୨୦ ତୃଣମୂଳ ସାଂସଦଙ୍କ ଏନଡିଏକୁ ସମର୍ଥନ, ଆଭ୍ୟନ୍ତରୀଣ ସଙ୍କଟ ଘନୀଭୂତ

ନୂଆଦିଲ୍ଲୀ(ସଂକେତ ଟିଭି): ତୃଣମୂଳ କଂଗ୍ରେସର ଆଭ୍ୟନ୍ତରୀଣ ସଙ୍କଟ ଆହୁରି ଘନୀଭୂତ ହୋଇଛି। ଦଳର ବରିଷ୍ଠ ସାଂସଦ କାକୋଲି ଘୋଷ ଦସ୍ତିଦାର ଦାବି କରିଛନ୍ତି ଯେ, ପ୍ରାୟ ୨୦ ଜଣ ସାଂସଦ କେନ୍ଦ୍ରରେ କ୍ଷମତାସୀନ ଜାତୀୟ ଗଣତାନ୍ତ୍ରିକ ମେଣ୍ଟ (NDA)କୁ ସମର୍ଥନ କରିବାକୁ ନିଷ୍ପତ୍ତି ନେଇଛନ୍ତି। ଲୋକସଭା ବାଚସ୍ପତି ଓମ୍ ବିର୍ଲାଙ୍କୁ ଏହି ନିଷ୍ପତ୍ତି ବିଷୟରେ ଅବଗତ କରାଯାଇଛି।

ଲୋକସଭାରେ ତୃଣମୂଳର ୨୮ ଜଣ ଏବଂ ରାଜ୍ୟସଭାରେ ୧୨ ଜଣ ସଦସ୍ୟ ଅଛନ୍ତି। କାକୋଲି ଘୋଷ ଦସ୍ତିଦାର PTI ସହ କଥାବାର୍ତ୍ତା କରି କହିଛନ୍ତି ଯେ, “ମୋ ସମେତ ପ୍ରାୟ ୨୦ ଜଣ ତୃଣମୂଳ ସାଂସଦ NDAକୁ ସମର୍ଥନ କରିବା ନିଷ୍ପତ୍ତି ବିଷୟରେ ଲୋକସଭା ବାଚସ୍ପତି ଓମ୍ ବିର୍ଲାଙ୍କୁ ଏକ ଚିଠି ଲେଖିଛନ୍ତି।” ସେ ନିଜକୁ ଲୋକସଭାରେ ଦଳର ମୁଖ୍ୟ ସଚେତକ ଦାବି କରି କହିଛନ୍ତି ଯେ ସାଥୀ ସାଂସଦମାନଙ୍କ ସହ ପରାମର୍ଶ ପରେ ଏହି ନିଷ୍ପତ୍ତି ନିଆଯାଇଛି।

ଅନ୍ୟପଟେ, ଦିଲ୍ଲୀରେ କେନ୍ଦ୍ରମନ୍ତ୍ରୀ ଭୂପେନ୍ଦ୍ର ଯାଦବଙ୍କ ବାସଭବନରେ ଅନେକ ତୃଣମୂଳ ନେତାଙ୍କୁ ଦେଖିବାକୁ ମିଳିଛି। ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀ ମଧ୍ୟ ସେଠାରେ ଉପସ୍ଥିତ ଥିଲେ। ଏହି ବୈଠକରେ ପ୍ରସନ୍ନ ବାନାର୍ଜୀ, ଜଗଦୀଶ ବାସୁନିୟା, କାଲିପଦ ସୋରେନ୍, ଅରୁପ ଚକ୍ରବର୍ତ୍ତୀ, ଆବୁ ତାହର, ଅସିତ ମଲ, ଡକ୍ଟର ଶର୍ମିଲା ସାର୍କ ଏବଂ ଖଲିଲୁର ରହମାନ ଉପସ୍ଥିତ ଥିଲେ।

ଏହାରି ମଧ୍ୟରେ ରାଜ୍ୟସଭା ଅଧ୍ୟକ୍ଷ ସିପି ରାଧାକୃଷ୍ଣନ ବରିଷ୍ଠ ତୃଣମୂଳ ନେତା ସୁଖେନ୍ଦୁ ଶେଖର ରାୟଙ୍କ ଇସ୍ତଫା ଗ୍ରହଣ କରିଛନ୍ତି। ୨୦୨୯ ପର୍ଯ୍ୟନ୍ତ ତାଙ୍କର କାର୍ଯ୍ୟକାଳ ଥିଲା, କିନ୍ତୁ ସେ ନୀତିଗତ କାରଣରୁ ଇସ୍ତଫା ଦେଇଛନ୍ତି। ଦଳରେ ଦୁର୍ନୀତି ଏବଂ ଜନକ୍ରୋଧକୁ ଉଦାହରଣ ଦେଇ ସେ ତାଙ୍କ ନିଷ୍ପତ୍ତି ଘୋଷଣା କରିଥିଲେ।