ଗଡସ୍ପିଡ୍ ୟୁଟିଆର୍ ସିରିଜ୍ ଟେନିସ୍: ବାଲେଶ୍ବରର ମନନ୍ ରାଠୀ ଅଣ୍ଡର-୧୨ରେ ଚାମ୍ପିଆନ୍

ବାଲେଶ୍ବର (ସଂକେତ ଟିଭି): କୋଲକାତାଠାରେ ଅନୁଷ୍ଠିତ ଗଡସ୍ପିଡ୍ ୟୁଟିଆର୍ ସିରିଜ୍ ଟେନିସ୍ ଟୁର୍ଣ୍ଣାମେଣ୍ଟରେ ବାଲେଶ୍ବରର ଟେନିସ୍ ପ୍ରତିଭାମାନେ ଉତ୍କୃଷ୍ଟ କ୍ରୀଡ଼ା ପ୍ରଦର୍ଶନ କରିଛନ୍ତି। କୋଲକାତାର ସ୍ପେସ ସର୍କଲ ସେଣ୍ଟରରେ ମାର୍ଚ୍ଚ ୨୦ରୁ ଆରମ୍ଭ ହୋଇ ମାର୍ଚ୍ଚ ୨୫ ତାରିଖ ପର୍ଯ୍ୟନ୍ତ ଚାଲିଥିବା ଏହି ଟୁର୍ଣ୍ଣାମେଣ୍ଟର ଅଣ୍ଡର-୧୨ ବିଭାଗରେ ମନନ୍ ରାଠୀ ଚାମ୍ପିଆନ୍ ହୋଇଥିବା ବେଳେ ଅଣ୍ଡର-୧୬ ବିଭାଗରେ ଅମର୍ତ୍ତ୍ୟ ସେନ୍ ରନର୍ସ ଅଫ୍ ହୋଇଛନ୍ତି।

ସେହିପରି ଅଣ୍ଡର-୧୬ ବିଭାଗରେ ସୌଭାଗ୍ୟ ପଣ୍ଡା କ୍ବାଟର ଫାଇନାଲ୍ ପର୍ଯ୍ୟନ୍ତ ପହଞ୍ଚିଥିବା ବେଳେ ସମର ଭଟ୍ଟର ଅଣ୍ଡର-୧୦ ବିଭାଗରେ ରନର୍ସ ଅଫ୍ ହୋଇଥିଲେ । ସେହିପରି ସମର ଅଣ୍ଡର-୯ ବିଭାଗରେ କ୍ବାଟର ଫାଇନାଲ୍ ପର୍ଯ୍ୟନ୍ତ ଯାଇଥିଲେ। ତେଜସ୍ ମାଲୁଓ ଅଣ୍ଡର-୧୦ ବିଭାଗରେ ସେମିଫାଇନାଲ୍ ଏବଂ ଅଣ୍ଡର-୯ ବୟସ ବର୍ଗରେ କ୍ବାଟର ଫାଇନାଲ୍ ପର୍ଯ୍ୟନ୍ତ ଯାଇଥିଲେ। ଅଣ୍ଡର-୧୨ ବିଭାଗରେ ଚାମ୍ପିଆନ୍ ହୋଇଥିବା ମନନ୍ ରାଠୀ ଅଣ୍ଡର-୧୦ ବିଭାଗରେ ମଧ୍ୟ କ୍ବାଟର ଫାଇନାଲ୍ ପର୍ଯ୍ୟନ୍ତ ଯାଇଥିଲେ।

ଏହି ସମସ୍ତ ଖେଳାଳୀ ତଥା ତାଙ୍କର ଟେନିସ୍ କୋଚ୍ ସେଖ୍ ଅସଲମଙ୍କୁ ବାଲେଶ୍ବର ଟେନିସ୍ ଆସୋସିଏସନର ସଭାପତି କିଶନ ସାହୁ, ଉପଦେଷ୍ଠା ମଦନ ସରାଓଗୀ ଓ ସଂପାଦକ ସମଥମ୍ ପ୍ରସାଦଙ୍କ ସମେତ ବରିଷ୍ଠ କର୍ମକର୍ତ୍ତା ଅରୁଣ ରାଠୀ, ଗିରିଶ ମୋଦୀ, ରାଜୀବ ସାହୁ, ଜୁବିନ ବୋଧାଓ୍ବାଲା, ଡକ୍ଟର ଅମରଜ୍ୟୋତି ଆଚାର୍ଯ୍ୟ, ମୁକ୍ତେଶ ମଚ୍ଚର, ପଞ୍ଚାନନ ନାୟକ ପ୍ରମୁଖ କୃତଜ୍ଞତା ଜଣାଇଛନ୍ତି।