ଓଡ଼ିଶା ପୁଲିସର ନୂତନ ଅନ୍ତରୀଣ ଡିଜିପି ଦାୟିତ୍ୱ ଗ୍ରହଣ କଲେ ବିନୟତୋଷ ମିଶ୍ର
ଭୁବନେଶ୍ୱର (ସଂକେତ ଟିଭି): ଓଡ଼ିଶା ପୁଲିସର ଡିଜିପି ପଦରେ ପରିବର୍ତ୍ତନ ହୋଇଛି। ଡିଜିପି ୱାଇ.ବି. ଖୁରାନିଆ ରବିବାର ଚାକିରିରୁ ଅବସର ନେବା ପରେ କ୍ରାଇମବ୍ରାଞ୍ଚ ଡିଜି ବିନୟତୋଷ ମିଶ୍ର ଅନ୍ତରୀଣ ଡିଜିପି ଭାବେ ଅତିରିକ୍ତ ଦାୟିତ୍ୱ ଗ୍ରହଣ କରିଛନ୍ତି। ରବିବାର ଅପରାହ୍ନରେ କଟକସ୍ଥିତ ପୁଲିସ ମୁଖ୍ୟାଳୟରେ ପହଞ୍ଚି ସେ ଦାୟିତ୍ୱ ନେଇଥିଲେ। ଅବସରପ୍ରାପ୍ତ ଡିଜିପି ୱାଇ.ବି. ଖୁରାନିଆ ତାଙ୍କୁ ଦାୟିତ୍ୱ ହସ୍ତାନ୍ତର କରିଥିଲେ।
ଦୁଇ ଦିନ ପୂର୍ବରୁ ରାଜ୍ୟ ସରକାର ୧୯୯୩ ବ୍ୟାଚ୍ର ଆଇପିଏସ୍ ଅଧିକାରୀ ବିନୟତୋଷ ମିଶ୍ରଙ୍କୁ ଅନ୍ତରୀଣ ଡିଜିପି ଭାବେ ନିଯୁକ୍ତ କରିଥିଲେ। ଡିଜିପି ଚୟନ ପ୍ରକ୍ରିୟାକୁ ନେଇ ମାମଲା ସୁପ୍ରିମକୋର୍ଟରେ ବିଚାରାଧୀନ ଥିବାରୁ ଏହି ନିଯୁକ୍ତି ଗୁରୁତ୍ୱ ବହନ କରୁଛି।
ସୂଚନା ଅନୁଯାୟୀ, ଗତ ଗୁରୁବାର ଓଡ଼ିଶାରେ ଡିଜିପି ଚୟନ ପ୍ରକ୍ରିୟା ଉପରେ ସୁପ୍ରିମକୋର୍ଟ ରୋକ୍ ଲଗାଇଥିଲେ। ଆସନ୍ତା ୧୮ ତାରିଖ ପର୍ଯ୍ୟନ୍ତ ନୂଆ ଡିଜିପି ଚୟନ ପ୍ରକ୍ରିୟା ଆଗକୁ ନବଢ଼ାଇବାକୁ ୟୁପିଏସ୍ସିକୁ ନିର୍ଦ୍ଦେଶ ଦିଆଯାଇଛି। ତେଣୁ ଏହି ସମୟରେ ପୁଲିସ ପ୍ରଶାସନରେ ନେତୃତ୍ୱର ନିରନ୍ତରତା ବଜାୟ ରଖିବାକୁ ବିନୟତୋଷ ମିଶ୍ରଙ୍କୁ ଅନ୍ତରୀଣ ଦାୟିତ୍ୱ ଦିଆଯାଇଛି।
ବିହାରର ମଧୁବନୀ ଜିଲ୍ଲାରେ ୧୯୬୬ ନଭେମ୍ବର ୩ ତାରିଖରେ ଜନ୍ମ ଗ୍ରହଣ କରିଥିବା ଶ୍ରୀ ମିଶ୍ର ପୁଲିସ ମ୍ୟାନେଜମେଣ୍ଟରେ ମାଷ୍ଟରଡିଗ୍ରୀ ହାସଲ କରିଛନ୍ତି।
