ଜେପିଏସସି ପରୀକ୍ଷା ଅନିୟମିତତା ମାମଲା: ପୂର୍ବତନ ଅଧ୍ୟକ୍ଷ ଖିଆଙ୍ଗଟେ ଗିରଫ

ରାଞ୍ଚି(ସଂକେତ ଟିଭି): ଝାଡ଼ଖଣ୍ଡ ପବ୍ଲିକ୍ ସର୍ଭିସ୍ କମିଶନ୍ (JPSC) ଦ୍ୱାରା ଆୟୋଜିତ ନିଯୁକ୍ତି ପରୀକ୍ଷାରେ ଅନିୟମିତତା ମାମଲାରେ ପୂର୍ବତନ JPSC ଅଧ୍ୟକ୍ଷ ତଥା ଅବସରପ୍ରାପ୍ତ IAS ଅଧିକାରୀ ଏଲ୍. ଖିଆଙ୍ଗଟେଙ୍କୁ ଝାଡ଼ଖଣ୍ଡ CID ଗିରଫ କରିଛି। CID ଏଡିଜି ମନୋଜ କୌଶିକ ଏହି ସୂଚନା ଦେଇ କହିଛନ୍ତି ଯେ, ଖିଆଙ୍ଗଟେଙ୍କୁ ମିଶାଇ ଏହି ମାମଲାରେ ଗିରଫ ସଂଖ୍ୟା ୨୦ରେ ପହଞ୍ଚିଛି।

ଝାଡ଼ଖଣ୍ଡର ପୂର୍ବତନ ମୁଖ୍ୟ ସଚିବ ରହିଥିବା ଖିଆଙ୍ଗଟେ ୨୦୨୫ ମସିହା ଫେବ୍ରୁଆରୀରେ JPSCର ଅଧ୍ୟକ୍ଷ ଭାବରେ ନିଯୁକ୍ତ ହୋଇଥିଲେ। ହେଲେ, ଅନିୟମିତତା ତଦନ୍ତ ଜୋରଦାର ହେବା ପରେ ଗତ ଜୁଲାଇ ୨୨ ତାରିଖରେ ସେ ପଦରୁ ଇସ୍ତଫା ଦେଇଥିଲେ। ସେ ସେତେବେଳେ କହିଥିଲେ ଯେ, ନିରପେକ୍ଷ ଓ ସ୍ୱଚ୍ଛ ତଦନ୍ତ ପାଇଁ ସେ ସ୍ୱେଚ୍ଛାକୃତ ଭାବେ ପଦ ଛାଡ଼ିଛନ୍ତି।

ଖିଆଙ୍ଗଟେ ଇସ୍ତଫା ଦେବାର ପରଦିନ CID ତାଙ୍କ ରାଞ୍ଚି ସ୍ଥିତ କାଙ୍କେ ରୋଡ଼୍ ବାସଭବନ ସମେତ ଅନ୍ୟ ବିଭିନ୍ନ ସ୍ଥାନରେ ଚଢ଼ାଉ କରିଥିଲା। ଏହାପରେ ଜୁଲାଇ ୨୮ ତାରିଖଠାରୁ ତାଙ୍କୁ ଏକାଧିକ ଥର ଦୀର୍ଘ ସମୟ ଧରି ପଚରାଉଚରା କରାଯାଇଥିଲା।

