ଓଡ଼ିଶା ପୋଲିସ ଓ ଏନଏଫଏସୟୁ ମଧ୍ୟରେ ୫ ବର୍ଷିଆ ବୁଝାମଣାପତ୍ର ସ୍ୱାକ୍ଷରିତ

ଭୁବନେଶ୍ୱର (ସଂକେତ ଟିଭି): ସାଇବର ଅପରାଧ ତଦନ୍ତ କ୍ଷମତା ବୃଦ୍ଧି, ଡିଜିଟାଲ୍ ଫରେନ୍ସିକ୍ କୌଶଳକୁ ସୁଦୃଢ଼ କରିବା ଏବଂ ପୋଲିସିଂରେ ବୈଜ୍ଞାନିକ ପଦ୍ଧତିକୁ ପ୍ରୋତ୍ସାହିତ କରିବା ଉଦ୍ଦେଶ୍ୟରେ ଓଡ଼ିଶା ପୋଲିସର ସିଆଇଡି-କ୍ରାଇମ୍ ବ୍ରାଞ୍ଚ ଏବଂ ଭୁବନେଶ୍ୱରସ୍ଥିତ ନ୍ୟାସନାଲ୍ ଫରେନ୍ସିକ୍ ସାଇନ୍ସ ୟୁନିଭରସିଟି (NFSU) ମଧ୍ୟରେ ଏକ ୫ ବର୍ଷିଆ ବୁଝାମଣାପତ୍ର (MoU) ସ୍ୱାକ୍ଷରିତ ହୋଇଛି।

ଓଡ଼ିଶା ପୋଲିସର ଡିଜିପି ଯୋଗେଶ ବାହାଦୂର ଖୁରାନିଆଙ୍କ ଉପସ୍ଥିତିରେ କ୍ରାଇମ୍ ବ୍ରାଞ୍ଚ ଡିଜିପି ବିନୟତୋଷ ମିଶ୍ର ଏବଂ ଏନଏଫଏସୟୁ କ୍ୟାମ୍ପସ ନିର୍ଦ୍ଦେଶକ ଡକ୍ଟର ପୂର୍ବୀ ପୋଖରିଆଲ୍ ଏହି ଏମଓୟୁରେ ସ୍ୱାକ୍ଷର କରିଥିଲେ। ଏହି ଭାଗିଦାରୀ ରାଜ୍ୟରେ ସାଇବର ପୋଲିସିଂକୁ ମଜବୁତ କରିବା ପାଇଁ ଏକ ଦୃଢ଼ ଭିତ୍ତିଭୂମି ଯୋଗାଇବ ବୋଲି ଡିଜିପି ପ୍ରକାଶ କରିଛନ୍ତି।

ଏମଓୟୁ ସ୍ୱାକ୍ଷର ପରେ ଡିଜିପି ଖୁରାନିଆ ପୋଲିସ କର୍ମଚାରୀଙ୍କ ପାଇଁ ଉଦ୍ଦିଷ୍ଟ “ସାଇବର କ୍ରାଇମ୍ ଇନଭେଷ୍ଟିଗେସନ୍ ଆଣ୍ଡ ଡିଜିଟାଲ୍ ଫରେନ୍ସିକ୍ସ” ନାମକ ଏକ ତାଲିମ କାର୍ଯ୍ୟକ୍ରମର ଉଦ୍ଘାଟନ କରିଥିଲେ। ଏହି ଅବସରକୁ ଓଡ଼ିଶା ପୋଲିସର ଆଧୁନିକୀକରଣ ଦିଗରେ ଏକ ଐତିହାସିକ ମାଇଲଖୁଣ୍ଟ ଭାବେ ବର୍ଣ୍ଣନା କରି ସେ କହିଛନ୍ତି ଯେ, ବର୍ତ୍ତମାନ ସମୟରେ ଅପରାଧର ରୂପରେଖ ଦ୍ରୁତ ଗତିରେ ବଦଳୁଛି ଓ ପ୍ରାୟ ପ୍ରତ୍ୟେକ ଅପରାଧିକ ତଦନ୍ତରେ ଡିଜିଟାଲ୍ ପ୍ରମାଣ ଏକ ଗୁରୁତ୍ୱପୂର୍ଣ୍ଣ ଅଂଶ ପାଲଟିଛି।

