ଡିଜିପି ନିଯୁକ୍ତି ନେଇ ମାମଲାର ଶୁଣାଣି କରିବାକୁ ରାଜି ହେଲେ ସୁପ୍ରିମକୋର୍ଟ

ନୂଆଦିଲ୍ଲୀ(ସଂକେତ ଟିଭି): ଓଡ଼ିଶା ସରକାର ପୋଲିସ ମହାନିର୍ଦ୍ଦେଶକ (DGP) ପଦ ପାଇଁ ସମ୍ଭାବ୍ୟ ପ୍ରାର୍ଥୀଙ୍କ ତାଲିକାରେ ଜଣେ କନିଷ୍ଠ ଅଧିକାରୀଙ୍କୁ ସାମିଲ କରିବାକୁ ଉଦ୍ୟମ କରୁଛନ୍ତି। ଏହା ସୁପ୍ରିମକୋର୍ଟଙ୍କ ୨୦୦୬ ମସିହାର ପ୍ରକାଶ ସିଂହ ମାମଲାରେ ଦିଆଯାଇଥିବା ନିର୍ଦ୍ଦେଶର ଉଲ୍ଲଂଘନ ବୋଲି ଅଭିଯୋଗ ହୋଇଥିବା ଏକ ଜନସ୍ୱାର୍ଥ ମାମଲା (PIL)ର ଶୁଣାଣି କରିବାକୁ ସୁପ୍ରିମକୋର୍ଟ ଆଜି (ମଙ୍ଗଳବାର) ରାଜି ହୋଇଛନ୍ତି।

ପ୍ରଧାନ ବିଚାରପତି ଜଷ୍ଟିସ୍ ସୂର୍ଯ୍ୟକାନ୍ତ, ଜଷ୍ଟିସ୍ ଜୟମାଲ୍ୟ ବାଗଚୀ ଏବଂ ଜଷ୍ଟିସ୍ ଭି. ମୋହନାଙ୍କୁ ନେଇ ଗଠିତ ଖଣ୍ଡପୀଠଙ୍କୁ ବରିଷ୍ଠ ଆଇନଜୀବୀ ପି. ଚିଦାମ୍ବରମ ଏହି PILକୁ ଜରୁରୀ ଭିତ୍ତିରେ ତାଲିକାଭୁକ୍ତ କରି ଶୁଣାଣି କରିବାକୁ ଅନୁରୋଧ କରିଥିଲେ। ଚିଦାମ୍ବରମ କହିଥିଲେ ଯେ, ଓଡ଼ିଶା ସରକାର ଜଣେ ଅଯୋଗ୍ୟ ଅଧିକାରୀଙ୍କୁ UPSCକୁ ପଠାଯିବାକୁ ଥିବା ପ୍ୟାନେଲରେ ସାମିଲ କରିବାକୁ ଉଦ୍ୟମ କରୁଛନ୍ତି, ଯାହା ସୁପ୍ରିମକୋର୍ଟଙ୍କ ନିର୍ଦ୍ଦେଶର ଉଲ୍ଲଂଘନ।

ଉଲ୍ଲେଖଯୋଗ୍ୟ, ବର୍ତ୍ତମାନର DGP ଯୋଗେଶ ବାହାଦୁର ଖୁରାନିଆ ଚଳିତ ବର୍ଷ ଅଗଷ୍ଟ ୧୬ ତାରିଖରେ ଅବସର ନେବେ। ୨୦୦୬ ମସିହାରେ ସୁପ୍ରିମକୋର୍ଟଙ୍କ ପ୍ରକାଶ ସିଂହ ରାୟ ଅନୁଯାୟୀ, ରାଜ୍ୟର DGPଙ୍କୁ ପୋଲିସ ବିଭାଗର ତିନିଜଣ ସର୍ବାଧିକ ବରିଷ୍ଠ ଅଧିକାରୀଙ୍କ ମଧ୍ୟରୁ UPSC ଦ୍ୱାରା ପ୍ରସ୍ତୁତ ପ୍ୟାନେଲରୁ ଚୟନ କରାଯିବା ଆବଶ୍ୟକ। ଏହି ଅଧିକାରୀମାନେ ସେବା ଅବଧି, ଉତ୍କୃଷ୍ଟ ରେକର୍ଡ ଏବଂ ବିଭିନ୍ନ କ୍ଷେତ୍ରର ଅଭିଜ୍ଞତା ଆଧାରରେ ଯୋଗ୍ୟ ହେବା ଲୋଡ଼ା। ରାୟରେ ଏହା ମଧ୍ୟ ସ୍ପଷ୍ଟ କରାଯାଇଥିଲା ଯେ, ଥରେ ଜଣେ ଅଧିକାରୀଙ୍କୁ DGP ପଦ ପାଇଁ ଚୟନ କରାଗଲେ, ତାଙ୍କର ଅବସର ତାରିଖ ଯାହା ହେଉନା କାହିଁକି, ଅତିକମରେ ଦୁଇ ବର୍ଷର କାର୍ଯ୍ୟକାଳ ରହିବା ବାଧ୍ୟତାମୂଳକ।

