ପରୀକ୍ଷା ସଂଶୋଧନ ବିଲ୍କୁ ମଞ୍ଜୁରୀ ପ୍ରଦାନ କଲା କେନ୍ଦ୍ର କ୍ୟାବିନେଟ୍

ନୂଆଦିଲ୍ଲୀ (ସଂକେତ ଟିଭି): ପ୍ରଶ୍ନପତ୍ର ଲିକ୍ ବିବାଦ ଏବଂ ଛାତ୍ରଛାତ୍ରୀଙ୍କ ଜାରି ଆନ୍ଦୋଳନ ମଧ୍ୟରେ କେନ୍ଦ୍ର ସରକାର ଶୁକ୍ରବାର ଦୁଇ ମୋର୍ଚ୍ଚାରେ ସକ୍ରିୟତା ଦେଖାଇଛନ୍ତି। ଗୋଟିଏ ପଟେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ କ୍ୟାବିନେଟ୍ କମିଟି ଅନ୍ ସିକ୍ୟୁରିଟି ଏବଂ କ୍ୟାବିନେଟ୍ କମିଟି ଅନ୍ ଇକୋନମିକ୍ ଆଫେୟର୍ସର ବୈଠକ ପରେ କେନ୍ଦ୍ର ମନ୍ତ୍ରିମଣ୍ଡଳର ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଛି। ଏହି ବୈଠକରେ ପ୍ରଶ୍ନପତ୍ର ଲିକ୍ ସଂପର୍କିତ ଡ୍ରାଫ୍ଟ ବିଲ୍ ଉପରେ ବିସ୍ତୃତ ଆଲୋଚନା ହୋଇଥିଲା ଏବଂ ଶେଷରେ ଏହାକୁ ମଞ୍ଜୁରି ପ୍ରଦାନ କରାଯାଇଛି।

ଅନ୍ୟପଟେ, ଆନ୍ଦୋଳନରତ କକରୋଚ୍ ଜନତା ପାର୍ଟି (କେଜେପି)ର ପ୍ରତିନିଧି ଏବଂ କେନ୍ଦ୍ର ସରକାରଙ୍କ ମନ୍ତ୍ରୀଙ୍କ ମଧ୍ୟରେ ଏକ ଗୁରୁତ୍ୱପୂର୍ଣ୍ଣ ଆଲୋଚନା ଅନୁଷ୍ଠିତ ହୋଇଛି। ନୂଆଦିଲ୍ଲୀ ସ୍ଥିତ କନଷ୍ଟିଟ୍ୟୁସନାଲ୍ କ୍ଲବ୍ ଅଫ୍ ଇଣ୍ଡିଆରେ କେନ୍ଦ୍ରମନ୍ତ୍ରୀ ଜେ.ପି. ନଡ୍ଡା ଏବଂ ଜିତେନ୍ଦ୍ର ସିଂହ କେଜେପି ପ୍ରତିନିଧିଙ୍କ ସହ ଆଲୋଚନା କରି ସେମାନଙ୍କ ଦାବି ଶୁଣିଥିଲେ। ଛାତ୍ରମାନେ ପରୀକ୍ଷା ପୁନର୍ନିଧାରଣ, ଦୁର୍ନୀତି ଉଚ୍ଛେଦ ଏବଂ ଦୋଷୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଦାବି କରି ଆନ୍ଦୋଳନ ଜାରି ରଖିଛନ୍ତି।

କ୍ୟାବିନେଟ୍ ବୈଠକରେ ପବ୍ଲିକ୍ ଏକ୍ଜାମିନେସନ୍ (ପ୍ରିଭେନସନ ଅଫ୍ ଅନଫେୟାର ମୀନ୍ସ) ଆକ୍ଟ, ୨୦୨୪ ର ସଂଶୋଧନ ପ୍ରସ୍ତାବ ଉପରେ ମୁଖ୍ୟ ଆଲୋଚନା ହୋଇଥିଲା। ସରକାର ଆସନ୍ତା ସପ୍ତାହରେ ଆରମ୍ଭ ହେଉଥିବା ମୌସୁମୀ ଅଧିବେଶନରେ ଏହି ସଂଶୋଧିତ ବିଧେୟକକୁ ସଂସଦରେ ଉପସ୍ଥାପନା କରିବାକୁ ପ୍ରସ୍ତୁତି କରୁଛନ୍ତି। ନୂଆ ଆଇନରେ ପେପର୍ ଲିକ୍ ମାଫିଆଙ୍କ ବିରୁଦ୍ଧରେ କଠୋର ପ୍ରାବଧାନ ରହିବ, ଯେଉଁଥିରେ ସ୍ୱତନ୍ତ୍ର ଫାଷ୍ଟ-ଟ୍ରାକ୍ କୋର୍ଟ ଗଠନ ଏବଂ ଆଇନଗତ ସହାୟତା ପ୍ରଦାନ କରାଯିବ। ଏହି ଫାଷ୍ଟ-ଟ୍ରାକ୍ କୋର୍ଟଗୁଡ଼ିକୁ ତିନି ମାସ ମଧ୍ୟରେ ତଦନ୍ତ ଶେଷ କରି ରାୟ ପ୍ରଦାନ କରିବାର କ୍ଷମତା ଦିଆଯିବ।

