ରାଜ୍ୟସଭାରେ ବନ୍ଦେ ମାତରମ୍ ବିଲ୍ ପାରିତ

ନୂଆଦିଲ୍ଲୀ(ସଂକେତ ଟିଭି): ବୁଧବାର ସଂସଦର ଦୁଇ ସଦନରେ ଶିକ୍ଷା ବ୍ୟବସ୍ଥା ଓ ଜାତୀୟ ଭାବନା ସହ ଜଡ଼ିତ ଦୁଇଟି ଗୁରୁତ୍ୱପୂର୍ଣ୍ଣ ବିଲ୍ ଆଗକୁ ବଢ଼ିଛି। ଏହି ଦୁଇ ବିଲ୍ ମଧ୍ୟରୁ ଗୋଟିଏ ପେପର ଲିକ୍ ଓ ପରୀକ୍ଷା ଦୁର୍ନୀତି ବିରୋଧରେ କଡ଼ା ଆଇନ ଆଣିଥିବା ବେଳେ ଅନ୍ୟଟି ‘ବନ୍ଦେ ମାତରମ୍’ ଗାନକୁ ଶିକ୍ଷାନୁଷ୍ଠାନରେ ବାଧ୍ୟତାମୂଳକ କରିବା ପାଇଁ ପ୍ରାବଧାନ ରଖିଛି।

ଲୋକସଭାରେ ‘ପବ୍ଲିକ ଏକ୍ଜାମିନେସନ୍ସ (ପ୍ରିଭେନ୍ସନ୍ ଅଫ୍ ଅନଫେୟାର୍ ମିନ୍ସ) ସଂଶୋଧନ ବିଲ୍–୨୦୨୬’ ପାରିତ ହୋଇଛି। ଏହି ବିଲ୍ ମାଧ୍ୟମରେ ପ୍ରଶ୍ନପତ୍ର ଲିକ୍, ସଂଗଠିତ ପରୀକ୍ଷା ଦୁର୍ନୀତି ଓ ଅସାଧୁ ଉପାୟ ବିରୋଧରେ ଅଧିକ କଡ଼ା ଦଣ୍ଡ, ତଦନ୍ତ କ୍ଷମତା ଏବଂ ଆଇନଗତ ବ୍ୟବସ୍ଥାକୁ ସୁଦୃଢ଼ କରାଯାଇଛି। ଏହା ଦ୍ଵାରା ଭବିଷ୍ୟତରେ ପରୀକ୍ଷା ଦୁର୍ନୀତି ରୋକିବାରେ ସହାୟକ ହେବ ବୋଲି ଆଶା କରାଯାଉଛି।

ଅନ୍ୟପଟେ, ରାଜ୍ୟସଭାରେ ‘ବନ୍ଦେ ମାତରମ୍ ବିଲ୍–୨୦୨୬’ ପାରିତ ହୋଇଛି। ଏହି ବିଲ୍ ରେ ସରକାରୀ ଓ ସରକାରୀ ଅନୁଦାନପ୍ରାପ୍ତ ଶିକ୍ଷାନୁଷ୍ଠାନରେ ‘ବନ୍ଦେ ମାତରମ୍’ ଗାନକୁ ବାଧ୍ୟତାମୂଳକ କରିବାର ବ୍ୟବସ୍ଥା ରହିଛି। ତେବେ ନିର୍ଦ୍ଦିଷ୍ଟ ବ୍ୟତିକ୍ରମ ପରିସ୍ଥିତିରେ ଛାଡ଼ ବ୍ୟବସ୍ଥା ମଧ୍ୟ ରଖାଯାଇଛି, ଯାହା କିଛି ବିଶେଷ ପରିସ୍ଥିତିରେ ଏହି ନିୟମରୁ ମୁକ୍ତି ଦେବ।

ଉଭୟ ବିଲ୍ ବର୍ତ୍ତମାନ ସଂବିଧାନ ସମ୍ମତ ପରବର୍ତ୍ତୀ ବିଧାନ ପ୍ରକ୍ରିୟାକୁ ଅଗ୍ରସର ହେବ। ଏହି ଦୁଇ ବିଲ୍ ପାରିତ ହେବା ଦ୍ଵାରା ଶିକ୍ଷା କ୍ଷେତ୍ରରେ ସ୍ୱଚ୍ଛତା ଏବଂ ଜାତୀୟତାବୋଧକୁ ପ୍ରୋତ୍ସାହନ ମିଳିବ ବୋଲି କୁହାଯାଉଛି।