଲେ ଏବଂ ତାଙ୍କ ମୁଣ୍ଡରେ ଗଭୀର ଆଘାତ ଲାଗିଥିଲା। ପରିବାର ଲୋକ ଘରକୁ ଫେରିବା ବେଳକୁ ସେ ଶେଷ ନିଶ୍ୱାସ ତ୍ୟାଗ କରିସାରିଥିଲେ। ତେବେ ତାଙ୍କ ଭାଇ ଦୀପାଂଶୁ କହିଛନ୍ତି ଯେ, କାମର ଚାପ କିମ୍ବା ଆର୍ଥିକ ସମସ୍ୟା ନେଇ ସେ କେବେ ପରିବାର ସହ ଆଲୋଚନା କରିନଥିଲେ।

ଦିବ୍ୟଙ୍କାଙ୍କ ମୃତ୍ୟୁ ପରେ ଅନେକ ପ୍ରଶ୍ନବାଚୀ ସୃଷ୍ଟି ହୋଇଛି। ବିନା ଶବ ବ୍ୟବଚ୍ଛେଦରେ ପରିବାର ଲୋକ ଅତି ଶୀଘ୍ର ଶେଷକୃତ୍ୟ ସମ୍ପନ୍ନ କରିବାକୁ ନେଇ ଚର୍ଚ୍ଚା ଜୋର ଧରିଛି। ତେବେ ପରିବାର ପକ୍ଷରୁ କୌଣସି ସନ୍ଦେହଜନକ କାର୍ଯ୍ୟକଳାପକୁ ମନା କରାଯାଇଛି। କୌଣସି ପୋଲିସ ଅଭିଯୋଗ ନକରି ପରିବାର ଲୋକ ଏହି ମାମଲାକୁ ଶେଷ କରିବାକୁ ଚାହୁଁଥିବା ଜଣାପଡ଼ିଛି।

ମୂଳତଃ ବୁଲନ୍ଦସହରର ବାସିନ୍ଦା ଦିବ୍ୟଙ୍କା ହରିୟାଣବୀ ମ୍ୟୁଜିକ ଇଣ୍ଡଷ୍ଟ୍ରିର ଏକ ଜଣାଶୁଣା ଚେହେରା ଥିଲେ। ‘ଭିଲେନ୍ ଏଗେନ୍’ ଏବଂ ‘ବଦମାସାଁ କା ବ୍ୟାହ’ ଭଳି ଅନେକ ହିଟ୍ ଗୀତରେ ସେ ଅଭିନୟ କରିଥିଲେ। ଇନଷ୍ଟାଗ୍ରାମରେ ତାଙ୍କର ୧.୩ ମିଲିୟନରୁ ଅଧିକ ଫଲୋଅର୍ସ ରହିଥିଲେ। ମୃତ୍ୟୁର ମାତ୍ର କିଛି ମାସ ପୂର୍ବରୁ ସେ ‘ଅଙ୍ଗଦ’ ନାମକ ଏକ ସିନେମାର ସୁଟିଂ ଶେଷ କରିଥିଲେ, ଯାହା ଏବେ ମୁକ୍ତିଲାଭ ଅପେକ୍ଷାରେ ରହିଛି।