ସଂଶୋଧିତ ବିଧେୟକରେ ପେପର ଲିକ୍ ମାମଲାରେ ଅଭିଯୁକ୍ତଙ୍କୁ ୧୦ ବର୍ଷ ପର୍ଯ୍ୟନ୍ତ ଜେଲଦଣ୍ଡ ଏବଂ ୧୦ କୋଟି ଟଙ୍କା ପର୍ଯ୍ୟନ୍ତ ଜରିମାନା ଦଣ୍ଡର ବ୍ୟବସ୍ଥା ରହିଛି। ଏହା ବ୍ୟତୀତ, ପରୀକ୍ଷା ବ୍ୟବସ୍ଥାରେ ସ୍ୱଚ୍ଛତା ଏବଂ ଦାୟିତ୍ୱ ସୁନିଶ୍ଚିତ କରିବା ପାଇଁ ଏକାଧିକ ସୁରକ୍ଷା ବ୍ୟବସ୍ଥା ମଧ୍ୟ ପ୍ରସ୍ତାବିତ ହୋଇଛି। ସରକାରଙ୍କ ମତରେ, ଏହି ଆଇନ ପରୀକ୍ଷା ବ୍ୟବସ୍ଥାକୁ ଅଧିକ ପାରଦର୍ଶୀ ଓ ଭରସାଯୋଗ୍ୟ କରିବ।

ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏହି ପ୍ରସଙ୍ଗରେ କଠୋର ମନୋଭାବ ପ୍ରକାଶ କରି କହିଥିଲେ ଯେ “ପେପର ଲିକ୍ କୌଣସି ଛୋଟ ଘଟଣା ନୁହେଁ।” ସେ ଗୁରୁତ୍ୱାରୋପ କରି କହିଥିଲେ ଯେ ଏହା ଲକ୍ଷ ଲକ୍ଷ ଛାତ୍ରଛାତ୍ରୀ ଏବଂ ସେମାନଙ୍କ ପରିବାରର ଭବିଷ୍ୟତ ସହିତ ଜଡ଼ିତ। ତେଣୁ ସରକାର ଦୋଷୀଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ସୁନିଶ୍ଚିତ କରିବା ପାଇଁ ଏହି ନୂତନ ଆଇନ ପ୍ରଣୟନ କରୁଛନ୍ତି ବୋଲି ସେ ପୁନଃପୁଷ୍ଟି କରିଥିଲେ।

ସରକାରଙ୍କ ରଣନୀତି ଏଠାରେ ସ୍ପଷ୍ଟ ଦେଖାଯାଉଛି — ଗୋଟିଏ ପଟେ ଆନ୍ଦୋଳନରତ ଛାତ୍ରଛାତ୍ରୀଙ୍କ ପ୍ରତିନିଧିମାନଙ୍କ ସହ ଆଲୋଚନା ମାଧ୍ୟମରେ ସମାଧାନ ଖୋଜିବାକୁ ଉଦ୍ୟମ କରାଯାଉଛି, ତେବେ ଅନ୍ୟପଟେ ପରୀକ୍ଷା ବ୍ୟବସ୍ଥାରେ ସ୍ୱଚ୍ଛତା, ନ୍ୟାୟ ଏବଂ ଦାୟିତ୍ୱ ସୁନିଶ୍ଚିତ କରିବା ପାଇଁ ଏକ କଠୋର ଆଇନଗତ ଢାଞ୍ଚା ଚୂଡ଼ାନ୍ତ କରାଯାଉଛି। ଆଗାମୀ ଦିନରେ ସଂସଦରେ ଏହି ବିଧେୟକ ଗୃହୀତ ହେଲେ ପରୀକ୍ଷା ବ୍ୟବସ୍ଥାରେ ଏକ ବଡ଼ ପରିବର୍ତ୍ତନ ଆସିବ ବୋଲି ଆଶା କରାଯାଉଛି।