ନୟାଗଡ଼ର ପ୍ରସିଦ୍ଧ ଛେନାପୋଡ଼କୁ ଶୀଘ୍ର ମିଳିବ ଜିଆଇ ଟ୍ୟାଗ୍

ଭୁବନେଶ୍ୱର (ସଂକେତ୍ ଟିଭି) ନୟାଗଡ଼ର ପ୍ରସିଦ୍ଧ ଛେନାପୋଡ଼କୁ ଶୀଘ୍ର ଭୌଗୋଳିକ ସଙ୍କେତ (ଜିଆଇ) ଟ୍ୟାଗ୍ ମାନ୍ୟତା ମିଳିବାକୁ ଯାଉଛି। ଏନେଇ କେନ୍ଦ୍ର ବାଣିଜ୍ୟ ଓ ଶିଳ୍ପ ମନ୍ତ୍ରୀ ପୀୟୂଷ ଗୋୟଲ ସୂଚନା ଦେଇଛନ୍ତି।

ଆସନ୍ତା ୨୮ ଓ ୨୯ ମେ ୨୦୨୩ ତାରିଖରେ ଅନୁଷ୍ଠିତ ହେବାକୁ ଥିବା ବୈଠକରେ ଏହାକୁ ବିଧିବଦ୍ଧ ଭାବରେ ଘୋଷଣା କରାଯାଇପାରେ। ଜିଆଇ ଟ୍ୟାଗ୍ ନେଇ ଉପଯୁକ୍ତ ପଦକ୍ଷେପ ନେବେ ବୋଲି କେନ୍ଦ୍ର ମନ୍ତ୍ରୀ ପ୍ରତିଶ୍ରୁତି ଦେଇଛନ୍ତି।

ବୈଠକ ପରେ ‘Geographical Indications of Goods (Registration and Protection) Act, 1999’ ଅନୁଯାୟୀ ଜିଆଇ ଟ୍ୟାଗ୍ ପ୍ରଦାନ ପ୍ରକ୍ରିୟାକୁ ତ୍ୱରାନ୍ୱିତ କରାଯିବ। ଶନିବାର ନୟାଗଡ଼ ଛେନାପୋଡ଼ର ସ୍ରଷ୍ଟା ସୁଦର୍ଶନ ସାହୁଙ୍କ ଜନ୍ମଦିନକୁ ‘ବିଶ୍ୱ ଛେନାପୋଡ଼ ଦିବସ’ ଭାବରେ ପାଳନ କରାଯାଇଥିଲା। ନୟାଗଡ଼ ଅଞ୍ଚଳ ସହିତ ଛେନାପୋଡ଼ର ଗଭୀର ସମ୍ପର୍କ ରହିଛି ଏବଂ ତାହା ବର୍ତ୍ତମାନ ସ୍ୱୀକୃତି ପାଇବାକୁ ଯାଉଛି।

ଜିଆଇ ଟ୍ୟାଗ୍ ହେଉଛି ଏକ ସ୍ୱତନ୍ତ୍ର ପରିଚୟ, ଯାହା କୌଣସି ନିର୍ଦ୍ଦିଷ୍ଟ ଅଞ୍ଚଳର ଉତ୍ପାଦକୁ ଦର୍ଶାଏ। ଏହା ଏକ ପ୍ରକାର ବୌଦ୍ଧିକ ସମ୍ପତ୍ତି ଅଧିକାର। ଏହି ଟ୍ୟାଗ୍ ମିଳିବା ପରେ ଅନ୍ୟ କେହି ସେହି ନାମ ବ୍ୟବହାର କରି ନକଲି ଜିନିଷ ବିକ୍ରି କରିପାରିବେ ନାହିଁ। ଓଡ଼ିଶା ରସଗୋଲା, କନ୍ଧମାଳ ହଳଦୀ, ସମ୍ବଲପୁରୀ ବାନ୍ଧ ଶାଢ଼ୀ, ଗଜପତି କାଇ ଚଟଣି ସମେତ ଅନ୍ୟାନ୍ୟ ଉତ୍ପାଦକୁ ପୂର୍ବରୁ ଜିଆଇ ଟ୍ୟାଗ୍ ମିଳିସାରିଛି।