ବିନୟତୋଷ ମିଶ୍ର ବର୍ତ୍ତମାନ କ୍ରାଇମବ୍ରାଞ୍ଚ ଡିଜି ଭାବେ କାର୍ଯ୍ୟରତ ଥିଲେ। ସେ ୨୦୨୫ ଜାନୁୟାରୀରୁ ରାଜ୍ୟରେ ଡିଜି ପାହ୍ୟାରେ କାର୍ଯ୍ୟ କରୁଛନ୍ତି। ତାଙ୍କର ଡିଜି ପାହ୍ୟାର କାର୍ଯ୍ୟକାଳ ୬ ମାସରୁ କମ୍ ଥିବାରୁ ୟୁପିଏସ୍ସି ନିୟମ ଅନୁଯାୟୀ ସ୍ଥାୟୀ ଡିଜିପି ଚୟନ ପ୍ୟାନେଲରେ ତାଙ୍କୁ ସାମିଲ କରାଯାଇନଥିବା ଜଣାପଡ଼ିଛି।
ଆସନ୍ତା ୧୮ ତାରିଖରେ ସୁପ୍ରିମକୋର୍ଟର ଶୁଣାଣି ପରେ ଓଡ଼ିଶାର ସ୍ଥାୟୀ ଡିଜିପି ଚୟନ ପ୍ରକ୍ରିୟା ନେଇ ପରବର୍ତ୍ତୀ ଚିତ୍ର ସ୍ପଷ୍ଟ ହେବ। ସେପର୍ଯ୍ୟନ୍ତ ବିନୟତୋଷ ମିଶ୍ର ରାଜ୍ୟ ପୁଲିସର ମୁଖ୍ୟ ଭାବେ ଦାୟିତ୍ୱ ତୁଲାଇବେ।
ଅନ୍ତରୀଣ ପୁଲିସ୍ ଡିଜି ଭାବେ ଦାୟିତ୍ୱ ନେବା ପରେ ବିନୟତୋଷ ମିଶ୍ର ରାଜ୍ୟ ପୁଲିସ୍ର ଆଗାମୀ କାର୍ଯ୍ୟକ୍ରମ ନେଇ ନିଜ ପ୍ରାଥମିକତା ସ୍ପଷ୍ଟ କରିଛନ୍ତି। ନାରୀ ସୁରକ୍ଷା, ନିଶାମୁକ୍ତ ଓଡ଼ିଶା ଗଠନ, ସଂଗଠିତ ଅପରାଧ ଦମନ ଏବଂ ସାଇବର ଅପରାଧ ନିୟନ୍ତ୍ରଣ – ଏହି ୪ଟି ପ୍ରମୁଖ ବିନ୍ଦୁ ଉପରେ ଗୁରୁତ୍ୱ ଦେବାକୁ ସେ କହିଛନ୍ତି।
ଅନ୍ତରୀଣ ଡିଜି ଶ୍ରୀ ମିଶ୍ର କହିଛନ୍ତି, “ନାରୀଙ୍କ ସୁରକ୍ଷାକୁ ପୁଲିସ୍ର ପ୍ରମୁଖ ପ୍ରାଥମିକତା ମଧ୍ୟରେ ରଖାଯିବ। ମହିଳାମାନେ ଯେପରି ନିରାପଦ ପରିବେଶରେ ରହିପାରିବେ, ସେଥିପାଇଁ ପୁଲିସ୍ ବ୍ୟବସ୍ଥାକୁ ଆହୁରି ସୁଦୃଢ଼ କରାଯିବ।”
ଏଥିସହ ରାଜ୍ୟରୁ ନକ୍ସଲ ସମସ୍ୟା ପ୍ରାୟ ଦୂର ହୋଇସାରିଛି ବୋଲି ବିନୟତୋଷ ମିଶ୍ର କହିଛନ୍ତି। ତେବେ ଆଗକୁ ଯେପରି କୌଣସି ବ୍ୟକ୍ତି ନକ୍ସଲ ସଂଗଠନ ସହ ଯୋଡ଼ି ନହୁଅନ୍ତି, ସେଥିପ୍ରତି ମଧ୍ୟ ପୁଲିସ୍ ସତର୍କ ରହିବ ବୋଲି ସେ ସୂଚନା ଦେଇଛନ୍ତି।
ଶେଷରେ ପୁଲିସ୍ ଅଧିକାରୀ ଓ କର୍ମଚାରୀମାନେ ଲୋକସେବାକୁ ସର୍ବୋଚ୍ଚ ପ୍ରାଥମିକତା ଦେଇ କାର୍ଯ୍ୟ କରିବାକୁ ଅନ୍ତରୀଣ ଡିଜି ଆହ୍ୱାନ କରିଛନ୍ତି।
