ବାଙ୍କିପୁର ଉପନିର୍ବାଚନରେ ପ୍ରଶାନ୍ତ କିଶୋରଙ୍କ ଐତିହାସିକ ବିଜୟ

ପାଟନା(ସଂକେତ ଟିଭି): ବାଙ୍କିପୁର ଉପନିର୍ବାଚନରେ ରାଜ୍ୟ ଏବଂ କେନ୍ଦ୍ରରେ ଶାସନରେ ଥିବା ବିଜେପିକୁ ପରାସ୍ତ କରି ଜନସୁରାଜ ପାର୍ଟିର ପ୍ରଶାନ୍ତ କିଶୋର ବିହାର ରାଜନୀତିରେ ନୂଆ ଇତିହାସ ରଚିଛନ୍ତି। ଏହି ଉପନିର୍ବାଚନରେ ପ୍ରଶାନ୍ତ କିଶୋର ବିଜେପି ପ୍ରାର୍ଥୀ ନୀରଜ ସିହ୍ନାଙ୍କୁ ୧୮,୦୦୦ରୁ ଅଧିକ ଭୋଟରେ ପରାସ୍ତ କରି ବିରାଟ ବିଜୟ ହାସଲ କରିଛନ୍ତି। ପ୍ରଶାନ୍ତ କିଶୋର ୬୩,୨୦୩ ଭୋଟ ପାଇଥିବା ବେଳେ ନୀରଜ ସିହ୍ନା ୪୪,୨୫୦ ଭୋଟ ପାଇଥିଲେ। ଆରଜେଡି ପ୍ରାର୍ଥୀ ରେଖା କୁମାରୀ ୧୪,୦୮୫ ଭୋଟରେ ସୀମିତ ରହିଥିଲେ।

ଏହି ବିଜୟ ସହିତ ବିଜେପି ତିନି ଦଶନ୍ଧି ପରେ ଏହି ଆସନ ହରାଇଛି। ୨୦୨୫ ବିଧାନସଭା ନିର୍ବାଚନରେ ବର୍ତ୍ତମାନର ବିଜେପି ସଭାପତି ନିତିନ ନବୀନ ଏହି ଆସନରେ ଆରଜେଡି ପ୍ରାର୍ଥୀ ରେଖା କୁମାରୀଙ୍କୁ ୫୧,୯୩୬ ଭୋଟ ବ୍ୟବଧାନରେ ପରାସ୍ତ କରିଥିଲେ। କିନ୍ତୁ ଏଥର ପ୍ରଶାନ୍ତ କିଶୋର ବିଜେପିକୁ ଏହାର ଗଡ଼ମଣ୍ଟିରୁ ଉଖାଡ଼ି ଫୋପାଡ଼ି ଦେଇଛନ୍ତି।

ବିଜୟ ପରେ ପ୍ରଶାନ୍ତ କିଶୋର କହିଛନ୍ତି, “ଜନସାଧାରଣ ସେମାନଙ୍କ ମତାମତ ଏବଂ ପ୍ରାଥମିକତା କ’ଣ ତାହା ସ୍ପଷ୍ଟ କରିଦେଇଛନ୍ତି।” ସେ ଆହୁରି ମଧ୍ୟ କହିଛନ୍ତି ଯେ ସମ୍ରାଟ ଚୌଧୁରୀଙ୍କର ଅପରାଧିକ ପୃଷ୍ଠଭୂମି ଅଛି ଏବଂ ସେ ମୁଖ୍ୟମନ୍ତ୍ରୀ ପଦରେ ରହିବା ଉଚିତ୍ ନୁହେଁ। ପ୍ରଶାନ୍ତ କିଶୋର ବିଜେପିର କେନ୍ଦ୍ରୀୟ ନେତୃତ୍ୱକୁ ମୁଖ୍ୟମନ୍ତ୍ରୀ ଭାବରେ ଜଣେ ଯୋଗ୍ୟ ନେତାଙ୍କୁ ନିଯୁକ୍ତି ଦେବାକୁ ନିବେଦନ କରିବା ସହିତ ବିହାରକୁ ଏପରି ବିକଶିତ କରିବାକୁ ଦାବି କରିଛନ୍ତି ଯେଉଁଠାରୁ ପ୍ରବାସ ବନ୍ଦ ହୋଇଯାଉ।

