ଜେପିଏସସି ପରୀକ୍ଷା ଓ ନିଯୁକ୍ତି ବାତିଲ୍ ଉପରେ ରୋକ୍ ଲଗାଇଲେ ଝାଡ଼ଖଣ୍ଡ ହାଇକୋର୍ଟ

ରାଞ୍ଚି(ସଂକେତ ଟିଭି): ଝାଡ଼ଖଣ୍ଡ ଲୋକସେବା ଆୟୋଗ (JPSC) ଦ୍ୱାରା ଆୟୋଜିତ ୨୨ଟି ନିଯୁକ୍ତି ପରୀକ୍ଷା ଓ ଏହା ଆଧାରରେ ହୋଇଥିବା ନିଯୁକ୍ତିକୁ ବାତିଲ୍ କରିବାକୁ ସରକାର ଜାରି କରିଥିବା ଆଦେଶ ଉପରେ ଝାଡ଼ଖଣ୍ଡ ହାଇକୋର୍ଟ ଗୁରୁବାର ରୋକ୍ ଲଗାଇଛନ୍ତି। ଏହି ଆଦେଶ ବିରୋଧରେ ଦାଖଲ ହୋଇଥିବା ଏକାଧିକ ଯାଚିକା ଉପରେ ଶୁଣାଣି କରି କୋର୍ଟ ଯାଚିକାକାରୀମାନଙ୍କୁ ଆଶ୍ୱସ୍ତି ପ୍ରଦାନ କରିଛନ୍ତି।

ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ନେତୃତ୍ୱାଧୀନ ଝାଡ଼ଖଣ୍ଡ ସରକାର ଗତ ଅଗଷ୍ଟ ୧୮ ତାରିଖରେ ଏକ ଅଧିସୂଚନା ଜାରି କରି JPSC ଏବଂ ଏକ ବାହ୍ୟ ଏଜେନ୍ସି ଦ୍ୱାରା ଆୟୋଜିତ ୨୨ଟି ନିଯୁକ୍ତି ପରୀକ୍ଷାକୁ ବାତିଲ୍ କରିଥିଲେ। ସେହିପରି ଆଉ ୨୩ଟି ପରୀକ୍ଷାରେ କୌଣସି ଅନିୟମିତତା ହୋଇଛି କି ନାହିଁ, ତାହାର ଯାଞ୍ଚ ପାଇଁ ମଧ୍ୟ ନିର୍ଦ୍ଦେଶ ଦିଆଯାଇଥିଲା।

ହାଇକୋର୍ଟରେ ଯାଚିକା ଦାଖଲ କରି ଅଭ୍ୟର୍ଥୀମାନେ ଯୁକ୍ତି କରିଛନ୍ତି ଯେ, ସରକାର ସେମାନଙ୍କ ପକ୍ଷ ଶୁଣିବା ପୂର୍ବରୁ ଏକତରଫା ଭାବେ ପରୀକ୍ଷା ଓ ନିଯୁକ୍ତିକୁ ବାତିଲ୍ କରିଛନ୍ତି। ଏଥିରେ ଅନେକ ଅଭ୍ୟର୍ଥୀ ଚୟନ ପରେ ସରକାରୀ ଚାକିରିରେ ଯୋଗ ଦେଇସାରିଛନ୍ତି ବୋଲି ସେମାନେ ଉଲ୍ଲେଖ କରିଛନ୍ତି।

ଅଭ୍ୟର୍ଥୀମାନଙ୍କ ଅନୁସାରେ, ଯଦି ଯାଞ୍ଚ ସମୟରେ କୌଣସି ଅଭ୍ୟର୍ଥୀଙ୍କ ଭୂମିକା ସନ୍ଦେହଜନକ ବୋଲି ପ୍ରମାଣିତ ହୁଏ, ତେବେ ତାଙ୍କ ବିରୋଧରେ ନିୟମ ଅନୁସାରେ କାର୍ଯ୍ୟାନୁଷ୍ଠାନ ନିଆଯାଉ। କିନ୍ତୁ ଯାଞ୍ଚ କିମ୍ବା ଶୁଣାଣି ନକରି ସମସ୍ତ ସଫଳ ଅଭ୍ୟର୍ଥୀଙ୍କ ନିଯୁକ୍ତି ବାତିଲ୍ କରିବା ଠିକ୍ ନୁହେଁ ବୋଲି ସେମାନେ ଦାବି କରିଛନ୍ତି।

ସମସ୍ତ ଅଭ୍ୟର୍ଥୀ ନିର୍ଦ୍ଧାରିତ ପ୍ରକ୍ରିୟାରେ ପରୀକ୍ଷା ଦେଇ, ମେରିଟ୍ ତାଲିକାରେ ସ୍ଥାନ ପାଇ ଏବଂ ନିୟମ ଅନୁଯାୟୀ ନିଯୁକ୍ତି ପାଇଥିଲେ। ତେଣୁ କିଛି ଅନିୟମିତତା ପାଇଁ ସମସ୍ତଙ୍କୁ ଦାୟୀ କରିବା ଉଚିତ୍ ନୁହେଁ ବୋଲି ଯାଚିକାକାରୀମାନେ କୋର୍ଟରେ ଯୁକ୍ତି ଦେଇଛନ୍ତି। ଶୁଣାଣି ପରେ କୋର୍ଟ ସରକାରଙ୍କ ନିଷ୍ପତ୍ତି ଉପରେ ରୋକ୍ ଲଗାଇ ଯାଚିକାକାରୀମାନଙ୍କୁ ଆଶ୍ୱସ୍ତି ଦେଇଛନ୍ତି।