ଶୁଣାଣି ସମୟରେ ପି. ଚିଦାମ୍ବରମ କହିଥିଲେ ଯେ, ଅଗଷ୍ଟ ୭ ତାରିଖରେ UPSCର ବୈଠକ ହେବାର ଥିଲା, ଯେଉଁଠାରେ ତିନି ଜଣ DGP ସ୍ତରର ଅଧିକାରୀଙ୍କ ପ୍ୟାନେଲକୁ ବିଚାର କରାଯିବାର ଥିଲା। କିନ୍ତୁ ଓଡ଼ିଶା ସରକାର ସେହି ତାଲିକା ପ୍ରତ୍ୟାହାର କରିନେଇଥିଲେ। ଏବେ ସରକାର ଜଣେ ଅତିରିକ୍ତ ପୋଲିସ ମହାନିର୍ଦ୍ଦେଶକ (ADGP)ଙ୍କୁ ତରବରିଆ ପଦୋନ୍ନତି ଦେଇ ନୂଆ ପ୍ୟାନେଲରେ ସାମିଲ କରିବାକୁ ଚେଷ୍ଟା କରୁଛନ୍ତି, ଯାହା ନିର୍ଦ୍ଦେଶର ସ୍ପଷ୍ଟ ଉଲ୍ଲଂଘନ। ଚିଦାମ୍ବରମ ଅଭିଯୋଗ କରି କହିଥିଲେ, “ସେମାନେ ଜଣେ ADGPଙ୍କୁ ଆଜି କିମ୍ବା ଗତକାଲି ରାତିରେ ପଦୋନ୍ନତି ଦେଇ ତାଙ୍କୁ ତାଲିକାରେ ସାମିଲ କରିବାକୁ ଯାଉଛନ୍ତି।”

ପ୍ରଧାନ ବିଚାରପତି କହିଥିଲେ, “ଆମେ ଏହାକୁ ଆସନ୍ତାକାଲି (ବୁଧବାର) ତାଲିକାଭୁକ୍ତ କରିବୁ।” ସେ ଆହୁରି ମଧ୍ୟ କହିଥିଲେ ଯେ, ପୂର୍ବରୁ ଦିଆଯାଇଥିବା ନିର୍ଦ୍ଦେଶ ପାଳନ ହେଉନଥିଲେ UPSC ସୁପ୍ରିମକୋର୍ଟଙ୍କ ନିକଟକୁ ଯିବା ଉଚିତ। “କିଏ ଯୋଗ୍ୟ ଏବଂ କାହାକୁ ବିଚାର କରାଯାଇପାରିବ, ସେମାନେ (UPSC) ଭଲ ଭାବରେ ଜାଣନ୍ତି। ଯଦି ଅଯୋଗ୍ୟ ଅଧିକାରୀଙ୍କୁ ନେଇ ପ୍ୟାନେଲ ପଠାଯାଉଛି, ତେବେ ଆମେ ଆଶା କରୁଛୁ UPSC ଆମ ନିର୍ଦ୍ଦେଶ ଅନୁଯାୟୀ ପଦକ୍ଷେପ ନେବ,” ବୋଲି ପ୍ରଧାନ ବିଚାରପତି କହିଥିଲେ।

ଚିଦାମ୍ବରମ ପୂର୍ବ ଶୁଣାଣିର ଉଲ୍ଲେଖ କରି କହିଥିଲେ ଯେ, ଓଡ଼ିଶା ସରକାର ଏପ୍ରିଲ ମାସରେ ପଠାଇଥିବା ପ୍ରଥମ ପ୍ୟାନେଲ୍ ପ୍ରତ୍ୟାହାର କରିଥିଲେ। ମେ ମାସରେ ପଠାଯାଇଥିବା ଦ୍ୱିତୀୟ ପ୍ୟାନେଲରେ ତିନିଜଣ DGP ଏବଂ ଆଠଜଣ ADGP ଥିଲେ, ଯାହାକୁ UPSC ଗ୍ରହଣ କରିନଥିଲା ଏବଂ କହିଥିଲା ଯେ ସେମାନେ କେବଳ DGP ସ୍ତରର ଅଧିକାରୀଙ୍କୁ ବିଚାର କରିବେ। ଏହାପରେ UPSC ବୈଠକ ସମୟରେ ରାଜ୍ୟ ସରକାର ପୁଣି ପ୍ୟାନେଲ୍ ପ୍ରତ୍ୟାହାର କରିନେଲେ। ଚିଦାମ୍ବରମ କହିଥିଲେ ଯେ କାର୍ଯ୍ୟରତ ପୋଲିସ ଅଧିକାରୀମାନେ ସାଧାରଣତଃ ରାଜ୍ୟ ସରକାରଙ୍କ ବିରୋଧରେ ମାମଲା ଦାୟର କରିବାକୁ ଦ୍ୱିଧା କରୁଥିବାରୁ ଏହି ପ୍ରସଙ୍ଗଟି PIL ମାଧ୍ୟମରେ ଉଠାଯାଇଛି।

ସୂଚନାଯୋଗ୍ୟ, ୧୬ ଅଗଷ୍ଟରେ ବର୍ତ୍ତମାନର DGP ୱାଇ.ବି. ଖୁରାନିଆ ଅବସର ନେବେ। ଏହାରି ମଧ୍ୟରେ ଗତକାଲି (ସୋମବାର) ବରିଷ୍ଠ ଆଇପିଏସ୍ ଅଧିକାରୀ ସଞ୍ଜୀବ ପଣ୍ଡା ଏବଂ ଯଶୱନ୍ତ କୁମାର ଜେଠୱାଙ୍କୁ DGP ପାହ୍ୟାକୁ ପଦୋନ୍ନତି ମିଳିଛି, ଯାହାକୁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଅନୁମୋଦନ କରିଛନ୍ତି। ଏହି ପଦୋନ୍ନତି ନୂଆ ପ୍ୟାନେଲ୍ ଗଠନର ପୃଷ୍ଠଭୂମିରେ ଘଟିଥିବାରୁ ବିବାଦୀୟ ପାଲଟିଛି।