ତାମିଲନାଡୁର ନୂଆ ମୁଖ୍ୟମନ୍ତ୍ରୀଙ୍କ ପ୍ରଥମ କ୍ୟାବିନେଟ୍ ବୈଠକ: ୪୩୬ଟି ନୂଆ ପ୍ରକଳ୍ପ ଘୋଷଣା

ଚେନ୍ନାଇ (ସଂକେତ ଟିଭି):ତାମିଲନାଡୁର ନୂତନ ମୁଖ୍ୟମନ୍ତ୍ରୀ ସି. ଜୋସେଫ୍ ବିଜୟଙ୍କ ନେତୃତ୍ୱରେ ଶାସକ ଦଳ ତାମିଲାଗା ଭେଟ୍ରି କାଜାଗମ୍ (TVK)ର ପ୍ରଥମ କ୍ୟାବିନେଟ୍ ବୈଠକ ସଚିବାଳୟଠାରେ ଅନୁଷ୍ଠିତ ହୋଇଯାଇଛି। ଏକ ଘଣ୍ଟାରୁ ଅଧିକ ସମୟ ଧରି ଚାଲିଥିବା ଏହି ବୈଠକରେ ବିଭିନ୍ନ ବିଭାଗରେ ଅନେକ ନୂଆ ପ୍ରକଳ୍ପ ଆରମ୍ଭ କରିବା ଏବଂ ଏହାର ସଫଳ ରୂପାୟନ ନେଇ ବିସ୍ତୃତ ଆଲୋଚନା କରାଯାଇଛି।

ଶକ୍ତି ଏବଂ ଆଇନ ମନ୍ତ୍ରୀ ସି.ଟି.ଆର୍ ନିର୍ମଳ କୁମାର ଗଣମାଧ୍ୟମକୁ ସୂଚନା ଦେଇ କହିଛନ୍ତି ଯେ, ଏହି ପ୍ରଥମ ବୈଠକରେ ମୁଖ୍ୟମନ୍ତ୍ରୀ ବିଜୟ ସମସ୍ତ ବିଭାଗକୁ ମିଶାଇ ମୋଟ ୪୩୬ଟି ନୂଆ ପ୍ରକଳ୍ପ ଘୋଷଣା କରିଛନ୍ତି। ପ୍ରତ୍ୟେକ ବିଭାଗ ପାଇଁ ସ୍ୱତନ୍ତ୍ର ଲକ୍ଷ୍ୟ ଧାର୍ଯ୍ୟ କରାଯାଇଛି। ଯୁବ ସଶକ୍ତୀକରଣ, ମହିଳା କଲ୍ୟାଣ, ମତ୍ସ୍ୟଜୀବୀ ସମ୍ପ୍ରଦାୟର ବିକାଶ ଏବଂ ତାମିଲନାଡୁକୁ ସମ୍ପୂର୍ଣ୍ଣ ‘ନିଶାମୁକ୍ତ’ (Drug-free) କରିବା ଉପରେ ସରକାର ସର୍ବାଧିକ ଗୁରୁତ୍ୱାରୋପ କରିଛନ୍ତି।

ବିଭାଗୀୟ ମନ୍ତ୍ରୀମାନେ ଏବେ ନିଜ ନିଜ ଅଧିକାରୀଙ୍କ ସହ ଆଲୋଚନା କରି ଏହି ପ୍ରକଳ୍ପଗୁଡ଼ିକର ଏକ ବିସ୍ତୃତ ‘ଆକ୍ସନ୍ ପ୍ଲାନ୍’ ବା ବ୍ଲୁ-ପ୍ରିଣ୍ଟ ପ୍ରସ୍ତୁତ କରିବେ। ଏହି ଯୋଜନା ପ୍ରସ୍ତୁତ ହେବା ପରେ ପ୍ରକଳ୍ପଗୁଡ଼ିକୁ କିପରି ତୁରନ୍ତ ତୃଣମୂଳ ସ୍ତରରେ କାର୍ଯ୍ୟକାରୀ କରାଯିବ ସେନେଇ ପଦକ୍ଷେପ ନିଆଯିବ।

ନିଶା ନିବାରଣ ଉପରେ ପ୍ରଶ୍ନର ଉତ୍ତର ଦେଇ ମନ୍ତ୍ରୀ କହିଛନ୍ତି ଯେ, ରାଜ୍ୟରେ ଇତିମଧ୍ୟରେ ୭୧୭ଟି ସରକାରୀ ମଦ ଦୋକାନକୁ ବନ୍ଦ କରିଦିଆଯାଇଛି। ବିଗତ ୫ ବର୍ଷ ଧରି ରାଜ୍ୟରେ ଗଞ୍ଜେଇଠାରୁ ଆରମ୍ଭ କରି ମେଥାମ୍ଫେଟାମାଇନ୍ (methamphetamine) ଭଳି ମାରାତ୍ମକ ଡ୍ରଗ୍ସର ବେଆଇନ କାରବାର ବୃଦ୍ଧି ପାଇଛି। ଏହାକୁ ସମ୍ପୂର୍ଣ୍ଣ ମୂଳୋତ୍ପାଟନ କରିବା ପାଇଁ ମୁଖ୍ୟମନ୍ତ୍ରୀ ପୋଲିସ ବିଭାଗକୁ କଡ଼ା ନିର୍ଦ୍ଦେଶ ଦେଇଛନ୍ତି।

ରାଜ୍ୟରେ ନିଷିଦ୍ଧ ଗୁଟଖା ବିକ୍ରି କରୁଥିବା ଦୋକାନଗୁଡ଼ିକୁ ସିଲ୍ କରାଯାଉଛି। ଉଦାହରଣ ସ୍ୱରୂପ, କେବଳ ମଦୁରାଇରେ ମାତ୍ର ଗୋଟିଏ ସପ୍ତାହ ମଧ୍ୟରେ ୨୪ରୁ ଅଧିକ ଏପରି ଦୋକାନ ସିଲ୍ କରାଯାଇଛି। ଏହାବ୍ୟତୀତ ସିନ୍ଥେଟିକ୍ ନିଶାଦ୍ରବ୍ୟ ବିକ୍ରି କରୁଥିବା ଅପରାଧୀଙ୍କ ବିରୋଧରେ କଠୋର ‘ଗୁଣ୍ଡା ଆକ୍ଟ’ ଲଗାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି।