ପଶ୍ଚିମବଙ୍ଗ ଡିଜିପି ସିଦ୍ଧ ନାଥ ଗୁପ୍ତାଙ୍କ କାର୍ଯ୍ୟକାଳ ୬ ମାସ ବୃଦ୍ଧି

ନୂଆଦିଲ୍ଲୀ(ସଂକେତ ଟିଭି): ବିଧାନସଭା ନିର୍ବାଚନ ମଧ୍ୟରେ କେନ୍ଦ୍ର ସରକାର ପଶ୍ଚିମବଙ୍ଗ ପୋଲିସ ମହାନିର୍ଦ୍ଦେଶକ (ଡିଜିପି) ତଥା ପୋଲିସ ମହାନିରୀକ୍ଷକ (ଆଇଜିପି) ସିଦ୍ଧ ନାଥ ଗୁପ୍ତାଙ୍କ କାର୍ଯ୍ୟକାଳ ବୃଦ୍ଧି କରିଛନ୍ତି। ଗୁପ୍ତାଙ୍କ କାର୍ଯ୍ୟକାଳ ତାଙ୍କ ନିର୍ଦ୍ଧାରିତ ସେବା ନିବୃତ୍ତି ପରେ ୬ ମାସ ନିମନ୍ତେ ବଢ଼ାଇବାକୁ ନିଷ୍ପତ୍ତି ହୋଇଛି। ଏହି ସୂଚନା ସୋମବାର ଜାରି ଏକ ନିର୍ଦ୍ଦେଶରେ ଦିଆଯାଇଛି।

ଆଦେଶରେ କୁହାଯାଇଛି ଯେ ମନ୍ତ୍ରୀମଣ୍ଡଳ ନିଯୁକ୍ତି କମିଟି ଏ ନେଇ ଗୃହମନ୍ତ୍ରାଳୟର ପ୍ରସ୍ତାବକୁ ମଞ୍ଜୁର କରିଛନ୍ତି। ଏଥିରେ ୧୯୮୨ ବ୍ୟାଚ୍ ପଶ୍ଚିମବଙ୍ଗ କ୍ୟାଡର ଆଇପିଏସ୍ ଅଫିସରଙ୍କ ସେବା ଅବଧିକୁ ୩୦ ଏପ୍ରିଲ ୨୦୨୬ ବାଦେ ୬ ମାସ ବଢ଼ାଇବାକୁ ପ୍ରସ୍ତାବ ଦିଆଯାଇଥିଲା। ଏହି ସମ୍ପ୍ରସାରଣ ସାର୍ବଜନିକ ହିତ ଉଦ୍ଦେଶ୍ୟରେ ଏଆଇଏସ ଡିସିଆରବି ନିୟମ ୧୯୫୮ର ନିୟମ ୧୬(୧)ରେ ରିହାତି ଦିଆଯାଇ କରାଯାଇଛି।

ଭାରତୀୟ ନିର୍ବାଚନ ଆୟୋଗ (ଇସିଆଇ) ମାର୍ଚ୍ଚ ୧୬ ତାରିଖରେ ସିଦ୍ଧ ନାଥ ଗୁପ୍ତାଙ୍କୁ ପଶ୍ଚିମବଙ୍ଗ ପୋଲିସ ମହାନିର୍ଦ୍ଦେଶକ ଓ ମହାନିରୀକ୍ଷକ ନିଯୁକ୍ତ କରିଥିଲେ। ଏହି ନିଯୁକ୍ତି ପଶ୍ଚିମବଙ୍ଗ ଡିଜିପି ପିୟୁଷ ପାଣ୍ଡେଙ୍କୁ ପଦରୁ ହଟାଇବାର ଦିନକ ପରେ କରାଯାଇଥିଲା। ଆୟୋଗ କହିଥିଲେ ଯେ ଅଧିକାରୀମାନଙ୍କୁ ହଟାଇବାର ନିଷ୍ପତ୍ତି ରାଜ୍ୟରେ ନିର୍ବାଚନ ପ୍ରସ୍ତୁତି ସମୀକ୍ଷା ପରେ ନିଆଯାଇଥିଲା।

ବିଧାନସଭା ନିର୍ବାଚନର ପ୍ରଥମ ପର୍ଯ୍ୟାୟ ଏପ୍ରିଲ ୨୩ ତାରିଖରେ ଶେଷ ହୋଇଛି। ଦ୍ଵିତୀୟ ତଥା ଚୂଡ଼ାନ୍ତ ପର୍ଯ୍ୟାୟ ମତଦାନ ଏପ୍ରିଲ ୨୯ ତାରିଖରେ ହେବ। ଏଥିପାଇଁ ଆଜି ଶେଷ ପର୍ଯ୍ୟାୟ ନିର୍ବାଚନ ନିମନ୍ତେ ପ୍ରଚାର ସମାପ୍ତ ହୋଇଛି। ଭୋଟ ଗଣନା ମେ ୪ ତାରିଖରେ ହେବ।