୧୧୩୭ ରୋଗୀଙ୍କ ପରୀକ୍ଷାରେ ସଫଳ ହେଲା ମଡେର୍ଣ୍ଣା କ୍ୟାନସର ଟିକା

ନୂଆଦିଲ୍ଲୀ(ସଂକେତ ଟିଭି): କ୍ୟାନସର ରୋଗର ଚିକିତ୍ସା କ୍ଷେତ୍ରରେ ଏକ ଐତିହାସିକ ସଫଳତା ଆସିଛି। ମଡେର୍ଣ୍ଣା ଏବଂ ମର୍କ କମ୍ପାନୀଙ୍କ ମେସେଞ୍ଜର mRNA ଟେକ୍ନୋଲୋଜିରେ ନିର୍ମିତ କ୍ୟାନସର ଟିକା ‘ଇନଟିସମେରାନ୍’ ତୃତୀୟ ପର୍ଯ୍ୟାୟ (ଫେଜ୍-୩) କ୍ଲିନିକାଲ ପରୀକ୍ଷାରେ ସଫଳତା ହାସଲ କରିଛି। ଏହି ବିରାଟ ସଫଳତା ଦ୍ୱାରା ବିଶ୍ୱର ପ୍ରଥମ ବ୍ୟକ୍ତିଗତ mRNA କ୍ୟାନସର ଟିକା ସାଧାରଣ ଲୋକଙ୍କ ବ୍ୟବହାର ପାଇଁ ବହୁତ ନିକଟତର ହୋଇଯାଇଛି।

ସାଧାରଣ ଚିକିତ୍ସା ପଦ୍ଧତିରେ ସମସ୍ତଙ୍କୁ ଗୋଟିଏ ପ୍ରକାର ଔଷଧ ଦିଆଯାଉଥିବା ବେଳେ, ଏହି ନୂଆ ଟିକା ରୋଗୀର ଶରୀର ହିସାବରେ ସ୍ୱତନ୍ତ୍ର ଭାବରେ ପ୍ରସ୍ତୁତ କରାଯାଏ। ଏହା ରୋଗୀର ରୋଗ ପ୍ରତିରୋଧକ ଶକ୍ତିକୁ ଚିହ୍ନଟ କରି ତା’ର ଆଧାରରେ ଔଷଧ ତିଆରି କରାଯାଏ, ଯାହା ଚିକିତ୍ସା କ୍ଷେତ୍ରରେ ଏକ ଯୁଗାନ୍ତକାରୀ ପରିବର୍ତ୍ତନ।

ଏହି ବଡ଼ ବିଶ୍ୱସ୍ତରୀୟ ପରୀକ୍ଷାରେ ୧,୧୩୭ ଜଣ ଉଚ୍ଚ-ଆଶଙ୍କା ଥିବା ରୋଗୀ ସାମିଲ ହୋଇଥିଲେ, ଯେଉଁମାନଙ୍କର ସାଙ୍ଘାତିକ ଚର୍ମ କ୍ୟାନସର (ମେଲାନୋମା) ଅପରେସନ ଦ୍ୱାରା ବାହାର କରାଯାଇଥିଲା। ରୋଗୀଙ୍କୁ ଦୁଇଟି ଗ୍ରୁପରେ ବିଭକ୍ତ କରାଯାଇଥିଲା। ପ୍ରଥମ ଗ୍ରୁପ୍କୁ କେବଳ ସାଧାରଣ ଇମ୍ୟୁନୋଥେରାପି ଔଷଧ ‘କିଟ୍ରୁଡା’ ଦିଆଯାଇଥିବା ବେଳେ, ଦ୍ଵିତୀୟ ଗ୍ରୁପ୍କୁ କିଟ୍ରୁଡା ସହିତ ମଡର୍ଣ୍ଣାର ଏହି ସ୍ୱତନ୍ତ୍ର କ୍ୟାନସର ଟିକାର ୯ଟି ଡୋଜ୍ ପର୍ଯ୍ୟନ୍ତ ଦିଆଯାଇଥିଲା।

ଏହି ଦୁଇଟି ଔଷଧର ମିଶ୍ରଣ ଯୋଗୁଁ ରୋଗୀଙ୍କ ଶରୀରରେ କ୍ୟାନସର ଫେରିବାର ସମୟ ସୀମା ଯଥେଷ୍ଟ ବୃଦ୍ଧି ପାଇଥିଲା। ଅର୍ଥାତ୍, କ୍ୟାନସର ପୁନର୍ବାର ଫେରିବାର ପ୍ରକ୍ରିୟା ବହୁତ କମିଯାଇଥିଲା କିମ୍ବା ପ୍ରାୟ ବନ୍ଦ ହୋଇଯାଇଥିଲା। ଏହି ଟିକା ଶରୀରର ଅନ୍ୟ ଅଙ୍ଗକୁ କ୍ୟାନସର ବ୍ୟାପିବାକୁ ମଧ୍ୟ ରୋକିବାରେ ସଫଳ ହୋଇଥିଲା।

ଏହା ଏକ ଚିକିତ୍ସା ଟିକା, ଯାହା ରୋଗ ଭଲ କରିବା ପାଇଁ ବ୍ୟବହୃତ ହୁଏ, କିନ୍ତୁ ଏହା କ୍ୟାନସର ନ ହେବା ପାଇଁ ଦିଆଯାଉଥିବା ପ୍ରତିଷେଧକ ଟିକା ନୁହେଁ। ଏହା ଶରୀରର ରୋଗ ପ୍ରତିରୋଧକ ଶକ୍ତି ପାଇଁ ଏକ ସ୍ୱତନ୍ତ୍ର “ୱାଣ୍ଟେଡ୍ ପୋଷ୍ଟର” ଭଳି କାମ କରେ। ଟିକା ଦେବା ପରେ, ଏହା ରୋଗୀର ରୋଗ ପ୍ରତିରୋଧକ କୋଷଗୁଡ଼ିକୁ ଶରୀରରେ ଲୁଚି ରହିଥିବା ଅତି ସୂକ୍ଷ୍ମ କ୍ୟାନସର କୋଷଗୁଡ଼ିକୁ ଖୋଜି ବାହାର କରି ସେଗୁଡ଼ିକୁ ନଷ୍ଟ କରିଥାଏ।

ଚିକିତ୍ସା ବିଜ୍ଞାନୀମାନେ ଏହାକୁ କ୍ୟାନସର ଚିକିତ୍ସାରେ ନୂଆ ଯୁଗ ବୋଲି କହୁଛନ୍ତି। ଏହି ବଡ଼ ବୈଜ୍ଞାନିକ ସଫଳତା ପରେ ମଡେର୍ଣ୍ଣା କମ୍ପାନୀର ସେୟାର ମୂଲ୍ୟ ଗୋଟିଏ ଦିନରେ ୯୦% ରୁ ଅଧିକ ବୃଦ୍ଧି ପାଇଛି। ଚର୍ମ କ୍ୟାନସରରେ ଏହା ଭଲ କାମ କରିଥିବାରୁ, ମଡେର୍ଣ୍ଣା ଏବଂ ମର୍କ କମ୍ପାନୀ ଏବେ ଫୁସଫୁସ କ୍ୟାନସର, ବ୍ଲାଡର କ୍ୟାନସର ଏବଂ କିଡନୀ କ୍ୟାନସର ପାଇଁ ମଧ୍ୟ ଏହାର ପରୀକ୍ଷା ଆରମ୍ଭ କରିଦେଇଛନ୍ତି।