୭ ରାଜ୍ୟରେ ବିଚାରପତିଙ୍କ ଅବସର ବୟସ ୬୦ରୁ ୬୨ ବର୍ଷକୁ ବୃଦ୍ଧି

ନୂଆଦିଲ୍ଲୀ (ସଂକେତ ଟିଭି): ସୁପ୍ରିମକୋର୍ଟ ୭ ରାଜ୍ୟ ସରକାରଙ୍କୁ ଜୁଡିସିଆଲ ଅଧିକାରୀଙ୍କ ଅବସର ବୟସ ୬୦ରୁ ବଢାଇ ୬୨ ବର୍ଷ କରିବାକୁ ନିର୍ଦ୍ଦେଶ ଦେଇଛନ୍ତି। ପ୍ରଧାନ ବିଚାରପତି (ସିଜେଆଇ) ଜଷ୍ଟିସ୍ ସୂର୍ଯ୍ୟକାନ୍ତ, ଜଷ୍ଟିସ୍ ଜୟମାଲ୍ୟ ବାଗଚୀ ଓ ଜଷ୍ଟିସ୍ ଭି.ମୋହନାଙ୍କ ବେଞ୍ଚ ଏହି ଐତିହାସିକ ରାୟ ଶୁଣାଇଛନ୍ତି। ବେଞ୍ଚ କହିଛନ୍ତି ଯେ ଏହି ୭ ରାଜ୍ୟରେ ଯେଉଁ ଜୁଡିସିଆଲ ଅଧିକାରୀ ୩୧ ମାର୍ଚ୍ଚ ୨୦୨୬ କିମ୍ବା ତଦ୍ପରେ ଅବସର ଗ୍ରହଣ କରିଛନ୍ତି, ସେମାନଙ୍କୁ ପୁନର୍ବାର ଜୁଡିସିଆଲ ସେବାରେ ଯୋଗ ଦେବାର ବିକଳ୍ପ ପ୍ରଦାନ କରାଯିବ।

ଯେଉଁ ୭ ରାଜ୍ୟ ଏହି ନିର୍ଦ୍ଦେଶର ଅଧୀନରେ ଆସିଛନ୍ତି, ସେଗୁଡ଼ିକ ହେଲେ: ଛତିଶଗଡ଼, କର୍ଣ୍ଣାଟକ, ମଧ୍ୟପ୍ରଦେଶ, ମହାରାଷ୍ଟ୍ର, ସିକ୍କିମ, ତାମିଲନାଡୁ ଓ ପଶ୍ଚିମବଙ୍ଗ। ଏହି ରାଜ୍ୟମାନେ ପୂର୍ବରୁ ଜୁଡିସିଆଲ ଅଧିକାରୀଙ୍କ ଅବସର ବୟସ ବୃଦ୍ଧି ପାଇଁ ସହମତି ପ୍ରକାଶ କରିସାରିଛନ୍ତି। ସୁପ୍ରିମକୋର୍ଟ ଏହି ରାଜ୍ୟମାନଙ୍କୁ ସେମାନଙ୍କ ସର୍ଭିସ ନିୟମାବଳୀରେ ଆବଶ୍ୟକ ସଂଶୋଧନ ଆଣିବାକୁ ଏବଂ ଅବସର ବୟସ ୬୦ରୁ ୬୨ ବର୍ଷକୁ ପରିବର୍ତ୍ତନ କରିବାକୁ ନିର୍ଦ୍ଦେଶ ଦେଇଛନ୍ତି।

