ଆମେରିକାରେ ନୀରବ ମୋଦୀଙ୍କ ଭାଇ ନେହଲ ମୋଦୀ ଗିରଫ

ନୂଆଦିଲ୍ଲୀ:(ସଂକେତ ଟିଭି):ଆମେରିକାରେ ନୀରବ ମୋଦୀଙ୍କ ଭାଇ ନେହଲ ମୋଦୀଙ୍କୁ ଗିରଫ କରାଯାଇଛି। ପିଏନବି ଋଣ ଠକେଇ ମାମଲା ଏବଂ ଏଲଏଲଡି ଡାଇମଣ୍ଡସ୍ ୟୁଏସଏ ସହିତ ଜଡିତ ୨.୬ ନିୟୁତ ଡଲାର ଠକେଇ ମାମଲାରେ ତାଙ୍କ ସମ୍ପୃକ୍ତି ଥିବାରୁ ତାଙ୍କୁ ଗିରଫ କରାଯାଇଛି। ଭାରତୀୟ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଏବଂ କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ)ର ମିଳିତ ଆବେଦନ ଅନୁସାରେ ଜୁଲାଇ ୪ରେ ନେହଲ ମୋଦୀଙ୍କୁ ଆମେରିକାରେ ଧରାଯାଇଛି। ବର୍ତ୍ତମାନ ତାଙ୍କୁ ଭାରତକୁ ପ୍ରତ୍ୟାର୍ପଣ ପାଇଁ ପ୍ରକ୍ରିୟା ଆରମ୍ଭ ହୋଇଛି।

ଦୁଇଟି ଅଭିଯୋଗ ଆଧାରରେ ନେହଲ ମୋଦୀଙ୍କ ବିରୋଧରେ ପ୍ରତ୍ୟାର୍ପଣ ପ୍ରକ୍ରିୟା ଚାଲିଛି। ପ୍ରଥମ ଅଭିଯୋଗ ପିଏନବି ଋଣ ଘୋଟାଳା ସହିତ ଜଡିତ, ଯେଉଁଥିରେ ବ୍ୟାଙ୍କରୁ ବଡ଼ ପରିମାଣର ଋଣ ନେଇ ଠକେଇ କରାଯାଇଥିଲା। ଦ୍ୱିତୀୟ ଅଭିଯୋଗ ହେଉଛି ଆମେରିକାର ମାନହାଟନରେ ଅବସ୍ଥିତ ବିଶ୍ୱର ଶୀର୍ଷ ହୀରା କମ୍ପାନି ଏଲଡି ଡାଇମଣ୍ଡସ୍ ୟୁଏସଏରୁ ୨.୬ ନିୟୁତ ଡଲାର ମୂଲ୍ୟର ହୀରା ଅବୈଧ ଭାବେ ହାସଲ କରିବା। ୧୭ ଜୁଲାଇ, ୨୦୨୫ରେ ପ୍ରତ୍ୟାର୍ପଣ ବିଚାର ପାଇଁ ଶୁଣାଣି ହେବ ବୋଲି କୁହାଯାଉଛି।

ସୂତ୍ରମାନଙ୍କ ଅନୁସାରେ, ନେହଲ ମୋଦୀ କଷ୍ଟକୋ ସହିତ ଏକ ଚୁକ୍ତି ଥିବାର ମିଥ୍ୟା ଦାବି କରି ଏଲଡି ଡାଇମଣ୍ଡସ୍ ଠାରୁ ହୀରା ଆଣିଥିଲେ। ମାତ୍ର, ସେ ଦେୟ ଶର୍ତ୍ତାକୁ ଅଣଦେଖା କରି ହୀରାଗୁଡ଼ିକୁ ନିଜ ଲାଭ ପାଇଁ ବିକ୍ରି କରିଦେଇଥିଲେ। ଏହି ଦୁଇଟି ମାମଲାରେ ଇଡି ଏବଂ ସିବିଆଇ ତଦନ୍ତ କରୁଥିବା ବେଳେ ଆମେରିକୀୟ ପ୍ରଶାସନ ତାଙ୍କୁ ଗିରଫ କରିଛି। ଶୁଣାଣି ସମୟରେ ନେହଲ ଜାମିନ ପାଇଁ ଆବେଦନ କରିପାରନ୍ତି ବୋଲି ଆଶା କରାଯାଉଛି।