ବହୁ ସଂଘର୍ଷ ପରେ ଖୋଲିଲା ବିବାଦୀୟ ହର୍ମୁଜ

ନୂଆଦିଲ୍ଲୀ(ସଂକେତ ଟିଭି): ବହୁ ସଂଘର୍ଷ ଓ ରକ୍ତପାତ ପରେ ବିବାଦୀୟ ହର୍ମୁଜ ପ୍ରଣାଳୀ ଖୋଲିଛି। ଏବେ ଏହି ପ୍ରଣାଳୀ ଦେଇ ସବୁ ଜାହାଜ ଯାତାୟତ କରିପାରିବେ। ଏନେଇ ଇରାନର ବୈଦେଶିକ ମନ୍ତ୍ରୀ ଆବ୍ବାସ ଆରାଘଚି ଘୋଷଣା କରିଛନ୍ତି। ତେବେ ଲେବାନନ ଏବଂ ଇସ୍ରାଏଲ ମଧ୍ୟରେ ଅସ୍ତ୍ରବିରତି ଅବଧି ଶେଷ ହେବା ଯାଏଁ ହର୍ମୁଜ ପ୍ରଣାଳୀ ଖୋଲା ରହିବ। ଫେବୃଆରୀ ୨୮ରେ ଆମେରିକା ଆକ୍ରମଣ କରିବା ପରେ ମାର୍ଚ୍ଚ ୬ରେ ହର୍ମୁଜକୁ ବନ୍ଦ କରି ଦେଇଥିଲା ଇରାନ।

ଏକ ପୋଷ୍ଟରେ ବୈଦେଶିକ ମନ୍ତ୍ରୀ ଆରାଘଚି କହିଛନ୍ତି, ‘ଯେପର୍ଯ୍ୟନ୍ତ ଅସ୍ଥାୟୀ ଯୁଦ୍ଧବିରତି ଜାରି ରହିବ, ସେପର୍ଯ୍ୟନ୍ତ ସମସ୍ତ ବାଣିଜ୍ୟିକ ଜାହାଜ ହର୍ମୁଜ୍ ପ୍ରଣାଳୀ ଦେଇ ମୁକ୍ତ ଭାବରେ ଯାତାୟତ କରିପାରିବେ। ସମସ୍ତ ଜାହାଜ ଇସଲାମିକ୍ ଗଣରାଜ୍ୟ ଇରାନର ବନ୍ଦର ଏବଂ ସାମୁଦ୍ରିକ ସଂଗଠନ ଦ୍ୱାରା ପୂର୍ବରୁ ଘୋଷଣା ହୋଇଥିବା ମାର୍ଗ ଦେଇ ଯାଇପାରିବେ।’

ହର୍ମୁଜ ଖୋଲିବାକୁ ଇରାନର ନିଷ୍ପତ୍ତି ପଛରେ ତିନୋଟି ପ୍ରମୁଖ କାରଣ ରହିଛି। ପ୍ରଥମତଃ, ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଦୁଇ ଦିନ ପୂର୍ବରୁ ହର୍ମୁଜ୍ ପ୍ରଣାଳୀରୁ ନାକାବନ୍ଦୀ ହଟାଇବେ ବୋଲି ଘୋଷଣା କରିଥିଲେ। ଏକ ସାକ୍ଷାତକାରରେ ଟ୍ରମ୍ପ କହିଥିଲେ ଯେ ଚୀନ୍ ସହିତ ଆଲୋଚନା ପରେ ଆମେରିକା ଅବରୋଧ ହଟାଇବ, ଏବଂ ଇରାନ୍ ଏବଂ ଚୀନ୍ ଉଭୟ ଏହି ପ୍ରସ୍ତାବରେ ରାଜି ହୋଇଛନ୍ତି। ଦ୍ବିତୀୟତଃ, ଯୁଦ୍ଧବିରତି ଅବଧି ବୃଦ୍ଧି କରିବା ପାଇଁ ଇରାନ ଉପରେ ହର୍ମୁଜ୍ ପ୍ରଣାଳୀ ଖୋଲିବାକୁ ଚାପ ପଡ଼ିଥିଲା। ଆମେରିକା ସ୍ପଷ୍ଟ କରିଥିଲା ଯେ ହର୍ମୁଜ୍ ନଖୋଲିଲେ ଯୁଦ୍ଧବିରତି ଆଲୋଚନା ଆଗକୁ ବଢ଼ିବ ନାହିଁ। ରଏଟର୍ସ ରିପୋର୍ଟ ଅନୁଯାୟୀ, ଇରାନ ଓ ଆମେରିକା ଯୁଦ୍ଧବିରତି ଅବଧି ବୃଦ୍ଧି ପାଇଁ ଏକ ଚୁକ୍ତିରେ ପହଞ୍ଚିବା ପରେ ହର୍ମୁଜ୍ ପ୍ରଣାଳୀକୁ ସମ୍ପୂର୍ଣ୍ଣ ଖୋଲି ଦିଆଯାଇଛି। ତୃତୀୟତଃ, ହର୍ମୁଜ୍ ଖୋଲିବା ପାଇଁ ଇରାନ ଉପରେ ଆନ୍ତର୍ଜାତିକ ଚାପ ବୃଦ୍ଧି ପାଇଛି। ପ୍ୟାରିସରେ ୪୦ଟି ଦେଶର ଏକ ବୈଠକ ହେବାର କାର୍ଯ୍ୟକ୍ରମ ରହିଛି, ଯେଉଁଥିରେ ଫ୍ରାନ୍ସ ଓ ବ୍ରିଟେନ ଭଳି ଦେଶର ନେତାମାନେ ଯୋଗଦେବେ। ଏକାଥରେ ଏତେ ଦେଶକୁ ନିଜ ଶତ୍ରୁ କରିବାକୁ ଇରାନ ଚାହିଁନାହିଁ।