ବିପୁଳ ପରିମାଣର ମାଓ ଅସ୍ତ୍ରଶସ୍ତ୍ର ଓ ଗୁଳିବାରୁଦ ଜବତ
ଭୁବନେଶ୍ୱର (ସଂକେତ ଟିଭି): ମାଲକାନଗିରି ଜିଲ୍ଲା କାଲିମେଳା ଥାନା ଅନ୍ତର୍ଗତ ଗୁଣ୍ଠାବେଡା ଜଙ୍ଗଲରେ ଚାଲିଥିବା କୁମ୍ବିଂ ଅପରେସନ୍ ବେଳେ ସୁରକ୍ଷା ବାହିନୀକୁ ଏକ ବଡ଼ ସଫଳତା ମିଳିଛି। ଡିଭିଏଫ (ଡିସ୍ଟ୍ରିକ୍ଟ ଭଲଣ୍ଟିୟର ଫୋର୍ସ) ଯବାନମାନେ ଜଙ୍ଗଲ ଭିତରେ ମାଟି ତଳେ ପୋତି ରଖାଯାଇଥିବା ଏକ ମାଓବାଦୀ ଡମ୍ପକୁ ଚିହ୍ନଟ କରିବାରେ ସଫଳ ହୋଇଛନ୍ତି।
ଏହି ଡମ୍ପରୁ ବିପୁଳ ପରିମାଣର ଅସ୍ତ୍ରଶସ୍ତ୍ର ଓ ଗୁଳିବାରୁଦ ଜବତ କରାଯାଇଛି। ଜବତ ସାମଗ୍ରୀ ମଧ୍ୟରେ ଗୋଟିଏ ଆମେରିକା ନିର୍ମିତ ପିସ୍ତଲ, ଦୁଇଟି ଏସ୍ଏଲ୍ଆର୍ (ସେଲ୍ଫ-ଲୋଡିଂ ରାଇଫଲ୍), ଦୁଇଟି ରିଭଲଭର, ଦୁଇଟି ଆଇଇଡି (ଇମ୍ପ୍ରୋଭାଇଜ୍ଡ ଏକ୍ସପ୍ଲୋସିଭ୍ ଡିଭାଇସ୍), ଚାରିଟି ୟୁବିଜିଏଲ୍ (ୟୁଣ୍ଡର ବ୍ୟାରେଲ ଗ୍ରେନେଡ୍ ଲଞ୍ଚର) ଏବଂ ୱାକି-ଟକି ସେଟ୍ ସହିତ ଅନ୍ୟାନ୍ୟ ମାଓବାଦୀ ସାମଗ୍ରୀ ରହିଛି।
ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ, ମାଓବାଦୀମାନେ ଭବିଷ୍ୟତରେ କୌଣସି ବଡ଼ ଧରଣର ହିଂସାତ୍ମକ ଘଟଣା ଘଟାଇବା ପାଇଁ ଏହି ସବୁ ଅସ୍ତ୍ରଶସ୍ତ୍ର ଓ ବିସ୍ଫୋରକ ସାମଗ୍ରୀ ଜଙ୍ଗଲରେ ଲୁଚାଇ ରଖିଥିଲେ। ସୁରକ୍ଷା ଅଧିକାରୀମାନେ କହିଛନ୍ତି ଯେ, ଠିକ୍ ସମୟରେ ଏହି ଡମ୍ପ ଜବତ ହୋଇଥିବାରୁ ମାଓବାଦୀଙ୍କ ଏକ ବଡ଼ ଯୋଜନା ବିଫଳ ହୋଇଯାଇଛି। ଏହି ସଫଳତା ପାଇଁ ଡିଭିଏଫ ଯବାନମାନଙ୍କୁ ପ୍ରଶଂସା କରାଯାଇଛି ଏବଂ ଅଞ୍ଚଳରେ କୁମ୍ବିଂ ଅପରେସନ୍ ଜାରି ରହିଛି।
