ନିର୍ଦ୍ଵନ୍ଦ୍ଵରେ ରାଜ୍ୟସଭାକୁ ନିର୍ବାଚିତ ହେଲେ ଦେବାଶିଷ ସାମନ୍ତରାୟ

ଭୁବନେଶ୍ୱର (ସଂକେତ ଟିଭି): ନିକଟରେ ବିଜେଡି ଛାଡ଼ି ବିଜେପିରେ ମିଶିଥିବା ବରିଷ୍ଠ ନେତା ଦେବାଶିଷ ସାମନ୍ତରାୟ ନିର୍ଦ୍ଵନ୍ଦ୍ଵରେ ରାଜ୍ୟସଭାକୁ ନିର୍ବାଚିତ ହୋଇଛନ୍ତି। ବିଜେପି ପ୍ରାର୍ଥୀ ଭାବେ ସେ ନିର୍ଦ୍ଵନ୍ଦ୍ଵରେ ନିର୍ବାଚିତ ହୋଇଛନ୍ତି। ଜୁନ ୫ରେ ବିଜେପିର ପ୍ରାର୍ଥୀ ଭାବେ ଦେବାଶିଷ ନାମାଙ୍କନ ପତ୍ର ଦାଖଲ କରିଥିଲେ। ଅନ୍ୟ କୌଣସି ଦଳ ପ୍ରାର୍ଥୀ ନ ଦେବାରୁ ସେ ନିର୍ଦ୍ଵନ୍ଦ୍ଵରେ ସଂସଦର ଉଚ୍ଚସଦନକୁ ନିର୍ବାଚିତ ହୋଇଛନ୍ତି।

ନିର୍ବାଚିତ ହେବା ପରେ ଦେବାଶିଷ ଗଣମାଧ୍ୟମ ପ୍ରତିନିଧିଙ୍କୁ ପ୍ରତିକ୍ରିୟା ଦେଇ କହିଛନ୍ତି ଯେ, “ଆଜି ସାର୍ଟିଫିକେଟ ପାଇଲି, ପୁନଃବାର ନିର୍ବାଚିତ ହେଲି। ବିଜେପିରେ ନିଷ୍ଠାର ସହ କାମ କରିବି। ଦଳ ନିର୍ଦ୍ଦେଶରେ ଯେଉଁଠି ସୁଯୋଗ ଦେବ, କାମ କରିବି। ଆଗରୁ ଯେଉଁ ଅଞ୍ଚଳରେ ନେତା ରହିଛି, ସେହି ଅଞ୍ଚଳ ପାଇଁ କାମ କରିବି।”

“କଟକରେ ମୋର ସଂଗଠନ ଅଛି। ଗତ ନିର୍ବାଚନରେ ବିଜେପି ଦ୍ଵିତୀୟ ସ୍ଥାନରେ ଥିଲା, ସଂଗଠନ ନିଶ୍ଚିତ ରୂପରେ ଅଛି। ମୁଁ ସେହି ସଂଗଠନରେ ଯୋଗଦେଇ ଆଗାମୀ ଦିନରେ ଯେଉଁ ପୌର ନିର୍ବାଚନ ହେବ, ତାହାରେ କଟକକୁ ବିଜେପିର ଦୁର୍ଗ କରିବି।” ସେ ଆହୁରି ମଧ୍ୟ କହିଛନ୍ତି।

ବିଜେଡିକୁ ସୁଜାତା ଆସିବେ ବୋଲି ହେଉଥିବା ଆକଳନ ପ୍ରସଙ୍ଗରେ ସେ କହିଛନ୍ତି, “ଏହା ଦୀର୍ଘ ଦିନ ଧରି ସୋସିଆଲ ମିଡିଆରେ ପ୍ରଚାର ହେଉଛି। ବାସ୍ତବିକ ଏହି ନିଷ୍ପତ୍ତି ନେବେ ବିଜେଡିର ନେତାମାନେ।”

ଫାଇଲ ଚୋରି ପ୍ରସଙ୍ଗରେ ସେ କହିଛନ୍ତି, “ଯଦି ଚୋରି ହୋଇଥାଏ, ତେବେ ମୋହନ ମାଝୀ ସରକାର ଆକ୍ସନ ନିଅନ୍ତୁ। ଯିଏ ଫାଇଲ ଗାୟବ କରିଛି, ତା ବିରୁଦ୍ଧରେ କାର୍ଯ୍ୟାନୁଷ୍ଠାନ ହେଉ। ଏଭଳି ଫାଇଲ ଗାୟବ ହେବା ବେନିୟମ।”

ଉଲ୍ଲେଖନୀୟ, ଦେବାଶିଷ ସାମନ୍ତରାୟ ବିଜେଡି ଛାଡ଼ିବା ସହ ରାଜ୍ୟସଭା ପଦରୁ ଇସ୍ତଫା ଦେଇଥିଲେ। ଏହା ପରେ ଭାଜପା ତାର ପୁରୁଣା ଫର୍ମୁଲା ଅନୁସାରେ ତାଙ୍କୁ ଉଚ୍ଚସଦନ ପାଇଁ ପ୍ରାର୍ଥୀ କରିଥିଲା। ଏହା ପୂର୍ବରୁ ଦେବାଶିଷଙ୍କ ପରି ବିଜେଡି ଛାଡ଼ି ବିଜେପିରେ ସାମିଲ ହୋଇ ରାଜ୍ୟସଭା ଯାଇଥିଲେ ମମତା ମହାନ୍ତ। ନିକଟରେ ସୁଜିତ କୁମାର ପୁନର୍ବାର ରାଜ୍ୟସଭାକୁ ନିର୍ବାଚିତ ହୋଇଛନ୍ତି, ସେ ମଧ୍ୟ ବିଜେଡି ଛାଡ଼ି ବିଜେପିରେ ମିଶିଥିଲେ।