ବ୍ରିଟିଶ ପ୍ରଧାନମନ୍ତ୍ରୀ କୀର ଷ୍ଟାର୍ମରଙ୍କ ଇସ୍ତଫା, ଆଣ୍ଡି ବର୍ନହାମ ହେବେ ନୂଆ ପ୍ରଧାନମନ୍ତ୍ରୀ

ଲଣ୍ଡନ(ସଂକେତ ଟିଭି): ବ୍ରିଟେନର ରାଜନୀତିରେ ଏକ ବଡ଼ ପରିବର୍ତ୍ତନ ଘଟିଛି। ପ୍ରଧାନମନ୍ତ୍ରୀ କୀର ଷ୍ଟାର୍ମର ତାଙ୍କ ପଦରୁ ଇସ୍ତଫା ଦେବାକୁ ଘୋଷଣା କରିଛନ୍ତି। ତାଙ୍କ ଏହି ନିଷ୍ପତ୍ତି ପରେ ବ୍ରିଟେନରେ ରାଜନୈତିକ ଅସ୍ଥିରତା ଆହୁରି ବୃଦ୍ଧି ପାଇଛି। ପରବର୍ତ୍ତୀ ପ୍ରଧାନମନ୍ତ୍ରୀ ନିର୍ବାଚିତ ନହେବା ପର୍ଯ୍ୟନ୍ତ ଶ୍ରୀ ଷ୍ଟାର୍ମର କାର୍ଯକାଳୀନ ଭାବରେ ଏହି ପଦବୀରେ ରହିବେ ବୋଲି ସେ ସ୍ପଷ୍ଟ କରିଛନ୍ତି।

ଜାତି ଉଦ୍ଦେଶ୍ୟରେ ଦେଇଥିବା ଏକ ଅଭିଭାଷଣରେ ଶ୍ରୀ ଷ୍ଟାର୍ମର କହିଛନ୍ତି ଯେ, ସେ ଏହି ଇସ୍ତଫା ବିଷୟରେ ରାଜା ଚାର୍ଲ୍ସ ତୃତୀୟଙ୍କୁ ଅବଗତ କରାଇସାରିଛନ୍ତି। ସେ ନିଜ କାର୍ଯ୍ୟକାଳ ମଧ୍ୟରେ ଘଟିଥିବା ବିଭିନ୍ନ ଘଟଣା ଓ ବିବାଦ ପାଇଁ ଦାୟୀତ୍ୱ ସ୍ୱୀକାର କରି କହିଛନ୍ତି, “ପରିସ୍ଥିତି ପାଇଁ ମୁଁ ଦାୟୀ।” ଗତ ୧୦ ବର୍ଷ ମଧ୍ୟରେ ପଦ ଛାଡ଼ିବାରେ ଶ୍ରୀ ଷ୍ଟାର୍ମର ଷଷ୍ଠ ବ୍ରିଟିଶ ପ୍ରଧାନମନ୍ତ୍ରୀ ହୋଇଛନ୍ତି, ଯାହା ବ୍ରିଟିଶ ରାଜନୀତିର ଅସ୍ଥିରତାକୁ ଉଜାଗର କରୁଛି।

ଶ୍ରୀ ଷ୍ଟାର୍ମରଙ୍କ ଉପରେ ଗତ କିଛି ଦିନ ଧରି ଲେବର ପାର୍ଟି ନେତା ପଦରୁ ଇସ୍ତଫା ଦେବା ପାଇଁ ପ୍ରବଳ ଚାପ ବଢ଼ିବାରେ ଲାଗିଥିଲା। ଏହି ଚାପ ମଧ୍ୟରେ ଆଣ୍ଡି ବର୍ନହାମ ନୂତନ ପ୍ରଧାନମନ୍ତ୍ରୀ ହେବାକୁ ନେଇ ଏକ ଶକ୍ତ ଦାବି ଉଭା ହୋଇଥିଲା। ଗତ ସପ୍ତାହରେ ଉତ୍ତର ଇଂଲଣ୍ଡର ମେକରଫିଲ୍ଡ ଉପନିର୍ବାଚନରେ ଜଣେ ଦକ୍ଷିଣପନ୍ଥୀ ପ୍ରତିଦ୍ୱନ୍ଦ୍ୱୀଙ୍କୁ ପରାସ୍ତ କରି ଶ୍ରୀ ବର୍ନହାମ ଏକ ଐତିହାସିକ ବିଜୟ ହାସଲ କରିଥିଲେ। ଏହି ବିଜୟ ତାଙ୍କୁ ପ୍ରଧାନମନ୍ତ୍ରୀ ପଦ ପାଇଁ ଆହୁରି ମଜବୁତ କରିଛି।