ବାଙ୍କିପୁର ତିନି ଦଶନ୍ଧି ଧରି ନିତିନ ନବୀନ ପରିବାରର ଅଭେଦ୍ୟ ଦୁର୍ଗ ଭାବରେ ରହିଥିଲା। ନିତିନ ନବୀନ ଏକା ଏହି ଆସନରେ ଚାରିଥର ବିଜୟୀ ହୋଇଥିଲେ। ୧୯୯୫ ମସିହାରୁ ବିଜେପି ଏହି ଆସନରେ ବିଜୟୀ ହୋଇଆସୁଥିଲା, ସେତେବେଳେ ଏହା ପାଟନା ପଶ୍ଚିମ ନାମରେ ଜଣାଶୁଣା ଥିଲା। ୨୦୦୮ ମସିହାରେ ସୀମା ନିର୍ଦ୍ଧାରଣ ପରେ ଏହା ବାଙ୍କିପୁର ଭାବରେ ପରିଚିତ ହେଲା।

୨୦୦୫ ନିର୍ବାଚନରେ ବିଜୟୀ ହେବା ପରେ ନବୀନ କିଶୋର ପ୍ରସାଦ ସିହ୍ନାଙ୍କ ଦେହାନ୍ତ ହେବାରୁ ଉପନିର୍ବାଚନ ଆବଶ୍ୟକ ହୋଇଥିଲା। ପରବର୍ତ୍ତୀ ସମୟରେ, ନିତିନ ନବୀନ ୨୦୦୬ରେ ସେହି ଆସନ ପାଇଁ ଉପନିର୍ବାଚନ ଜିତି ତାଙ୍କର ରାଜନୈତିକ କ୍ୟାରିଅର ଆରମ୍ଭ କରିଥିଲେ। ଏବେ ପ୍ରଶାନ୍ତ କିଶୋର ସେହି ପରମ୍ପରାକୁ ଭାଙ୍ଗି ଦେଇଛନ୍ତି।

ପାଟନା ଜିଲ୍ଲାରେ ମୋଟ ୧୪ଟି ବିଧାନସଭା ନିର୍ବାଚନମଣ୍ଡଳୀ ରହିଥିବା ବେଳେ ବାଙ୍କିପୁରକୁ ସବୁଠାରୁ ଗୁରୁତ୍ୱପୂର୍ଣ୍ଣ ବିଧାନସଭା ନିର୍ବାଚନମଣ୍ଡଳୀ ଭାବରେ ବିବେଚନା କରାଯାଏ। ଏହି ଆସନ ରାଜେନ୍ଦ୍ର ନଗର, ମିଠାପୁର, ଗର୍ଦ୍ଦାନିବାଗ, ସଚିବାଳୟ, କଦମକୁଆଁ, ବୋରିଂ ରୋଡ୍ ଏବଂ ଗାନ୍ଧୀ ମୈଦାନ ସମେତ ଅନେକ ଗୁରୁତ୍ୱପୂର୍ଣ୍ଣ ଅଞ୍ଚଳକୁ ଘେରି ରହିଛି। ଏହି ଅଞ୍ଚଳକୁ କାୟସ୍ଥ ସମ୍ପ୍ରଦାୟର ବହୁଳ ଅଞ୍ଚଳ ବୋଲି ବିବେଚନା କରାଯାଏ।

ପ୍ରଶାନ୍ତ କିଶୋରଙ୍କ ଏହି ଐତିହାସିକ ବିଜୟ ଆଗାମୀ ବିହାର ବିଧାନସଭା ନିର୍ବାଚନ ପାଇଁ ସଙ୍କେତ ଦେଇଛି ଏବଂ ବିଜେପିକୁ ଏକ ବଡ଼ ଝଟକା ଦେଇଛି। ଏହା ବିହାର ରାଜନୀତିରେ ଏକ ନୂଆ ମୋଡ଼ ଆଣିବ ବୋଲି ବିଶ୍ଳେଷକମାନେ ମତ ଦେଇଛନ୍ତି।