ସିଇସି ନିଯୁକ୍ତି ପ୍ରକ୍ରିୟାରେ ସ୍ବାଧୀନତା ଜରୁରୀ, ପ୍ରଶ୍ନ ଉଠାଇଲେ ସୁପ୍ରିମକୋର୍ଟ

ନୂଆଦିଲ୍ଲୀ(ସଂକେତ ଟିଭି): ମୁଖ୍ୟ ନିର୍ବାଚନ କମିଶନର (ସିଇସି) ଏବଂ ଅନ୍ୟ ନିର୍ବାଚନ କମିଶନରମାନଙ୍କ ନିଯୁକ୍ତି ପାଇଁ ଏକ ସ୍ବାଧୀନ ଓ ନିରପେକ୍ଷ ପ୍ରକ୍ରିୟା ଅତ୍ୟନ୍ତ ଜରୁରୀ ବୋଲି ସୁପ୍ରିମକୋର୍ଟ କହିଛନ୍ତି। ନିର୍ବାଚନ କମିଶନ କେବଳ ସ୍ବାଧୀନ ଭାବେ କାର୍ଯ୍ୟ କରିବା ଉଚିତ ନୁହେଁ, ବରଂ ତାହାର ସ୍ବାଧୀନତା ଲୋକଲୋଚନରେ ମଧ୍ୟ ପ୍ରତିଫଳିତ ହେବା ଆବଶ୍ୟକ ବୋଲି କୋର୍ଟ ମତ ଦେଇଛନ୍ତି।

ଜଷ୍ଟିସ୍ ଦୀପଙ୍କର ଦତ୍ତ ଏବଂ ଜଷ୍ଟିସ୍ ସତୀଶ ଚନ୍ଦ୍ର ଶର୍ମାଙ୍କ ଖଣ୍ଡପୀଠ ସିଇସି ଓ ଇସିମାନଙ୍କ ନିଯୁକ୍ତି ନିମନ୍ତେ ପାର୍ଲାମେଣ୍ଟ ଆଇନ ପ୍ରଣୟନ କଲାବେଳେ ଚୟନ କମିଟିରେ ଭାରତର ପ୍ରଧାନ ବିଚାରପତି (ସିଜେଆଇ)ଙ୍କୁ ନ ନେବାକୁ କ’ଣ ପାଇଁ ନିଷ୍ପତ୍ତି ନିଆଗଲା ବୋଲି ପ୍ରଶ୍ନ କରିଛନ୍ତି। ସିବିଆଇ ନିର୍ଦ୍ଦେଶକ ଏବଂ ଲୋକପାଳ ନିଯୁକ୍ତି ପାଇଁ ଚୟନ କମିଟିରେ ସିଜେଆଇ ରହିଥିବାବେଳେ ନିର୍ବାଚନ କମିଶନରଙ୍କ ନିଯୁକ୍ତି କମିଟିରୁ ତାଙ୍କୁ କାହିଁକି ବାଦ୍ ଦିଆଗଲା ବୋଲି ଖଣ୍ଡପୀଠ ତୀବ୍ର ପ୍ରଶ୍ନୋତ୍ତର କରିଛନ୍ତି।

ଏହି ଗୁରୁତ୍ୱପୂର୍ଣ୍ଣ ମାମଲାକୁ ସାମ୍ବିଧାନିକ ପୀଠକୁ ପଠାଇବା ପାଇଁ ସରକାରଙ୍କ ପକ୍ଷରୁ କରାଯାଇଥିବା ନିବେଦନକୁ ଗ୍ରହଣ କରି ଖଣ୍ଡପୀଠ ଏହି ମାମଲାରେ ରାୟ ସଂରକ୍ଷିତ ରଖିଛନ୍ତି। ଏବେ ଏହି ମାମଲା ସୁପ୍ରିମକୋର୍ଟର ବୃହତ୍ତର ସାମ୍ବିଧାନିକ ବେଞ୍ଚ ଆଗରେ ଶୁଣାଣି ପାଇଁ ପଠାଯିବ।

ସୂଚନାଯୋଗ୍ୟ, ବର୍ତ୍ତମାନ ସିଇସି ଏବଂ ଇସି ନିଯୁକ୍ତି ପାଇଁ ଗଠିତ ୩ ଜଣିଆ ଚୟନ କମିଟିରେ ପ୍ରଧାନମନ୍ତ୍ରୀ, ଜଣେ କେନ୍ଦ୍ରମନ୍ତ୍ରୀ ଏବଂ ଲୋକସଭାର ବିରୋଧୀ ଦଳ ନେତା ରହିଛନ୍ତି। ଏହି ପ୍ରକ୍ରିୟାକୁ ନେଇ ସାମ୍ବିଧାନିକ ଚିନ୍ତା ପ୍ରକଟ କରାଯାଉଛି।

କେନ୍ଦ୍ର ସରକାର ତାଙ୍କ ପକ୍ଷରୁ ଯୁକ୍ତି କରି କହିଛନ୍ତି ଯେ, ବର୍ତ୍ତମାନର ନିଯୁକ୍ତି ପ୍ରକ୍ରିୟା ଉପଯୁକ୍ତ ଏବଂ ଏଥିରେ ପ୍ରଧାନମନ୍ତ୍ରୀଙ୍କ ଭୂମିକା ଉପରେ ସନ୍ଦେହ କରିବାର କୌଣସି କାରଣ ନାହିଁ। ସରକାର ଗଣତାନ୍ତ୍ରିକ ମୂଲ୍ୟବୋଧ ବିରୋଧରେ କାର୍ଯ୍ୟ କରିବେ ବୋଲି ସାମ୍ବିଧାନିକ ଅଦାଲତ ଧରିନେଇ ପାରିବେ ନାହିଁ ବୋଲି ସରକାର ମତ ଦେଇଛନ୍ତି।

ଚୟନ କମିଟି ଗଠନ ଉପରେ ପ୍ରଶ୍ନ ଉଠାଇବା ହେଉଛି ପାର୍ଲାମେଣ୍ଟର ଆଇନଗତ ଜ୍ଞାନ ଓ ନିର୍ବାଚିତ ଅନୁଷ୍ଠାନଗୁଡ଼ିକ ଉପରେ ନ୍ୟସ୍ତ ସାମ୍ବିଧାନିକ ଆସ୍ଥାକୁ ସନ୍ଦେହ କରିବା ସହ ସମାନ ବୋଲି ସରକାରୀ ପକ୍ଷ କହିଛନ୍ତି। ତେବେ ଏହି ଯୁକ୍ତିକୁ ନେଇ ସୁପ୍ରିମକୋର୍ଟ ତୀବ୍ର ପ୍ରଶ୍ନୋତ୍ତର କରିବା ସହ ସ୍ବାଧୀନ ନିଯୁକ୍ତି ପ୍ରକ୍ରିୟାର ଆବଶ୍ୟକତା ଉପରେ ଗୁରୁତ୍ୱାରୋପ କରିଛନ୍ତି।