ବର୍ତ୍ତମାନ ଶ୍ରୀ ବର୍ନହାମଙ୍କୁ ଶାସକ ଲେବର ପାର୍ଟିର ପରବର୍ତ୍ତୀ ନେତା ଏବଂ ବ୍ରିଟେନର ନୂତନ ପ୍ରଧାନମନ୍ତ୍ରୀ ଭାବରେ ବିବେଚନା କରାଯାଉଛି। ଶ୍ରୀ ଷ୍ଟାର୍ମର ଗତ ଜୁଲାଇ ୨୦୨୪ ସାଧାରଣ ନିର୍ବାଚନରେ ୧୭୪ ଆସନ ସହିତ ଏକ ବିଶାଳ ବିଜୟ ହାସଲ କରିଥିଲେ। କିନ୍ତୁ, ତାଙ୍କ କାର୍ଯ୍ୟକାଳ ଅନେକ ବିବାଦରେ ଘେରି ରହିଥିଲା।

ଶ୍ରୀ ଷ୍ଟାର୍ମରଙ୍କ ବିରୋଧରେ ଥିବା ପ୍ରମୁଖ ଅଭିଯୋଗ ହେଉଛି, ଦୋଷୀ ସାବ୍ୟସ୍ତ ଯୌନ ଅପରାଧୀ ଜେଫ୍ରି ଏପଷ୍ଟାଇନଙ୍କ ସହ ଏକ ବରିଷ୍ଠ ଲେବର ନେତାଙ୍କ ସମ୍ପର୍କ ବିଷୟରେ ପୂର୍ବରୁ ଜାଣିବା ସତ୍ତ୍ୱେ, ସେହି ନେତା ପିଟର ମାଣ୍ଡେଲସନଙ୍କୁ ଆମେରିକାରେ ବ୍ରିଟିଶ ରାଷ୍ଟ୍ରଦୂତ ଭାବରେ ନିଯୁକ୍ତି ଦିଆଯାଇଥିଲା। ଏହା ବ୍ୟତୀତ, ଟିକସ ଏବଂ ସାମାଜିକ ସୁବିଧା ସମ୍ପର୍କରେ ସରକାରଙ୍କ କିଛି ନିଷ୍ପତ୍ତି ଏବଂ ପରବର୍ତ୍ତୀ ସମୟରେ ୟୁ-ଟର୍ଣ୍ଣ (ନିଷ୍ପତ୍ତି ପରିବର୍ତ୍ତନ) ମଧ୍ୟ ସରକାରଙ୍କ ପ୍ରତିଛବିକୁ କ୍ଷତି ପହଞ୍ଚାଇଥିଲା।

ଏହି ଅସ୍ଥିରତା ମଧ୍ୟରେ ଆଣ୍ଡି ବର୍ନହାମ ତାଙ୍କ ବିଜୟ ପରେ ଏହାକୁ ଲେବର ପାର୍ଟିର ପରିବର୍ତ୍ତନ ପାଇଁ ଶେଷ ସୁଯୋଗ ବୋଲି ଘୋଷଣା କରିଛନ୍ତି। ସେ ବ୍ରିଟେନ ପାଇଁ ଏକ ନୂତନ ପଥ ଆପଣାଇବାକୁ ପ୍ରତିଶ୍ରୁତି ଦେଇଛନ୍ତି ଏବଂ ‘ଟ୍ରିକଲ୍-ଡାଉନ୍ ଅର୍ଥନୀତି’ର ଅନ୍ତ ପାଇଁ ଆହ୍ୱାନ ଦେଇଛନ୍ତି। ସେ ଯୁକ୍ତି ଦେଇଛନ୍ତି ଯେ, ଏହି ଅର୍ଥନୈତିକ ନୀତିର ଲାଭ ସାଧାରଣ ଲୋକଙ୍କ ପାଖରେ ପହଞ୍ଚିପାରିନାହିଁ, ଏବଂ ଏବେ ଏକ ନ୍ୟାୟସଙ୍ଗତ ଓ ସନ୍ତୁଳିତ ନୀତିର ଆବଶ୍ୟକତା ରହିଛି।