ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଆତଙ୍କବାଦୀ ବୋଲି କହିଲେ ଖଡ଼ଗେ

ନୂଆଦିଲ୍ଲୀ(ସଂକେତ ଟିଭି): କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେ ମଙ୍ଗଳବାର ଦିନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ‘ଆତଙ୍କବାଦୀ’ କହି ଏକ ନୂଆ ବିବାଦ ସୃଷ୍ଟି କରିଛନ୍ତି। ଚେନ୍ନାଇରେ ଏକ ସାମ୍ବାଦିକ ସମ୍ମିଳନୀରେ AIADMK ଏବଂ BJP ମେଣ୍ଟକୁ ସମାଲୋଚନା କରିବା ସମୟରେ ସେ ଏହି ମନ୍ତବ୍ୟ ଦେଇଛନ୍ତି।

ଖଡ଼ଗେ ପ୍ରଶ୍ନ କରିଛନ୍ତି ଯେ, ଅନ୍ନାଦୁରାଇଙ୍କ ଫଟୋ ଲଗାଉଥିବା AIADMK ନେତାମାନେ କିପରି ମୋଦୀଙ୍କ ସହ ମିଶିପାରିବେ? ସେ କହିଛନ୍ତି, “ସେ ଜଣେ ଆତଙ୍କବାଦୀ। ତାଙ୍କ ଦଳ ସମାନତା ଏବଂ ନ୍ୟାୟରେ ବିଶ୍ୱାସ କରେ ନାହିଁ।” AIADMK ନିଜର ପରିଚୟ ହରାଇ BJPର ନୀରବ ଦାସ ପାଲଟିଛି ବୋଲି ଅଭିଯୋଗ କରି ସେ ତାମିଲନାଡ଼ୁର ସ୍ୱାର୍ଥ ରକ୍ଷା ପାଇଁ ମୁଖ୍ୟମନ୍ତ୍ରୀ ଏମକେ ଷ୍ଟାଲିନଙ୍କ ଭଳି ଲଢୁଆ ନେତାଙ୍କ ଆବଶ୍ୟକତା ରହିଛି ବୋଲି ଦୋହରାଇଥିଲେ।

ବିବାଦ ବଢ଼ିବା ପରେ ଖଡ଼ଗେ ସ୍ପଷ୍ଟୀକରଣ ଦେଇ କହିଲେ ଯେ ସେ ମୋଦୀଙ୍କୁ ପ୍ରତ୍ୟକ୍ଷ ଭାବେ ‘ଆତଙ୍କବାଦୀ’ କହି ନାହାନ୍ତି, ବରଂ ସେ ସବୁବେଳେ ଲୋକ ଓ ରାଜନୈତିକ ଦଳଗୁଡ଼ିକୁ ‘ଭୟଭୀତ’ (ଟେରରାଇଜ୍) କରୁଛନ୍ତି। ସେ କହିଛନ୍ତି, “ମୋଦୀ ସର୍ବଦା ଧମକ ଦେଉଛନ୍ତି। ED, ଆୟକର ବିଭାଗ ଏବଂ CBI ତାଙ୍କ ହାତରେ ଅଛି, ଏବଂ ସେ ପରିସୀମନ (Delimitation)କୁ ମଧ୍ୟ ନିଜ ହାତକୁ ନେବାକୁ ଚାହୁଁଛନ୍ତି।”

ସେ ଆହୁରି ଅଭିଯୋଗ କରିଛନ୍ତି ଯେ, ୧୩୧ତମ ସଂଶୋଧନ ବିଲ୍ ସଂସଦରେ ପାରିତ ନହେବା ପରେ ପ୍ରଧାନମନ୍ତ୍ରୀ ଜାତିକୁ ସମ୍ବୋଧିତ କରି ନିର୍ବାଚନ ଆଚରଣ ବିଧି (MCC) ଉଲ୍ଲଂଘନ କରିଛନ୍ତି। ନିର୍ବାଚନ କମିଶନ BJPର ଏକ ଶାଖା ଭଳି କାମ କରୁଛନ୍ତି ବୋଲି ମଧ୍ୟ ସେ କହିଛନ୍ତି। ମହିଳା ସଂରକ୍ଷଣ ବିଲ୍ ପ୍ରସଙ୍ଗରେ ଖଡ଼ଗେ କହିଲେ ଯେ ୨୦୨୩ରେ କଂଗ୍ରେସ ଏହାକୁ ସମର୍ଥନ କରିଥିଲା, କିନ୍ତୁ ବର୍ତ୍ତମାନ ୫୪୩ ଆସନରେ ତୁରନ୍ତ ଲାଗୁ କରିବାକୁ ଦାବି କରୁଛି।

ଏହି ପ୍ରସଙ୍ଗରେ BJP ମୁଖପାତ୍ର ଶହଜାଦ୍ ପୁନାୱାଲା କଡ଼ା ପ୍ରତିକ୍ରିୟା ଦେଇଛନ୍ତି। ସୋସିଆଲ ମିଡିଆ ‘ଏକ୍ସ’ରେ ପୋଷ୍ଟ କରି ସେ କହିଛନ୍ତି ଯେ କଂଗ୍ରେସ ଏପର୍ଯ୍ୟନ୍ତ ପ୍ରଧାନମନ୍ତ୍ରୀଙ୍କୁ ୧୭୫ ଥର ଅପମାନିତ କରିସାରିଲାଣି। ଆତଙ୍କବାଦୀ ଓ ନକ୍ସଲଙ୍କୁ ନିର୍ଦ୍ଦୋଷ କହୁଥିବା କଂଗ୍ରେସ ପାଇଁ ‘ଚା’ବାଲା OBC’ ପ୍ରଧାନମନ୍ତ୍ରୀ ଆତଙ୍କବାଦୀ ବୋଲି ସେ କଟାକ୍ଷ କରିଛନ୍ତି।