ଖେଳ ପଡ଼ିଆରେ ଅପରେସନ ସିନ୍ଦୂର, ଭାରତ ଜିତିଲା : ମୋଦୀ
ନୂଆଦିଲ୍ଲୀ (ସଂକେତ ଟିଭି): ଏସିଆ କପ୍ ୨୦୨୫ ଫାଇନାଲରେ ପାରମ୍ପରିକ ପ୍ରତିଦ୍ୱନ୍ଦ୍ୱୀ ପାକିସ୍ତାନକୁ ୫ ୱିକେଟରେ ପରାସ୍ତ କରି ଟ୍ରଫି ହାତେଇ ନେଇଛି ଟିମ୍ ଇଣ୍ଡିଆ । ଦୁବାଇ ଇଣ୍ଟରନ୍ୟାସନାଲ କ୍ରିକେଟ ଷ୍ଟାଡିୟମରେ ଅନୁଷ୍ଠିତ ରୋମାଞ୍ଚକର ମ୍ୟାଚରେ ଭାରତ ଏହି ବିଜୟ ସାଧନ କରିଛି । ଦୁଇ ସପ୍ତାହ ମଧ୍ୟରେ ଏହା ପାକିସ୍ତାନ ବିରୁଦ୍ଧରେ ଭାରତର ଲଗାତାର ତୃତୀୟ ବିଜୟ ।
ବିଜୟ ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସୋସିଆଲ ମିଡିଆ ପ୍ଲାଟଫର୍ମ X (ପୂର୍ବର ଟ୍ୱିଟର)ରେ ଟିମ୍ ଇଣ୍ଡିଆକୁ ଅଭିନନ୍ଦନ ଜଣାଇଛନ୍ତି । ତାଙ୍କ ପୋଷ୍ଟରେ ଲେଖାଥିଲା, “ଖେଳ ପଡ଼ିଆରେ ଅପରେସନ ସିନ୍ଦୂର । ଫଳାଫଳ ସମାନ – ଭାରତ ଜିତିଲା ! ଖେଳାଳିମାନଙ୍କୁ ଅଭିନନ୍ଦନ ।” ପ୍ରଧାନମନ୍ତ୍ରୀଙ୍କ ଏହି ଟିପ୍ପଣୀକୁ ପାକିସ୍ତାନ କ୍ରିକେଟ ବୋର୍ଡ (PCB)ର ଅଧ୍ୟକ୍ଷ ମୋହସିନ ନକଭି ନେଇ ଆପତ୍ତି ଜଣାଇ ଜବାବ ଦେଇଛନ୍ତି । ନକଭି ନିଜ ପୋଷ୍ଟରେ ଲେଖିଛନ୍ତି, “ଯଦି ଯୁଦ୍ଧ ଆପଣଙ୍କ ଗର୍ବର ମାପକାଠି, ତେବେ ଇତିହାସ ପାକିସ୍ତାନ ହାତରୁ ଆପଣଙ୍କ ଅପମାନଜନକ ପରାଜୟର ଉଲ୍ଲେଖ କରି ସାରିଛି… ଯୁଦ୍ଧକୁ ଖେଳ ସହ ଘୋଷାଡ଼ିବା ହତାସାପଣକୁ ଉଜାଗର କରୁଛି ।”
ମ୍ୟାଚ ପରେ ପୁରସ୍କାର ବିତରଣୀ ଉତ୍ସବରେ ବଡ଼ ବିବାଦ ଦେଖାଦେଇଥିଲା । ପାକିସ୍ତାନର ଗୃହମନ୍ତ୍ରୀ ଏବଂ ପିସିବି ଅଧ୍ୟକ୍ଷ ମୋହସିନ ନକଭିଙ୍କଠାରୁ ଟ୍ରଫି ଗ୍ରହଣ କରିବାକୁ ଟିମ୍ ଇଣ୍ଡିଆ ମନା କରିଦେଇଥିଲେ । ଏହି ନିଷ୍ପତ୍ତି ପଛରେ ଦେଶ ବିରୋଧୀ ମନୋଭାବ ଥିବା ଆଭିମୁଖ୍ୟ ଥିବା ବ୍ୟକ୍ତିଙ୍କଠାରୁ ପୁରସ୍କାର ନେବାକୁ ଇଚ୍ଛା ନଥିବା କଥା ଭାରତୀୟ ପକ୍ଷ ତରଫରୁ କୁହାଯାଇଛି । ଏହି ପରିସ୍ଥିତିରେ ନକଭି ଟ୍ରଫି ନେଇ ମଞ୍ଚ ଛାଡ଼ି ଚାଲିଯାଇଥିଲେ, ଫଳରେ ଚାମ୍ପିଅନ୍ ଭାରତୀୟ ଦଳକୁ ସେହି ସମୟରେ ଟ୍ରଫି ପ୍ରଦାନ କରାଯାଇ ନଥିଲା ।
ବିସିସିଆଇ ସଚିବ ଦେବଜିତ ସାଇକିଆ ଏହି ଘଟଣାକୁ “ଅତ୍ୟନ୍ତ ଦୁର୍ଭାଗ୍ୟଜନକ” ବୋଲି କହିଛନ୍ତି । ତାଙ୍କ ମତରେ, ଟ୍ରଫି ନ ନେବାର ନିଷ୍ପତ୍ତି ଥିଲା, କିନ୍ତୁ ଏସିଆ କ୍ରିକେଟ ପରିଷଦର ଅଧ୍ୟକ୍ଷଙ୍କ ପକ୍ଷରେ ଟ୍ରଫି ନେଇ ପଳାୟନ କରିବା ଉଚିତ ନଥିଲା । ସାଇକିଆ ଜଣାଇଛନ୍ତି ଯେ, ନୂତନ ଦିଲ୍ଲୀରେ ଅଗାମୀ ICC ସମ୍ମିଳନୀରେ ଏହି ଘଟଣା ବିରୁଦ୍ଧରେ ଗମ୍ଭୀର ପ୍ରତିବାଦ କରାଯିବ । ଏହି ବିବାଦିତ ପରିସ୍ଥିତିରେ, ଟ୍ରଫି ବିନା ହେଲେବି ଭାରତୀୟ ଦଳ ନିଜର ବିଜୟ ଉତ୍ସବ ପାଳନ କରିଛି ।
#OperationSindoor on the games field.
— Narendra Modi (@narendramodi) September 28, 2025
Outcome is the same – India wins!
Congrats to our cricketers.
