ଭାରତ-ବାଂଲାଦେଶ ସୀମାରେ ତାରବାଡ଼ ନିର୍ମାଣ ପାଇଁ ଜମି ଦେଲେ ପଶ୍ଚିମବଙ୍ଗ ସରକାର

କୋଲକତା(ସଂକେତ ଟିଭି): ପଶ୍ଚିମବଙ୍ଗର ନୂତନ ମୁଖ୍ୟମନ୍ତ୍ରୀ ଭାବରେ ଶୁଭେନ୍ଦୁ ଅଧିକାରୀ ଦାୟିତ୍ୱ ଗ୍ରହଣ କରିବା ପରେ ପ୍ରଥମ କ୍ୟାବିନେଟ୍ ବୈଠକ ଅନୁଷ୍ଠିତ ହୋଇଛି। ଏହି ବୈଠକରେ ବହୁ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଗ୍ରହଣ କରାଯାଇଛି।

ଏହି ବୈଠକରେ ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀଙ୍କ ସହିତ ସମସ୍ତ ୫ (ପାଞ୍ଚ) ଜଣ କ୍ୟାବିନେଟ୍ ମନ୍ତ୍ରୀ ଯଥା: ଅଗ୍ନିମିତ୍ର ପାଉଲ୍, ଖୁଦିରାମ ଟୁଡୁ, ଅଶୋକ କୀର୍ତ୍ତନିଆ ଏବଂ ନିଶିତ ପରମାଣିକ ଉପସ୍ଥିତ ଥିଲେ। ବୈଠକ ପରେ ମୁଖ୍ୟମନ୍ତ୍ରୀ କହିଛନ୍ତି ଯେ ଶାସନ, ସୁରକ୍ଷା ଏବଂ ଡବଲ ଇଞ୍ଜିନ୍ ସରକାରଙ୍କ ରୋଡମ୍ୟାପ୍ ଏହି ସରକାରଙ୍କ ପ୍ରାଥମିକତା।

ଏହି ବୈଠକରେ ଦୀର୍ଘଦିନ ଧରି ଚାଲିଥିବା ବାଂଲାଦେଶ ସୀମା ବିବାଦର ସମାଧାନର ବାଟ ଦେଖାଇଛନ୍ତି ମୁଖ୍ୟମନ୍ତ୍ରୀ। ଭାରତ-ବାଂଲାଦେଶ ସୀମାରେ ତାରବାଡ଼ ନିର୍ମାଣ ପାଇଁ ଆବଶ୍ୟକୀୟ ଜମି ଯୋଗାଇବାକୁ ଘୋଷଣା କରିଛନ୍ତି। ଏଥିପାଇଁ ଆଗାମୀ ୪୫ (ପଞ୍ଚଚାଳିଶ) ଦିନ ଭିତରେ ଜମି ଯୋଗାଇ ଦିଆଯିବ ବୋଲି ଘୋଷଣା କରିଛନ୍ତି। ୪୫ ଦିନରେ ସମଗ୍ର ଅଞ୍ଚଳ ବିଏସ୍ଏଫ୍ (ସୀମା ସୁରକ୍ଷା ବଳ) ଅଧୀନରେ ରହିବ ବୋଲି ସେ ସ୍ପଷ୍ଟ କରିଛନ୍ତି।

୮୭୪ (ଆଠ ଶହ ଚୁହାତ୍ତର) କିଲୋମିଟର ଦୀର୍ଘ ସୀମାନ୍ତରେ ଏପର୍ଯ୍ୟନ୍ତ ତାରବାଡ଼ ହୋଇପାରି ନଥିଲା। ପୂର୍ବତନ ମୁଖ୍ୟମନ୍ତ୍ରୀ ମମତା ବାନାର୍ଜୀ ଜମି ଦେବାରେ ଅନାଗ୍ରହ ଦେଖାଉଥିବାରୁ ତାରବାଡ଼ ହୋଇପାରୁନଥିଲା ବୋଲି ଶୁଭେନ୍ଦୁ ଅଧିକାରୀ ଅଭିଯୋଗ କରିଛନ୍ତି।

ବଙ୍ଗଳା ସରକାର ଆୟୁଷ୍ମାନ ଭାରତ ଯୋଜନାରେ ସାମିଲ ହେବେ। ଏହାସହ ରାଜ୍ୟରେ ପ୍ରଧାନମନ୍ତ୍ରୀ ଜନ ଆରୋଗ୍ୟ ଯୋଜନା, ପ୍ରଧାନମନ୍ତ୍ରୀ କିଷାନ ବୀମା, ପ୍ରଧାନମନ୍ତ୍ରୀ ବିଶ୍ୱକର୍ମା, ବେଟି ବଚାଓ ବେଟି ପଢ଼ାଓ, ଏବଂ ଉଜ୍ଜ୍ୱଳା ସମେତ ସମସ୍ତ କେନ୍ଦ୍ରୀୟ ଯୋଜନାରେ ସକ୍ରିୟ ଭାବରେ ସାମିଲ ହେବ ବୋଲି ଘୋଷଣା କରାଯାଇଛି।

ଆଇଏଏସ୍ ଅଧିକାରୀମାନଙ୍କୁ କେନ୍ଦ୍ରୀୟ ତାଲିମ ସହିତ ସଂଯୋଜିତ କରାଯିବ। ରାଜ୍ୟ ଭାରତୀୟ ନ୍ୟାୟ ସଂହିତା (BNS) ସହିତ ସମ୍ପୂର୍ଣ୍ଣ ଭାବରେ ଅନୁକୂଳ ହେବ।

ସରକାରୀ ଚାକିରି ପାଇଁ ସର୍ବାଧିକ ବୟସ ସୀମା ୫ (ପାଞ୍ଚ) ବର୍ଷ ବୃଦ୍ଧି କରାଯାଇଛି। ଏହାବ୍ୟତୀତ, ଗୃହ ମନ୍ତ୍ରଣାଳୟର ୧୬ (ଷୋଳ) ଜୁନ୍ ୨୦୨୫ (ଦୁଇ ହଜାର ପଚିଶ) ତାରିଖର ଜନଗଣନା ନିର୍ଦ୍ଦେଶକୁ, ଯାହାକୁ ପୂର୍ବ ସରକାର ସ୍ଥଗିତ ରଖିଥିଲେ, ତୁରନ୍ତ କାର୍ଯ୍ୟକାରୀ କରାଯାଇଛି।