ତେବେ, ଅବସର ବୟସ ବୃଦ୍ଧି ପୂର୍ବରୁ ସମ୍ବନ୍ଧିତ ହାଇକୋର୍ଟ ପ୍ରତ୍ୟେକ ଜୁଡିସିଆଲ ଅଧିକାରୀଙ୍କ ଉପଯୁକ୍ତତାର ଆକଳନ (ଆସେସମେଣ୍ଟ) କରିବେ। ବେଞ୍ଚ ସ୍ପଷ୍ଟ କରିଛନ୍ତି ଯେ ନିୟମ ପରିବର୍ତ୍ତନ ନହେବା ପର୍ଯ୍ୟନ୍ତ କୌଣସି ଜୁଡିସିଆଲ ଅଧିକାରୀ, ଯିଏ ୬୦ ବର୍ଷ ପୂର୍ଣ୍ଣ କରିସାରିଛନ୍ତି, ସେ ୬୨ ବର୍ଷ ନହେବା ପର୍ଯ୍ୟନ୍ତ ଅବସର ଗ୍ରହଣ କରିପାରିବେ ନାହିଁ। ତାଙ୍କର ଦ୍ୱିତୀୟ କାର୍ଯ୍ୟକାଳ ସମ୍ବନ୍ଧିତ ହାଇକୋର୍ଟଙ୍କ ଉପଯୁକ୍ତତା ମୂଲ୍ୟାଙ୍କନ ଉପରେ ନିର୍ଭର କରିବ।

ଏହାସହ, ସୁପ୍ରିମକୋର୍ଟ ଅନ୍ୟ ୨୩ଟି ରାଜ୍ୟ ଓ କେନ୍ଦ୍ରଶାସିତ ପ୍ରଦେଶଙ୍କୁ ମଧ୍ୟ ନିର୍ଦ୍ଦେଶ ଦେଇଛନ୍ତି, ଯେଉଁମାନେ ଏପର୍ୟ୍ୟନ୍ତ ଅବସର ବୟସ ବୃଦ୍ଧି ଉପରେ ନିଷ୍ପତ୍ତି ନେଇନାହାନ୍ତି। ଏହି ରାଜ୍ୟ ଓ କେନ୍ଦ୍ରଶାସିତ ପ୍ରଦେଶଗୁଡ଼ିକ ହେଲେ: ଆନ୍ଧ୍ରପ୍ରଦେଶ, ଅରୁଣାଚଳ ପ୍ରଦେଶ, ଆସାମ, ବିହାର, ଗୋଆ, ଗୁଜରାଟ, ହରିୟାଣା, ହିମାଚଳ ପ୍ରଦେଶ, ଝାଡ଼ଖଣ୍ଡ, କେରଳ, ମଣିପୁର, ମେଘାଳୟ, ମିଜୋରାମ, ନାଗାଲ୍ୟାଣ୍ଡ, ଓଡ଼ିଶା, ପଞ୍ଜାବ, ରାଜସ୍ଥାନ, ତେଲେଙ୍ଗାନା, ତ୍ରିପୁରା, ଉତ୍ତରାଖଣ୍ଡ, ଉତ୍ତରପ୍ରଦେଶ, ଏନସିଟି ଦିଲ୍ଲୀ, ଜମ୍ମୁ ଓ କାଶ୍ମୀର ଏବଂ ପୁଡୁଚେରୀ।

ଏହି ସମସ୍ତ ରାଜ୍ୟ ଓ କେନ୍ଦ୍ରଶାସିତ ପ୍ରଦେଶଙ୍କୁ ସୁପ୍ରିମକୋର୍ଟ ୨ ସପ୍ତାହ ମଧ୍ୟରେ ଏହି ପ୍ରସଙ୍ଗରେ ନିଜର ନିଷ୍ପତ୍ତି ନେବାକୁ ଏବଂ ଏକ ଅନୁପାଳନ ରିପୋର୍ଟ (କମ୍ପ୍ଲାଏନ୍ସ ରିପୋର୍ଟ) କୋର୍ଟରେ ଜମା କରିବାକୁ ନିର୍ଦ୍ଦେଶ ଦେଇଛନ୍ତି। ଏହି ରାୟ ଦେଶର ନ୍ୟାୟିକ ବ୍ୟବସ୍ଥାରେ ଏକ ଗୁରୁତ୍ୱପୂର୍ଣ୍ଣ ପରିବର୍ତ୍ତନ ଆଣିଛି।