ପୁଣି ଇସଲାମାବାଦରେ ଆରମ୍ଭ ହେବ ଆମେରିକା-ଇରାନ ଆଲୋଚନା

ନୂଆଦିଲ୍ଲୀ (ସଂକେତ୍ ଟିଭି) ପୁଣି ଥରେ ଆରମ୍ଭ ହେବାକୁ ଯାଉଛି ଆମେରିକା ଏବଂ ଇରାନ ମଧ୍ୟରେ ଆଲୋଚନା। ଶାନ୍ତି ପ୍ରତିଷ୍ଠା ପାଇଁ ଇସଲାମାବାଦରେ ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହେବ। ବିଭିନ୍ନ ବିଶ୍ୱସ୍ତ ସୂତ୍ରରୁ ମିଳିଥିବା ସୂଚନା ଅନୁସାରେ, ଆମେରିକା ଓ ଇରାନର ପ୍ରତିନିଧି ଦଳ ଚଳିତ ସପ୍ତାହ ଶେଷ ସୁଦ୍ଧା ଇସଲାମାବାଦରେ ଏକାଠି ହେବେ। ଗତ କିଛି ସମୟ ଧରି ଦୁଇ ଦେଶ ମଧ୍ୟରେ ଲାଗି ରହିଥିବା ଅଶାନ୍ତି ଓ ଉତ୍ତେଜନାକୁ ପ୍ରଶମିତ କରିବା ପାଇଁ ଏହି ବୈଠକ ଅତ୍ୟନ୍ତ ଗୁରୁତ୍ୱପୂର୍ଣ୍ଣ।

ମୁଖ୍ୟତଃ ଦୁଇ ଦେଶ ମଧ୍ୟରେ ଥିବା ବିବାଦୀୟ ପ୍ରସଙ୍ଗଗୁଡ଼ିକର ସମାଧାନ କରିବା ଏବଂ ଏକ ଦୀର୍ଘକାଳୀନ ବ୍ୟାପକ ଚୁକ୍ତି ପାଇଁ ପଥ ପରିଷ୍କାର କରିବା ଆଲୋଚନାର ମୂଳ ଉଦ୍ଦେଶ୍ୟ। ବୈଠକକୁ ନେଇ ସବୁ ପ୍ରକାର ପ୍ରସ୍ତୁତି ଚାଲିଥିଲେ ମଧ୍ୟ, କେଉଁ କେଉଁ ଉଚ୍ଚପଦସ୍ଥ ଅଧିକାରୀ ଯୋଗଦେବେ, ସେନେଇ ଏପର୍ଯ୍ୟନ୍ତ କୌଣସି ସ୍ପଷ୍ଟ ସୂଚନା ମିଳିନାହିଁ। ତେବେ ଉଭୟ ପକ୍ଷ ନିଜ ନିଜର ଶୀର୍ଷ କୂଟନୀତିଜ୍ଞଙ୍କୁ ପଠାଇବା ନେଇ ଆଶା କରାଯାଉଛି। ଆଲୋଚନା କେତେ ଦିନ ଧରି ଚାଲିବ, ତାହା ମଧ୍ୟ ଏପର୍ଯ୍ୟନ୍ତ ଗୋପନ ରଖାଯାଇଛି।

ବିଶେଷଜ୍ଞଙ୍କ ମତରେ, ଯଦି ପ୍ରାଥମିକ ସ୍ତରରେ ବୁଝାମଣା ସଫଳ ହୁଏ, ତେବେ ଆଗାମୀ ଦିନରେ ଏକ ବଡ଼ ଧରଣର ଆନ୍ତର୍ଜାତୀୟ ଘୋଷଣା ହୋଇପାରେ। ଏହି ଆଲୋଚନା କେବଳ ଦୁଇ ଦେଶ ପାଇଁ ନୁହେଁ, ବରଂ ସାରା ବିଶ୍ୱର ଶାନ୍ତି ଓ ସ୍ଥିରତା ପାଇଁ ଶୁଭ ସଙ୍କେତ।

ଅନ୍ୟପଟେ, ଆମେରିକା ଓ ଇରାନ ମଧ୍ୟରେ ଚାଲିଥିବା ପରମାଣୁ ଆଲୋଚନା ଅଚଳାବସ୍ଥାରେ ପହଞ୍ଚିଛି। ମୁଖ୍ୟ ବିବାଦ ହେଉଛି ‘ୟୁରାନିୟମ ସମୃଦ୍ଧିକରଣ’, ଯାହା ପରମାଣୁ ବୋମା ତିଆରିରେ ବ୍ୟବହାର ହୁଏ। ଇରାନ କହିଛି ଯେ ସେ ଆଗାମୀ ୫ ବର୍ଷ ପାଇଁ ୟୁରାନିୟମ ସମୃଦ୍ଧିକରଣ କାମ ବନ୍ଦ ରଖିବ, କିନ୍ତୁ ନିଜ ପାଖରେ ଥିବା ୟୁରାନିୟମକୁ ଦେଶ ବାହାରକୁ ପଠାଇବ ନାହିଁ। ଆମେରିକା ଚାହୁଁଛି ଯେ ଇରାନ ଅତି କମରେ ୨୦ ବର୍ଷ ପର୍ଯ୍ୟନ୍ତ ଏହି କାମ ବନ୍ଦ ରଖୁ ଏବଂ ନିଜ ପାଖରେ ଥିବା ସମସ୍ତ ପରମାଣୁ ସାମଗ୍ରୀକୁ ଦେଶ ବାହାରକୁ ପଠାଇ ଦେଉ। ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନର ୫ ବର୍ଷିଆ ପ୍ରସ୍ତାବକୁ ପ୍ରତ୍ୟାଖ୍ୟାନ କରିଛନ୍ତି।