ମନ୍ତ୍ରୀ-ମୁଖ୍ୟମନ୍ତ୍ରୀ ବନ୍ଦ କରନ୍ତୁ ବନ୍ୟା ପର୍ଯ୍ୟଟନ : ବିଜେଡି ନେତା ଅରୁଣ ସାହୁ

ଭୁବନେଶ୍ୱର (ସଂକେତ ଟିଭି): ଭଦ୍ରକ ଜିଲ୍ଲାର ବନ୍ୟା ପ୍ରଭାବିତ ଅଞ୍ଚଳ ବୁଲି ବିଜେଡି ନେତା ଅରୁଣ ସାହୁ ସ୍ଥିତି ପରଖିଛନ୍ତି। ଏହି ପରିଦର୍ଶନ ସମୟରେ ସେ ସ୍ଥାନୀୟ ଲୋକଙ୍କ ଦୁଃଖ-କଷ୍ଟ ନିକଟରୁ ଦେଖିବା ସହ ସରକାରଙ୍କ କାର୍ଯ୍ୟଶୈଳୀ ଉପରେ ତୀକ୍ଷ୍ଣ ଟିପ୍ପଣୀ କରିଛନ୍ତି।

ଶ୍ରୀ ସାହୁ କହିଛନ୍ତି ଯେ, ଭଦ୍ରକରେ ବନ୍ୟା ସ୍ଥିତି ଅତ୍ୟନ୍ତ ଗମ୍ଭୀର ରହିଛି। ଅତିବୃଷ୍ଟି ଯୋଗୁଁ ଜିଲ୍ଲାର ବ୍ୟାପକ ଚାଷଜମି ଜଳମଗ୍ନ ହୋଇଯାଇଛି। ଫଳରେ ଚାଷୀଙ୍କ ଧାନ ଫସଲ ସମ୍ପୂର୍ଣ୍ଣ ନଷ୍ଟ ହୋଇଯାଇଥିବା ବେଳେ ପନିପରିବା ଚାଷ ମଧ୍ୟ ଉଜୁଡ଼ି ଯାଇଛି। ଏହି କ୍ଷତି ଯୋଗୁଁ ଅନେକ କୃଷକ ଏବଂ ଦିନମଜୁରିଆ ଶ୍ରମିକ ନିଜର ଜୀବିକା ହରାଇ ଅତ୍ୟନ୍ତ ଅସୁବିଧାର ସମ୍ମୁଖୀନ ହୋଇଛନ୍ତି।

ଏଭଳି ସଙ୍କଟମୟ ସମୟରେ ସରକାର ବନ୍ୟା ପର୍ଯ୍ୟଟନ (ଫ୍ଲଡ୍ ଟୁରିଜିମ୍) କରିବା ବଦଳରେ ବନ୍ୟା ପ୍ରଭାବିତ ଲୋକଙ୍କ ପ୍ରକୃତ ସମସ୍ୟା ଉପରେ ଧ୍ୟାନ ଦେବା ଉଚିତ୍ ବୋଲି ଅରୁଣ ସାହୁ ଗୁରୁତ୍ୱାରୋପ କରିଛନ୍ତି। ଚାଷୀଙ୍କ କ୍ଷତି କିପରି ପୂରଣ ହେବ, ସେନେଇ ତୁରନ୍ତ ପଦକ୍ଷେପ ନେବାକୁ ସେ ସରକାରଙ୍କୁ ପରାମର୍ଶ ଦେଇଛନ୍ତି।

ଏଥିସହିତ ଶ୍ରୀ ସାହୁ ୫ଟି ପ୍ରମୁଖ ଦାବି ରଖିଛନ୍ତି:

(୧) ବନ୍ୟାରେ ନଷ୍ଟ ହୋଇଥିବା ଚାଷୀଙ୍କ ଋଣ ମାଫ କରାଯାଉ।

(୨) ପ୍ରତ୍ୟେକ ପ୍ରଭାବିତ ପରିବାରକୁ ପର୍ଯ୍ୟାପ୍ତ ଆର୍ଥିକ ସହାୟତା ଯୋଗାଇ ଦିଆଯାଉ।

(୩) ବନ୍ୟା ପରେ ନିତ୍ୟବ୍ୟବହାର୍ଯ୍ୟ ଦ୍ରବ୍ୟର ଦର ବୃଦ୍ଧିକୁ ତୁରନ୍ତ ନିୟନ୍ତ୍ରଣ କରାଯାଉ।

(୪) ଫସଲ ନଷ୍ଟ ହୋଇଥିବା କୃଷକମାନଙ୍କୁ ବିକଳ୍ପ ଜୀବିକା ଯୋଗାଣ ପାଇଁ ଯୋଜନା ପ୍ରସ୍ତୁତ କରାଯାଉ।

(୫) ବନ୍ୟା ପରବର୍ତ୍ତୀ ପୁନରୁଦ୍ଧାର କାର୍ଯ୍ୟ ଦ୍ରୁତ ଗତିରେ କରାଯାଉ।

ଶେଷରେ ସେ କହିଛନ୍ତି ଯେ, ବନ୍ୟାରେ ଚାଷ ନଷ୍ଟ ହୋଇଥିବାରୁ ଲୋକଙ୍କ ପାଖରେ ଜୀବିକାର କୌଣସି ବିକଳ୍ପ ନାହିଁ। ତେଣୁ ସରକାର ତୁରନ୍ତ ସହାୟତା ଓ କ୍ଷତିପୂରଣ ପ୍ରଦାନ କରି ସାଧାରଣ ଲୋକଙ୍କ ଦୁର୍ଦ୍ଦଶା ଦୂର କରନ୍ତୁ ବୋଲି ସେ ଜୋରଦାର୍ ଦାବି କରିଛନ୍ତି।