ମ୍ୟୁଲ୍ ଆକାଉଣ୍ଟ ଜାଲିଆତି, ଅନଲାଇନ୍ ବିନିଯୋଗ ଠକେଇ ଏବଂ “ଡିଜିଟାଲ୍ ଆରେଷ୍ଟ” ଭଳି ସାଇବର ଅପରାଧ ବୃଦ୍ଧି ପାଉଥିବା ବେଳେ ନୂତନ ଅପରାଧିକ ଆଇନ ଅଧୀନରେ ବୈଜ୍ଞାନିକ ତଦନ୍ତ ଏବଂ ଫରେନ୍ସିକ୍ ବିଶ୍ଳେଷଣର ଗୁରୁତ୍ୱ ଅଧିକ ବଢ଼ିଯାଇଛି। ଡିଜିପି ଖୁରାନିଆ କହିଛନ୍ତି ଯେ, ସାଇବର ଅପରାଧକୁ ରୋକିବା ପାଇଁ ସମଗ୍ର ଓଡ଼ିଶାରେ ୨୦ଟି ନୂତନ ସାଇବର ଅପରାଧ ଏବଂ ଅର୍ଥନୈତିକ ଅପରାଧ ଥାନା ପ୍ରତିଷ୍ଠା କରାଯାଇଛି। ଏହାବ୍ୟତୀତ ରାଜ୍ୟର ବିଭିନ୍ନ ଥାନାକୁ ପ୍ରାୟ ୧୫ କୋଟି ଟଙ୍କା ମୂଲ୍ୟର ଆଧୁନିକ ହାର୍ଡୱେର ଏବଂ ସଫ୍ଟୱେର ଯୋଗାଇ ଦିଆଯାଇଛି।

ଏନଏଫଏସୟୁ ସହ ସ୍ୱାକ୍ଷରିତ ଏମଓୟୁ କେବଳ ତାଲିମ ମଧ୍ୟରେ ସୀମିତ ନୁହେଁ, ବରଂ ଅପରାଧ ସ୍ଥଳ ପରିଚାଳନା, ଉଚ୍ଚଶିକ୍ଷା, ମିଳିତ ଗବେଷଣା, ଫରେନ୍ସିକ୍ ଭିତ୍ତିଭୂମିର ବିକାଶ ଏବଂ ବୈଷୟିକ ପରାମର୍ଶ ଭଳି କ୍ଷେତ୍ରକୁ ମଧ୍ୟ ଅନ୍ତର୍ଭୁକ୍ତ କରିବ। କ୍ରାଇମ୍ ବ୍ରାଞ୍ଚ ଡିଜିପି ବିନୟତୋଷ ମିଶ୍ର ସୂଚନା ଦେଇଛନ୍ତି ଯେ, ଜାନୁଆରୀ ୨୦୨୭ ସୁଦ୍ଧା ୩୪ଟି ପୋଲିସ ଜିଲ୍ଲା ଏବଂ କ୍ରାଇମ୍ ବ୍ରାଞ୍ଚର ମୋଟ ୪୮୦ ଜଣ ଅଧିକାରୀ ଓ କର୍ମଚାରୀଙ୍କୁ ୧୬ଟି ବ୍ୟାଚରେ ତାଲିମ ଦିଆଯିବ।

ପ୍ରତ୍ୟେକ ବ୍ୟାଚରେ କନେଷ୍ଟବଳରୁ ଆରମ୍ଭ କରି ଡିଏସପି ପାହ୍ୟା ପର୍ଯ୍ୟନ୍ତ ୩୦ ଜଣ ପ୍ରତିଯୋଗୀ ସାମିଲ ହେବେ। ୬ ଦିନିଆ ଏହି ତାଲିମ କାର୍ଯ୍ୟକ୍ରମରେ ଏନଏଫଏସୟୁ ଠାରେ ୫ ଦିନର ଶ୍ରେଣୀଗୃହ ଓ ଲାବୋରେଟୋରୀ ଭିତ୍ତିକ ଅଧିବେଶନ ରହିଥିବାବେଳେ ସାଇବର କମ୍ପ୍ଲେକ୍ସରେ ଗୋଟିଏ ଦିନର ବ୍ୟବହାରିକ ତାଲିମ ଦିଆଯିବ। ଏହି କାର୍ଯ୍ୟକ୍ରମରେ ଏସଏଫଏସଏଲ ନିର୍ଦ୍ଦେଶକ ଡକ୍ଟର ସନ୍ତୋଷ ବାଲା, ଆଇଜି (କ୍ରାଇମ୍) ଡକ୍ଟର ସାର୍ଥକ ଷଡ଼ଙ୍ଗୀ ପ୍ରମୁଖ ଉପସ୍ଥିତ ଥିଲେ ଏବଂ ଏନଏଫଏସୟୁ ସହଯୋଗୀ ପ୍ରାଧ୍ୟାପକ ଡକ୍ଟର ବିଶ୍ୱ କଲ୍ୟାଣ ଦାଶ କାର୍ଯ୍ୟକ୍ରମ ପରିଚାଳନା କରିଥିଲେ।