୧୪ଶ JPSC କମ୍ବାଇଣ୍ଡ ସିଭିଲ୍ ସର୍ଭିସେସ୍ ପରୀକ୍ଷାକୁ ନେଇ ହୋଇଥିବା ଅନିୟମିତତା ଯାଞ୍ଚ କରାଯାଉଛି। ୧୦୩ଟି ଗ୍ରୁପ୍-A ଓ ଗ୍ରୁପ୍-B ପଦ ପାଇଁ ଆୟୋଜିତ ଏହାର ପ୍ରିଲିମିନାରୀ ପରୀକ୍ଷା ଏପ୍ରିଲ ୧୯ରେ ଅନୁଷ୍ଠିତ ହୋଇଥିଲା। ପରୀକ୍ଷା ପରିଚାଳନା ଦାୟିତ୍ୱ ଲକ୍ଷ୍ନୌର TSR Data Processing Private Limited (TDPL)କୁ ଦିଆଯାଇଥିଲା, ଯାହାର ପ୍ରକ୍ରିୟା ଏବେ CID ତଦନ୍ତ ପରିସରରେ ରହିଛି। ଏହି ସଂସ୍ଥା ପୂର୍ବରୁ ବ୍ଲାକ୍ ଲିଷ୍ଟ ହୋଇଥିବା ନେଇ ମଧ୍ୟ ଅଭିଯୋଗ ରହିଛି। ଠିକା ପ୍ରଦାନରେ ଲାଞ୍ଚ କାରବାର ଓ ନିୟମ ଉଲ୍ଲଂଘନ ହୋଇଥିବା ଗୁରୁତର ଅଭିଯୋଗର CID ତଦନ୍ତ କରୁଛି।

ଗିରଫ TDPL ମାର୍କେଟିଂ ମ୍ୟାନେଜର ଅଭୟ କୁମାର ତିୱାରୀ ତଦନ୍ତକାରୀଙ୍କୁ କହିଛନ୍ତି ଯେ, ଖିଆଙ୍ଗଟେଙ୍କୁ ପ୍ରାୟ ୨ କୋଟି ଟଙ୍କା ଦିଆଯାଇଥିଲା। ଏହି ମାମଲା ଭାରତୀୟ ନ୍ୟାୟ ସଂହିତା ସହ ଝାଡ଼ଖଣ୍ଡର ପ୍ରତିଯୋଗିତାମୂଳକ ପରୀକ୍ଷାରେ ଅନୁଚିତ ଉପାୟ ନିୟନ୍ତ୍ରଣ ଓ ପ୍ରତିରୋଧ ସମ୍ବନ୍ଧୀୟ ଆଇନର ବିଭିନ୍ନ ଧାରାରେ ରୁଜୁ କରାଯାଇଛି।

ଏହି ମାମଲାରେ ପୂର୍ବରୁ JPSCର ପୂର୍ବତନ ଡେପୁଟି କଣ୍ଟ୍ରୋଲର ଅଫ୍ ଏକ୍ଜାମିନେସନ୍ସ ଶ୍ୱେତା କୁମାରୀ ଗୁପ୍ତା, TDPLର ନିର୍ଦ୍ଦେଶକ ଓ କର୍ମଚାରୀ, କେତେକ ପରୀକ୍ଷାର୍ଥୀ ଏବଂ କଥିତ ଏଜେଣ୍ଟଙ୍କୁ ଗିରଫ କରାଯାଇଛି। CID JPSC କାର୍ଯ୍ୟାଳୟ, TDPL ପରିସର, ଖିଆଙ୍ଗଟେଙ୍କ ବାସଭବନ, ହୋଟେଲ୍ ଓ ଅନ୍ୟାନ୍ୟ ସ୍ଥାନରେ ଚଢ଼ାଉ କରି ବିଭିନ୍ନ ଦସ୍ତାବିଜ, ଇଲେକ୍ଟ୍ରୋନିକ୍ ଡିଭାଇସ୍, OMR ସିଟ୍, ଆଡମିଟ୍ କାର୍ଡ ଓ ବ୍ୟାଙ୍କ ସମ୍ବନ୍ଧୀୟ ରେକର୍ଡ ଜବତ କରିଛି। ଏହି ବିବାଦ ମଧ୍ୟରେ JPSC ସିଭିଲ୍ ସର୍ଭିସେସ୍ ମେନ୍ ପରୀକ୍ଷାକୁ ମଧ୍ୟ ସ୍ଥଗିତ ରଖାଯାଇଛି।